Hnguh mat thei cuh im ung ka noh leng ci

Hnguh mat nak cuh im ung ka noh leng ci ci cuh cang ca kya ci. Nu Pa ung ka noh leng ci. Mi hmo hta yah ung Nu Pa noh a kya a i phih pyein ci cineh mi ng’ngai man ci. Cun gui cuh ng’vai lo kon a vah mi hmat lo ci. K’hmo hta yah ung kä hmat man te a kya ci. K’chang cuh a ng’vai lo hmat lo pi ca kä kya ci. Im ung ka noh m’thei m’cäi cun vah a ghün nak ung hmat lo ca kya ci. Hnguh hmat thei ca k’chang tumat a kya vai cuh im ung ka noh leng ci ci cuh mi hmat ci. Mi on ih nak ung mät kavai kä kya ci ci cuh avan noh mi ng’ngai ci. Cun tu pang a phih hmat thei cuh avan noh yum m’nai ci. K’chü ng’tha thei vai cun phih Nu Pa noh vah a k’da pi m’thei ca kya ci. K’chang gui ah hngu ah a i ah ng’tha ko vai ci cuh im ung ka noh mi ng’thei ca kya ci. Pyein khin ang kä pyein khin ang? cuh mi hmat vai khin ci. Kä pyein vai hlü mi pyein lo ung k’chang gui noh kä na yum m’nai lo ba ci gui. Mät ka kä kya ci cuh kä bi vai ciah na m’cäi ci gui. A cun gui cuh mi hmat thei vai khin ci. A ng’vai on ng’thu ng’tha lo ung hngip nep khai a i ah ng’tha vai cuh mi ng’ngaih nak vai khin ci. Cun a kya hleih a cun gui avan cuh im ung ka noh mi ng’thei ci. A nu pa kä om ci gui cuh m’thei m’cäi khai kä om ci ah kya ci. Cun a kya hleih im ung om yah ung Nu Pa ah beit m’cäi ng’ngaih vai cuh hlü ci. Nu noh a cun lang lang pyein ci. Pa noh a cun lang lang pyein ci cineh mi ng’ngai ho khai hlü te vah mi ng’vai lo ung cun gui cuh mi shüm ba khai ah kya ci. K’chang tumat teng neh a i kyaong khui ung ka noh lo ci ci neh mi hmat hnging ci. Cun a kya hleih im ung ka noh mi ng’thei lo tu vai a kya khin ci nei.