RVA KCHO

“Magnifica Hamanitas” ciah Pope Leo XIV ah m’cäi nak

Mindat Chin RVA — Fri, 29 May 2026 08:58:52 +0000

Ng’shî lah m’shàng-Pope Leo 14 ah Ng’ngyan theileh Khing ung K’chàng Shing ghunnak ah Magnifica Humanitas Mikhäh Ca a mòòng Ng’shînak aktúng 10.M’khäh ca Manifica Humanitas noh k’chàng van ah nînak bü ca k’chàng ah htìnglingnak ah ngcun ngdònnak gui m’dáng ca hnguhhmat nìlam gui(technology)gui mi ghin om yah ung akní ah ng’vük hleih hnguh nak pe ci.M’khäh ca noh yùm äpnak lah htínak m’dòn neh pe ci.Ng’cét ci gui m’khomchâ hlak ci.Cung phih AI ung mi omnak ung k’chàng shing ghun vai k’hläp ca nìlam gui avan ah tah m’dáng ci. Hnguh tengnak,k’shíngnak lah k’chàng hlu màmòòng nak gui ciah a k’thagui om ci.
M’khäh Ca ah bücèng nak gui cuh akbé ah om tu k’càng chütah ng’khai hleih m’shàng ba vai ah ng’shikcà tu k’càng vai ah mòòng gui amshah om lo ci.Acun ah amòòng k’túng gui cuh hnguhhmat nìlam,ghum-â,ngtuknak,màmòòng,amòòng amà lah hluhngün mòòng gui ah kya ci.
1.M’gânak lah nong chahnak(176-177)
Ng’shî:Khokum phya k’khak ung m’gânak ahlühlü Htahta noh a khan cuh Pope noh k’bäî ci.
Aktoi ah m’shang:
Hngün mòòng lam ung akcàng noh htahtana a k’thá kä kèn hlak neh ng’chüih hlak ci.Kä taga ci gui bü ng’ngaih ah màmòòng nak noh phyónnak m’kot pe ci.
Ng’thup ciah hmatnak cuh k’chàng päng ah a htingling nak ah kya ci.

K’chimkhäh aktúng:
Ayan kah hngu hmat ci gui cun vah a tuhchü yùm vai kya ci.
2.Ng’tuknak AI shih hlak ca pyeinpit gui.(197-200)
Ng’shinak:
Ghunkhò m’shah gui noh ami mät ah shunkah nak ami m’däm yah ung AI noh shih ghin nak gui kä bi ci. cuh càng ci ang?
M’shàngnak Aktôi:
M’khäh Ca noh ghun vai ahlünak kä ma ci.K’chang cuh aktung pi ah mamoong nak vai ah líng ba ci.Cun cuh mchamlang ci gui lah hnguhmat ci gui omkní teipainak lah ghunkho ngcut khännak upatei ung ngyung ci.
Kchimkhá ktúng:
Kchang gui ung kah akhngupí ah pyein pit gui kä bi ung üp òngnak däm lo khai.

The post “Magnifica Hamanitas” ciah Pope Leo XIV ah m’cäi nak first appeared on RVA KCHO.

The post “Magnifica Hamanitas” ciah Pope Leo XIV ah m’cäi nak appeared first on RVA KCHO.

K’Thei ghíng ng’gúng ci.

Mindat Chin RVA — Fri, 29 May 2026 04:01:50 +0000

A ngói ung Bethany-ung-kah hteit u neh Jesu èi cói lo ci. A hngah om ci-ah k’thei-ghing, k’hláng-a kah nawh hnguh neh a k’theih tumat kù hnguh ’khai-ah ng’ngài neh hteit ci. Gok neh a hngah kon-ah a i-phih kä hnguh ci. A i-ah kia hleih ci ung a ng’theih nák-ah k’hngi k’cha-ah kä kia ci. Cun kon-ah, “Atuh-bäih lèng neh a i-zah pang-ung tah a u nawh phih, na ng’theih kä èi bà khai,” a ci. A-hlu-läk gùi nawh phih, ng’zak ci gùi.

