Bä ciah Polu a om ih a ng’thong hlah nak ah Poi
Yumhei k’chang gui chü khawng k’chang tu mat ah kya ciah bä ciah Polu cu Turkey ghunkhaw, Tarsus maanggo ung Judea läklam gui yum tu k’chang ah k’kyawng khui ung ka noh ng’tüi om lo ciah kya ci. A ni cu hnguh hmat nak ung a hlüng tai lo pihti vai ah phäh ah Jerusalem ung om ciah Mose noh a phyan ah läk lam gui ng’ theing’thang nak ah kyawng ung ca ng’thei ciah ah kya ci. Judia k’chang gui ah läk lam gui ung käng htek lo ne Christian k’chang gui kalu nak ung kawng mang lo ciah kya ne bä ciah Stephen lung awn ghot ne ngon ciah k’chang gui gunhtot tu gui ne, yum ghong ung k’chang gui a van a luh lo vai ah khawng mang man ciah kya ci. A cun gui a van a däih ah a khawng mang vai ah Pharisees taigü ng’ vai gui noh bi hlak u hleih Damascus maanggo ah htei ne Christian k’chang gui pha gui ne Jerusalem ah hteit khai ah ng’düi lo ci. Khawhngüp ng’ling yah ung Damascus go k’et lo hleih k’khankho a ka a k’khaang no Saulu cu lailäp shi ne yuk shüi ci. a ni cu ng’kyak ne m’dek ah a yään yah ung , Saulu, Saulu, I kya hleih kei na na yokkana ci ang? ci ah k’o ng’ya ci. A ni no, Boi aw, nag a u nei ci ne ng’shi ci. M’shang lo ba ne, kei cu na na yokkana ah Yesu nei. Cun ung phih let lo ba ne gonu ah hteit ä. A I na cii vai cu pyein khai gui nei, ci ci. (Actus 9:4-6)Saulu awn m’gu ci gui phih kä m’däh hlot ne ng’düi ci gui. K’o ng’ya lang ne a u phih kä hnguh ci gui. Saulu cun phih let lo ba ne a mik phyüi ne phih I kä hngu ba ci. A ni cu chü tu u ne Damascus ah a mi gok püi. Kho k’hngüp k’thum pum I kä hngu ba ne kä ei, kä ok ah ng’kuung ci. Kho k’hngüp k’thum plan lo hleih Anania ciah k’chang tumat im k’kyawng ah lut lo ne Saulu ah k’khan ah a kut taih ne, ka naa Saulu, Boi Yesu no a khang na hnguh ba vai ah htitheing ca muh awn na be vai ah kei na tüi lo ci ci ne pyein ci. A cun kon ah Saulu cu m’shi nak Sacramentu khan ci.
