Jesu, Nazareth-ah hteit bà ci.

Báwi a ng’vái lonák-ah, Nazareth-ah gok lo neh a mät-ah ci man-a hlo bä-ah, kiün k’hngüp cã-gat-ah lut neh m’cäinák cuh ’chei vai neh ng’düi lo hleih Báwi àm, ce ng’sä, Isaiah-ah m’cäinák pe u hleih m’cäinák cuh, k’phíät neh a hnguh-ah m’cäi cã cuh “Khãnpùghí-ah ng’mùi m’chà cuh, kã ’khãn-ah om ci. A cun nawh kei  na hlup hleih dú-dàwng ci gùi àm, zèi tu vai-ah màwng, m’lung-ah thüi hlèi ci gùi, m’zèi gùi vai-ah màwng, kiùm ci gùi ami luh lo bà vai, m’dah ci gùi nawh ami hnguh bà vai-ah màwng a piéin vai, ami zo ’kànák gùi k’phión gùi vai, Khãnpùghí-ah chü-k’hngànák, a na ng’kháinák gahnák-ah khaw-kum, khaw k’hngüp, khaw ng’sawng ung ka m’thein tu gùi khai-ah, kei  na tüì lo ci.

M’Cäinák cuh k’chò bà neh cã-gat k’ngäng-àm pe nehtah ngoh ci. Cã-gat-ung om ci gùi phung nawh ani cuh, cügün neh teng ci gùi. Jesu nawh phih, “Tuh-ngói mät sin-ah m’cäinák cuh nami ng’zák mät-ah bé pi ci,” ci ci. Cun-ah k’chàng gùi avan nawh ani cuh, bä ci, ci u neh a k’ní-ah a piéin cuh, zùm m’nài nehtah “Sin cuh, Joseph-a htá-ah kä kia ci ang?” ci ci gùi.

Báwi nawh phih, “Nangmi nawh a k’càng-ah, sin-ah m’tu m’tängnák bä bä-ah, nang k’chàng m’gái k’chàng, na mät nawh na mät m’gái-ä. Kami ng’zák tu gùi-ah, Cãpharnaum-ah na bi te gùi cuh, na mät-ah omnák-a phih m’dáng-ä,” ci neh nangmi nawh nami piéin lo khai.

Cun tu pang-ah phih, nangmi-àm a k’càng-ah ka piéin cuh, a u ce ng’sä phih, a mät-ah pigò-ah a hmai kä ’kiãng ci.

Nangmi àm a k’càng-ah ka piéin cuh, Elijah ce ng’sä a om zah ung Khãn-mòpí, kum k’thum lah ’cha k’chüih khaw káng hleih khaw púm-ah khàw azõ zah ung Israel khàw-ah hmei-nú a k’dá om ci.     Cun tu pang-ah phih, Sidonias khàw, Sareptaung-kah, hmei nú tumat kon-ah, a hei gùi-ah Elijah kä tüi ci. Ce ng’sä Elisha a om zah ung phih, Israel khaw-ung kiám-ah ei a k’dá om ci gùi. Cun tu pang-a phih, Syrus k’chàng kon-ah, a u phih, kä htí-théing bà ci,” ci neh piéin ci.

Cun-ah màwng gùi cuh cã-gat-ung om ci gùi, avan nawh ng’za u neh a kia-ah m’lung k’sé u neh, ng’düi lo neh pigò k’pùng-ah Báwi cuh, k’täm neh pigò-ah omnák-ah, ghangpám-ah buh-ton vai neh hteh püi ci gùi. Báwi läí cuh ami ng’lung-ah zút neh phiòng ci.