Bä ciah Adrian lah Eubulus ah ghünlu a mong
Bä ciah Adrian cu Christu kum 635 yah ung htumkho Africa Libya ung ng’tüi ciah kya ci. A ni cu a teihpüi Eubulus awn a täng ah Pa;estine ghunkho, Syria ung kalu na goi u ne a mi ngon goi ah kya ci. A m’lung k’nga om k’ih she ki no k’chang kä k’chü m’gein ne kalu tak ciah k’chang gui va dâ lo khai ah ci hnging ci. A u no kä beit m’cäi ein tu hlü vai ah m’lung a k’she kà awn bi loh nak gui cu ghunkho khong mang ci gui ah k’chang päng ung om ciah kya ci. Bä ciah Adrian lah Eubulus cun phih a cun ah hlo kä ni ciah ghunkho mâng tumat ah phäh ah a ni hngun pe ci goi ah kya ci. Dioclatian cu ga k’kap ng’htoi ung a k’ni ah k’thamah ne bi bi ne ta Christu kum 284 ung Roma Emperor mâng im ung Shangpughang tumat ah kya lo ci. A ni cu ânâ awn a van bi hnging ciah shangpughang ah a kya a hlo ah Christian yumtu ng’bum cu a í phih ci ne kä gah hnging ah a ng’bum ah hngu lo ciah kya ci. AD 4 ung a ni cu Christian gui a kya kalu nak gui ne a ci ah phäh ah ghunkho k’pung ah om ci gui ah phäh ah Khanpughi a mi yum ah mong a mi pyein vai ah a van a khän peit gui yop ah kya hleih a u no a yum nak kä m’dang ba hnging khai ah a ci gui ah kya ci.
A k’hmo k’tho goi ah kya ciah Bä ciah Adrian lah Eubulus cun phih kat nak kä om ein hleih a cun ah a mi kalu nak goi ah kya ci. Ngani cu Caesarea ung om ciah Christian yum tu k’chang gui ah hteit ne k’tha pe gui khai ah a ni om nak ung ka no ng’düi lo ci goi ah kya ci. M’kot ngäng ci gui no mânggo m’kot ung kä m’hluh awn tu goi ne ta a í a ni bi cu ng’shi k’ca goi u hleih a ni bi vai gui cu cang hleih m’thein tu gui ci goi ah kya ci. Ngami no pha goi u ne ghunkho ng’vai ah om nak ah khapüi ni hleih ghunkho ng’vai no kalu na goi ne ta chihteik am a mi m’ei goi vai ah pyein hleih Adrain cu ma ne chinhteik am a mi m’ei ah kya ci. Chinhtik no chet ne kyäp ah ei hleih dan ci gui no sho ciah ng’ngai lo u ne ta k’chim a ng’shäi awn k’tok ne a mi ngon ah kya ci. Bä ciah Eubulus cu Bä ciah Adrian a mi ngon kon ah kho kum 12 sho ba hleih shih ciah kya ci.
