Ghin lo ba vai among.

Cun kon-ah, ghinnák bà kä om ci, ci k’ci gùi-ah Sadducee gùi nawh a mà-ah lo u neh ami ng’si lo cuh, “Saza ng’vái-aw, a phäí cuh, a htá kä om hleih si-neh, a k’chú a nòng ghüt-ah a kia-ung, a phäí-ah ng’sòn kä cin-èin khai-ah ani-ah k’chú a nàü nawh om tu bà püi hlä” ci neh Moses nawh keimi na m’cäi gùi ghüt ci. Ng’Phäí ng’nàü k’chüih om ci gùi. A k’ta-k’hngà cuh, k’chu-mah neh a htá kä k’poih neh si-’ci. A k’hngihnák phih chúnak tu bà nehtah si k’ci. Ani phih, a htá ng’sòn kä k’poih ghüt ci. A k’thumnák phih a cun bä-ah kia ci. Avan k’chüih nawh ani k’chú na u neh ami ng’sòn kä om ghüt líng hleih k’hngumi phih a k’hngú-ah sih ci. Cun-ah a kia-ung, sih-ci gùi-ung-kah, ami ghin lo bà ung cun cuh, a u-ah k’chú-ah kia khai ang? A i-ah kia hleih ci ung avan k’chüih nawh ani k’chú-nák ci gùi.

Jesu nawh phih, m’sàng bà gùi neh ngami àm a piéin cuh, “Nangmi cuh, m’cäinák boh, Khãnpùghí-ah ã boh kä nami hmat ci-ah kia hleih nami cheisoh ci-ah kä kia ci ang? A i-ah kia hleih ci-ung, sih ci gùi ung-kah ghin lo bà-ah a kia ung k’chu cèi mahnák kä om bà khai. Khãnmòpí-ah khãnhtapup gùi vai hlü-ah kia khai gùi.  Sih ci gùi ami ghin bà vai-a màwng cuh, “Kei cuh, Abraham-a Khãnpùghí, Isaac-ah Khãnpùghí, Jacob-ah Khãnpùghí-ah ka kia ci,” ci neh k’bup-ung-kah Khãnpùghí nawh Moses àm a piéin cuh, ani-ah m’cäinák ung kä nami ng’za tu man ci ang? Khãnpùghí cuh, si k’ci gùi-ah Khãnpù-ghí-ah kä kia ci. A k’ghing gùi-ah Khãnpù-ghí-ah kia ci. Cun-ah kia hleih nangmí a kia-ah nami cheisoh ci.”