Jesu lah Nicodemus.

Judeu gùi-ung, khawng màng k’chàng-ah kia ci-ah, Nicodemus ng’mingnák ci-ah, Pharisee k’chàng tumat om ci. Ani cuh, mü-ah Jesu-ah lo neh, “Nang Saza, Khãnpùghí-ung-kah lo ci-ah, na kia cuh, kami hmat ci. Na m’dáng gùi cuh Khãnpùghí nawh kä om püi-ung, a u nawh phih, kä m’dáng hnging khai hlü,” ci neh piéin ci.  Jesu nawh, “Nang-àm a k’càng-ah ka piéin cuh, a k’thài-ah kä ng’tüì bà ci nawh Khãnpùghí-ah ghin-khàw, kä hnguh hnging khai,” ci neh m’sàng bà ci.

Nicodemus nawh, “A ghü cuh, a i-ho k’chà-ah htánák bà hnging vai-ang? A Nú-ah poi-ung lut bà hleih a k’thài-ah htánák bà hnging vai-ang?” ci neh Báwi-àm piéin ci.  Jesu nawh ani-àm a piéin cuh, “Nang- àm a k’càng-ah ka piéin cuh, tui lah Muh-Htí-ung, a k’thài-ah kä htánák bà cuh Khãnpùghí-ah khàw-ah kä lut khai. Hlá-awn htánák cuh, hlá-ah kia ci. Ng’Mùi m’chà-awn htánák cuh ng’mùi m’chà-ah kia ci. Nangmi cuh a k’thài-ah nami ng’tüi bà vai ci neh ka ning m’thein tu-ah phäh-ah kä cäi-èin vä. Khàw-’chì cuh, a ’chìnák hlü-ah ’chì ci. A k’áw ng’zák tu pang-a phih, ahòi-a kah lo neh ahòi-ah a hteh kä  mi hmat ci. A cun-a hlo-ah, ng’mùi m’chà-ung-kah htánák cun phih kia ci.