Bä ciah Angela of the cross ah ghinlu a mong
Bä ciah Angela of the cross cu Christu kum 1846, January k’cha 30 ung Spain ghunkhaw, Seville maanggo ung ng’tüi ciah kya ci. A ni cu khodok a mi yoih nak ung khokum k’ku bi bi tu ne a gah tu ah ngui awn a nu pa gunghtot ne ta, a cun kon ah The Sisters of the company of the cross marmah ng’htoi cu m’düih ciah kya ci. A luh lo püi a nu be, phäina gui ghalei k’phli ung ka k’chuk bäng ghüng ne om ciah kya ci. A pa cu Boiphaya kyawng ah om ne ei shong ne kya hleih, a nu cun phih a cun ah Boiphaya kyawng ah phaipheih pheih a ng’kho gui bi lo tu ne om ciah kya ci.
Angela cu dudong yaica ci ah kyawng khui ung ka no va ng’tüi lo ciah kya hleih hnguh mat ng’thei ng’thang gui a gah tu vai ah kyawng kä kai tu hnging lang pang hleih phih a nu pa ah Khanpughü yumäp ne k’taigü nak awn Angela cu a om k’ih gui cu a nu pa ung ka do ne thei bang tu ci ah kya hleih a k’hmo hta yah ge ung Nu maria ng’ngaih u ne ciputi cit tu thei ciah kya ci. A kho kum k’thum ung m’shi nak Sacramentu khan tu ne, a kho kum (8) be lo hleih Boi Yesu ah a shi lah a hla (Kodomyat ) gah tu ciah kya ci. A khokum 12 ung ka no 29 a chüt hleih khodok yoih nak ung bi tu hleih a im mah cu Christian yum tu k’chang tu mat ah kya ne citputi (Rosary) a täng ah cit püi gui hti ciah kya ci. A kho kum 19 ung marmah ng’htoi tumat un glut tu hlü te ci, a kyü ka gai hleih kä lut tu hlot ciah kya ci.
A cun kon ah a ni ah ng’mü m’cha lam ah khongmang ciah Taigü Boi no dudong ci gui lah kä gai ci gui a m’htei vai ah pyein hleih a cun gui teng ne gung htot ci gui ah kya ci. Christu kum 1873 ung a ni cu m’dang nak gah ciah kya ci. A cun ah m’dang nak ung a ni no a hnguh cu a ni ah k’taigü nak ah shing m’kang cu Boi Yesu kä om ciah shing m’kang düt ah kya hleih hnguh ne , a ni cun phih goippyam ci gui, dudong ci gui m’htei gui ne a mät phih a cun gui ah hlo ah a kya vai ah Boi no a ng’yak hlü ah hmat lo ciah kya ci. Angela cu a hngüp täi hleih bi bi ne läk lam gui awn a k’taigü nak ghinlu Khanpughü am a k’cum ah gänap ciah kya ci.
Bä ciah Angela ah a ghinlu pum a bi loh nak gui ung marmah ng’htoi kyawng gui 23 kyawng lo lo ciah kya ci. A ni ah ghinlu pum hmeihta gui lah duyai ci gui ghung m’htei ne om ciah kya ci. A ni Christu kum 1932, March k’cha 2 ung shih ciah kya ci.
