Boi Yeisu Phayakyawng ah a mi gänap nak poi
Boi Yesisu ng’tüi om lo nak khaw hngüp k’phlikip be lo hleih Joseph lah Nu Maria no Jerusalem phayakyawng ah hteit ni ne Khanpughü am a ni gän ap ah kya ci. A cun ah a ni ci cu Khanpughü ah m’cäi läklam vai a ni bi ah kya ci. K’chang ah phih kyai, phukha, chihla ah phih kyai ma pi bäih ne ng’tüi om lo ci cu kei a phäh ah htitheing hlä ci ah (Exodus 13: 1) ung om ci cu a ni läk ah kya ci. Nu Maria cu müm k’hngih awn a htitheing nak vai ah gän ap ciah kya ci. Phayakyawng ah Simieon ci ah k’chang k’ni tumat ne a ni cu na k’phyon gui ciah Boi Jesu kä shih vai ci ah Htitheing ciah Muh Khanpughü ah m’dang nak gah ciah kya ci. Simeon no Ng’tüi om lo ciah Boi Yesu a kut ung k’pom ne, Khanpughü ah ni bä nak gui ah phäh ah m’tamkhah ne, a pyein cu Boi aw, na pyein te ah hlo ah na na k’chang cu a diim ah ka shi hnging ci. A I kya hleih ci ung, Boi ah k’chnag pakhui gui phung a mi phyon nak hnging vai ah na tüih lo ah Jesu Boi cu ka mik mät awn ka hnguh tu pyi ci.” ci ne pyein ci. ( Luka 2: 29-32).
A cun ah k’chü m’kha ng’yak ci goi ah Nu Maria lah Joseph cu a kyaa ah cäi ci goi ah kya ci. Simeon no phih nga ni am k’taigü pe goi ne, Nu Maria am a pyein cu, “ Israel k’chang a daa am didam vai lah ghin nak a mi gah vai ah phäh ah shin ah hmo hta cu Khanpughü no a ghü pyi nei. A ni cu Khanpughü ah m’cha lang nak ah kya ne k’chang gui no ng’hngungtuk püi ne a mi k’chüomnak on a mi mät ah m’lung k’kyaong cu ng’ dang hlak khai gui nei. Na m’lung phih k’khim m’ghat awn tuk vai hlü ah kya khai nei ci ne pyein ci. (Luka 3: 33-35). Boi Yesu ah a Nu lah a Pa cu Khanpughü pyein läk ne a van bi yop ni ne ta Galilee khaw Nazareth maanggo ah htei ba ci goi ah kya ci.
Simeon no ghunkhaw gui ah a khang ah kya ci ci ne pyein ne, yumtu ng’bum no Boi Yesu phayakyawng ah gänap nak ah poi cu khawngki gah pyi ciah phayongtäng m’däi ne hteitgüi ne ng’taigü cu leng ne bi lo ciah kya ci. A cun ah bi cu Boi Yesu cu kä ni ci lah shih nak ah a hngup cu k’hmai ne khaw m’dek ah khan ah a khang lo püi ci ci cu m’dang ciah kya ci.
