Jesu nawh k’chü m’cäi k’süm gùi a m’katnák.
Cun kon-ah, m’cäi gùi neh a piéin cuh, “k’Chü m’cäi k’süm gùi cuh, ng’gaih na vä. Ngami cuh, k’htù a ’kiunú ng’thuh neh hteh-hton, zoih-tuknák-ah, ng’htà püi gùi vai. Cãgat gùi ung a k’ni pí, ei vainák ung phih k’hmà gùi vai ng’za hlü ci gùi. A k’so k’tài-gü ci gùi ah ng’sèi u nehtah hmeinú gùi-ah khawh gùi èi zop ci gùi. Sin-ah k’chàng gùi cuh, a ’ka pí-ah m’cha m’lang-ah kia khai.
Cun kon-ah, Jesu nawh ngùi m’kiüm mán na neh ngoh nehtah k’chàng gùi nawh a i-ho-k’chà ah, ngùi m’kiüm ung ngùi ami ghon cuh, teng ci. Khawh mah ci gùi nawh a k’dá ghon ci gùi. Dú ci-ah hmeinú tumat lo neh ngùi k’chùn k’hngih ghon tu ci. Jesu nawh phih, a-hlu-läk gùi chü gùi neh ngami àm a piéin cuh, “Nangmi àm a k’càng-ah ka piéin cuh, sin-ah ngùi m’kiüm ung ghón ci gùi avan-a tah, sin-ah hmeinú k’du nawh a k’dá pí ghon ci. A i-ah kia hleih ci ung avan nawh ami mät ami nú-mãngnák-ah khawh-tang ung-kah ghón ci gùi. Sin läí nawh a mät-ah dúnák ung-kah púí, a ghinnák vai hlü ng’hngün avan ghón ci,” ci neh piéin ci.