Jerusalem-ah gok neh khàw-im ung lut neh khàw-im ’kiong-ah zoi ci, k’hleih ci gùi cuh, leng neh k’täm gùi ci. Ngùi m’thong ci gùi-ah k’pe m’sõn lah müm zoi ci gùi-ah ngohnák gùi phih, lat ton zop ci. Khàw-im ’kiong hlùn neh a u nawh phih k’am, m’zák a ’koh vai kä ci ci. M’Thei gùi neh ngami àm a piéin cuh, “Kei-ah im cuh, ‘k’chàng avan-ah k’tài-günák-ah im ci vai,’ ci neh ng’guk ci-ah kä kia ci ang? Nangmi nawh tah m’guk èi gùi-ah ng’thuh nák im-ah lat lo ve u ci. Cun-ah màwng cuh, k’tài-gü ng’vái gùi lah k’chü m’cäi k’süm gùi nawh ng’zák-u neh ani, i-ho k’chà-ah ami m’dí vai ng’ngah-tüh neh nìnák ci gùi. Cun-ung phih, ani cuh, kiüh ci gùi. A i-ah kia hleih ci ung ani-ahk’chü m’cäi cuh, k’chàng gùi nawh cäi-cat neh zùm ci gùi-ah kia ci. Mü-hngün täng-ah mãng-gò-a kah Jesu lut lo ci.

Khaw-ngói-ah, lam ami hteh zah ung k’thei cuh, a ng’zung-ah lèng neh k’chong hleih hnguh ci gùi. Petru nawh süm bà neh “Báwi aw, teng-ä, na plah-ah k’thei cãn tah k’chong pi na mo,” ci neh hleih, Jesu nawh a m’sàng bà cuh, “Khãnpùghí zùm vä. Nangmi àm, a k’càng-ah ka piéin cuh, a u nawh phih cein-ah khàw m’htung-àm, ‘ng’nòn neh na mät nawh na mät pinle-tui ung ng’phum-ä,’ ci neh apíhtá-a phih zùmnák kä k’hngih mah èin neh a piéin-ung a piéin-ah kia khai. Cun-ah kia hleih nangmi àm ka piéin cuh, nangmi k’tài-gü u neh nami san phung nami gah khai ah zùm vä. A cun bä bä-ah kia lo khai. Nami k’tài-gü zah ung k’chàng tumat kù nawh a ning katnák gùi, a om-ung, Khãnmòpí ah om ci-ah, nami Pá nawh nami katnák a ning k’phión gùi vai ah nangmi nawh phih, k’chàng-ah ning katnák gùi k’phión vä. Nangmi nawh kä nami k’phión ung Khãnmòpí-ah om ci-ah, namí Pá nawh phih, nami kat kä ning k’phión gùi khai.

The post K’Thei ghíng ng’gúng ci. first appeared on RVA KCHO.

The post K’Thei ghíng ng’gúng ci. appeared first on RVA KCHO.

Jericho ung-kah, k’chàng mik m’dah.

Mindat Chin RVA — Thu, 28 May 2026 03:57:09 +0000

Jericho pigò-ah gok lo ci gùi. Jericho pigònú-a kah, a-hlu-läk gùi lah, k’chàng a k’dá awn a kong ät-ah, a hteh lo zah ung Timaeus-ah htá Bartimaeus, a mik m’dah ci cuh, lam pèi-ah ngoh neh ng’zoi neh èi ci. Ani nawh Jesu Nazarenus-ah, a kia-ah màwng hmat neh “David-ah htá Jesu aw, kei na k’chü-k’hngà èi-ä,” ci neh m’lã neh piéin ci. Ani düp-ah a om vai-ah a k’dá nawh k’sénák láng u hleih “David-ah htá aw, na k’chü-k’hngà tu-ä,” ci neh m’la lo pí htí ci. Jesu nawh ng’düm neh ani cuh, chü hlak gùi hleih a m’dah cuh, chü u neh “A k’dim kiäp-ah om-ä. Ning chü ci. Ng’Düí lo-ä,” ci neh ami m’thein. Ani nawh a ng’vaih ghot-èin neh ng’düí neh Jesu-ah mà-ah lo ci. Jesu nawh piéin bà neh “Nang kavai-ah a i ka ci vai ang?” ci neh ani a ng’si. M’Dah ci nawh “Báwi aw, ka-hnguh tu bà vai-ah,” ci ci. Jesu nawh phih, “Hteit-ä. Na zùmnák nawh ning k’phión püi ci,” ci hleih a k’tén-ah a mik m’dèi bà hleih lam ung a hngú-ah läk ci.

