Kchò ah shehshum gui a mong
Kchò gui cuh Mvákhò a ka kái lo ci gui.Cun ah kya neh Mvákhò ah biloh shehshum gui cuh lo püi ci gui ah kya ciCun ah ami lo püi ah shehshum theinak gui ung khlüng sheh cun phih om ci.Khlüng sheh am khlüng vók ciah phih ami pyéin ah kya ci.Kchò gui ah im päng ung khlüng om ciah kya hleih khlüng shep ci dá màn ciah ngngaih vai kya ci.Tuhchü khlüng shep ciah pìgò cuh apí vah om bà ci.Maangdat maanggò on ng’et ciah Mthò lah Ngghóng bäng ung shep thei ci om bà ci.Shep thei ci gui cuh ghí lo yop ci gui.Akhmó gui no kä shep thei ci gui.Ami mtheimthángnak cun phih kä om ciah kya ci.Khlüng cuh Kchò gui no akya ah ami yùm ah kya ci.A i bi lo ung phih khlüng yù ami bi ah kya ci.
Yùhlak,ngkòishui,khòlo màmòòng avan cuh khlüngyù bäbä on ami pyipäng ah kya ci. Cun ah khlüng gui cuh tuhchü akdá tu ba no kä mang lo ba ci gui.A i ah kya hleih ci ung christian ngpài mshah gui no yù cuh khò knget ah kphyám,kcó cuh khò knget ah ék,khtìng kbèi tum cun phih khò knget ah biloh ciah ami mthei mthàng ah phäh ah kya ci.A cun yùm lo ci gui no khlüng gui tu payak-yak u neh ghot yop u hleih maih lo ciah kya ci.Cun kòn ah khlüng gui ah hngün ung plastic gui a gok lo ah phäh ah phih kya ci.Khlüng gui cuh biloh gihgo neh mgäng pyaan phih kä nghloi neh shokshü chütah tah biloh a nghloi vai lah yoihtuk amàn vai phäh ah avan ghep no ami mang lo ah phäh ah phih kya ci. Catholic yùm ci gui lah Kchò thùng ah om ci gui ah im ah khlüng gui cuh om bà yah ci.Shep ciah pìgò mshah gui cun phih ngami gui ah kya ci. RC gui no yù cuh Kkhaanpùghí no ana péit ah khoh tumat ah kya ci.
Acun o neh kä o ktat en neh ók ah a kya ung mhlüng mtaainak lah kthaigui ah om nak ah kya ci.Yù bäng ah kä kya neh a i paang tah kä khin hleih maang ung na pe ciah Kkhaanpùghí katnak ah kya ci.A i pang tah a ngkäk ah maangca vai mthei ci.A cun ah phäh ah RC yùm ci gui ah ami im amshah ung khlüng gui cuh om bà ci. Tuhkbäih cuh u no phih hlüng kä shep ba ci te amshah no shep lo ba ci.Om khò kä ni lo neh ngùi gahnak vai ah lam kèn lo hleih khlŭng kä shep bà hlü ci gui cun phih shep lo bà ci gui. Cun cuh a nghloi ah hnguh thei ah a kya ung khòmdek mdí ciah plastic ah hngŭn ung khlŭng gui om mthong ung ni khai kya ci Vanglam ah pyéin ung Kchò gui ah biloh thùngyò mhtéinak tumat ah phih kya ci.A khòtüi pèingléng mhtéinak lah thùngyò mkhännak ciah lam khngih cuh tumat ah kyùm khai kya ci.
