RVA KCHO

Bä ca Augustine

Mindat Chin RVA — Fri, 28 Aug 2026 04:53:34 +0000

Bä ca Augustine cuh Kum (1354) Africa, Tacastei mang-go ah ng’tuiom lo tu ci. Ani ah nu cuh ani ka van Shuh a shan pek tu pang ah phih Khanpughi kä yum tu ca apa awng ng’tuiom lo tu ci.

Augustine cuh kum (17) alo yah ung Cathit mang-go ah hteih neh Manisiyat ci ah Khànpùghü kä yum ca k’cháng gui ong om tu ci. Ani cuh Shetkat nak avan bi neh kä nik ca k’hngumi gui awng om ip neh k’chàng She tumat ah kya lo ci.

Bä ca Augustine cuh Akhokum (29) kum ung Italy shungkho ah hteih neh acun ung ka noh Milan Sayataw ah Kya ca Bä ca Ambrose ah ang’thung’hta gui ng’ya lo tu ci.Khohngüp ät ung Boiyeisu ung ang;thongng’hlak vai ka lo ci. Roma (15:14) ung “ Boi Yesu cu hluihlak ah mi sham ne,mi kyä ah ng’yakhlü gui kä mi k’täih ein ko.” ci ah m’cä ca cuh hlu ah ng’thongng’hlak lo ci.

Kum (1387) ung ani ah khokum (32) goh lo hleih Pachsaca mui ung Bä ca Ambrose ah kuh ung m’shinak Sacramentu lak tu ci. A cun ka noh Khànpùghü kavai ah amät noh amät gän-ap ci. Ani ah aguk ghüt ah Caup tumat ung “ Cä täun neh na nik ca nang khanpughi cuh Tubäh vah kei noh ka ning hmat lo tu ci.” Ci ah guh ci.

Acun ah ang’thongng’hlak lo khon ah Boiphaya tumat ah kya lo neh ta kum (1395) ung Hippo Mang-go ung Sayataw ah ami m’duih. Ani cun anikpi ah Hto sham tumat ah kya lo ci. Hnguhmat nak ung nik ca, hlung ca k’chang, ca guk ca k’chang phih kya lo ci. Ani cuh Boiphaya gui ni, maamah gui noh ami läk khin gui cuh guh ci.

Bä ca Augustine noh “ Kei cuh Sayataw tumat ah ka kya tu lang pang ah phih nangmi awng ät tun eh ka om hlu ah kei cuh pahtak’chang tumat ah nei kya ci, ci ah pyein ci.

Khohngüp ät ung Bä ca Augustine cuh PinletuiNu pe ah lam ahteih ah ung ak’hmohta tumat noh kaokhta pyain neh pinletui gui cuh akutm’ya hta awng la neh a shum ba hti cuh hngu neh ta ak’hmohta am “ ca na ci ,I ah be khai na ngaih neh maa “ ci ah Bä ca Augustine noh ci nak hleih ak’hmohta noh “na mät ah luchoh hta awng shingthumkhànpùghü tumat ah mong na ngaihtuih cuh I ah kä kya hining khai, ci ah m’shang ba neh maik e ci. Acun ung Bä ca Augustine cuh phih cä neh poih shut ci.

Bä ca Augustine ah m’hteim’cä gui, ni nak gui awng k’chàng ak’da cuh Khàpùghü ah monglam hmat lo tu ci gui.

Bä ca Augustine cuh Ahtintow lam ung hnguhmat pi ca Sayataw tumat ah phih kya neh Ahtintaw cuh ani ah khongmang neh ta kum (1430) kumu ng Shih ca kya ci.

The post Bä ca Augustine first appeared on RVA KCHO.

The post Bä ca Augustine appeared first on RVA KCHO.

Ng’Làmí ghà-awn m’tu m’tängnák.