The post Jericho ung-kah, k’chàng mik m’dah. first appeared on RVA KCHO.

The post Jericho ung-kah, k’chàng mik m’dah. appeared first on RVA KCHO.

Ng’Vái hlü ci nawh phàn a bi vai.

Mindat Chin RVA — Wed, 27 May 2026 03:52:16 +0000

Jerusalem-ah kài u neh ami lam hteh zah ung Jesu cuh, ami mà-ah hteit hleih ngami cuh, cäi-cat neh kiü-neh a hngú-ah läk ci gùi. Cun kon-ah gha-leigoi cuh, chü bà gùi neh a mät ung kia lo khai gùi, lèng neh a piéin lo cuh, “nami süm bà vai. Mihmí tu bäih Jerusalem-ah mi kài ci. k’Chàng-ah-htá cuh, k’tài gü ng’vái gùi, k’chü m’cäi k’süm gùi-ah kut ung àp-ah kia khai. Ngamí nawh sih khai-ah m’cha m’lang u neh ani cuh, k’chàng hei gùi-ah kut ung àp khai gùi. Ngamí nawh ani, gaih tu neh m’thui u neh tuthat u neh ngáwn khai gùi. A k’thum k’hngüp, ghing lo

Cun kon-ah, Zebedee-ah htá goi, Jacob lah Johan nawh a pèi-ah k’et ni neh “Báwi aw, keiní nawh kani ning san phùng na nà péit goi vai kani ng’zák hlü ci,” ci ci goi. Jesu nawh phih, “A i cuh, ka ning ci péit goi vai nani ng’zák hlü?” ci neh ng’si goi hleih, ngani nawh “Keiní goi cuh, na taimahnák ung tumat k’pat täng, tumat k’eng täng-ah nana ngoh hlak goi vai,” ci neh piéin ci goi. Jesu nawh phih, “Nangni nawh i, nani san kä nani hmat ci. Kei-ah áwk vai-ah, m’zak nani áwk vai lah, ka gah-ah m’sinák nani gah hnging khai ang?” ci neh ng’si goi hleih, nganí nawh phih, “Kani ci hnging ci,” ci ci goi. Jesu nawh “Ka áwk vai-ah m’zak cuh, nani awk khai. Ka gah vai-ah m’sinák phih nani gah khai. Ka k’eng k’pat-ah ngoh vai läí cuh, pian péit gùi kavai-ah kon-ah, a u àm phih kä ka pe hnging ci,” ci neh piéin c

Ghà nawh ng’zák-u neh Jacob lah Johan cuh, kä zèinák goi ci gùi. Jesu nawh chü gùi neh a piéin cuh, “k’chàng gùi ung Sangpùghang gùi nawh ’kalu-nák hma ci gùi-ah màwng, ami Sangpùghang gùi nawh ami ’khãn-ah, ã bi ci gùi cuh, nami hmat ci. Nangmi gùi läí ung cun-ah kä kia vai. A ng’vái-ah kia hlü ci cuh, nami bi, ning bi pe gùi ci-ah nami phàn-ah a kia vai. Nangmí gùi ung mà hlü ci cuh, k’chàng avan-ah phàn-ah a kia vai. A i-ah kia hleih ci ung k’chàng-ah htá mät cuh, a ng’phàn vai-ah phäh-ah kä kia ci. Ami phàn vai-ah lah k’chàng a k’dá-ah phiónnák vai-ah phäh-ah a mät-ah hngùn a péit vai-ah lo ci.

