Bä ciah Nobert ah ghinlu a mòng
Bä ciah Nobert cu Christu kum 1080 ung Germany ghunkhaw Cleves Mânggo ung ng’tüi ciah kya ci. A ni ah ghinlu malam gui cu kä ni ciah om k’ih gui awn m’dî k’hmaih ciah kya ci. A khokum 33 lo lo hleih a ten hta ah a ng’ploh ng’kheih nak awn a m’lung nga ng’thong hlat khai ah lam cu lo ciah kya ci. Kho k’khi goh ne ng’keng thek hleih a ni ah ng’hle cäicat lo ne ng’düi mit hleih Nobert cu ng’hle ah k’khan ah ka no ng’kyak ne shi chä ciah kya ci. Ta nayi hlok a sho lo kon ah a ni cu ng’shüm lo na ne nang Boi kei am a î ang na bi hlak hlü ci ne ng’shi ciah kya ci. A cun ung Boi no kä ni ci gui na bi nak ung ka no ng’hlat ba ne ni ci gui na bi ba vai, Dîmgei nak shùi ne a cun ah hngú ah na läk vai ci ne a pyéin cu a m’lùng k’kyòng ka no ng’yak ciah kya ci. A ni cu Xanten ah hteit ne a cun ung Taigü Boi ah a kya lo tu nak hnging vai ah k’taigü ne a mät no a mät phep ne a k’ni ah a m’lùng k’nga pyang tham ciah kya ci.
A ni ah bü cèng gui lang hta ne ni ci nei ci cu a m’dáng vai ah phäh ah a ni ah shümko khoh tang gui a vai yoi ne dûyai k’chàng gùi àm peit tak gùi ne Papa Shángpugháng Gelasius ah hteit ne khat nak phleh ciah kya ci. A cun ung ka no Papa Shángpugháng no a m’shan tub a cu Nobert a hteih nak hlü a hoi phih hteit ne Khánpùghi ah mòng lám gùi thählà m’thei m’thàng hnging ci ci ne pyéin ciah kya ci. Christu kum 1121 ung Nobert cu k’chàng gùi a khen nak ah Premontre m’htúng gùi ah ng’lak ah htéit ne a po teihpüi Boiphaya 13 awn a täng ah yum nak ng’bum tumat cu k’hmong ci gui ah kya ci. Christu kum 1125 ung Papa Shángpugháng a k’hngih nak Honorius Ⅱ no k’chàng a dâ no a hmat vai ah a k’dang ah a pyéin ah kya ci. A cun ung ka no khokum k’hma sho lo hleih Nobert cu Magdeburg ung Taigü Mâng ah a hmoh ah kya ci. A ni cu a cun ah mânggo k’kyòng ah a luh yah ung hlúi k’ni kä hlùi ne hteit hleih m’kot lo k’äih ci no kä luh hlak hleih k’chang tumat no a ni cu Taigü Mâng ne ci ne pyein ciah kya ci. A cun ng’yak ciah m’kot lo k’ngäng cu ng’â ne kya hleih Nobert no ka na aw nang cu Khei shin ung na tüi lo ci gui ah ta cang cu ba hleih na pukpit hnging ci ci ne pyéin ciah kya ci. A ni ah tavon a k’thai ung phih a ni cu Yahteih gui no htek khai ah a mi läk lam gui cu a ng’däih ah läk ciah kya ci. A ni cu kä ni ci gui hmaih khai ah yumtu ng’bum a ni ah a kya lo vai pyang tham ba khai ah a m’lung pukpit ciah kya ci. Christu kum 1134 ung Magdeburg ung shih ciah kya ci. A ni ah üm na ne shüm lä
