NGTHUKNI - RVA KCHO

Christù-ah hngip hngäinák.

Mindat Chin RVA — Thu, 16 Jul 2026 02:41:38 +0000

Phuih güh hleih, zái-cã ci-ah k’chàng gùi avan, kei-ah lo vä; ka ning m’chüng zãng hlak gùi khai. Ka k’koh la neh k’kot tu vä. Ka m’lùng zo-nem, hngip hngäi ci-ah kia hleih, kei-ah ng’thei tu vä; nami m’lung dìm kiäp khai néi. A i-ah kia hleih ci ung ka k’koh cuh, k’koh phia ci, ka phuih phih zãng ci.

The post Christù-ah hngip hngäinák. first appeared on RVA KCHO.

The post Christù-ah hngip hngäinák. appeared first on RVA KCHO.

K’hmo gui am m’dang ci.

Mindat Chin RVA — Wed, 15 Jul 2026 03:46:30 +0000

Cun zah ung Jesu nawh piéin neh Khãnmòpí lah khàw m’dek kanák ci-ah Pá aw, hnguh hmatnák awn bé ci gùi àm, sin gùi m’zih gùi neh a k’hmó gùi àm na m’dáng ci-ah kia hleih, ka ning süm hmat zùm m’nài ci. A k’càng néi. Asin-ah na ng’zák hlü ci-ah kia ci. Ka Pá nawh avan na àp zop pi ci. Pá kon-ah u nawh phih Htá kä hmat ci, Htá mät lah Htá nawh a k’khãng hlak-ah k’chàng kon-ah, u nawh phih, Pá, kä hmat ci.

The post K’hmo gui am m’dang ci. first appeared on RVA KCHO.

The post K’hmo gui am m’dang ci. appeared first on RVA KCHO.

Kä zùm tu ci-ah pigò nú gùi.

Mindat Chin RVA — Tue, 14 Jul 2026 03:31:25 +0000

Cun kon-ah a ã a k’dá a m’dáng-nák-ah pìgò gùi cuh kä ng’zu bà u hleih, k’sénák gùi ci.

Chorazin aw, ka-’khai néi bäí; Beth-saida aw, ka-’khai néi bäí; a i-ah kia hleih ci ung nangní ung m’dáng-ah cäi-catnák gùi, Tyre lah Sidon ung a m’dáng vai hlü ung hlui-k’sé hlùi neh m’vut awn ng’bú neh cáü-vah ng’zu bà pi khai goi hlü. Cun tu pang-ah phih m’cha-m’làngnák-ah k’hngüp, Tyre lah Sidon cuh nangní-atah ng’mãng tu bà khai goi. Cãrpharnaum aw, Khãnmòpí k’pha hleih ning m’tâm hnging bä vai ang? M’Hteì-khaw-ah ning ghoh-ah kia lo khai. A i-ah kia hleih ci ung nang ung m’dáng-ah cäi-catnák gùi cuh, Sodom-ah m’dáng vai hlü ung cun-ah pìgò, a tuh güt om khai hlü. Cun tu pang-ah phih, m’cha-m’làng k’hngüp, Sodom cuh nang-atah, ng’mãng tu bà khai.

The post Kä zùm tu ci-ah pigò nú gùi. first appeared on RVA KCHO.

The post Kä zùm tu ci-ah pigò nú gùi. appeared first on RVA KCHO.

Kä dìmdehnák vai, ng’cha ng’táinák.

Mindat Chin RVA — Mon, 13 Jul 2026 02:59:50 +0000

Khàw m’dek k’khãn-ah, dìm kiäp-nák ka lo püi vai-ah ka lo ci-ah kä nami ng’ngaih vai; dìm kiäpnák-ah kä kia ci; Chìm vah ka lo püi ci. A i-ah kia hleih ci ung a htá cuh, a Nú Pá awn, htá k’hngu cuh, a nú awn, htá-ah k’chú cuh, htá-ah nú awn ng’cha ng’tái khai-ah ka lo ci. k’Chàng cuh a-’kiong-a kah gùi awn chì-gà-ah kia lo khai.

A u pang-tah kei-atah a Pá boh, a Nú boh, m’hni tu bà pi ci cuh kei-awn kä chîn ci. A htá-k’pá boh, a htá-k’hngu boh, m’hni tu ba pi ci cuh kei awn kä chîn ci. A mät-ah Sing-m’kang-k’tùng k’kot neh ka hngú-ah kä na läk ci cuh kei awn kä chîn ci. A mät-ah hngùn m’ghin hlü ci nawh a hngùn m’sih ci-ah kia khai. Kei ah phäh-ah, a hngùn m’sih ci nawh ghinnák gah khai.

