Bä ciah Dominic ah ghünlu a mòng
Ordo Praedicatorum m’düih ciah Bä ciah Dominic cu Christu kum 1170 ung Spain ghunkho Calaroga Mânggo ung ng’tüi ciah kya ci. Taigü Boi ah a kya lo tu kon ah Osma Mânggo ung om ciah Cathedral ung ngok ciah kya ci. A cun ung om ne a ni cu Bä ciah Augustine ah upatay gui läk ne om ci.Christu kum 1204 ung a ni cu Denmark ah a hteh nak ah lam ung Taulous Mânggo ung ka Hotel kamah k’chang ah a m’lung k’nga ng’thong hlah hlak ciah kya ci. A ni cu Khanpughi ah m’thei m’cäi gui, Khanpughi ah mong lam gui thähla m’thei m’thang nak ung a kya ah ghuih ciah kya ne a cun ah a m’thei m’thang no a ni ah m’lung cun phih a k’cum ah yeikyai hlak ciah kya ci.
Cun kon ah Bä ciah Dominic cu Pyinhtit kho htum lam ah a kya ah hlüng tai ciah (French Albigeneses) ci ah yum nak ng’htoi cu a ng’thong hlah lo vai ci ne a mi tüih ah kya ci. A cun ung k’chang gui am a ni ah m’thei m’thang gui ah phäh ah phih kyai, a ni ah ghünlu a omk’ih theingthap khai ah a m’dang ah phäh ah phih kyai k’chang a k’daa no yum ngak u ne Catholic yum nak ung k’chang a k’daa cu ng’hlat lo ba ci gui ah kya ci. A mi yum a mi läl gui ng’khei ne kya ci gui ng’hngu ng’tuk püi ne kä aungtang ci gui ah Citeaux Mânggo ung om ciah Yahteih gui am a pyein cu “k’chim ah kä kya ein hleih k’taigü nak cu na mi ng’tuk ah nak ah na mi ci vai, hlui k’ni hlui ah kä kya ein hleih m’lung m’yo nem nak na mi hlui vai ci ne m’thein m’cäi gui ci.
Kho k’hngüp ät ung nang ah m’thei m’cäi nak cu a í ca uk ung ang a om ci ne ng’shi u hleih a ni no m’hngi nak ah ca uk ung ka ci ne m’shang ba gui ci. A ni awn Khanpughi ah mong lam thähla m’thei m’thang ci gui awn a täng ah Taulous Mânggo ung om ciah Praedicatorum Yahteih ng’htoi m’düih ci. A ni ah po gui cu bä caih ca gui k’khei u ne thähla m’thei m’thang nak awn a mi ghünlu günap ci gui ah kya ci. Dominic cu a ni ah phäi na gui am Khanpughi ah mong hnguh hmat ne Khanpughi awn a mi ng’htako vai ah k’nga k’phlang gui ci. A ni cu ng’lami hta Maria a m’hlüng tai nak ah kyomhtang ciah k’taigü nak ah kya ciah citputi cu leng ne tün ciah kya ci. Christu kum 1217 ung Nu Maria Khanmopi ah a kai nak ah poi ung Dominican ung om ci gui cu kho dung a van ung htieh hlak gui ne mi mi ung om ciah geit m’shi gui kä htin ein ne na mi phu vai ci ne pyein ci. Bä ciah Dominic cu Khokum a k’sho Khanpughi ah mong lam gui a thähla m’thei m’thang nak awn a k’tha khen lo ne a kho kum 52 ung Tauglous Mânggo ung shih ciah kya ci.
