Tour mânggo ung ka Bä ciah Martin ah ghünlu ah mong
Ga k’kap gui gunghtot gui ca bä ca Martin cu Christu kum 316 ung Hungary ghunkhaw, Pannonia maanggo ung ka yum hei k’chang k’kyawng khui ung ka no k’tüi lo ciah kya ci. A pa cu Roma ga k’kap tu mat ah kya hleih Martin cun phih ga k’kap tu mat ah a kya vai ah ga k’kap ng’htoi ung ling ne a mi luh tu hlak ah kya ci. Martin cu a kho kum m’kuleik’thum ung Amiens maanggo ah ga k’kap gui ah om nak ah sakhan ung m’kot lo a ngäng yah ung dudong ne ng’yoi ne ei ciah k’chang tu mat a kya ah m’yu hleih hngu ne ta k’sheng ne a mät ah hlui aat hteek ne a m’cot cu a cun ah k’yoi ne ei ca duyai k’chang am pe ciah kya ci. A cun ah mü a ih yah ung Martin a ng’mang she lo ne Boi Yesu no a cu ah hlui a m’cot hlui hleih hnguh ne a cun ung ka no a m’lung nga ng’thong ng’hlat lo hleih Khanpughü am a ghinlu gänap khai ah ng’ngai lo ci.
Cung phih a cun yah ung Barbarian k’chang k’yeng gui ah kha ca htapung gui noh a mi om nak lut ne tuk lo khai gui ah kya hleih Shanpughang Julian no ga k’kap ung ka no a ng’düm hlü cu ga k’kap ah a kya vai a kyüh ah ng’ngai hleih Martin no a pyein cu “ Kei cu Boi Yesu ah ng’ming awn hlehnget kä shäm ein ne ng’tung ah nak ung a ge ah ka om khai a kyak ah hlo ah gaa gui ah hngu ah ka mät hteit ne ka ng’tuk vai ah phih a ge ah ka om ci nei ci ne pyien ciah kya ci. a cun ah a pyein ah a ngoi ung cäicat vai aung ah ga lam ah ka gui noh kä ng’tuk vai ah k’chü shä lo u hleih a cun kon ah Martin cu ga k’kap a kya nak ung ka no ng’düm ne m’shi nak Sacramentu khan tu ciah kya ci.
A nupa phäi na gui am Khanpughü ah mong lam m’thei m’thang gui ne ta Pyinhtit Khaw Liguge ung Yahteih ah kyak tu ci. Christu kum phya k’thum lah k’chüihkipleiät ung (371) ung Tour maanggo ung Taigü mang tu mat ah kya lo ne a cun ung om ne Yahteih kyawng gui phih co ne Taigü gui am phih ca m’thei tu gui ca kyak ki. Bä ca Martin cu Christu kum phya thumkip lah kokipleik’chüh (397) ung shih ca kya ci. Bä ciah Martin ah ghünlu a mòng lam gui teng ah a kya ung a ni ah m’lung cu k’chü m’gein nak, dìmgei nak lah yum nak gui awn be ciah kya ci. M’hngi nak ng’yung na ne bi ah kä í k’äih hta gui awn htitheing nak gah hnging ci lah mät ung om ci awn gunghtot vai hlü ci gui am gunghtot peit tak gui cu Khanpughi am gänap awn täng ci ci cu Bä ciah Martin ah ghünlu na m’thei gui ciah kya ci.