The post Ng’Vái hlü ci nawh phàn a bi vai. first appeared on RVA KCHO.

The post Ng’Vái hlü ci nawh phàn a bi vai. appeared first on RVA KCHO.

Dim Kyäp Ca K’kyong Khui m’düih Hnging Vai-ah Phäh K’kyong Khui Mah K”hngumi Gui-ah Bi Vai gui lah Hloi vai Gui

Mindat Chin RVA — Tue, 26 May 2026 07:48:06 +0000

Kyei cuh k’kyong khui-ah nu nu-ah ka kya ci ci neh ng’ngaih vai.
Cei-ah k’khan-ah hmat pe thei ca m’lung ngaih shäm vai.
Ng’ngaih na neh, gü hloi thei ca k’hngumi-ah kia vai.
Mät noh mät ak’cum-ah theing khai-ah ng’pyang ng’tham neh om vai.
Khoh ap neh ng’gü ng’lah nak gui lah ei awk k’tat nak gui nong vai.
Ng’dam nak gui nong vai.
Im ng’gü lo ng’phei gui-ah ng’thä nak gui nong vai.
Mät-ah m’hngi nak gui cuh cei-am ak’cum-ah m’dang vai.
Hta k’hmaw gui-am ni ci gui cuh m’caw m’thei gui vai.
K’kyong khui-ah mong gui k’chang hngei gui-am kä m’thein tu vai.
Cei hta-ah k’tha a kyen nak gui kat kä m’hluh vai.
Däm neh ni ca m’lung shäm vai.
Mät-ah cei a hngei k’hngumi-awn kä m’ap vai.
Mät-ah cei noh kä hmat tu-ah ma mong hngei gui kä bi vai.
Yum äp nak-ung yei neh k’tha na neh om vai.

Shin Gui Cuh k’kyong khui mah k’hngumi gui-ah bi chin gui lah hloi chin gui-ah kia ci.

The post Dim Kyäp Ca K’kyong Khui m’düih Hnging Vai-ah Phäh K’kyong Khui Mah K”hngumi Gui-ah Bi Vai gui lah Hloi vai Gui first appeared on RVA KCHO.

The post Dim Kyäp Ca K’kyong Khui m’düih Hnging Vai-ah Phäh K’kyong Khui Mah K”hngumi Gui-ah Bi Vai gui lah Hloi vai Gui appeared first on RVA KCHO.

Ng’kheng nak gah vai.

Mindat Chin RVA — Tue, 26 May 2026 05:01:52 +0000

Cun kon-ah Petru nawh “Mät-ah om ci phung nòng ghüt neh ning läk-èi,” ci hleih, Jesu nawh m’sàng bà neh a piéin cuh, “Nangmí àm, a k’càng-ah ka piéin cuh, kei-ah phäh-a boh, Evangeli (zèi tu vai-ah k’chü)-ah phäh-ah boh, im, phäí-nàü gùi, nu bè gùi, nú pá, htá gùi, lung khàw gùi nòng ghüt ci nawh, ghin zah mät ung zái-cã zo’kànák awn a kong ät-ah, im Phäí-nàü gùi, bè gùi, nú pá gùi, htá gùi, lung khàw gùi phia vei, sih kon-ah phih a k’cum-ah ghinnák cuh, kä gah neh kä kia khai. Mà te t ci gùi, hngú lo khai gùi. Hngú te te ci gùi mà lo khai gùi.”

The post Ng’kheng nak gah vai. first appeared on RVA KCHO.

The post Ng’kheng nak gah vai. appeared first on RVA KCHO.

Bä ca Philip Neri

Mindat Chin RVA — Tue, 26 May 2026 04:56:12 +0000

Bä ca Philip Neri cuh 21^st July 1515,Florence ,Italy ung ng’tüom tu ci.

