Papa Shangpughang ah ng’thu

Khanpughi ah cang ciah htitheing nak cu om nak cu Boi Yesu ah kya ci. A ni cu K’pyhon nak gah vai ah na ng’shä pe gui ciah tumat bäng ah kya ciah k’pyhon ciah Boi, mi mi kho m’dek k’chang gui a mät awn na ät hlak gui ne a ni ah m’hngi nak awn mi mi gui na ng’thong hlah nak hlak gui awn Pa Khanpughi ah mi gok tu hnging vai ah ng’shong ciah k’shoh mät ah phih kya ci. Mi mi gui cu Boi Yesu ah yumtu ng’bum, Boi Yesu ah kyä ah kya khai ah Khanpughi ah k’chü m’gein nak, Boi ah m,’ung gei khai a na ci nak gui lah dìmkyäp nak gui ung Khanpughi ah mong lam thähla m’thei m’thang vai ah a na chü gui ah Boi ah kyä ng’pai gui ah kya ci. Mi mi gui cu Boi Yesu awn a täng ah yeikyai ne mi ng’hläk tu hnging vai ah büceng nak ah Boi Yeisu ah m’düih ah yumtu ng’bum ah kya ci.

Mi ng’müi m’cha lam mi hnguh thei vai ah mi m’lung mi pyan hnging vai hlü ci. Christian k’chang gui ah k’tha a nem nak lah kat nak gui awn a täng ah  k’chang gui ah thuvi nak gui lah a mi m’cha nglang nak gui no yumtu ng’bum ah thuuk ciah bä ng’mang nak gui hmat nak vai ung ka no na m’cha gui ciah mi ng’ngai ci. A cang ah a kya ung Yumtu ng’bum ah htitheing nak cu mi mi gui ah ni ciah bi loh gänap nak gui ah phäh ah kä kya ne Khanpughi ah nibä nak ah phäh ah kya ci.