Bä ciah Cyril lah Bä ciah Methodius ah ghinlu among

Bä ciah Cyril lah Bä ciah Methodius cu ng’päi na goi ah kya ci. Nga ni cu Greek ghunkhaw Thessalonica maanggo ung ng’tüi ci goi ah kya ci. Cyril cu Constantinoble ung ca ng’thei ne k’hmo k’chang ah kya ne Taigü Boi ah kya nak gah ciah kya ci. A phäi ah kya ciah Methodius cu ghunkhaw mong gui a bi nak ung ah noh ng’düm ne Yahteih ah kya khai ah Yahteih ng’htoi un glut tu ciah kya ci. Christu kum 863 ung Constantinoble ung ngoh ciah Taigü maang no Moravia ghunkhaw ng’pai ung Khanpughä ah mong lam a ni thähla vai ah a tüih goi ah kya ci.

Nga ni no maapi k’bäih ne a ni bi vai cu Slave k’chü awn Khanpughü mong lam a ni thähla, a ni  bi loh nak ung a nim ang vai ah bi loh nak ah kya ci. A cun ah ca lung mang nak a ni pyantham cu (Cyrillic) ci ne a mi pyein ah kya ci. A ni ng’päi na a ni ni k’hngih cu k’chang a daa Christian ah a mi kya lo tu hnging vai ah bi hnging ci goi ah kya ci. Cung phih  a mi k’taigü nak gui ung Slave k’chü  a mi mang vai cu k’Taigü gui no kä mi yum lah Taigü Boi ah a mi kya lo hnging vai ah Ordination pe gui khai ah Taigü mang kä om cu Buiawt ci gui ah kya ci. Roma maanggo ah ng ani ah Khanpughü ah mong lam a ni bi loh gui a ni m’theinkan vai a ni hteh yah ung Papa Shangpughang Hadrain Ⅱ no Taigü Maang ah kya lo khai ah a k’hmoh ah kya ci. Bä ciah  Cyril cu Christu kum 869 ung shih hleih Bä ciah Methodius a mät bäng cu poih ba ne ghunkhaw ng’phei gui ah kya ciah Poland, Bohemia, gui ung Khanpughü ah mong k’däih ne thähla m’thei m’thang ciah kya ci.