Lazarus lah ng’büh ng’mãng k’chàng.

 Hlèn neh plái ci-ah hlùi neh a k’hngüp täi hleih èi awk ci-ah k’chàng ng’mãng tumat om ci.  A m’kot lo pèi-ah Lazarus ng’mingnak ci-ah, k’chàng k’piàm cuh a käü púm-ah ’chei ghóng-ah, a k’plùi-ah om neh, k’chàng ng’mãng-ah ei ng’zaih èi tu hlü hleih phih, a u nawh phih ani-àm kä m’bei tu ci. A ’chei gùi cuh, ui gùi nawh lo neh m’léik ci gùi.  Cun-ah k’chàng k’piàm si hleih Khãnhtapup gùi nawh Abraham-ah k’coi-ah hteh püi ci gùi. K’Chàng ng’mãng cuh, si hleih k’phuh-ah kia ci.  

 M’Htèi khàw-ah zái-cã lo aih neh han k’dang neh Abraham lah a k’coi-ung Lazarus cuh hnguh goi nehtah,  “Pá Abraham-aw, na m’gein-èi ä. Kei cuh, mei k’däì-ung ka zái k’hma ci-ah kia hleih Lazarus nawh akut m’dóng-awn tui tok neh ka m’lèi na m’gei pe khai-ah zu k’tüì lo-ä,” ci neh m’lã neh chü ci.  Abraham nawh phih, ani-àm piéin lo bà neh, “Ka htá aw, na ghin zah-ung a k’ni gùi gah ci hleih Lazarus nawh a k’sé gùi a gah man na süm bà vai. Tuh-bäih, ani cuh, a hlá gei pi ci. Nang cuh, vúk khàw na hnguh ci.  Sin gùi kon-ah,  mät lah, nangmi-ah ng’lak-ung, k’hmòi-khùi-nú nawh na m’cha gùi ci. Si zah ka nawh cèi zàh, cèi zah ka nawh si-zah, ng’kat hlü ci cuh kä ng’kat hlot ci,” ci ci.

 Ani nawh piéin neh, “Cun-ah a kia- ung Pá-aw, ka Pá-ah k’píu-ah Lazarus na tüih vai-ah ka ning sàng ci. Ka nàü k’hmà om ci. Sin-ah zái-cãnák-ah, kä mi lo èin tu vai-ah, a béit gùi vai-ah phäh-ah kia ci,”ci ci.  Abraham nawh, “Ngamí-ung Moses lah ce ng’sä gùi om ci gùi. Ngami ng’ngài gùi u hlä,” ci ci.  “Kä kia ci, Pá Abraham-aw. Si ci gùi ung-kah tumat, ngamí-ah a hteh bà-ung, ng’zu lo bà khai gùi,” ci ci.  Ani nawh, “Moses lah ce ng’sä gùi-ah k’chü kä ng’ngài ci gùi-ah a kia-ung, si ci a ghin lo bà-ung phih, kä zùm täng khai gùi,” ci ci.