Mindat Chin RVA — Fri, 28 Aug 2026 04:43:21 +0000

Cun kon-ah, Khãnmòpí khaw cuh, ng’dàwn khai goi-ah k’Pámihtá lah k’hngumi-htá la-tu goi vai neh mei im ’kot neh hteit ci gùi ah ng’lamitá ghà-awn täng ci. Ngami gùi-ung k’hmà cuh, i kä hnguh hmat ci gùi. K’Hmà läi cuh, hnguh hmat ci gùi-ah kia ci. I kä hmat ci-ah k’hmà nawh mei im lo püi neh chi-tui kä lo püi ci gùi. Hngu-hmat ci gùi nawh mei im lah chi-tui cun phih lo püi ci gùi. A k’chú m’dàwn khai-ah k’pámihtá sok’sü hleih cun gùi avan ngàm neh ip zop ci gùi. Mü khawcoih ah “A’chú m’dàwn khai-ah k’pámihtá lo ci. Dàw vai-ah hteit vä,” ci neh m’la ci gùi. Cun zah ung ng’lami avan cuh, let lo u neh ami mei-im piàngtham ci gùi. I kä hmat ci gùi nawh “Keimí-ah mei-im sih pi ci, nami chi-tui apí htá na pe tu gùi-vä,” ci neh hnguh-hmat ci gùi-ah ng’zoi tu ci gùi. Hnguh-hmat ci gùi nawh “Keimi lah nangmi kavai kä päng vai hleih chi-tui zòi ci gùi-ah hteit neh nami mät-ah phäh-ah nami k’hleih-ung bä tu bà khai,” ci neh piéin bà ci gùi. Ngami cuh, k’hleih vai neh ami hteh zah ung a k’chú m’dáwn khai-ah k’Pámi htá gok lo hleih ana-om ci gùi mah-ah k’chú m’dàwn nák-ah lut neh k’soh-khai ci gùi. Cun kon-ah k’poih bà ci-ah ng’lami gùi lo u neh “Báwi aw, Báwi aw, k’soh na k’hmón tu péit gùi-ä,” ci neh ng’chü ci gùi. “Nangmi-àm, a k’càng-ah ka piéin cuh, nangmi kä ka ning hmat gùi ci,” ci neh piéin bà ci. Cun-ah kia hleih cu k’hngüp cu zah, kä nami hmat ci-ah kia hleih güng neh om vä.

The post Ng’Làmí ghà-awn m’tu m’tängnák. first appeared on RVA KCHO.

The post Ng’Làmí ghà-awn m’tu m’tängnák. appeared first on RVA KCHO.

Ng’Ngaihnák ci lah, kä ng’ngaihnák ci.

Mindat Chin RVA — Thu, 27 Aug 2026 03:34:00 +0000

A cun-ah Báwi-ah lo bà vai cuh, kä hmat-ah kia hleih güng neh om vä. M’Guk èi a lo vai zah cuh, immah nawh a hmat ung a k’càng-ah güng neh om khai. A im ’kiong-ah kä lut-èin hlot khai ah ghung khai. Cun-ah kia hleih nangmi phih ng’ngaih na neh om vä. A i-ah kia hleih ci ung kä nami hmat zah ung k’chàng-ah htá lo khai.

Báwi nawh a mät-ah htá gùi àm èi-áwk vai zah ung m’èi m’áwk gùi neh a k’ní-ah ng’ngaih na neh om ci-ah phàn-ah k’chàng cuh, a u-awn täng ci-ah ng’ngài khai ang? A Báwi a lo zah ung a cun-ah bi neh om ci cuh, bä ci. Nangmí àm a k’càng-ah ka piéin cuh, a mät-ah khawh-tang avan m’htéi hlak khai. Cun tu pang-ah phih, ‘ka Báwi kä lo pha ci. So cang khai’ ci-ah a m’lùng-am ng’ngài neh phàn-ah a k’chàng po gùi tu-that gùi neh áwk-tat ci gùi awn èi-áwk neh om tu ci. Ani-ah kä ng’ngaih-tüh, kä süm hmat zah ung phàn-ah k’chàng-ah Báwi gok lo nehtah Ani cuh, m’cha neh ve-kha k’chàng gùi-awn a kong ät-ah tha khai. A cun zah ung thüi kiahnák lah ha ’kíüt nák om khai.

The post Ng’Ngaihnák ci lah, kä ng’ngaihnák ci. first appeared on RVA KCHO.

The post Ng’Ngaihnák ci lah, kä ng’ngaihnák ci. appeared first on RVA KCHO.

Bä ca Monica

Mindat Chin RVA — Wed, 26 Aug 2026 14:40:01 +0000

Bä ca Monica cuh kum (331) AD, Thagaste ung ng’tui om lo ca kya ci. Katholic Pahtak’chàng ah kyat e ci ani ah aNu noh Africa kho ung om ca kä Pahtak’chang Tagaste awng am’chüm goi.