Nangmí ning m’om tu gùi ci nawh kei na m’om tu ci; kei na m’om tu ci nawh na tüi lo ci mät m’om tu ci-ah kia ci. Ce ng’sä-ah hmat neh ce-ng’sä m’om tu ci nawh ce ng’sä-ah ng’khéng gah ci; k’chàng k’ní-ah hmat neh k’chàng k’ní m’om tu ci nawh k’chàng k’ní-ah ng’khéng gah ci. A u nawh phih a k’ghói pí àm, ka hlu läk-ah a kia-ah phäh ah, tui k’khîng m’zak ät htá düit tu tu-khai; kei nawh nangmí àm a k’càng-ah ka piéin cuh, a phù kä gah-ah kä om khai.

A-hlu-läk gùi gha-leigoi m’thei-m’tháng lo zop nehtah ami pìgò gùi zung-ah m’thei m’tháng vai neh a cu zah-a kah nawh hteit ci.

The post Kä dìmdehnák vai, ng’cha ng’táinák. first appeared on RVA KCHO.

The post Kä dìmdehnák vai, ng’cha ng’táinák. appeared first on RVA KCHO.

A u kiüh vai ang?

Mindat Chin RVA — Sat, 11 Jul 2026 03:25:14 +0000

Hlu-läk cuh, a saza ng’vái-atah, kä bä tu bà ci. Phàn-ah k’chàng phih a báwi-atah kä ng’mãng tu bà ci. Hlu-läk cuh, a saza ng’vái-a hlo-ah, phàn-ah k’chàng phih a báwi-a hlo-ah a kia ung bä khai hlü. K’Kiòng-mah àm Beelzebul khaw-’nget ng’vái ci neh ami chü ung a’kiong k’om gùi àm, cun-atah kapí hleih kä piéin khai gùi ang?

Cun-ah kia hleih, kä kiü èin vä; a i- ah kia hleih ci ung sùng gùi phùng ng’dáng lo khai; Thuh gùi phùng ng’hmat lo khai. A k’hmüpnák ung ka ning m’cäì gùi cuh, a k’khãngnák ung piéin vä. Nami k’hngà pèi-ah nami ng’zák cuh, m’kiung khãn-ah piéin vä.

Käü ngáwn neh ng’mùi m’chà kä ngáwn hnging ci gùi kä kiüh èin vä; ng’mùi m’chà lah käü m’htèi khàw-ah k’htop hnging ci cuh, kiüh tu pí vä. Bít-htá k’hngih cuh, ngùi phia-ah zoih-ah kä kia ci ang? Nami Pá nawh kä ci ung tumat phih m’dek ’khãn-ah kä ng’kiak khai. Nami lu ’khãn-ah nami lu mû cuh, k’chei zop pi-ah kia ci. Cun-ah kia hleih, kä kiüh eìn vä; nangmi cuh, bít-htá gùi atah, nami bä tu bà púi ci néi.

A cun-ah kia hleih, a u pang nawhtah k’chàng gùi-ah mà-ah kei awn khäh khai; ani cuh Khãnmòpí-ah om ci-ah ka Pá-ah mà-ah ka khähnák tu bà khai. A u pang nawhtah k’chàng gùi-ah mà-ah, kei na ma-’khai; ani cuh, Khãnmòpí-ah om ci-ah ka Pá-ah mà-ah, ka ma tu bà khai.

The post A u kiüh vai ang? first appeared on RVA KCHO.

The post A u kiüh vai ang? appeared first on RVA KCHO.

Bùi-àwt vai-ah ’kalu zái-cãnák.

Mindat Chin RVA — Fri, 10 Jul 2026 03:30:33 +0000

Ami mãng k’hlák-ah ning m’àp gùi neh ami cãgat gùi-ah ning tu-that lo gùi khai-ah k’chàng gùi ng’ngaihnák ge vä. Kei-a phäh-ah Khàw Báwi ng’vái gùi lah, Sàng-pùghãng gùi-àm, ning àp lo gùi khai gùi. Ami ning m’cha-m’làng lo gùi ung a i-ah nami k’chü vai, a i nami piéin vai-ah, kä nami ng’ä èin vai. A i-ah kia hleih ci ung nami piéin vai gùi cuh a cun zah mät ung (nami m’lùng-àm) ning m’thein-èi gùi vai. Nangmí nawh nami piéin khai-ah kä kia ci, nami Pá-ah Htí-théing ci-ah Muh mät nawh nami m’gòng-awn piéin khai néi.

