Bä ciah Stanislaus ah ghinlu a mong
Krakaw maanggo ung ah Taigü Mang ah kya ciah Bä ciah Stanislaus cu Christu kum 1030 ung Poland ghunkhaw Sezepanow maanggo ung ng’tüi ci. A ni ghinlu pum Boi Yeisu am gänap ci goi ah a nu lah a pa a ni shih kon ah a ni ung om ciah a koh htang gui a van cu duyai k’chang gui am peta ne ta Khanpugi lam hnguh hmat nak gui leng ne ng’thei ng’thang ciah kya ci. hnguh hmat vai gui a ng’thei ng’thang kon ah Msgr. Lampert ah kutu ng ka no Christu kum 1072 ung khan ne a cun ah Msgr. Lampert ah ngoh nak ah hngu thong ciah kya ci. A ni cu a kum täi hleih a om nak ung om ciah gui ah yum tu k’chang gui ah om nak ah hteit ne Taigü Boi gui lah yumtu k’chang gui am ng’mü m’cha lam ah k’tha gui a mi gah vai ah k’tha pe gui hti ciah kya ci.
A ni ah om nak ah Taigü Maang im ung a cum ah duyai k’chang gui be ciah kya ci. Hmei nu gui lah duyai k’chang gui ah ng’ming gui a van a k’ni ah m’hteih ne a van am nguighui khoh htang gui petak gui ciah kya ci. A cun yah ung Poland ghunkhaw cu a k’hngih nak shangpughang Boleslaus (King Boleslaus Ⅱ) no uk ciah kya ci. A cun ah shangpughang cu a shihla kä näng ne a cei om pui ciah hngumi tumat cu chü ne a om pui ah kya ci. A cun cu bä ciah Stanislaus no Khanpughi no kä yum ah bi a bi cu m’shungchak ne Shangpughang cu m’lung k’she na ciah kya ci. Shangpughang no a cun m’lung she ne bä ciah Stanislaus cu m’kyüih ne kä hnguh hlü ciah kya ci. Taugü Mang cu a cun ah shangpughang yumtu ng’bum ung ka no a no ngung ka no loi hleih a hei I kä om ciah kya ci. Shangpughang cu Krakaw Taigü Maang ah im ung lut lo hleih Taigü maang ah k’chü m’kha a phäh ah a k’taigü vai hlü phih ng’düm ciah kya ci.
A cun ah phäh ah Shangpughang no m’lung she ne bä ciah Stanislaus cu pha ne ta maanggo a k’pung lam ah om ciah St. Michael Phayakyawng a k’yo hta ung a tha ne ta Missa a gänap yah ung a ngon ah kya ci. A pei ah om ci gui ah a k’chang gui no bä ciah Stanislaus cu kyä cu a k’pit a m’hton ah kya ciah tuk pit pit ne bunghngu om k’chihla gui no a mi ei ah a mi ng’ngaih vai ah ci hlak gui ci. A ni cu Christu kum 1097 ung shi ciah kya ci. A ni ah shümlä ne üm nak vai gui cu Krakaw maanggo Taigü Maang ah imu ng a mi tha ah kya ci.