Imkongkhui gui ung ami Cei,hta kavai amimät ah pumkyä gän up ci ah Nu gui noh ami upa ah bä ca k’chàng ah kya ci. Ani cuh Bä ca Augustine ah aNu ah phih kya ci.

Bä ca Monica cuh Kä ni ca a pighü ah pyeinm’shet nak, omih se awng aomih nak gui cuh Nikca m’lung awng kan neh om ci. Monica ah acei cun phih ei,ot neh ani cuh Tuthat neh kya hti ci. Monica cuh (3) ah hta neh ang’vaipi cuh Augustine ah kya ci. A cei noh ak’hmo gui cuh Pahtalam ung m’shinak Sacramentu ami lak tu vai kä ng’yah hlui ci.

Khohngüp ät ung Augustine cuh goi lo hleih m’shinak Sacramentu a lak tu vai yum neh ta Augustine gai lo ba helih phih apa noh kä yum ba ci. Monica ah Shuh Shan Taigä nak awng ahnu ah Monica ah acei lah apighi cuh Yumtuk’chàng ah kya lo ci goi. Cun phih acei cuh yumtuk’chàng ah akya nak kum ät lo hleih shih ci.

Cun ah ung Augustine cuh kum (17) lo phah ci. Anaa hta goi Navigius lah Perpetua om ci goi. Anu monica noh Augustine cuh Carthage yahteicong ah tui tu ci. Augustine cuh k’chàngkaa gui ong gei u neh shet kat nak ong be ca k’chàng ah kya lo ci. Anu Monica cuh am’lung ah thuihlei neh yanca lo neh kä ei hloh nei, kä ip hloh neh Yanca lo ci. Cun phih ahta Augustine ka vai eihloi neh Shuh shan nak bi ci.

Augstine akhokum (29) lo helih Roma ah heih khai pong hleih Monica phih ng’läk tu ci. Milan ah gok lo ni neh Monica noh ani ah ng’muim’cha lam ah khongmang ca Sayataw Ambrose ah Augustine ah among m’thein tu ci. Bä ca Monica noh khokumsho nu Shuh Shan pek nak kong Augustine cun phih Sayataw Ambrose awng hngu ni neh Khanpughü lam ah ng’thongng’hlak lo ci.

Augustine cuh apüipo gui am m’shi nak Sacramentu lah tu u neh Yumtuk’chang ah kya lo ci. Augustine cuh akhngu ah Sayataw tumat ah kya lo ci. Bä ca Monica cun phih Milan ung om ca k’hngumi gui ah ng’muim’cha lam m’shüm ah kya lo ci. Bä ca Monica noh Augustine am “ ka hta aw, a I noh phih kei ung Yeikyai nak kä nah pe hing ci.Cun phih kei ah ng’ngaih u nak gui kyüm pyi ci’’ ci ah ani kä shih pha ung pyeih shut ci.

Augustine cun phih aNu ashih ong nak Confession ciah Cang’bu aguh ah ung Anu aMonica noh ani ka vai miktuing’hlui awng Shuh a shan pek ah mong cuh guh neh thuihlei ci. Bä ca monica cuh kum(387) 27^th Aug, Ostia Antica, Italy ung shih ca kya ci.

The post Bä ca Monica first appeared on RVA KCHO.

The post Bä ca Monica appeared first on RVA KCHO.

K’phuh hngün awn nami täng ci.

Mindat Chin RVA — Wed, 26 Aug 2026 03:13:45 +0000

Nami dí lo khai néi, nangmi k’chü m’cäi k’süm, Pharisee, ve-kha k’chàng gùi! A i-ah kia hleih ci ung a bók-awn hlup u hleih a k’pung-ah a’kióm-ah ng’dáng neh a’kiong-ah a k’si-ah guh gùi ni, a k’thú-awn bé ci-ah k’phuh hngün awn nami täng ci. A cun-a hlo-ah, a k’pung-ah k’chàng k’ní vai hlü-ah, a ’kiong-ah kä bü k’bü-ah nami om ci.