Ani cuh anu be gui ung a (2) nak a kya ci. Ak’hmohta ah ung “good little phil’’ ciah ami chü ah kya ci.A khokum 18 gok lo hlei San Germano ciah htei tu nei akhok’chang gui ong om tu ät ci. A cu ka no khàngpughü ah mong lam cuh shin lo tu ci.

Kum 1533 ung Philip Neri cuh Rome ah hteit neh Tutor tumat ah kya lo ci. Ani cuh am’lung m’yom’nem neh k’chàngdu gui cuh m’hteim’tha gui ci.

Ani cuh khànpughü kyüt-a neh ani ah ng’shunhei ca k’chàng tumat ah kya ci.

Kum 1596 ung Congregation of the Oratory ci cuh m’düh ci neh k’chàng gui ah nibä nak vai bilo ci. Ani ah Congregation of the Oratory ung ng’mümm’chà lam kavai ni,ami pumkyä ah ng’phät na gui cu k’tana neh bi pe gui ci.

Philip Neri cuh kum 1551 ung Boiphaya tumat ah kya lo tu neh Congregation of the Oratory cuh khongmang ci.1575 ung cuh ah Congregation cuh Papashàngpughàng Gregory XIII noh abä tu.

Bä ca Philip Neri cuh akhokum 80 ape nak 1595 ung shit ci.Kum 1622 ung Bä ca k’chàng ah ahtintaw noh am’dü.Ani ung taigui shushan nak bi ci gui cuh ami ng’yahhlü gah ci gui.

The post Bä ca Philip Neri first appeared on RVA KCHO.

The post Bä ca Philip Neri appeared first on RVA KCHO.

K’Chò Khó a kkòtüî lah géitkò mòòng

Mindat Chin RVA — Tue, 26 May 2026 03:33:43 +0000

K’Chò Khò cuh ng’phlän pyi ca kum phya yah ung avan ung ghàm bé neh om man ci. Acun ah khò gham ghong ah akya ah phäh ah khotui kho k’â phih ni neh kho nglei phih ni hleih geit phih kholo ci phung noh akya ah m’hlep mkhoi man ci gui.
Cun tu láng pang ah phih ng’phlän pyi ca kum 50 ung lèng neh kchang gui cuh da lo pi hti neh kho vo neh lo kyang neh bi cuh avan noh ng’ngaih ah kä ng’kyüh ngyah lo ba ci gui.
A kdá noh ami vok lo ah kya neh kho kä gham lo ba neh kpu lo yop netah nglei mdek phih kä ni lo ba neh akni ah kä ngläh ng’an kä vui pai hngin cèi lo ba hleih mhlep mkhoi neh khäm tong nak kä om lo ba ci.
A cun ah kya lo chütah a mshah noh kchei pai ahlühlü shui neh yoi tu neh ngui ghui shui lo ci gui. Ami pei ah bung hngu ung om ca kchei pai gui maih lo hleih thui gham yung ah hteit neh ng’cuh na ng’gang en neh shuilei lo ci gui.
A khngu ah ghingnu ghampa gui ung phung ghing ca kcheipai gui chu ton ton neh sui lo u hleih thui gham gui ngnü kpu lo neh tui gui kyêim lo ci.

