PAPASHANGPUGHANG - RVA KCHO

Papa Shangpughang ah ng’thu

Mindat Chin RVA — Mon, 06 Apr 2026 03:55:08 +0000

Boi Yesu ah ghün lo ba nak ah k’hngüp cu Khanpughi no kho m’dek a tüipyan yah ah a k’htük pi k’bäih tüipyan nak cu na chü ba gui ciah kya ci. Boi Yesu shih nak ung ka na a ghün lo ba nak ah poi ah kya ciah Ester no mi mi gui ng’ngaih u nak a ngoi ah phih kä ng’kya ein khai ah na k’hmon pe gui ci. Boi Yesu shih nak ung ka ghüng lo ba ci a mong Ester no a thähla cu a ngoi ah phih kä ng’kyak hnging khai ah ng’ngaih u nak, a ngoi ah phih kä k’hngüp khai ah a k’khang, a í no phih kä k’hmaih hnging khai ah yeikyai nak a k’be cu mi mi gui am na m’shüm gui ci. Tüipyan nak a van cu a k’khang a k’thai awn däi cang ciah kya ci. m’hlüng m’tai nak ah ng’äi ung a om ah hlo ah Boi Yesu cu shih nak ung ka ghüng lo ba ne Boi awn a täng ah mi mi gui phih ghünlu k’thai awn mi ghüng tu ba khai ah kya ci. Ester poi cu yeikyai nak a k’be lo püi ciah kya ci. Boi Yesu shih nak ung ka no a ghün lo ba nak ah Ester no a thähla cu mi mi gui ah ghünlu ah thûk ci lah ngoiä shüm lä vai ah a mong gui cu k’pom ciah kya ci. Mi mi gui cu a kya ah mi m’lung ng’kya ne mi thüihlei yah ung hngo Ester poi no a k’cum ah ng’ngaih u nak na pe gui ne a k’khang na m’shüm gui ci.

Source: Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Papa Shangpughang ah ng’thu

Mindat Chin RVA — Thu, 02 Apr 2026 03:46:00 +0000

Yumtu k’chang gui (Lay people)cu dìmkyäp nak a van ung a gok hnging vai ah Yumtung’bum gunhtot ci gui ah kya ci. Khanpughi ah ng’k’ni m’dang ne yumtu ng’bum ah bi loh nak ung yum tu k’chang gui (Lay people) gui cu a k’tung ah hlü ciah kya ci. Lay people gui ah gunghtot nak, gänap peit tak nak lah yum nak gui m’dang ne cu taga nak, hlü ci gui gunhtot nak lah dìmgei nak gui k’chang gui päng ung a gok vai ah bi loh nak ung ngami gui cu a ng’htei ah hlü ciah kya ci. Khanpughi ah mong lam bi lo ci gui ah Lay people gui ah ng’shong ciah a mi bi loh nak cu yum tu ng’bum bäng ah kä kya ne kho m’dek pum ung yat ciah kya ci. Lay people gui lah ngami gui ah bi loh nak gui cu Khanpughi no a ghü gui ah k’chang gui awn ät ciah kya hleih Boi Yesu Christu ung täng ciah dignity ng’pai nak ung ng’hlüh ciah kya ci. Khanpughi ah k’chang gui cu Boi Yesu ah Taigü k’tung ah a kya nak ung cumboi tu nak mong goi ah kya ciah yum tu k’chang gui ah ng’bum lah Khanpughi ah bi bi lo m’thei m’thang ci gui ah Taigü k’tung gui ah ng’lak ah ni bä nak vai ah ng’hnguh ng’hmat nak awn pyantham ah a ng’bum ah kya ci. Lay people gui cu m’shi nak a mi ci tu nak awn Boi Yesu ah Taigü k’tung ah a kya nak ung cumboi tu ci gui ah kya ci.

