RVA KCHO

M’Thei m’cäi k’thài cuh a k’phiüm-a tah bä pí ci.

Mindat Chin RVA — Fri, 27 Feb 2026 04:01:20 +0000

A i-ah kia hleih ci ung nami om kia cuh chü m’cäi k’süm gùi lah, Pharisee gùi-a tah kä bä tu bà ung Khãnmòpí-ah kä nami gok khai ci neh ka piéin ci. Cáü, pù pá gùi-àm, “k’Chàng kä ngáwn vai: k’chàng ngáwn ci cuh zùng im-ah, m’cha m’làng-ah kia khai,” ci neh ami m’cäì, nami ng’za tu màn ci. Kei nawh nangmi-àm ka piéin cuh, a u pang-tah a phäí-nàü gùi a ú-gen düit ung phih, ani cuh, zùng im-ah m’cha-m’làng-ah kia khai. A phäí-nàü gùi àm, nang a k’gù k’pang ci neh a sài-nák-ung phih, hluki gùi-ah mà-ah, m’cha-m’làng vai-ah chîn ci. A phäí-nàü gùi àm, a k’gù cinák ci nawh phih, m’htèi-khàw mei gah chîn ci. Cun-ah kia hleih, a-i-phih khawih-hngah vai neh ng’bum im-ah lo k’hläm nehtah na phäí-nàü gùi nawh kat tumat kù ami ning k’bün vai om hleih, a cu khaw im-’kiak-ah, na süm bà ung” na khawih-hngahnák vai cuh, nawng-èin ghütneh ng’hlat bà neh na phäí-nàu gùi na ng’gèi bà püi gùi cang vai. Cun kon-a vah, lo bà neh na khawih-hngah vai. Nang àm, kat ning k’bün ci-ah k’chàng awn, lam ung nani ng’gui ät zah ung m’lùng ng’ngaih nani ät bà vai-ah, k’sèng neh na ci vai. Kä cun-ung, Zung Báwi-am ning m’ap khai. Zung Báwi nawh thong Báwi-am, ning àp hleih, thong Báwi nawh thong-ung ning chúm lo khai. Thúng vai-ah ngùi,a pihtá phih kä k’poih eìn hleih, kä na thúng phã phùng ung kä na lut lo bà khai ci neh a k’càng-ah ka piéin ci.

The post M’Thei m’cäi k’thài cuh a k’phiüm-a tah bä pí ci. first appeared on RVA KCHO.

The post M’Thei m’cäi k’thài cuh a k’phiüm-a tah bä pí ci. appeared first on RVA KCHO.

Bóiphaya Kyüi K’Khui Om ah pyéinhlak

Mindat Chin RVA — Fri, 27 Feb 2026 01:47:00 +0000

KChò gui ah yùmnak lah akhòtüî pèingléngBói ah pyéinhlak ciah ah gukthén pyéinhlak ah akya ung Bói Jesu ang? kä cun ung Bóiphàyà ang ciah aktén ah kä hmat phya khai ah kya ci. Aktôi ah pyêin ah akya ung Bòiphàyà noh Bói Jesu ah a pyéinhlak gui cuh KChò ngthû on KChò Thùng on mhlat neh a pyéin ah kya ci. Bóiphàyà Kyüì Kkhúi Om noh Kkhòilung Pìgò Ngcut ah a lo ba tä hleih Pìgò kchàng gui ung nggó nggài pí kbäih neh ami ngcuhngcan pí kbäih ah lungkhò ngcuhngcan nggenng’am nak ah amòòng cuh pyéin laih laih ciah kya ci. A pyéin pyî laih laih a pyéin ah kya tu láng pâng hleih phih yùm ktû ngbûm pâhtâ kchàng gui noh ami ngbûm lo ba tä hleih Bóiphàyà ah a mcäì m’ä gui avan noh mcûmcèng neh pyéin hla ba htî ci gui ah kya ci.

