Diidam lo ciah mi ng’dü im min m’htei vai a mong

Laudato Si ah Khotüi pei ng’leng k’chüng k’hlei khai ah pyan vai ah maapi bäih ne m’cäi nak ah mong no a na m’cäi gui cu, khaw m’dek ci nak ci cu mi om nak ah mi mi ah ng’dü im ah kya hleih mi mät no a k’ni ah mi m’htei vai hlü ci ci cu na m’thei m’cäi gui ciah kya ci. Mi om nak ah kho m’dek cu diidam lo ciah kya hleih mi ng’dü im a ni ah pi m’htei vai ci cu ngoiä hmat lä ne pyantham vai ah Catholic m’thei m’cäi ung a htük pi bäih ah Papa Shangpughang no a guk ah ca (Encyclical) cu a k’tung pi ah ng’ngahtüh vai ah kya ci.

Papa Shanpughang no a ng’yak hlü cu k’chang gui a van tumat lah tumat ng’hta ng’ko hlü ah m’lung ng’ngaih cu a k’tung pi ah mi om nak ah mi ng’dü im ah phäh ah kya ci ci ne pyein ci. A guk ah ca (Encyclical) a pum ah teng ah a kya ung phih mi om nak ah mi ng’dü im cu a k’ni ah mi m’htei vai tumat hti ung tarvon om ci ci cu mi hnguh ciah kya ci. Papa Shangpughang Francis no a k’om phung ng’müng ah ng’shün ng’phan nak a mong ng’shong khai ah a guk nak ung Khotui a mong ung ka no om nak ah ng’dü im kho a chüt khai ah ng’thonghlat hleih a guk gui ci a k’ni ah ng’ngahtüh vai ah kya ci.

Mi mi gui cu ng’shong ciah kho m’dek ung om ciah a hngun ghüng gui awn kä täng ein ciah om nak ah im ung mi om ciah kya ci. Kä ni ci ah biboi gui ghoh düt, shing ghüng gopai chuk gui awn khohtüi ng’thong hlat lo ne, tui gui kyet lo hleih kho m’dek khan ah om ci ah k’chang bang ah kä kya hleih k’phyuk kha chihla gui cun phih maih lo yop ciah kya ci. Ngoiä ng’däih ne ng’tüi om khai gui ah hta k’hmo gui a mi om nak hlü ah kho m’dek ah a kya vai ah mi ng’dü im kho cu van no ng’lung lak na ne ni k’khai ah mi pyantham vai ah k’chang pang ung tavon om ci ci cu mi hmat vai hlü ci.