Htitheing ca Muh Khanpughi a kyum lo ah poi k’hngüp

Mikmi Chritian k’chang gui ah phäh ah Shing k’thum Khanpughi tumat mi yum ci ah kya ci. Pa khanpughi, Hta Khanpughi, Htitheing ca Muh Khanpughi ciah mi yum ci. Cun tu pang a phih, Htitheing ca Muh cuh mi k’hmih hti ciah kya ci. Mi bi lo gui avan ung Htitheing ca Muh ah ni bä nak on mi bi ca kya ci. Htitheing ca muh ah ni bä nak gui cuh, M’hngi nak, yeikyai nak, dimkyap nak, M’lung kä sheit nak, hngiphäi nak lah ni nak, khäng htek nak, hipnep nak lah mät no mät m’hting nak a kya ci.

M’hmi nak cuh a k’tung pi ah mi shäm vai lah mi om it nak ung mi läk vai ni pi ca kya ci. Khanpughi ah m’hngi nak cuh mi gah te ah hlo ah Khanpughi m’hmi nak lah teihpüi pok k’chang m’hmi nak ung hlü pi bäih ca kya ci. Khanpughi ah m’hmi nak cuh Good Samaritan ciah m’tung täng neh a m’cäi nak ung mi hmat hnging ci.

Yeikyai nak cuh mikmi ung a om vai hlü ci. Yeikyai nak cuh Khanpughi ung ka lo ca kya ci. M’lung a yei vai, bi loh nak ung yei vai cuh Htitheing ca Muh ca ni bä nak a kya ci. Mi yeikyai cuh a hei ung kä om ci. Mi m’lung kyawng ung vah om ci. A k’pung a ka kä kya ci. A k’kyawng ung om ci.

Dimkyäp nak cuh avan noh gah hlü ci. Cun tu pang a phih avan noh amät a m’lung on vah hlü ci. Dimkyäp nak Bawi noh na pe gui ci. A cang a mi gah tu ne ang? Mi ng’ä cäi gui avan a phäh mi m’lung kä dim gei ci. Muh Khanpughi noh dimgei nak na pe gui ci. Mi gah tu vai mi k’tha nak ko.