A Phäí nawh a Nàü, a Pá nawh a Htá, k’tun lo khai. Htá nawh Nú-Pá kä ng’gèi püi neh ngáwn lo hlak gùi khai gùi. Kei-a phäh-ah, avan nawh ning ú lo gùi khai gùi. A cun-ung phih, a sih güt m’hténg neh zùm ci néi phiòng khai. Pìgò tumat ung ami ning k’kalû nák gùi ung pìgò tumat-ah dáwng vä. Nangmí àm a k’càng-ah ka piéin cuh, k’chàng-ah htá a lo güt-ah chüt, Israel ung pìgò gùi kä nami dáwng nák zop khai.

The post Bùi-àwt vai-ah ’kalu zái-cãnák. first appeared on RVA KCHO.

The post Bùi-àwt vai-ah ’kalu zái-cãnák. appeared first on RVA KCHO.

Bawi noh a hlü läk gui a m’cäi lo gui.

Mindat Chin RVA — Thu, 09 Jul 2026 02:50:30 +0000

A i pìgò ung phih, nami luh lo vai ung cun-ah pìgò ung “a u chînká ci mä,” ci-ah teng nehtah kä nami hteh bà pha phùng ung a cu-àh nami om tu vai. Im-ah nami luh ung “sin-ah im ung dìm kiäpnák om hlä,” ci-ah nami hnguh ng’hmat püi gùi vai. Chîn k’ká ci-ah a kia ung cun-ah nami piéin-ah dìm kiäpnák cuh, cun-ah im ung gok khai. Kä chîn k’ká ci-ah a kia ung cun-ah dìm kiäpnák cuh, nami mät ah ng’hlat lo bà khai. A u nawh boh, kä ning dàw gùi neh nami k’chü phih kä k’ngài ci-ah a kia ung cun-ah im ung-kah-ah phih kiài, cun-ah pìgò ung-kah phih kiài, lut lo bà neh nami khaw-ung-kah, m’vut phih ghut ghüt vä. Nang-mí-àm ak’càng-ah ka piéin cuh, m’cha-m’làngnák-ah k’hngüp ung Sodom
lah Gomorrah läí, cun-ah pìgò atah ng’mãng tu bà khai goi. Nangmi gùi cuh ng’hngei gùi-ah ng’lùng-ah, htò gùi vai hlü-ah ka ning tüì gùi ci. Cun-ah kia hleih k’phiù vai hlü-ah thei u neh müm vai hlü-ah hngip-hngäí vä.”

The post Bawi noh a hlü läk gui a m’cäi lo gui. first appeared on RVA KCHO.

The post Bawi noh a hlü läk gui a m’cäi lo gui. appeared first on RVA KCHO.

A-hlu-läk gha-leigoi-ah bi-loh gùi.

Mindat Chin RVA — Wed, 08 Jul 2026 02:54:12 +0000

A-hlu-läk gha-leigoi, a kong ät-ah chü gùi neh khàw-nget gùi k’täm nák hnging ni, gàw-pàinák a hei hei m’gü-m’gáinák-ah ã, pe gùi ci. Cun-ah gha-leigoi-ah ng’mìng gùi cuh mà neh Petru ci ah Simon, a phäí Andrew, Zebedee ah htá Jacob lah anáü Johan, Philip lah Bartholomeu; Thomas lah ngùi k’phlam k’lók Matheu; Alphaeus-ah htá Juda Thaddaeus; Cãnaan Simon lah ani zòi khai-ah Juda Iscãriot ah kia ci gùi. Cun-ah gha-leigoi cuh, Jesu nawh tüì gùi neh a m’cäì gùi cuh “Zùmhei ci ni ah khàw-ah kä nami hteh vai; Samaritan pìgò gùi-ah kä nami luh vai. Israel k’kiong khùi ung-kah, chük ci-ah htò gùi -ah hteit vä. Nami hteh zah ung “Khãnmòpí ghin khaw ng’et lo pi ci,” nami ci vai. Gàw-pài ci gùi m’gái bà gùi vä; sih ci gùi m’ghin bà gùi vä; kiám-ah èi gùi, m’théing gùi vä; khaw-’nget gùi k’täm gùi vä; nangmí nawh a i kä péit-ah nami gah ci-ah kia hleih, a i kä lák-ah pe vä. Ghùi, ngùi, Kièi boh, Lam-ahkavai, ng’zá, k’htù ng’zung goi, khawpha dàwk, ng’só-htung boh phih, kä nami hteh püi vai; a i-ah kia hleih ci ung bi bi ci nawh ng’khéng gah khîn ci.