A i ah kya hleih ci ung shin ah amòòng cuh Kkhòilung Pìgò Ngcut bäng ah kä kya neh a KChòkhò púm ah KChò KChàng gui cuh lungkhò lah khònggî akya ah ngcuh ci gui ah kya ci. Avan noh ami gah vai bäng ngah-tüh neh khò kä tä ah ami ngcuh ah khòmdek cuh khòmdek ah kkhân ah hngang ghin yah ung phih kyai,shih kòn ah ngmùimchà ah ka vai phih kyai a i hlok ah kyih kshé ci cuh hnguh hmat phya gé khai ah ngkháikhapèng hleih a mthêi ah phäh ah kya ci. A cun ah a mthêi mcäì cuh KChò ngthû on Kkhânpùghí Ngthû lah KChò Thùng mcoih neh a mthêi cuh mhteih neh teng ah akya ung KChàng gui noh KChòkhò ah akhòtüî pèingléng gui cuh mhtéimhtâ nak ung ana nghlôi ngpán lo ba khai kya ci. Avâihlü ah a mthêimcäì nak gui ung kah tumat teng lo ah akya ung”Khònggî hlò ci cuh a mät mà neh khòmdek ah nglat lo khai.Ngploh ngkheih lo khai. ”ciah a pyéin cuh a u noh phih a bùichúm tu màn ah amòòng alam ah kya ci.

Tuhchü cuh tumat lah tumat ah khònggî hlô kaih ngcuhngcan bäng ah kä kya hleih k’hlí ah tûikhong ah kya ciah khòpùi thùighàm kplut neh chu dèng neh vo kyang lo u netah hläm ät gôi ami gah vai,ami mät ah yu êi ami mang vai bäng cuh ngah-tüh lo ci gui ah kya ci. KChò gui cuh avan noh lungkho plohkheih hlò kaih ci cuh ngplohngkheih,shikyu neh a kkhúi hngô cì ci neh kyih ci gui.Cun tu pang ah phih amshah noh kä kyih neh khò kä tä neh ami ngngaih ah om ba hti u hleih kpoih ba ci gui cun phih ngami on ngcuh ba bä ci gui ah kya ci. KCho pùghí pa gui noh tuikhong,lungkhò,lamtung,khòghàm plohkheih ci gui ah phäh ah i hlok ah kyihkyok kshé nak gui a om ami pyéin gui om ci.Avaihlü ah”K’hlòigò tu ci a kkhúi cìn ci.Shénglung shep ci a ghêi hmò ci. Pùpì lam khang ci a hngùn än ci.Ghíngghàm kä na chuk vai.

A khngîm na yî hlü khai.Ghípá ngvái kä na mthüî vai.A kchî na ngngai hlü khai.”ci gui ah kya ci. Shin ah KChòkhò ah a khòtüî pèingléng ghunmhtéi nak ung KChò gui noh khòmdek tuikhong bungghàm plohkheih ung a i hlok ah nggheih ngbah neh a kyih kyok kshé gui cuh mtheimthang ci adá lo ah akya ung chüt gok khai ah kya ci. Cun cuh mkyihmkyok gui düt ah kä kya en hleih ngphlän pyi ciah hluhngün om mòòng gui ung hnguh tengteng ah a i ah ana a kya vü ci cuh mdáng gäkgäk neh akdá noh akcàng ah bilô neh mthêi laih laih ah akya ung akhòtüî péingléng cuh ngthong nghlat neh ni lo ba khai kya ci. A i ah kya hleih ci ung Kkhânpùghí noh khòmdek lah khòmdek ung om ci gui avan tüì khmüt netah kcháng am a àp te cuh kchàng van bä noh a pyân ba vai ah mi mà na ciah kya ci.

Inviroment

The post Bóiphaya Kyüi K’Khui Om ah pyéinhlak first appeared on RVA KCHO.

The post Bóiphaya Kyüi K’Khui Om ah pyéinhlak appeared first on RVA KCHO.