Nami dí lo khai néi, nangmi k’chü m’cäi k’süm, Pharisee, ve-kha k’chàng gùi! Ce ng’sä gùi-ah ng’phuh hngün co u neh k’chàng k’ní gùi-ah ng’phuhnák vai nami-piàng ci-ah nami piéin cuh, pùghí pá gùi ami om zah ung om tu vai hlü ung ce ng’sä gùi-ah si m’hlonnák ung kä cùm bòi tu vai hlü,” nami ci ci. Cun-ah kia neh ce ng’sä ngáwn ci gùi-ah ng’sòn-ah nami kia cuh, nami mät nawh nami piéin ci. Cun-ah kia hleih nami Pùghí Pá-ah bi k’pha bà khai-ah bi vä.

The post K’phuh hngün awn nami täng ci. first appeared on RVA KCHO.

The post K’phuh hngün awn nami täng ci. appeared first on RVA KCHO.

Angelu ung Pope noh: Mi ng’ngaih lam ah kä hläih en hleih Christu lam mi k’hmòng ko” ci ci.

Mindat Chin RVA — Tue, 25 Aug 2026 08:26:14 +0000

Angelu a k’chî ng’khäh ung Poe Leo 14 noh mi ghinlu lah khomdek cuh Christu on ng’pòngnak a dämtài móòng aktúng ah akya ngah-tüh neh a khngät kä hmat ah lam ung phih ngdüm ngtàng nak om ci ci ci.
Mi ghinlù lah khomdek m’thong m’hlah vai Jesu on ng’pong nak mdäm mtaih neh a khngüp tä akthài ah pyan vai ciah Kyün K’hngüp ,August 23, Bä Ca Peter Ng’dühngün ung Pope Leo 14 noh pyein ci.
”Mi ng’ngaih lam bäng lah pahta ng’shíng nak lam bäng kä shui en neh Boi Jesu akcàng ah ngpongnak khmon vai ah khóngling kpeng ung kchàng k’hlí am pyein ci.Akni pi ah bü nak ah kya tu lang pang hleih phih avan ah yum mi ng’yak mi gah tu düt on Christuan yumnak cuh ashängshäng mi bùi shàn ci ciah pyein ci.
Boi Jesu on mi mät noh mi mät akthài ah ngpyangngtham neh ngphèi ng’et lo pihti neh Jesu ah chü m’shang vai ah na chü gui ci.
Mi hmat k’bät ah tóktap nak gui mi hlùn yah ung Jesu noh a hluläk gui am kei cuh u ang ciah Jesu noh a ngshî cuh Mateiu ah Kyün K’hngüp ng’thukni ung kah Pope Leo 14 noh ngah-tüh ci.
Aktoi ah pyein ung a khngüp tä mi ghinlu ung cá hngün om mòòng ung aktung gui bi ciah akbä tumat ah ngdáng neh kä cung Pa Kkhanpughi ah m’hngi nak ung na khahpüi gui ca Kkhanpughi ah Christu noh mi ghinnak ah khomdek lah mi ghinlu na m’thong m’hlat gui khai ciah Pope noh pyein ci.

The post Angelu ung Pope noh: Mi ng’ngaih lam ah kä hläih en hleih Christu lam mi k’hmòng ko” ci ci. first appeared on RVA KCHO.

The post Angelu ung Pope noh: Mi ng’ngaih lam ah kä hläih en hleih Christu lam mi k’hmòng ko” ci ci. appeared first on RVA KCHO.

Bawi noh Pharisee gui plah gui ci.

Mindat Chin RVA — Tue, 25 Aug 2026 04:01:19 +0000

Nami dí lo khai néi, k’chü m’cäi k’süm, Pharisee, ve-kha k’chàng gùi! Nangmi nawh htüng-gük, nan-nan lah ciza cuh, ng’bum ghà-ung, ng’bum ät nami pe ci. M’Cäinák ung cun-a tah, däm tu bà ci-ah k’chü-’hngànák m’cha m’langnák, ni nák cuh, nami ghot ci. Sin-gùi mà neh bi cang neh k’bum ghà-ung k’bum ät cun phih, nawng vai-ah kä kia neh péit vai-ah kia ci. Lam m’süm ci-ah, k’chàng m’dah gùi aw, nang-mi nawh k’pí tumat phih käbòi èin khai-ah ghung u neh Kala-uk tah nami k’düh ci.

Nami dí lo khai néi, k’chü m’cäi k’süm, Pharisee, ve-kha k’chàng gùi! Tui m’zak, dàwn gùi, a k’pung-ah nami m’si ci. A ’kiong-ah kä chin chin hleih guh nák, kä htí-théingnák bé neh om ci. Pharisee k’chàng mik m’dah gùi aw, tui m’zak, dàwn gùi, a k’pung-ah a théing-thap vai-ah, a ’kiong lam mà neh m’si vä.

