Papa Shangpughang ah ng’thu

Kho kum k’pyhüm ung ka no kho kum k’thai ng’plan nak ung a pang van Khanpughi am m’ap vai ah kya ci. 2025 kum ah a ng’päng nak k’hngüp a pyein nak ung a m’sha cu yeikyai ne om ci. A i kya hleih ci ung yumtu ng’bum ung a kum pum hteit hton ghüi ne Khanpughi ah ni bä nak gui shüm hmat ne k’taigü ne om ci gui. A m’shah läi cu Papa Shangpughang Francis ah hlo ah k’chang bä a ng’vai shih hleih kyai, kho m’dek khan ah ng’tukah nak gui buiawt ne kyai thüihlei ne om ci gui ah kya ci. Ng’päng pyi ci gui ah phäh ah Khanpughi shüm hmat ne kat pyhon nak gui shui ne Khanpughi ah k’chü m’gein nak lam läk vai ah hlü ci.

A cun ah kya hleih Catholic yumtu ng’bum no yumtu ng’chang gui am yeikyai nak gui lah buiawt gui a van Khanpughi ah ma ah k’bum ne maa lam ah lo khai ah k’hngüp gui ung Khanpughi ah ni bä nak lah k’chü m’gein nak ah cäicat vai aung ah kya ci gui cu miät lah mi phei ng’leng ung a k’thai ah kya khai ah mi pyantham ba vai hlü ci. Khanpughi ah ni bä nak gui ah phäh ah Khanpughi m’tam vai ah m’lung cu a cang vai hlü ci. Ng’päng pyi ciah khum ung Khanpughi no a na peit gui ah ah k’tha gui ni bä nak gui ng’ngahtüh ba vai lah mät no mät a k’ni ah ng’shi ca ba ne ta bi läk chin vai gui kä bi läk nak gui lah mät ah kat nak gui a van ah phäh ah Khanpughi ah k’chü m’gein nak shang vai hlü ci ci-ne Papa Shangpughang Leo no pyein ci.

Source: Vatican News