Bä ciah Francis Gariel Possenti ah ghünlu a mong

Mindat Chin RVA — Fri, 27 Feb 2026 01:42:00 +0000

The Lady’s Man ci ne a mi yei nak m’dang ne a ming a mi chü ah k’pyangmi hta tumat ah kya ciah Fancis Gabriel cu Christu kum 1838 March k’cha 1 ung Italy ghunkho Assisi Mânggl ung ng’tüi ciah kya ci. A nu pa no a ng’tüi yah ung a ng’ming a hlui cu Francesco Possenti ah kya ci. A ni cu a müi hla lah a dung kyä ah a kya ah kyom ne kya hleih poi a mi bi nak ah a k’cum ah cumboi tu hnging ciah kya ci. K’hngi vei a kya ah goi ne kya lo ne ta Yahteih kyawng ah lut tu khai ah a m’lung phupit ciah kya ci. A ni ah m’lung m’cha cu Khanpughi lam ah a kya ah coigha ne kya ciah kya ci. Party poi gui ung hteit ne kya cu a ni ah phäh ah yeikyai nak ah kä kya lo ba ne bongbai nak düt ah kya ci-ah ng’ngai lo ci. Yum nak lam gui m’dang nak ung lam ah k’khan ah ng’tän ne hteit ne kya ciah k’chang ng’bum gui ah hngu ah a kya ah thählei ne kya ciah Nu Maria ah a müihmai a mi pyan tumat k’kot ne lam k’khan ah hteit tu ciah k’chang tumat cu Francis no hngu ciah kya ci. A cun ah a Nu Maria no “Francis, Kho m’dek cu nang ka vai ah kä kya ba ci-ah k’o cu a m’lung k’kyong ah ka no ng’yak ciah kya ci. A cun ah k’o no a ni ah m’lung k’hnga ng’thong hlah hlak ciah kya ci.

A khokum 18 ung Yaica buiawt nak Yahteih ng’htoi ung lut tu ne ta a cun ah Yahteih ng’htoi cu Gabriel of the Sorrowful Mother ci ne a ng’ming a m’thong ah kya ci. M’lung m’yo m’nem nak lah Khanpughi lah k’chang gui ah k’khan ah ng’ngaih nak cu a ni ah ghünlu ah k’tha peit nak ah kya lo ci. A ni K’chang gui no a ni a mi k’shing cu a kya ah yeikyai ciah m’lung k’nga ah kya ci. Yahteih kyawng ung hteit htong ghüi ne kya cu a ni ah phäh ah yeikyai nak ah kya ci. A ni cu a cop kä ni hleih a kho kum 24 ung shi ciah kya ci. Tuhgüt chüt k’chang a k’daa ah üm m’nai tu ah bä ciah k’chang tumat ah kya ci.

The post Bä ciah Francis Gariel Possenti ah ghünlu a mong first appeared on RVA KCHO.

The post Bä ciah Francis Gariel Possenti ah ghünlu a mong appeared first on RVA KCHO.

Kä ng’chüt hleih K’Tài-gü vai.

Mindat Chin RVA — Thu, 26 Feb 2026 03:57:54 +0000

Sàng vä. Nami gah khai. Sùi vä. Nami hnguh khai. Khäk vä. Ng’hmòng lo khai. A i-ah kia hleih ci ung Sàng ci nawh gah ci. Sùi ci nawh hnguh ci. Khäk ci àm, k’hmón péit-ah kia khai. A Htá nawh m’htut sàng hleih lung pe khai nangmí ung a-û om ci ang? Ngá a sãn ung k’phiù pe khai ang? Cun-ah kia hleih, se láng u neh nami htá àm a k’ní nami péit-ung, Khãnmòpí-ah om ci-ah nami Pá cun nawhtah ani-ah sàng ci gùi àm, a k’ní gùi cuh cun bäng-ah kä kia hleih, pe khai-ah kä kia ci ang?

K’Chàng gùi nawh ami ning kianák gùi vai nami ng’zák hlü-a hlo-ah, nami mät nawh phih k’chàng gùi kianák gùi vä. Cun cuh, m’cäi cã lah ce ng’sä gùi-ah ng’zák hlü-ah kia ci.

The post Kä ng’chüt hleih K’Tài-gü vai. first appeared on RVA KCHO.

The post Kä ng’chüt hleih K’Tài-gü vai. appeared first on RVA KCHO.

