Roman gàkáp Báwi-ah k’chàng säm, a m’gái bà.

Cu kon-ah, Jesu cuh Cãrpharnaum pigò-ah a gok lo am, Roman gàkáp báwi tumat, a pèi-ah lo neh a ng’hui lonák cuh   “Báwi aw, ka phàn-ah k’chàng cuh akut khaw ng’gúng hleih zái neh im-ah ng’zän ci.” Jesu nawh phih, “Lo neh ka m’gái bà khai” ci ci. Ga báwi nawh “Báwi aw, ka im-ah nà lonák vai-ah, kä kani ’ci; a cung phih na m’cäì eìn düit-ä: ka phàn-ah k’chàng cuh, gái èi lo bà khai néi. A i-ah kia hleih ci ung ka mät cuh gà-káp báwi htá-ah kia neh kei-ah ’kã-ah phih, gà-káp gùi om ci gùi. Gà-káp tumat-àm: hteit-ä, ka ci ung hteit ci; Lo-ä, ka ci ung lo ci. Ka phàn-ah k’chàng àm phih, sin na bi vai ka ci ung bi ’ci” ci neh m’sàng bà ci. Cun-ah a piéin cuh, ng’zák neh Jesu nawh zùm neh ng’läk tu ci gùi àm, “A k’càng-ah ka ning m’thein tu gùi cuh  Israel pa-khúi ung sin hlok-ah ni hleih zùm ci, tumat phih kä ka hnguh pha ci. Nangmí gùi àm ka piéin cuh, k’chàng k’hlí k’hngi-lo lah k’hngi kiák lam-a kah lo u neh Khãnmòpí ghin-khaw-ah, Abraham ni Isaac lah Jacob mah-ah ng’la tu khai gùi. A cun-ah khàw k’om gùi läí cuh a k’hmüpnák-ah a k’pùng-ah k’täm gùi-ah kia khai. A cun k’hmüp khùi-ah, Thüi kiahnák lah hà ’kietnák om khai,” ci neh piéin nehtah Gà-káp báwi àm, “hteit bà -ä. Na zùm äp-a hlo-ah kia hlä,” ci ci. A cun zah mät ung a phàn-ah k’chàng cuh, gái bà pi ci.

Jesu cuh Petru-ah im-ah lo nehtah ani-a k’chú-ah nú, gò neh ng’zän hleih hnguh ci. Cun-ah k’hngumi-ah kut tòn hleih, gái bà nehtah ng’düi lo neh ngamí nawh ami èi vai bi pe gùi ci. Mü hngün täng-ah, khàw k’sé-ah phã gùi a k’dá lo püi u hleih, k’chü m’khá-ät htá düit awn khàw-’nget gùi k’täm gùi ci. Kä gái ci gùi phùng m’gái bà gùi zop ci. A i-ah kia hleih ci ung “Kami gàw-pàinák nalak pe gùi pi ci. Zái-cãnák phih nachan pe gùi ci.” ci-ah, ce ng’sä-ah guk a bé vai-ah phäh ah kia ci.