I kia hleih shih pi ca k’chang gui-ah ng’mü m’cha gui ka vai suh shan-ang?

Catholic yumtu ng’bum-ah m’thei m’cäi gui kä hmat tu ci gui noh sih pi ca k’chang gui-ah ng’mü m’cha ka vai suh shan cuh a kho lä dät ci neh Catholic yumtu ng’bum cuh pyein m’sheit ci gui.

Shih pi ca k’chang gui-ah ng’müm m’cha ka vai suh shan nak k’tai gü nak gui cuh i-ah-ung phih a kho lä kä kia khai. Suh shan nak-ah m’yung aa cuh Khanpughü-ung kah lo ca kia hleih Khanpughü-ah m’yung aa-ah kia ci. A m’shah k’chang gui lah k’tai gü boi gui noh suh shan nak-awn ng’mü m’cha k’se gui k’täm hnging ci gui kia ci. Suh shan nak lah ng’müm m’cha lam täng cuh ng’pak ci goi kia ci.

K’chang cuh pum kyü lah ng’mü m’cha ng’dawn neh ghüng ca mong cuh Khanpughü yum ci päng noh äi khai kia ci. Pum kyä a ghün vai ei mi ei-ah hlo-ah m’müm m’cha ka vai suh shan vai hlü ci. Suh shan nak-awn ng’müm m’cha cuh k’tha gui gah neh a cun-ah ng’müm m’cha k’tha gui noh pum kyä cuh gung tu hleih khanmopi hteh nak vai phäh ni bä ci gui bi nak-awn phih ng’mü m’cha ka vai ni ca kia ci.Suh leng leng neh shan vai mong cuh Boi Christu mät noh ” Shang vä nami gah khai, Shui vä nami hnguk khai , k’khäk vä ni k’hmon pe gui khai ” ci neh pyein ghüt ci. Caw kia hleih ng’mü m’cha gui ka vai suh shan nak gui lah a k’ni bi peit nak gui cuh a kho lä kä kia ci.

Ng’thu theing-awn ng’yung neh shi pi ca ng’müm m’cha gui ka vai suh shan nak cuh Khanpughü noh kä nong khai. Kat bi ca k’chang tumat-ah phäh-ah kat kä om ca chang tumat noh a ng’hui lo peit-ung m’gein peit thei-ah akia kung Khanpughü cuh m’hngi nak m’gein nak-awn bi ca kia neh mikmi-ah suh shan nak cuh kä ng’ngaih-ah kä om khai.

Catholic ci-ah k’ghü ng’lung cuh ng’müng van-awn ng’pak ci. A caw kia hleih Catholic yumtu ng’bum cuh hnguh hnging kä hnguh hnging a van-awn ng’pak ci. Catholic yumtu ng’bum-ah ak’hngu bü nak cuh khanmopi-ah kia neh Catholic yumtu k’chang gui-awn phih ang’pak-ah mong cuh ng’thu theing-ung ”Tumat noh a m’neh-ung a cun-awn a hei gui oh phih m’neh tu ci gui. Tumat noh m’tam a gah-ung a yei nak cuh ng’pai tu ci gui.”ci-ah om ci. Mikmi gui cuh Boi Christu-ah kyä ng’pai gui mi kia neh Boi Christu cuh lu k’kye-ah kia ci.

Shih nak noh mikmi-am pum kyä hlu-ah na ng’pai hlak gui ci. Cung phih ng’mü m’cha hlu-ah käng ng’pai ci. A k’shi gui ka vai shu mi shan lah a k’ni mi bi peit gui cuh Khanpughü-awn nga mia-ah ng’mü m’cha cuh mi ng’et peit hlak gui kia ci.

Catholic yumtu ng’bum cuh ng’bum k’thum-awn ng’düi ci.

(1) Lam hteit yah ca ng’bum

(2) Ng’loh ng’chang yah ca ng’bum

(3) Ng’bäng pi ca ng’bum ci-ah kia ci.

Lam hteit yah ca ng’bum cuh Khanpughü-ah ghun kho-ah gok tu hnging vai ng’pyang tham neh hngün tho bi lo ca k’chang gui-ah om nak kho m’dek-ah kia ci.

Ng’loh ng’chang yah ca ng’bum cuh Khanpughü-ah ghun kho-ah ami luh tu hnging vai ami kat nak gui-ah phäh ng’loh ng’chang yah ca ng’mü m’cha gui-ah om nak-ah m’htei kho k’yo lia ci.

Ng’päng pi ca ng’bum cuh Khanpughü-awn a täng-ah yei kyai nak-awn om tu pi ca hlu läk ng’shäng gui lah k’chang k’bä gui-ah om nak-ah Khanmopi-ah kia ci. Cun-ah ng’bum k’thum cuh tumat noh tumat a gung tu nak-awn a kong ät-ah om ci. A k’shi gui phäh suh shan nak cuh nga mi m’gein nak ami gah vai kia ci. Cun-ah suh shan nak gui noh m’htei kho k’yo om ca ng’mü m’cha gui-ah m’neh m’oh nak gui cuh ng’gheip hlak ci. Cun-ah ng’mü m’cha gui noh suh shan pe ca ng’mü m’cha gui cuh shüm ba ci gui.

Khanmopi-ah gok pi ca k’chnag k’bä gui noh mikmi-ah phäh-ah kä ng’düm-ah na ng’hui ng’pa tu pe gui ci-ah kia ci. Catholic yumtu ng’bum noh a k’shi gui ka vai suh shan nak peit gui cuh ng’thu k’theing ,hlu läk ng’shä gui-ah thung gui lah k’chang k’bä gui-ah a kong ät-ah ami om-ah mong-ung ka noh ng’yung neh a m’thei-ah kia ci.

Catholic yumtu ng’bum noh shi pi ca Catholic yumtu ng’bum k’chang gui bäng kä kia hleih suh shan peit vai hlü ca ng’mü m’cha gui avan ka vai ci neh November ahngih nak hngüp cuh a k’shi gui-ah poi hngüp ci-ah k’bäi neh m’cim hngün-ah hteit neh suh shan nak gui cuh kho m’dek pum-ung bi ca kia ci.

Shi pi ca k’chang gui-ah ng’mü m’cha gui cuh k’chü m’gein nak gah u neh a k’dim a k’kyäp-ah om u hlä.