Papa Shangpughang ah ng’thu

Mindat Chin RVA — Thu, 26 Feb 2026 02:47:00 +0000

Shih nak ung ka ghüng lo ba ciah Boi Yesu awn a k’cang ah ng’hnguh hlü ah a kya ung k’pyhon nak ah ng’thu k’ni ah kya ciah Boi ah ng’thu cu ng’ngai ä. Om k’ih gui ng’ngahtüh ne nga tu ba ciah k’chang vai hlü ah kya hnging vai ah taga nak gui shui vai ah kya ci. Duyai k’chang gui m’htei m’hta ne mät no mä ah phe ng’leng ng’khot ng’et nak gui ung ka ng’yak hlü ah ni ciah bi loh nak gui m’dang vai. A ng’täih ah ghün nak ah kya ciah shihla ( Eucharist) ung om ciah Boi Yesu awn ät ne om ä. Boi Yesu no a bi ah hlo ah m’hngi nak awn bi bi ne ng’thei ng’thang vä. A ni cu mi k’mi gui ah pei ah a kong ät ah lam hteit ne ni ci na m’thei m’thang gui ciah Saya ah kya ci.

Source: Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Bä ciah Paula Montal ah ghünlu a mong

Mindat Chin RVA — Thu, 26 Feb 2026 01:34:00 +0000

Bä ciah Paula Montal cu Christu kum 1799, October 11 ung Spain ghunkho ung ng’tüi ciah kya ci. Spain pak’khui k’chang ah kya ciah Paula cu a khokum gha a lo yah ung a pa shi ciah kya hleih a be gui ah hnguh hmat nak lam ung ca a mi ng’thei ng’thei ng’thang nak vai ah a nu awn a täng ah lace fabric bi nak cu leng ne bi ci goi ah kya ci. Christu kum 1801 lah 1900 a ng’thong hlah nak cu Spain ghunkho ah ngoiä shümlä nak vai yaica nak gui a k’daa a mi buiawt yah ah kya ci. Cuntu pang ah phih a Paula cu a mät ah ghünlu a k’ni ah ng’shung hei khai ah pyangtham hnging ne dìmkyäp khai ah om ciah kya ci. Christu kum 1829 ung Paula cu Lace fabric bi nak a m’thei m’thang nak awn nguui shui ne k’hngumi hta gui ka vai ah kyawng tumat co ciah kya ci. Christian ung m’thei m’thang nak gui phih a cun ah kyawng ung om ci gui no a mi hmat vai ah m’thei m’thang gui ciah ah kya ci. A k’hmo hta gui am Khanpughi ah m’hngi nak gui a m’thei m’thang nak awn k’kyongkhui gui ka k’pyhon gui hlü ci ci-ne pyein man ciah kya ci. A ni ah I loh gui cu kho m’dek pum ung yat ciah kya ci. A ni no kä shih pha ung a pyein cu “ Nu.. Ka Nu” ciah k’chü m’kha cu a ni m’htei ne k’äih ci gui no a mi pyein ba hti ah kya ci. Bä ciah Paula Montal cu Christu kum 1889 February 26, a kho kum 89 ung shi ciah kya ci.

The post Bä ciah Paula Montal ah ghünlu a mong first appeared on RVA KCHO.

The post Bä ciah Paula Montal ah ghünlu a mong appeared first on RVA KCHO.

Jonah-ah a màwng piéin ci.

Mindat Chin RVA — Wed, 25 Feb 2026 03:54:42 +0000

Ng’Bum lo ci gùi-ah k’chàng gùi-àm, leng neh a piéin lo cuh, “Sin-ah k’chàng gùi cuh se ci gùi. Cäí-nák vai sàng ci gùi. Jonah-ah màwng-ung, cäinák vai-ah kon-ah, a i phih kä k’hmuh gùi vai.

