Kchò gui ah hlùmmlèi om ih mòòng

Htum Kchò Khó ung mdek kkâ khoh-tang a u noh phih kä hmat kä pyéin pha màn ci.A cun ah hlô ah bung hngú shing ghìng gui cun phih akní ah u no kä shùilèi pha ci.Kchò Kchàng gui cuh aktúng pí ah mhtûng kpèm gui ung ami géit ah aktheih tak gui,kkhìhlá gotnak,ngá phânak,shúntah gui(cíngcì khoh pyân vai u no a mshümnak kä om màn ci).Tumat lah tumat khoh-tang ngthong ci gui.Uyin bi ci akya ah kèn neh khò vók,khò mkhih,géitkò nì lam gui mang ci gui.Ghü neh ami vòk ah mdek gui cuh aktúng pí ah ngplôn ghüî ghüî neh bi ci gui.Hlik yah ung khò vok ci gui.Chà yah ung mkhih u neh khò k’â khtük ung htàng mguh,htàng khlèn,htàng lah ahêi mshímcàng gui géitkò ci gui.Khngüp yah ung ngghüh neh géitkò u neh cun cuh ami yoih-tuk vai ah kä kya neh kkyòngkhùi ung ami êi ók vai bäng ah kya ci.Nglôn neh bi bi ci gui.Ktàigü gui,pìgò ngvái gui lah ghí pá gui ka vai phih bi pe ci gui.Géit läí cuh khäm phäh phäh ci gui.Htàng mguh lah ahêi akdá ami géit gui cuh mhtûng akhlüng meter 1600 ah chüt om shàn ci.Htum Kchò ung dò ung géit ah htàngmguh kä dá ci.Htàng khlèn,htàng läí cuh avan ung géit ci gui.Mkhak kkhá,púmhtá phih géit ci gui.Kchò gui cuh panshì,htìnpò,mhtúbèi,metmàn,coofee gui apí htî ah géit ci gui.A ktheih gui ung kah a i gui nghù ci gui phih hmat ci gui.Aktheih gui,apâi gui,èi neh gah ah akya ah ni ca kpâ gui phih dá ci.Cung phih kchò kchàng gui cuh meh antûi mhngî pí ci gui.Khngüp ät ung meh khmà vei hngô eì ci gui.Dú ci gui ah kya netah a i phih kä ploh-htah ci gui.Meh kchìng a khlàt,meh ng’ùi,meh kket lah meh mkyüt lo ci phih èi ci gui.A im päng ung ami ami ngnäh ah vuh mhtah ci gui.Vok meh,mê meh ài meh èi ci gui.Ûi meh kä èi màn tê ci gui tuhchü èi lo ci gui.Hlèipat,mná gui Mvá ah kah khleih ci gui.A khngät pah neh hlô lo düt ci gui.Mná meh cuh hlìm ci.Cung phih khngüp kdäm gui ung ami bü cèng ami gah vai pòi bi na ci gui.Ami ngshông yah ung hlá ngkhài ci gui.Kchò kchàng gui cuh akní ah lí káp thêi ci gui.Cûn khih nak ung u noh kä kphâ gui khai. Cung phih kchò kchàng akdá pí cuh pôngmuk,capyit,htàkyà,thòpat gui kä èi thêi ci gui.Mshî hngô a khngät bäng shùi ci gui.Tûi khmòi gui akya ah dá ci.Kcó on shôn ah htàng khlèn yù cuh a ngmìng tháng ci.Cun te kchò gui cuh a i kchü phih o laih laih düt ci gui.Myanmar laphet tui,Mvá htang lah shôn ah a gàk gui phih yat lo ci. Khngûmí gui cuh khmûi kphyùi ci gui.Ménè on shòng neh tah tah ci gui.Nghlò ni,mkùm ni phih khlòk neh bi ci gui.Cun gui on tah gui cuh kä oh peh ci.Mvákhò ah kah khtù k’oh yih k’oh gui lo püî ci gui.Cung phih kpámí gui cuh ami kkhúi ami shùng vai düt ah kchí kpòm hla ci gui.Khngûmi gui phih khtù kä ngthuh ci gui.Ami mdáng hlü ah kä kya neh ami ngthuh vai kä om ah phäh ah kya ci.Hmàtthà vai läí cuh kûlî no khtù kä hlùi neh phih a lù pìn ci.Ghùi om ca khngái na ci phih om ci.Khngúmí gui cuh ghùi òi neh khngà théng lah kthè na ci gui.Kpámí gui cuh lì,mlá a khngät khtêi shäm ci gui. Kchò gui cuh akgàt ah om hnging ci gui.Khngìkyak k’om(ဥရောပတိုက်သား) gui ah tah ami mät äp neh ghìng om hnging ci gui.Akkhîng angling,cóighânak,yáicânak gui mchüt hnging ci gui.Kilogram 80 phùi kkot u neh ami gok nak ah pôlúm nglah ci gui.Khngüp ät ung khngih vêi èi u neh shei o shàn ci gui.Gáigong mòòng kä hmat ci gui.Amshah tûi ngshî shán ci.Amshah cuh tûi kä ngshî ah kchâ akkhak ung om ci gui.Khò a ngling lo hleih gôigê nak a om lo ung khò ngyó no a gheih ah ngngài ci gui.Sèitûi,sèilúng kä om ci.Shik ci lah htá ci tängtäng ci.Ék gâi,pôi chòn,mkhuh khmat no pìgò hngô khmaih ci.Kchò gui cuh ngtu shàn ci gui.Kchàng phù shûi om laih laih ci.Kchàng phih pha ci gui.Kchàng a shih ung mêi on mcìn cuh thùng na ci gui.Shì ca a mshin kheh netah phùi ami shûi vai teng ci gui.Ami mcìn ung kpoih ca guh khlüng ung thà ci gui.Pìgò kpùng mhtûng gui ung lung mshôn ah kkâ ah thà ci gui.