Khawh-tang awn m’tu m’tängnák.
A màwng hei läi-ah, Khãnmòpi ghin khaw cuh Lái ung thuh-ah khawh-tang awn täng ci. Cun-ah khawh-tang hnguh ci-ah k’chàng nawh thup bà ghüt neh zèi-kiài ci-ah m’lung awn, a hteh bà kon-ah, a k’om-ah khawh gùi phùng zòi zop neh cun-ah lái cuh, k’hleih ci.
A màwng hei hngá-awn a m’tu m’täng bà cuh Khãnmòpi ghin khaw cuh ng’büh ng’mãngnák-ah khawh-tang sùi ci-ah, hlum m’lèi k’chàng awn täng ci. Cun-ah hlum m’lèi k’chàng cuh, a kiã-ah a phù däm ci-ah k’cüm ng’lung a hnguh lo-ung, hteit bà neh a mät-ung om ci-ah khawh gùi zòi zop neh a cun-ah a phù däm ci-ah k’cüm ng’lung, k’hleih ci.
A hei a m’tu m’tängnák bà cuh Khãnmòpi ghin khaw cuh tuinú ung voih ung om ci-ah ngá-päng ’kiüp ci-ah ng’vài awn täng ci. ng’Vài ung ngá bé chü-tah ngá k’sùi gùi nawh ’kóng-ah hteh püi neh ngoh u nehtah a k’ní ghü neh gang ung m’chäp-èi u neh a k’sé gùi läi ghot ci gùi. A cun-a hlo-ah, cìn-khàw a lo lo ung Khãnpùghí-ah ng’sä Khãnhtapup gùi kium lo u nehtah k’chàng k’ní gùi k’hli-ah ng’bum nák-ung-kah kä ni-’ci-ah k’chàng ghü gùi neh Thüi kiah, ha ’kiet neh zái-cãnák-ah mei ung k’htop lo gùi khai.
“Cun gùi avan mä, Namivan nawh nami hmat ci ang?,” ci neh ng’si gùi hleih a-hlu-läk gùi nawh “kami hmat ci néi” ci neh m’sàng bà ci gùi. Báwi nawh phih, “Cun-ah kia neh Khãnmòpí ghin khaw ah màwng gùi m’thei m’tháng pi ci-ah k’chü m’cäi k’süm cuh a mät-ah m’kíüm ung-kah, khawh a hei hei a k’phiüm k’thai avan plok neh lo püi ci-ah, im mah awn täng ci,” ci ci.