A i-ah kia hleih ci-ung, Jonah cuh Nineveh k’chàng gùi-a phäh-ah cäinák-ah, a kia-a hlo-ah, sin-ah k’chàng gùi-àm phih, k’chàng-a htá cuh, kia lo khai. M’Chã m’làngnák-ah k’hngüp-ung, gam khaw-a kah Sàngpìghang nawh sin-ah k’chàng gùi, m’cha m’lang lo gùi khai. Solomon-ah k’chü ng’htà ng’ngaih khai-ah, khaw k’còi-a kah lo ci-ah kia ci. Sin läí-ung Solomon-a tah, bä tu bà ci om ci. M’Cha m’làngnák-ah k’hngüp-ung, Nineveh k’chàng gùi nawh sin-ah k’chàng gùi, m’cha m’làng lo gùi khai gùi. Ngami cuh, Jonah nawh piéin hleih ng’zu bà ci gùi. Sin läí-ung Jonah-a tah bä tu bà ci om ci.

The post Jonah-ah a màwng piéin ci. first appeared on RVA KCHO.

The post Jonah-ah a màwng piéin ci. appeared first on RVA KCHO.

Bä ciah Tarasius ah ghünlu a mong

Mindat Chin RVA — Wed, 25 Feb 2026 02:31:10 +0000

Bä ciah Tarasius cu Christu kum 730 yah ung Constantinople ung ng’tüi ciah kya ci. A ni cu bä ng’mang k’chang k’khong khui ung ka no ng’tüi ciah kya ci. A ni cu k’chang gui no a k’ni ah kä mi k’shing ah bä ciah k’cahng tumat ah kya ci. A ni cu khokum gha bäng lo pha ciah Shangpughang Constantine VI lah a nu Shangpinu Irene ka vai ah ghunkho a ng’vai tumat ah kya ne bi bi ciah kya ci. Tarasius cu ghunkho ka vai ah bi bi ah k’phe ah yum nak lam ung phih a k’ni ah k’tha na ne läk ciah kya ci. Christu kum 784 ung a ni cu yum tu ng’bum a ng’vai ah kya khai ah a mi m’hlüng m’tai nak cu do ne Bä ciah k’chang gui ah gùp gui lah shümlä ne üm vai ah ng’kho gui a k’ni ah a pyantham ba vai ah leng ne k’tha na ciah kya ci. A ni ah ghünlu cu thei bang tu hlü vai ah kya tu lang pang hleih phih Shangpughang Constantine awn a ni gei ah phäh ah a ng’ming a k’she ah thang ciah kya ci. A í ah kya hleih ci ung Shangpughang Constantine no a k’chu nong ba ne a phan k’chang k’hngumi hta a om tu ba püi ah phäh ah kya ci. Tarasius no Shangpughang am a cun ah a ci cu kä cang ciah kya hleih a cun ah a ci cu kä ni ci ci-ne m’cäi ne k’nga k’phlang tu lang pang hleih phih yum nak lam ung khong mang ci gui no a mi pyein ah kya ci. A k’cang ah a ni ah buitawt gui cu a u no phih kä hmat ciah kya ci. Tarasius cu Christian yum tu ng’bum ung bi a bi nak cu kho kum 21 peng peng a be ah chüt hleih k’tha na ne bi lo ne ta Christu kum 806 ung shih ciah kya ci.

The post Bä ciah Tarasius ah ghünlu a mong first appeared on RVA KCHO.

The post Bä ciah Tarasius ah ghünlu a mong appeared first on RVA KCHO.

Mi Ghün Om Nak ung-ah Khanpughü-ah Nu

Mindat Chin RVA — Tue, 24 Feb 2026 05:54:21 +0000

Yeisu Bawi noh anu Maria-ah shan nak-awn a k’htük pi-ah m’yung aa cuh Canon Mango-ung tui cuh Capyit tui-ah m’thong neh m’dang ci.

K’kyong mah gui-ah ami capyit tui cuh ng’pyi hleih hnguh ca Nu Maria cuh a m’lung kä ni lo hleih a hta Yeisu-ah a shan peit gui-ung gah khai-ah hmat ge ci. Yeisu noh phih ani cuh aching kä gok tu pha lang hleih anu-ah shan peit gui-ah phäh bi pe gui ci. Lung k’hlüng gui-ung tui cuh be khai-ah m’cun hlak gui neh ak’tui k’hlim pi-ah capyit tui-ah lat ci. Bawi Yeisu noh shing m’kang k’tung-ung ashih lo vai-ung “Nang k’hngumi na hta teng-ä” ci neh pyein ci. Cun cuh John-am cein cuh na nu ci neh apyein hlü-ah kia ci.