Source: Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Papa Shangpughang ah ng’thu

Mindat Chin RVA — Mon, 30 Mar 2026 03:52:51 +0000

Boi Yesu cu ng’tukah nak gui pheng ne ng’tukat ci gui ah k’taigü nak gui kä ng’ngai ci ci ne Papa Shangpughang Leo no pyein caih kya ci. Ghatghum nak gui no a k’ui yah ung phih Boi Yesu cu dìmkyäp nak ah Shangpughang ah kya ne a mät no a mät m’dang ciah kya ci. Boi Yesu no shing kang k’tung k’kot ne a hteh nak ah lum ung a peit tak ah a thüihleih yaica gui mi ng’ngahtüh ko. K’chang gui no ghatghum ne kalu mang ca nak gui a mi bi yah ung Boi Yesu cu hngiphngäi nak ung khäng htek hleih om ciah kya ci. K’chang hei gui no k’chim ni, htung ni a mi k’shäi ah hlo ah Boi Yesu cu k’chang gui k’kyop khai ah a kut k’shäi ne na pe gui ciah kya ci. A k’hngüp nak lah shih nak no a ni a k’bui yah ngo ung a hngun lah a k’khang awn kho m’dek khan ah lo püi khai ah lo ciah kya ci. Boi Yesu cu Pa Khanpughi ah k’coi ung khom’dek lo püi ne Khanpughi lah mi mi gui ah mi ng’phei ng’et gui ung ka no na m’cha gui ci phung a van pyhek ciah kya ci. Boi Yesu ah k’chü m’gein nak ung dìmkyäp nak ung dìmkyäp nak lo püi ci ci cu m’dang ne na m’hnguh gui ciah kya ci. hlüläk ng’shä tumat no Taigü k’tung ah phan k’chang ah k’ngakoi âtpit ne ci hleih Boi Yesu no a hluläk ng’shä am a k’khim a k’châk vai ah pyein ne ta k’chim awn a ghünlu ghün püi ci cu k’chim mät awn shih khai ci ne pyein ciah kya ci.

Boi Yesu no shing ng’kang k’tung ah khan ah a shih vai ah a mi ngong yah ung a mät no a mät kä ghung ein ne htome hta vai hlü ah a mi ngong vai ah khapüi ne a mi ci ci läk tu gui düt ciah kya ci. Ghatghum ne k’chang ngonsheh nak gui a k’cum ah pheing ciah Khanpughi ah hmai m’dang ciah kya ci. Boi Yesu cu ng’tukah nak gui pheng ne ng’tukat ci gui ah k’taigü nak gui kä ng’ngai ci ci ne Papa Shangpughang Leo no pyein caih kya ci.

Source: Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Papa Shangpughang ah ng’thu

Mindat Chin RVA — Thu, 26 Mar 2026 05:35:59 +0000

Boi Yesu Christu ung ka noh ng’tüi lo ciah yumtu ng’bum no Khanpughi ah ng’thu k’ni a thähla vai. Yumtu ng’bum cu Hierarchy ah kya ciah kya hleih k’khân ah ka no k’kâ ah kyom ciah a ng’hling hläi ne a k’sho k’shon ah hteit ciah a ng’bum ah kya ci. Boi Yesu ah a k’htük pi k’bäih ah a hluläk ng’shä cu Boi Yesu Christu ah Paschal Mistery awn a mi ghü gui ah a ng’bum ah kya ne Boi Yesu ung ka no kho m’dek ka vai k’pyhon nak lam a mi m’düih ah kya ci. Yumtu ng’bum ung Council gui pyantham cu yumtu ng’bum ah a k’kyong ah bi hnging khai gui ng’bum gui ah kä kya ne Boi Yesu no a hluläk ng’shä gui am a peit gui ah bi loh vai ah mission cu hngun a ng’päng ah chüt hleih a ng’täih ah a mi m’htei vai ci-ah bü ceng nak ah bä ciah a ng’bum ah kya ci.

Catholic yumtu ng’bum ung om ciah k’chang gui a van ät ne bi loh nak lah htitheing nak bi khai ah a ng’bum a ng’shon shon om ci. Hluläk ng’shä gui cu Boi Yesu ah k’pyhon nak lam m’thei m’thang nak a k’ni ah a mi m’htei vai ah a chü gui ge ah kya hleih Boi Yesu a kyum lo ba ah chüt hleih a mi hlüngtai nak cu ngami gui do gui khai ung ka no yumtung’bum cu htitheing hlak ne lam m’shüm gui ne ngmi ah bi loh gui cu m’thong khai gui ah kya ci. M’shi nak cu tu pyi ciah k’chang a van Boi Yesu ah Taigü ah kya nak ung cumboi tu ci gui ah kyat u lang pang hleih phih, Khanpughi ah mong lam bi khai gui ah a chü gui ah Taigü gui cu htitheing ciah m’yum aa gah ci gui ah kya ci. Taigü Mâng, Taigü Boi gui lah Tahmah Saya gui cu Khanpughi ah k’chang gui nga tu pi ciah lam awn gunghtot gui ne bi bi khai gui ah kya ci cu be Papa Shangpughang Leo no pyein ciah kya ci.

