K’Chàng phia k’hmà m’bei gùi ci.

 Cun zah ung Jesu cuh Tiberias ci-ah, Galilee pinle, ’kat neh hteit ci.  Gàw-pài ci-ah k’chàng gùi, a ã awn a m’gái bà gùi te cuh k’chàng ng’bum gùi nawh hnguh tu u neh a hngú-ah läk tu ci gùi.  Jesu cuh khaw m’htung ’khãn-ah kài nehtah a-hlu-läk gùi awn a täng-ah ngoh tu ci.  Cun kon-ah, Judeu k’chàng gùi-ah paschal cuh, ng’et lo ci-ah kia ci.  Jesu nawh, teng gùi nehtah k’chàng a ng’um ami lo hnguh lo gùi neh Philipuh àm, “Sin gùi nawh ami ei vai m’htut cuh a hoi-a kah, k’hleih vai ang,” ci ci.  Cun-ah a ng’si-ah màwng cuh a mät nawh, i-ah a bi vai cuh, hmat gèng gèng neh Philipuh-ah k’chü a sannák-ah, a ng’si-ah kia ci.  Philipuh nawh, “k’Chàng sin k’chü nawh a ei vai, k’bo-hta gùi neh ami èi ung phih, ngùi tang-kà phia-goi phù, m’htut kä päng khai” ci neh m’sàng bà ci.  Simon Petru-ah anàü Andrew ng’ming-nak ci-ah a-hlu-läk nawh, Muh-záng k’htang m’htut ng’lung k’hmà lah, ngá ’khùi k’hngih säm ci-ah, k’pámihtá tumat om ci. Cun tu pang-ah phih, k’chàng si k’chü àm, cun-ah m’htut lah ngá, a i-ah cum päng khai ang?”ci ci.  Jesu nawh phih, ngoh u hlä,” ci ci. Cun zah cuh m’ghó phih sah ci, ’chei ung k’chàng phia k’hma-kip vai  ngoh ci gùi. Jesu nawh, m’htut cuh, la neh süm hmat k’tài-gü nehtah ngoh ci gùi àm m’bei gùi ci. A cun-a hlo-ah, ngá k’hngih cun phih, avan àm tei bà gùi ci.  Cun-ah k’chàng gùi avan ami phü kon-ah, Báwi nawh, a pi htá phih kä maih èin vai-ah, k’poih bà ci-ah, a ’khùi htá gùi cuh ami m’htäm bà vai-ah, k’chàng gùi àm piéin ci. M’Htut k’hmà ami ei k’poih-ah a ng’theh gùi cuh tòng gha-leigoi-ah kó bà ci gùi.   Jesu nawh a m’dáng-ah, a cun-ah thúk ci-ah a màwng cuh k’chàng gùi nawh, hnguh u neh, “Sin-ah k’chàng cuh khaw m’dek ’khãn-ah kium lo ci ah, ce ng’sä-ah kia ci,” ci neh piéin ci gùi.  Ani cuh Sangpùghang-ah k’hmoh vai u neh ng’cuh neh ami pong lo vai cuh, Jesu nawh hmat neh a mät-htá bäng khaw m’htung-ah kài neh om ci.