Bä ciah Francis de sales ah ghinlu a mong

Bä ciah Francis de sales cu Christu kum 1567, August k’cha 21 hngüp ung Pyinhtit khaw, ah ng’tüi ciah kya ci. A hmo hta yah ge ung ghinlu gänap nak ni ci ci cu a m’lung kyawng ah om ge man ciah kya hleih ng’phep güih ne htitheing nak ah ghinlu lak ne a mät no a mät Nu Maria ah gunghtot nak ah k’khaa ah a ghinlu gänap ciah kya ci. Pari ung kho kum a k’sho hnguh hmat nak gui ng’thei ng’thang neta a khokum 24 ung Padua tekahto ung (law a mong ng’theithang ne poih gah ciah kya ci. Christu kum 1593 ung a pa no a k’bäi nak awn Taigä Boi ah kya lo ci. A ni cu li m’la hlenget kot ci gui ah a hngu ah Khanpughü ah mong lam bi ciah kya ci. Christu kum 1595 ung a ni ngon khai ah k’phyun ciah k’chang tu mat noh k’hngih vei pum ngon khai ah pong hleih phih bä ciah Francis de sales cu kä ngon hlot ah kya ci. Bä ciah Francis de sales cu Khanpughi ah mong lam a thähla yah ah ng’ lak ung yumtu ng’bum ah m’thei m’thang gui a van ung a yat vai ah thähla ne ca uk gui cun phih a daa guk ciah kya ci. A gok thai ung yumtu k’chang gui m’kum hta bäng a om nak ah maanggo, a k’hngu ah yumtu k’chang gui a k’daa lut lo tu ci gui ah kya ci. Christu kum 1602 ung Geneva Taigü Maang ah a kya lo kon ah Francis de sales cu ng’thuk’ni gui m’thei m’thang nak, Khanpughü ah mong thlähla nak lah kat k’phyon nak gui ung bi lo pihti ne k’chang gui ah yum nak khäng htek lo pihti khai ah bi ciah kya ci.

A ni cu hngiphngäi hta ne k’chang gui am peitak nak ung ng’chüih ne hmat thei ciah bä ciah k’chang tumat ah kya ci. Khanpughü ah m’hngi nak m’dang ne a guk nak ung, Khanpughü ah m’hngi nak cu k’khei ne kä m’chüt hnging vai ah kä ng’phleh hlot ciah yum m’hngi nak ah kya ci ci ne guk ci. Christu kum 1610 ung St. Francis de Chantal ah gunghtot nak awn Numaria bäcia Elizabeth ah htei ne a om tu ci ah Marmah ng’htoi cu m’düih ciah kya ci. Christu kum 1622, December k’cha 28 ung Pyinhtit khaw, Lyong ung shih ciah kya ci. Bä ciah Francis de sales cu a k’nga pam ci gui gunghtot ciah bä ciah k’chang tu mat ah kya ci.