Source: Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Papa Shangpughang ah ng’thu

Mindat Chin RVA — Mon, 23 Mar 2026 08:25:30 +0000

Papa Shangpughang no Ng’thu k’ni ung om ciah Boi Yesu no Lazarus a m’ghün ba ah mong a k’tung pi ah pyein ne mät ka vai bäng ng’ngahtüh ne k’chang gui ah k’khan ah ghatghum nak gui lah khoh tang gui düit ghünlu ung a k’tung pi ah ng’ngai ne kya nak gui nong ne m’hngi nak ka a k’khang ung ng’phlon hnging vai ah na k’ngaphlang gui ci. K’chang gui ah m’lung k’kyong ah a mi coiga gui cu a í no phih kä k’be hnging ciah kya hleih Khanpughi ung dìmkyäp nak shui hnging vai ah kya ci. Dìmkyäp nak cu vang ah vei m’kyüih m’kyok nak lah k’chang guui ah hngun m’shih ciah ng’tukah nak ung ka no gah ah kä kya ne tumat lah tumat a k’ni ah ng’gui khai ah ng’hta ng’ko nak ung ka no gah hnging vai ah kya ci. Ghatghum nak cu k’hlei m’don ne kä gah ah ghang nu ah kä kya pha ung kä bi ein ba ne nong vä. Taga nak ng’yung na ciah dìmgei nak gui ng’ya hlü ci gui ah k’chang gui ah ni bä nak m’htei vä ci ne pyein ciah kya ci.

Source: Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Papa Shanpughang ah ng’thu

Mindat Chin RVA — Thu, 19 Mar 2026 04:06:58 +0000

M’shí nak ci tu ci phung a van cu ng’thu k’ni thähla m’thei m’thang ne Boi Yesu a k’cum ah a yum nak a m’dang vai chüthäm nak gah ciah kya ci. Taigü k’tung ah ngoh nak läk ne bi nak cu lam a k’dâ om ciah kya ne a cun ah lam gui a van cu mi mi gui ah htitheing nak bü ceng ne a k’tung pi lah mâ pi k’bäih ne Boi Yesu ah a shi lah a hla gän ap nak ung cum boi tu ah kya ci. K’taigü nak, kyünhloi nak lah k’chang gui gunhtot nak ung lapk’yang ne cumboi tu nak ung ka no mi mi gui cu Khanpughi ah nibä nak awn hngun pe ba ciah ghünlu cu mi m’dang ciah kya ci. Htitheing ciah k’taigü nak gui lah om’ih ni khai ah pyantham nak gui awn Taigü gui ah hnguh ah htitheing ge ne kyähla ah a ng’shing phan ah nak cu m’dang ciah kya ci. Khanpughi ah htitheing ciah Pakkhui k’chang gui Boi Yesu no kya lo khai gui a pyein nak ah mission ung cum boi tu ah kya ci.

Source: Vatican News

The post Papa Shanpughang ah ng’thu first appeared on RVA KCHO.

The post Papa Shanpughang ah ng’thu appeared first on RVA KCHO.

Papa Shangpughang ah ng’thu

Mindat Chin RVA — Mon, 16 Mar 2026 01:37:00 +0000

Yaica buiawt ci gui ah k’chang gui ka vai ah yum nak no mi mik na m’déi hlak gui ci. Yohan 9: 1-41 ung om ciah ng’thu k’ni ung a ng’tüi püi ah a mik kä hngu ciah k’chang tumat ah mong va ng’ngahtüh ba ne a pyein cu k’chang gui a k’hngüp nak ung a mi om yah ung Pa Khanpughi ah hta Boi Yesu ah no mi mi gui ah mik na m’déi hlak gui khai ah kyum lo ciah kya hleih k’pyhon nak ah thûk ciah mong cu a cun ung m’dang ciah kya ci. K’thu k’ni ung ka hlo ah mi mi gui phih ghünlu ah thûk ciah a mong hmat ah ta khe ne ng’tüi püi ah mik kä hnguh ah kya ci. A cun ah kya hleih Boi Yesu no k’chang ah kya nak a ci tu nak awn k’tha gui mi gah vai ah a na pyan tham gui ah kya ci. Yum nak ci cu mi mik m’shin ne m’dah hleih yum nak ah kya ci. Boi Yesu awn mi ng’hnguh ng’hmat nak lah a ni ah m’hngi nak no a yan kä mi hnguh man gui ah lam awn mi mik cu na k’hmon pe gui ciah kya ci.