Khotui kho k’a phih kä ni ba ne kho phih ngling lo pihti ca kya ci. Akni ah ktäih neh hngu hmat ci gui noh ami pyein nak ung kcheipai gui cuh kho kkhi ung om ca kä ni ca akhu gui akthu shin gui mtheing mhtaih ci gui ci neh ami pyein gui cuh teng ah akya ung K’Chò Khò ung ayan kah on kä täng ca goige nak gui a om lo cuh ngngaih nak vai ah kya lo ci.
Acun ah nglak ung 2005 yah Htum K’Cho Kho pum ah kpui hlo lo neh geitko gui mdi lo yop hleih ei ok vai gui ngcet lo chütah a hoi phih kä hteh ah kä dong khton nghloh nghngih neh om man ca Kanpetlet lah Mindat ung om man ci gui cuh Malaysia ah hteit neh nghloh nghngih lo ci gui.
Acun ah akda dong neh ami nghloh nghngih nak kum gha hlok sho lo chütah bung yung ah a bü ah tak ca mtà (ဝဥ) gui man lo hleih acun gui co neh yoi tu lo ba ci gui.
Ngui apí kchu tha ci gui cuh mta gui k’hleih u neh ami mät noh geit neh yoi tu lo ci gui. Akhngu ah avan noh mta geit lo neh acun bäng bäng ami bi lo ah phäh ah a khótüi peingléng ah phäh ah kä nghloi ci gui om lo ba ci.
Acun ah kä nghloi ci gui läi cuh mta cuh geit nak laih laih ung geit ung kshin mdek le gui ken lo pi hti neh kä ni lo ba ci. Acun laih laih ung kum kko gha geit ung akni ah kä tak lo ba ci.
Cun kon ah avan düt ung mta abe ung kho ngling na pi ci ciah a mshah gui noh ami pyein phih om lo ci.
Acu gui ah a khotüi peingleng ah phäh ah kä nghloi ci gui mthong mhlah hnging vai phäh ah kum ksho ei mang hnging vai ah géitko vai ah K’Chò Khò pigo mshah ung ponghtei nak gui om ci.
Acun ah a ksho ghing neh ngtheih pai hleih yoi tu neh ei mang hnging nak gui ung kah leng neh ami geit lo cuh Coffee ah kya ci.

Cun ung amshah noh thopat, lingmaw, laphet gui phih geit ci gui.
Cun ung ghunkho uk ci lam täng ah ka gui noh tängpang neh pigo yung ah chüt hleih ami thählà läi cuh Coffee tumat bäng ah vah kya pha ci.
A kkhan ah a mong lam gui cuh teng ah akya ung tumat bi shüm neh kä kya lo ba hleih tumat ah ngplon ba laih laih cuh hnguh hmat ngah-tŭh a kèn cuh ngdang ca kya ci.
A hei biloh gui lah hnguh hmat gui ahlŭ hlü on mi ghin om tu hnging vai ktha nak vai cuh hlü ba ca kya ci.
Amshah noh a ghunkho hei ung ka gui ah hlo ah pyinnya ahlü-hlü shui hleih amshah noh akthai ah biloh gui, vuh mhtah gui, geitko gui mi bi hnging vai hlü lo ca kya ci.
Tumat noh a bi bä ca ngngai netah avan noh läk neh bi tu ah kä kya en neh
mät ah om nak on nghloi ngpan neh a khotüi ah phäh ah phih plohkheih nak kèn pi ca lam on ghin om hnging vai ah om cuh
K’Khanpughi noh nu pa khtük a tüi yah ung a pyein ah khòmdek mhtei vai a pyein cuh ngngai neh läk ah kya ci.

The post K’Chò Khó a kkòtüî lah géitkò mòòng first appeared on RVA KCHO.

The post K’Chò Khó a kkòtüî lah géitkò mòòng appeared first on RVA KCHO.

Ng’Büh ng’mãng lah Ghin-khàw.