The post A-hlu-läk gha-leigoi-ah bi-loh gùi. first appeared on RVA KCHO.

The post A-hlu-läk gha-leigoi-ah bi-loh gùi. appeared first on RVA KCHO.

A k’áng a m’gái bà.

Mindat Chin RVA — Tue, 07 Jul 2026 03:12:43 +0000

Nganí ani hteh bà kon-ah, khaw k’sé nawh pha hleih, áng ci-ah k’chàng tumat ani-ah hteh püi u hleih, Khàw k’sé k’täm hleih, cun-ah áng ci cuh, k‘chü bà ci. k’Chàng gùi cäi u neh “Israel k’chàng gùi ung sin-a hlo, kä hnguh tu man,” ci ci gùi. Pharisee gùi läí nawh “Ani khàw-nget a ng’vái pí-ah kia neh khàw-nget gùi k’täm ci,” ci neh piéin ci gùi.

Jesu nawh pigò k’zo k’däm gùi ung hteit hton neh ami cãgat gùi ung m’thei tu neh Khãnmòpí ghin khaw-ah màwng thä hla nehtah gàw-pài ci phùng m’gái bà gùi ci.

K’Chàng a k’dá gùi cuh ami mah kä om ci-ah htò gùi vai hlü-ah zái-cã k’hma u hleih, hnguh gùi neh a m’lùng àm, k’chü k’hngà gùi ci. A cun-ung, a-hlu-läk gùi àm piéin neh “Khäm vai-ah géit dá ci; khäm-khai läí kèn ci. Cun-ah kia hleih, khäm tu khai gùi, a ghüh gùi vai-ah, géit mah-ah nami sãn vai néi,” ci ci.

The post A k’áng a m’gái bà. first appeared on RVA KCHO.

The post A k’áng a m’gái bà. appeared first on RVA KCHO.

Zung Báwi-ah htá ng’la m’ghin bà neh k’hngu mí nú a m’gái bà.

Mindat Chin RVA — Mon, 06 Jul 2026 03:07:57 +0000

Cun-ah a ng’htà zah ng’hngün ung a ng’vái tumat a pèi-ah lo neh a khaw kûng-ah ng’bóp htá nehtah “Báwi aw, ka htá-hngumi-htá tuh-bäih ng’hngün sih ci; cun ung phih, lo neh a ’khãn-ah nakut na taih vai hlü ung ghing-èi bà khai hlü,” ci neh a ng’huinák. Jesu cuh, ng’düí lo neh a-hlu-läk gùi mah-ah hteit tu ci.

Cun zah ung kum gha-leigoi púm asi ng’chong neh go pài ci-ah k’hngumí tumat nawh läk neh a hlui piai ton ci. A i-ah kia hleih ci ung ani nawh “a hlui düit phih ka ton-ungtah ka gái bà khai hlü,” ci neh a m’lùng-am ng’ngài te ci. A cun-ung phih, Jesu nawh ng’hlat neh ani cuh, hnguh nehtah “Ka htá-k’hngu aw, na ng’ngaih m’gep-ä. Na zùm nawh ning k’phión ci néi,” ci ci. A cu vai-am tah cun-ah hngumi, gái bà ci.

Cun kon-ah a ng’vái-ah im-ah, gok lo neh tum-’khawng ci gùi lah, pam-cãi ci gùi a k’dá cuh, hnguh lo gùi neh Jesu nawh “Sin-ung-kah ng’nòn vä; k’hngumi htá kä sih ci néi, ip ci,” ci hleih, ani cuh, gaih tu ci gùi. Jesu nawh ngami gùi a k’pùng-ah tüi-èin gùi zop-nehtah a ’kiòng-ah lut neh hngumi-htá ah kut vèn hleih let lo ci. Cun-ah a màwng cuh a cun-ah khàw púm ung zat zop ci.

The post Zung Báwi-ah htá ng’la m’ghin bà neh k’hngu mí nú a m’gái bà. first appeared on RVA KCHO.

The post Zung Báwi-ah htá ng’la m’ghin bà neh k’hngu mí nú a m’gái bà. appeared first on RVA KCHO.