Na läk düt vai.

Petru nawh phih, ng’hlat neh Jesu nawh a m’hni tu hngá-ah a k’chàng, mü ei ami ei zah ung Jesu ah ng’kiàng-ung ng’hngán neh “Báwi aw, gà gùi-ah kut ung ning k’tun khai cuh a u ang?” ci neh ng’si te ci ah a-hlu-läk; ani hngú-ah lo hleih Petru nawh hnguh neh Jesu àm, Báwi aw, “Ani mä?” ci neh ng’si ci. Jesu nawh, “Ani cun-tah ka lo bà güt a om vai-ah, ka ng’zák hlü ung mä-tah nang nawh i ho na tu vai neh ang? Nà läk düit vai,” ci neh a m’sàng bà. A cun kon-ah, ng’phäi ng’nàü gùi ung ‘Sin-ah, k’chàng, kä sih tu khai,’ ci-ah k’chü ng’gú om lo ci. Jesu läí nawh, “Ani, kä sih tu khai,” ci neh Petru àm a m’thein kiäm-ah kä kia ci. Cun tu pang-ah phih, ‘Ka lo bà güt a om vai-ah ka ng’zák hlü ung mä-tah kä na piéin tu kiäm vai,’ ci neh vah, a piéin-ah kia ci. Sin-ah a màwng gùi cuh a-hlu-läk mät nawh, a hnguh ng’zák mät a guk ghüt néi.

Ani nawh a piéin phih, càng hleih mi hmat zop ci. Báwi Jesu nawh, a bi gùi, a hei a k’dá púi k’poih bà ci. Cun gùi avan guk zop vai hlü ung-tah m’cäinák cã-üp gùi, m’dek ung kä zu ’khai-ah ka ng’ngài ci.