“ yum nak cu a mik m’dah ci vai hlü ah bi loh, ng’ngahtüh hnguh hmat nak gui nong ne kho m’dek lam kä hnguh ein thei vai ah yum nak lam ung na pheng ci gui ciah kä kya ci. Vang ah pyein ah a kya ung yum nak cu Boi Yesu mät no a hnguh ah hlo ahBoi Yesu ah mik awn mi hnguh tu hnging vai ah na gung tu gui ciah kya ci. Christian gui cu ghatghum nak, kä taga nak gui mi phei ng’leng ung buiawt tu lang pang u hleih phih ng’ngaih nak ciah, k’chang gui ah yaica gui hmat ne cek ciah yum nak cu m’dang vai hlü ci. Mi mi gui ah mik cu kho m’dek a k’hngüp nak k’hmon pe ne dìkyäp nak, taga nak lah ät nak ah k’khan ah mi k’chü khan nak ung ka no ng’thu k’ni ah a k’kang cu k’chang gui am thak vai ah hlü ci ci ne Papa Shangpughang no pyein ciah kya ci.

Source : Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Papa Shangpughang ah ng’thu

Mindat Chin RVA — Thu, 12 Mar 2026 02:36:38 +0000

Yumtung’bum cu dìmkyäp nak lah ät nak ah kya ne a van ka vai ah kya ci. Ng’cha lang nak lah ling gai nak gui ng’dang ciah kho m’dek ung yumtu ng’bum cu Boi Yesu lah a ni ah m’hngi awn a mät ah ng’bum ung ät hlak ne chang van ung a gok hnging vai cu a ni ah bü ceng nak ah kya ci. K’chang k’pami lah k’hngumi päng ah Boi lah k’pyhon ciah Yesu ung ät ciah yumtu ng’bum cu a k’ni ah ng’dang ne k’chang van ka vai ah kya ci. Yumtu ng’bum cu ng’tukah nak gui lah ng’gen am nak gui mi buiawt ciah mi mi gui ah ghünlu ung, kä täng ciah ng’thu ng’hta, thung yo gui ung ka no k’hngumi k’pami gui yum nak ung ät ne mi om ciah pakkhui k’chang gui ah mi kya gui mi hmat cu ng’ngaih u nak ah däm ciah a ng’dang nak ah kya ci. Khanpughi cu k’chang van k’pyhon hlü ciah Khanpughi ah kya ci. Ng’thu k’pyhüm ung Khanpughi no Abraham chü ne a hta ng’shon gui am k’chü a khan kon ah a cun ah hta ng’shon gui cu k’phan k’chang ung ka no m’hlot ba gui ne k’chü a khän ah kya ah kya ci. Abraham a chü cu k’chang gui a van a ni ah a mi gok hnging vai ah mei im nu vai hlü ah a hlei pakkhui chang gui ah phä ah a k’khang ah a kya vai ah a chü ah kya ci. Boi Yesu no a ni ah kyä lah hla a na m’ei nak gui awn a awn a täng ah ät vai ah phäh ah kya ci.

