Bä ca Hyacinth
Bä ca Hyacinth cuh Bäng’mangk’chàng khongkhui ung ng’tui lo ci. Ani cuh Europ ghunkho ung om ci ah University tumat ung Ca ng’theinng’thang tu neh aPukhaw ah kya ca Sayataw ah pe ah om ci. Khânpùghü ah monglam phih ani ah hnguhmat ci. Khok’hngüp ät ung apukhoSayataw awng Roma ah ani hteih ah ung Bä ca Dominic awng hnguh ci goi. Kum (1220) ung Dominican ng’htawi ung amaa pi ah lut tu ci ah Boiphaya tumat ah kya lo ci. Polan ah tui u hleih Khânpùghü ah NiBä nak athähla hlu ah acu ah Mang-go nu ung Yumtuk’chàng da lo ci.
Bä ca Hyacinth cuh Khânpùghü ah ng’bumIm gui, Boiphaya Im gui ak’da Cophlan ci. Khok’hngüp ät ung Shih pyi ca ak’hmohta tumat cuh Bä ca Hyacinth ah
Shuh a shan pe nak ung ghüng-gai lo ba hleih k’chàngak’da noh Khânpùghü ah Nibä nak m’tamm’khah ci gui. SeiIm ah hteih neh Gopai natnak sham ca k’chàng gui cuh m’gai ba gui ci.
Bä ca Hyacinth aghünlu ung Nu Maria cuh ang’htei ah Yihei Upa ca kya ci. Nu Maria ah Shuh shan pe nak ung ani ah biloh gui cuh ng’pyinng’päng kyümbe ci ah kya ci.
Moncok’chàng gui noh Ani ah aom nak tu lo u hleih Bä ca Hyacinth cu pheih dawng vai neh paung tu ci.A cun ung Nu Maria noh “ Ka hta aw,I kya helih naa Nu na nongghuit hlui ci ang. Gakap gui awng Kei atäng ah kei kä na k’tha e nä.Naa Nu kei phih nak hah tu pui ä.” ci ah chü-o cuh ng’ya neh ta Kotawmyat Sacrmentu lah lungpok awng ami pyang ah Nu Maria müim’cu hta cuh dong pui ci.
A cun ka noh ani awng atäng ah Kotawmyat lah Nu Maria cuh a ät ah om tu hti ci.
Bä ca Hyacinth cuh Go lo neh kum (1257), Aug 15 Nu Maria Khânmopi ah akai nak poi k’hngüp ung Khânpùghü noh achü ba.