The post Bawi noh Pharisee gui plah gui ci. first appeared on RVA KCHO.

The post Bawi noh Pharisee gui plah gui ci. appeared first on RVA KCHO.

Generation Alpha K’hmo Gui M’hting Nak Vai

Mindat Chin RVA — Tue, 25 Aug 2026 02:53:01 +0000

Nu pa ak’da noh cutah k’hmo gui cuh mät yah ka-awn kä täng ba ci ci neh pyein da ci gui-ah kia ci. A k’cang-ah phih kä täng ba ci-ah kia ci.

Generation Alpha ci cuh (2010-2024) k’kyong-ung ng’tüi ci gui cuh hnguh hmat nka k’thai-ah om lo nak-awn ng’tüi lo ci gui-ah kia neh Phone, Internet gui lah AI gui-awn ng’tüi lo ci gui-ah kia ci. Cu kia hleih ayan ka hnguh hmat nak gui düt-awn m’thei m’thang gui neh m’hting gui neh kä gah ba-ah kia ci. K’hmo hta gui-awn kongät tu neh chit-wn phih ng’gui tu hnging vai cuh hlü lo ci.

Caw kia hleih Generation Alpha gui-ah nu pa gui noh ng’thei ng’tham hnguh hmat nak cuh kä kyüh-ein vai hlü lo ci. Lam m’shüm tu gui vai,Phone gui kä mang vai-ah khai gui-ah tah i hlo cha mang vai ci cuh m’thei tu gui vai hlü lo ci. Phone ami mang nak vai aching gui cuh k’bäi peit gui vai. Online vuuk nak (cyberbullying) gui cun phih m’thein m’kan tu gui ge vai.

Hla tha nak peit gui vai.

Ma mong ami ka nak thei vai-ah m’thei tu gui vai. K’chü chum nak gui cuh ami mät noh ami bi hnging vai-ah m’thei gui vai. Ca teng nak vai, im k’kyong bi bi nak gui phih ami bi tu hnging vai-ah m’thei gui vai.

Kat m’hluk vai-ah tah ng’ngaih peit gui vai.

Shi tu chü k’hmo hta gui cuh kyong ca-ah geih nak, kho k’chang gui ng’hnguh ng’hmat nak (social Media) gui-ah geih nak gui-awn güh ci gui-ah kia ci. Ngai mi-gui k’hnga k’phlang gui ci-ah tah ng’ngaih pe gui ca nu pa gui-ah kia vai hlü ci.

Generation Alpha k’hmo gui cuh k’she nak neh phan gui neh gah ba-ah k’hmo hta gui-ah kä kia ba ci gui. Ngami hmat gui pe thei neh ng’ngaih pe gui khai-ah nu pa gui bäng ng’ya hlü ci gui.

The post Generation Alpha K’hmo Gui M’hting Nak Vai first appeared on RVA KCHO.

The post Generation Alpha K’hmo Gui M’hting Nak Vai appeared first on RVA KCHO.

Papa Shangpughang a ng’hngung’tuk püî ah phäh ah Boiphaya ung ka noh ami k’htät.

