Egypt Khaw ah kah Bä ciah Anthony ah ghinlu a mong

Hlalai ung ung Yahteih ng’htoi m’düih ciah Anthony cu  Christu kum 251 ung Egypt khaw ah ng’ tüi ciah kya ci. A nu lah a pa a ni shih kon ah Bä ciah Anthony cu nga mi khoh htang ah kya ciah im, lai, ng’cham gui a van cu a be am a htei vai ah tarvon a peit ah kya ci. Bä ciah Anthony cu  a kho kum gha ung Missa gän ap nak ung a yak ah ng’thu ni ah kya ciah Mt: 19:21 ung “ Nang cu na ng’kyüm be hlü ung, na khoh htang gui yoi neta dudoong ci gui am pe gui ä. K’khanmopi khoh na gah khai. Cun kon ah ka hlu ah na na läk vai” ci ah ng’thu k’ni cu a ni ah m’lung kyong ah om kheng geng ciah kya ci. A cun ah kya hleih Bä ciah Anthony cu a ni ung hlü ci gui bäng lak k’boih ba ci a khoh htang gui a vai yoi ne k’chang gui am peitak gui ciah kya ci. A cun ung ka noh Mt: 6:31 ung “ Cun ah kya hleih a i ei vai, a i ok vai , ci ne kä ng’äcäi ein vä” ci cu  ci ah ng’thi k’ni cu ng’ yak lo ba ne k’poih ba ci ah a khoh htang gui a van k’chang gui am pe tak ne, a be hta cu Marmah ng’htoi ung luh tu hlak ne ta a mät cu hlalai ah htei Yahteih un glut tu ciah kya ci. A cun ah Yahteih ung a lut tu ung ka noh tün ne khawnget noh a hlü a hngäi ah toktap tu lang hleih phih bä ciah Anthony cu a ni ah k’taigü nak lah kyünhloi nak awn khawnget ah toktap nak gui cu m’chüt näng ciah kya ci. K’changui gui a k’daa noh bä ciah Anthony am ng’mü m’cha lam ah ng’ngaih plak nak gui shang u ne kya u hleih a ni ah hluläk k’cahng gui cu daa lo pihti ciah kya ci. A cun ah kya hleih a ni cu a hlüläk k’chang gui a van awn leng ne Yehteih ng’htoi cu maapi bäih ne Christian Yahteih ng’htoi cu m’düih hnging ciah kya ci. A ni noh a hlüläk k’chang gui am a pein cu “ khawngoi lam ah a kya ung mü ah shih lo khai khai ah k’chang vai hlü ah kya vai, mü hngün täng ah a kya ung a ngong khawngoi kä hnguh tub a hlot khai ah k’chang vai hlü ah mät noh mät ng’ngahtüh ne bi loh, ng’ngahtüh nak gui ung a i phih a ni pi ah bi lo ne ng’ngahüh gui kyomhtang khai ah pyan vai hlü ci ci ng’ m’thei m’thang m’cäi m’ä gui ci ah kya ci. Christu kum 355 ung a teihpüi ah kya ciah St. Ignatius noh a chüthäm ah phäh ah Alexanda maanggo ung htei ne Boi Yesu cu Khanpughü ah kä kya ci ci cu kä cang ciah kya ci ne Yesu cu a k’cang ah Khanpughü ah kya ci cicu m’thei m’thang ne k’chang a daa yum nak ung a käng htek lo pi hti vai ah ng’ mü m’cha lam ung a k’ni ah kyükong gui ciah kya ci. A ni cu kä shih pha ung a hluläk k’chang k’hngih chü goi ne a ni a shi ah a kya ung diim kyäp hta kiah m’tung ung a mi k’phuh vai ah m’cäi goi güt ciah kya ci. Bä ciah Anthony cu Lai bi ci gui la him ung a mi vuh ah ui, min, vok, me gui ghnung m’htei gui ciah bä ciah k’chang tu mat ah kya ci.