Cun cuh John bäng-am apyein-ah kä kia ci. Christian gui van-am apyein-ah kia neh yumtu ng’bum gui van-am Maria cuh nami nu nei ci neh a pyein-ah kia ci. Yeisu Bawi mät cuh Adam a k’thai-ah kia ci. Ani-ah shih nak cuh Adam-ah beit kä ng’yak nak cuh beit ng’yak nak-ah ng’hlat lo ca kia ci. Eve noh beit kä ng’yak te cuh Nu Maria-ah beit ng’yak nak-ah ng’hlat lo ci.

Hti theing Muh Khanpughü akyum lo yah-ung Nu Maria cun phih hlu läk ng’shä gui-awn atäng-ah om tu neh ani-ah k’taigü nak tu cun phih yumtu ng’bum-ah ng’yäk ng’chan nak vai phäh-ah gung tu nak-ah kia lo ci.

Nu Maria cuh kho m’dek khan aom nak ng’päng lo hleih akyä lah a ng’mü m’cha cuh khamopi-ah kai püi ci gui-ah kia ci. Cun cuh Nu Maria Khanmopi-ah ami püi nak k’hngüp ci neh chü-ah kia ci. Cun-ah k’hngüp cuh m’tupi k’cha (15) k’hngüp-ung bi-ah kia ci.

Nu Maria cuh Khanmopi-ah om neh yumtu ng’bum pum-ah nu-ah phih kyai k’chang shing tumat hti-ah nu-ah phih kyai na teng gui neh na m’htei gui ci. Nu Maria cuh vuuk mi hnguh yah-ung na gung tu gui neh mikmi ka vai-ah Khanpughü-ah ma yah na ng’hui tu pe gui ci.

The post Mi Ghün Om Nak ung-ah Khanpughü-ah Nu first appeared on RVA KCHO.

The post Mi Ghün Om Nak ung-ah Khanpughü-ah Nu appeared first on RVA KCHO.

I-ah k’tài gü vai.

Mindat Chin RVA — Tue, 24 Feb 2026 03:50:05 +0000

Nami k’tài gü lo ung phih, kä zùm ci gùi vai hlü-ah, k’chü a k’dá kä nami piéin vai. A i-ah kia hleih ci ung ngamí nawh a k’dá ami piéin ung vah, ami sãn bé khai-ah ’ngài ci gùi. Cun-ah kia hleih, ngamí kä nami bang eìn tu gùi vai. A i-ah kia hleih ci-ung, Nangmí ung hlü ci gùi cuh kä nami sãn pha gé ung nami Pá nawh hmat ci. Cun-ah kia hleih, si chà-ah nami sãn vai. “Khãnmòpí-ah om ci-ah kami Pá aw, na ng’mìng m’tãm vai-ah kia hlä. Na bänák avan ung zat hlä. Nang ng’zák hlü Khãnmòpí-ah ami ng’ngaih a hlo-ah, khaw m’dek-ah ’khãn ah phih kng’ngaih tu vai-ah kia hlä. Tuh-ngói hlü ci-ah èi vai cuh, na ’chü hngà tu gùi-ä. Na katnák ci gùi, kami m’gein-a hlo-ah, kami ning katnák cun phih na m’gein tu gùi-ä. Kat lamcuh na m’choh gùi neh khaw-’nget ung-kah, na k’phión tu gùi ä. Amen.”

A i-ah kia hleih ci ung nangmi nawh k’chàng gùi-ah kat, nami k’phión-ah a kia ung Khãnmòpí-ah om ci-ah nangmi-ah pá nawh phih nangmi-ah kat gùi cuh ning k’phión gùi khai. Nangmí nawh k’chàng gùi-ah kat kä nami k’phión läi ung nami Pá nawh nangmi-ah kat kä ning k’phión gùi khai.

The post I-ah k’tài gü vai. first appeared on RVA KCHO.

The post I-ah k’tài gü vai. appeared first on RVA KCHO.