Mindat Chin RVA — Mon, 24 Aug 2026 08:25:52 +0000

America Ghunkhò Texas ung om ca San Antonio Ng’htòi Uk ung kah Fr. John Mary Fister cuh Pope käh yum lah htahtana ung ka noh ngtáinak(Schism)ah phäh ah Canonnical Tribunal noh pyein pit neh ktàigü ung ka noh k’htätnak(Dismissal from the Clerical State/Laicization)a bi ah mòòng San Antonio Ng’htoi Uk Sayataw Gustavo Garcia Siller noh August 14 ung shä ci.
EWTN Amòòng kthài/CNA noh August 19 ung Fr.John Mary Foster cuh Pope Francis lah Leo 14 goi am ”usurpers”ciah k’hlí ah mà ah chŭ goi neh Leo 14 cuh Pope akcang ah kä kya ci ciah amoong gui cun phih Mission of Divine Mercy on m’tói neh têi neh m’dáng ci.
Fr.John Foster cuh 1987 ung Boiphaya gah neh2009 ung San Antonio Nghtoi ung bi tu ci.2001 ung Mission of Devine Mercy m’düih neh acun ah nghtoi on ngpak hleih Jesu Maria noh ani mthein ah moong ngcuh vai gui shä ci.
Acun ah a shä nak ung Pope Francis lah Pope Leo 14 cuh Pope ah kä kya ci ciah boi lo chütah San Antonio Nghtoi Uk Sayataw noh käh pyein en ba vai lah a ngyu ba vai ah pyein hleih phih Fr.Foster cuh k’däih neh líng ciah Catholic Amoong kthai gui noh m’dáng ci gui.
Cun kon ah Vatican ah Dicastery for the Doctrine of the Faith noh a kbäi ah Canon Law Tribunal cuh 2025 kum April 10 ung ka noh lèng neh Boiphaya Foster ah pyeinhlak gui,biloh gui,m’theimthang gui ktäih neh kum ät bilo netah 2026 April 20 ung Schism katnak ah phäh ah kat om ciah kbäí ci.

Canon khännak upatei cun phih shin ah mòòng ung aktung ah kya ci.Canon 751 ung Schism ci cuh Papa Shangpughang kä cun ung Papa shangpughang on ät ciah htahtana kboi gui on ät ah mòòng kä yum nak ciah kbäi pyi ah kya neh Canon 1364 / 1 ung Schismatic tumat cuh latae sententiae excomunication-kbäînak ah amoong gui on a ngkyüm lah amät ng’htät nak gah ci.Cun kon ah Papa Shangpughang noh phih boiphaya ung ka noh k’htät hnging ci ciah moong Vatican ah Code of Canon noh akbäi ah kya ci.

The post Papa Shangpughang a ng’hngung’tuk püî ah phäh ah Boiphaya ung ka noh ami k’htät. first appeared on RVA KCHO.

The post Papa Shangpughang a ng’hngung’tuk püî ah phäh ah Boiphaya ung ka noh ami k’htät. appeared first on RVA KCHO.

Bä ca Bartholomew

Mindat Chin RVA — Mon, 24 Aug 2026 03:46:17 +0000

Bä ca Bartholomew cuh Canan kho ah ami hta nak. Ani cuh k’chàngak’dà ah khan ah m’lungni tha neh m’hteim’hta tu gui ca k’chàngni tumat ah kya ci.

Ani ah aghün-om nak ung Dudong neh yai-ca ci ah k’chàng gui cuh atung pi ah gu tu gui ci. Boi Khânpùghü cuh na tuipyan ca Pa ah kya hleih Yum äp neh m’shumm’chuk vai, Boi cuh ng’ngaih u vai, m’hin vai lah mi mät gui ah biloh, Hmàkat gui ah phäh ah thüi hlei neh mi ng’Yu bà vai hlü ci, ci ah Boi ah hluläk ca k’chàng gui m’cäim’ä gui ci.

Ani ah omkya ni awn kä hnguhmat nak ung ka noh hnguhmat na ung, Hnguhmat nak ung ka noh m’hni nak ung, m’hni nak ung ka noh k’chàng gui Guhtoh nak ah gok hlieh biloh vai ci cuh m’theim’cäi neh Lam m’shüm gui ci.

Ani noh Khânpùghü I ah a m’hin cuh amät ah sihla ah toktap kä läk neh apumkyä mät Khânpughü an gän up ci. Bä ca Bartholomew cuh Boi Yesu khanmopi ah akai bac un phih hngu tu ca bä ca k’chàng tumat ah kya ci. Indiaghunkho ah phih gok neh Khanpughi ah mong thähla ci.

Amenia ah hteih neh Ameinia ghunkho Boi cuh ng’thongng’hlak khai ah bem’cä hinh hleih Yumtu k’chang tumat ah kya lo tu ci. Angu ah Bä ca Bartholomew cuh Anaa ah kya ca Polymius noh ngon neh alu m’chün neh shingm’kantung ung a thai.

Bä ca Batholomew cuh m’shi yoi ca k’chàng gui, khodok bi neh yawituk ca k’chang gui guhtok gui ci lah Lu m’nek nak hmaih ca Bä ca k’chàng ah Ahtitho noh am’düh.

The post Bä ca Bartholomew first appeared on RVA KCHO.

The post Bä ca Bartholomew appeared first on RVA KCHO.