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Papa Shangpughang ah ng’thu

Mindat Chin RVA — Mon, 09 Mar 2026 03:28:40 +0000

Kho m’dek ung om ciah k’hngumi gui ah kho k’hngüp ung ät ne om vai hlü ci. K’hngumi gui ah k’khan ah ghatghum ne kalu nak gui kyühkyok nak kä om ein hleih nami m’thein m’khan vai. K’pami lah k’hngumi ah täng ciah dignity cu hmat ne k’chükhän nak gui a k’thai bi ba vai kya ci. A cun cu Christian gui ah ng’thu k’ni thähla m’thei m’thang nak ah k’khan ah ng’yung nak ciah hlü ne a k’tung pi ah kya ci tu hmat ah kya ci. K’hngumi gui cu a mi k’hmohta yah ge ung m’cha m’lang ne a mi ci gui cu m’shûkcha ne mi mi gui ah ät nak lah mi k’taigü nak gui cu ngmi gui ung gok hlä. Kho m’dek ung om ciah k’hngumi gui ah kho k’hngüp cu a kum täi March k’cha 8 hngüp bi ne k’hmgumi gui ah k’chang gui ah k’khan ah a mi bi loh peit gui, a mi hlumlei, a mi thung yo lah ghun kho lam ung a mi bi loh gui a aung tang nak gui ni ci ci-cu hmat ne m’nai tu gui ne k’hngumi k’pami a van täng khai ah bi loh vai hlü ci ci ne Papa Shangpughang Leo no pyein ci.

Source: Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.

Papa Shangpughang ah ng’thu

Mindat Chin RVA — Thu, 05 Mar 2026 04:19:23 +0000

Yumtu ng’bum ah k’chang ah kya nak lah lah Khanpughi ah kya nak cu ng’awi ci. Khom’dek ung ka no om lo ciah htitheing ne k’chang gui ah phäh ah thei bang tu hlü vai ah kya ciah yumtu ng’bum ci cu kä om ci. Ngoiä shüm lä vai ah ng’dang ne om ci cu Boi Yesu mät no a m’düih ghüt ah yumtu ng’bum bäng va om ciah kya ci. Yumtu ng’bum cu a k’ni ah pyantham ah a ng’bum ah kya ne k’chang lah Khanpughi ah m’yungaa bi nak hnging cu m’cha ng’lang ne kä gah ah ng’awih khaih ciah kya ci. Yumtu ng’bum cu Christian ah kya nak ah yeikyai nak lah yaica nak gui ah hngu ah k’tha nak ah k’tha a om nak lah k’tha a nem nak awn a täng ah tumat lah tumat khoih ngah nak ah k’hngumi, k’pami ng’cut ne om nak ah kya hleih Khanpughi ah ng’thu k’ni thähla m’thei m’thang ne ghünlu hteh nak lam ung mi mi gui awn a täng ah na läk gui ciah Boi Yesu a om cu na m’dang gui ciah kya ci. Yumtung’bum cu khom’dek lam ung a om ät ah a ng’bum lah Boi Yesu ah thûk ciah kyä ah kya ciah hnguh hnging ah ng’bum nak lah ng’müi m’chang lam ah thûk ciah tumat ah kya hleih ngoiä shümlä vai ah om nak ah ghünlu ah kya ne Khanmopi lam hteit ciah k’chang pak’khui tumat ah kya ci. K’chang lah Khanpughi cu tumat lah tumat ng’thuh ng’sheng nak kä om ein hleih ng’awi khai ah ng’pong ne om ciahkya ci.

Yumtu ng’bum ci cu k’chang gui lah Khanpughi a ni ni k’hngih cumboi ciah cang ci tumat ah kya hleih kap mah gui do ne Khanpughi ah om nak ah khah püi ciah kya ci. Yumtu ng’bum cu k’eit ne teng ah a kya ung a k’hmät Khanpughi ah ng’thû lah a m’thei m’cäi gui cu kyomhtang hleih ng’dang ciah kya ne a k’hmät hmät cu k’chang hei gui ah hlo ah ghünlu ung yaica nak gui awn k’tha na ne kat nak gui awn be ciah k’chang k’bum gui ah mi hnguh hnging khai ah kya ci. Cun tu pang ah phih Boi Yesu mâ lah a ni ah k’pyhon nak gui a bi loh nak cu yumtu ng’bum ung om ci gui ah lah kho m’dek lam ah kya no teng ung ng’dang hleih hnguh hnging vai ah kya ci. Boi Yesu cu a hngun k’ghüng gui ah k’tha nem nak ung ka no a mät no a mät ng’dang khai ah ci hnging ciah kya ci. Mimi gui cu mi biloh mi omk’ih gui awn Boi Yesu mi m’dang ne mi om ung mi van cu mi mät lah mi mät gui ah ng’lak ah cang ne bä ciah Christan k’chang gui ah mi m’dang ne yumtu ng’bum mi pyang tham hnging khai ah kya ci.

Source: Vatican News

The post Papa Shangpughang ah ng’thu first appeared on RVA KCHO.

The post Papa Shangpughang ah ng’thu appeared first on RVA KCHO.