Mindat Chin RVA — Mon, 25 May 2026 03:16:16 +0000

Lam-ung a hteh zah ung k’chàng tumat dàwng lo neh a mà-ah m’khúk-dàwng neh “Ni ’ci-ah Báwi aw, a k’cùm-ah ghin vai-ah, a i-ah ci vai ang?” ci neh Báwi cuh, ng’si ci. Jesu nawh ani àm a piéin bà cuh, “ ‘Ni’ci,’ ci neh a i-ah kia hleih kei, nà chü ang? Khãnpùghí kon-ah, a u phih ni ci-ah kä kia ci. M’Cäinák gùi na hmat-èi. Ami k’chú htá kä plohnák vai. k’Chàng kä ngáwn vai, Kä hlè vai. Kä m’gúk vai. Hlè m’gong kä k’bäi vai. Na pá lah na nú na m’htéi goi vai.” Ani nawh phih, “Báwi aw, sin gùi avan cun tah ka k’hmó zah ge ung lèng neh ka läk-èi pi” ci neh piéin bà hleih Jesu nawh ani cuh, teng neh k’chü k’hngà neh “Nang ung tumat hlü bà ci. Hteit-ä. Na säm kõ phung zoi neh dú-dàwng ci gùi àm na péit ung Khãnmòpí khawh na gah khai. Cun kon-ah lo neh ka hngú-ah nà läk vai,” ci neh piéin hleih, ani cuh, kä zèi neh a m’lung thüi-hleih hteit bà ci. A i-ah kia hleih ci ung a khawh-tang dá ci-ah kia ci.

Jesu nawh a pèi zung-ah teng neh A-hlu-läk gùi àm a piéin cuh, “Khawh-tang ngùi ghùi om ci gùi, Khãnmòpí ghin-khàw-ah, ami gok vait-ah, a kia-ah ’kak khai.” A-hlu-läk gùi cuh, a k’chü-ah phäh ah, a kia-ah cäi-cat ci gùi. Jesu nawh ngamí àm a piéin bà mä cuh, “Ka htá gùi aw, khawh-tang ngùi ghùi äp ci gùi cuh, Khãnpùghí-ah ghin-khàw-ah ami gok vai ka’ci. Khawh-tang gah ci-ah k’chàng Khãnmòpí-ah a luh-a tah, kala-uk ng’piüm k’hngài ung lut thei pí khai. Ngami cuh, cäi lo pihti u neh “Cun-ah a kia ung a u phiòng hnging khai ang?” ci neh ami mät gùi nawh piéin ci gùi. Jesu nawh ngami teng gùi neh a piéin cuh, “Sin cuh, k’chàng-ah k’tha-gui awn, kä kia hnging láng hleih phih, Khãnpùghí nawh kä ci hnging ci-ah kä kia ci. A i-ah kia hleih ci ung Khãnpùghí nawh a i phih ci hnging ci.

The post Ng’Büh ng’mãng lah Ghin-khàw. first appeared on RVA KCHO.

The post Ng’Büh ng’mãng lah Ghin-khàw. appeared first on RVA KCHO.

Htí-théing ci-ah Muh cuh, gah vä.

Mindat Chin RVA — Sun, 24 May 2026 07:25:56 +0000

Khaw hngüp k’chüih-ung-kah, a k’htük hngüp mü hngün-ah, Judeu k’chàng gùi ami kiüh-ah phäh-ah, a-hlu-läk gùi nawh ami omnák-ah im ung k’shoh khai neh ng’üng ci gùi. Jesu cuh, lo neh ngamí-ah ng’lùng-ah ng’düí nehtah, “Nangmí dìm kiäpnák nawh ning om püi gùi hlä,” ci ci. Cun-ah piéin nehtah akut goi lah, avé cuh, k’hmuh tu gùi ci. A-hlu-läk gùi nawh phih, Báwi cuh, hnguh lo u neh a kia-ah zèi tu ci gùi. Leng bà neh Jesu nawh, “Nangmí gùi ung dìm kiäpnák om hlä,” Pá nawh, kei cuh, a na tüih-a hlo-ah, kei nawh ka ning tüi gùi ci,” ci ci. Ngami gùi-ah k’khãn ah muh neh, “Htí-théing ci-ah Muh cuh, gah vä. Nangmi gùi nawh, kat nami m’hlòt péit gùi ung lòt khai gùi. Kat nami tang péit gùi läí cuh a cu ng’tang-ah, kat ung om khai gùi,” ci neh Jesu nawh piéin ci.

The post Htí-théing ci-ah Muh cuh, gah vä. first appeared on RVA KCHO.

The post Htí-théing ci-ah Muh cuh, gah vä. appeared first on RVA KCHO.