Na hta-hmo gui Khanpughi ami yum vai among lam gui

Na pa gui cuh htahmo gui ami m’thei vai hlü ci. A k’hmo a nu ah poi kyawng a om yah ge ung leng neh bi vai gui cuh ni m’thei tu gui vai kya khai.

Kyämah yah ge ung k’o lut lo khai k’taigü vai ah kya ci. Poi kyawng a om ca a k’hmo cuh mi ng’tha ng’yak neh mi piein gui hmat ci. A cun a kya hleih kyämah ki gui ah nu gui cuh ami k’taigü vai hlü ci. kho khngüp ät ung nayi ät vai k’taigü neh poi kyawng a ak’hmo a ng’yak vai hlü ci.
Na hta gui Missa gänap nak ung na chü tu gui vai hlü ci. A m’shah na pa gui noh a k’hmo gui cuh k’pamcai ci gui ci neh Missa gänap nak ung kä khah tu püi gui hlü ci. A mi lawk lak ung phih m’thei tu gui neh Missa a pyi ah chüt hleih ami om tu vai pyein gui vai. A khmo a kyah ung a k’pung a khah pui neh a büi lo ba ung Missa gänap nak ung khah lo ba pui gui vai hlü ci.
Hta k’hmo gui on a täng a k’taigü ät vai hlü ci. A k’hmo gui ami k’taigü lo tu thei vai m’thei gui neh Lam m’shüm gui vai khin ci. A k’hmo gui cuh ami hnuh nak ung vah a k’da pi ng’thei ci gui ah kya ci. A mi k’taigü lo tu vai chü gui neh a i ami sham hlü ng’shi gui neh Khanpughi ami hmat ami yum vai lam m’shüm gui vai a kya ci.
A k’hmo hta gui phaya pung gui on ami hmat vai m’thei gui vai. Catholic im gui ung k’taigü nak a “phayazin” ci cuh a k’ni ah pyein vai kya ci. Bä ca k’chang gui ah pung gui tai vai, Nu Maria ah pung tai ung a k’hmo gui noh hnguh lo tu neh ng’shi lo neh hmat lo khai gui.