NGTHUKNI - RVA KCHO

Jesu nawh a k’gàw gùi m’gái bà ci.

Mindat Chin RVA — Wed, 14 Jan 2026 04:08:23 +0000

Cãgat-ung-kah a luh lo bà vai-àm, Jacob, Johan awn a kong ät-ah Simon lah Andrew ah im-ah hteit ci gùi. Simon-ah k’chú-ah a nú cuh, go neh ng’zän ci. Ani-a màwng cuh, Báwi àm a k’tén-ah m’thein tu u hleih Báwi nawh phih, k’et nehtah akut vèn neh m’tho-chü-tah a cu vai-àm go-nák nawh ani nòng hleih ngami kavai hlü ci gùi bi pe gùi ci.

Mü-hngün täng-ah, khaw va lut vü chü-tah kä gái ci gùi phung ni, khaw k’nget-ah pha gùi phung cuh, a pèi-ah hteh püi u hleih pigò púm-ung-kah m’kõt pèi ah ng’bum ci gùi. Gàw-pàinák a tä tä om ci gùi cuh, m’gái bà gùi ci. Khaw-’nget a k’dá phih, k’täm gùi hleih ngami nawh Báwi cuh, hmat ci gùi-ah kia hleih kä piein èin khai gùi-ah ci gùi ci.

Khawngói-ah, khàw kä thãi pha hleih let lo nehtah a dìng nák-ah hteit neh k’tài-gü ci. Simon nawh a pó gùi awn ani sùi neh hnguh lo u neh, “k’chàng van nawh ning sùi ci gùi,” ci ci. Jesu nawh phih, ngamí-àm, “ng’et ci-ah pigò k’zõ, k’däm gùi-ung, m’thei m’cäi vai-ah mi hteit kò. A cun vai-a phäh-ah ka lo ci,” ci neh piéin nehtah ngami-ah cãgat-ung lèng neh Galilee khàw púm-ah, m’thei m’cäi gùi neh khaw-’nget gùi k’täm gùi neh om ci.

The post Jesu nawh a k’gàw gùi m’gái bà ci. first appeared on RVA KCHO.

The post Jesu nawh a k’gàw gùi m’gái bà ci. appeared first on RVA KCHO.

Jesu nawh khàw k’sé a k’täm.

Mindat Chin RVA — Tue, 13 Jan 2026 04:04:53 +0000

Cãpernaum-ah ami gok vai àm tah, kiün k’hngüp-ah kia lo gé hleih cãgat-ah lut neh Jesu nawh ngami m’thei m’tháng gùi ci. Ngamí nawh phih, Jesu-ah piéin gùi, zùm m’nài ci gùi. A i-ah kia hleih ci ung Jesu cuh, k’chü m’cäi k’süm gùi vai hlü-ah kä kia ci. Pa-còng k’chàng ng’vái-ah k’chü om man ng’tüi-ah, ngami àm m’thei m’tháng gùi ci.

Ngami-ah cãgat-ung, khaw-’nget nawh a pha-ah k’chàng tumat om ci. Ani nawh m’la neh, Jesu Nazarenu aw, nang cuh, keimi awn, i, mi ng’lak om hleih ang? Keimi nà m’dí gùi khai-ah, na lo ci mâ? Nang a u-ah na kia ka hmat ci. Khãnpùghí-ah, Htí-théing ci-ah k’chàng-ah na kia ci,” ci neh piéin ci. Jesu nawh phih, ani cuh, k’sé na neh, “Kä k’chü èin bà-ä. Cein-ah k’chàng ung-kah lut lo-ä,” ci hleih ng’hlo-hngóm ci-ah khaw-’sé nawh ani cuh, a k’nà-ah ci ghüt nehtah akia-ah m’lã neh ani-ung-kah lut lo ci. k’Chàng avan cuh, akia-ah cäi u neh, “Sin, a i-cuh? Sin-ah a m’thei k’thài mä, a i phäih? A i-ah kia hleih ci ung ng’hlo-hngóm ci-ah khaw-’nget gùi hngo, a ã-awn be gùi hleih a k’chü ’ngài ci gùi phäih néi,” ci neh tumat lah tumat piéin ci gùi. Ani-ah ng’ming cuh, a k’tén-ah, Galilee khaw-púm-ung tháng zop ci.

The post Jesu nawh khàw k’sé a k’täm. first appeared on RVA KCHO.

The post Jesu nawh khàw k’sé a k’täm. appeared first on RVA KCHO.

Jesu nawh k’chàng sing k’phlì chü ci.

Mindat Chin RVA — Mon, 12 Jan 2026 03:21:02 +0000

Johan ami chúm kon-ah, Jesu cuh, Galilee khàw-ah lo neh Khãnpùghí-ah zèi tu vai-ah k’chü k’ní a piéin lo cuh, K’Hngüp ng’kìüm lo pi ci. Khãnpùghí-ah khàw ng’et lo ci. Ng’Zu bà u neh zèi tu vai-ah k’chü zùm vä.

Galilee tui nú pèi-ah a hteh zah ung Simon lah a nàü Andrew, tui-nú ung ng’vài vòi ni hleih hnguh goi ci. Jesu nawh phih, “ka hngú-ah na läk nä. K’Chàng gùi pha’ci-ah, ka ning piàng goi khai,” ci ci. Ngani nawh a k’tén-ah ng’vài gùi nawng ghüt ni neh a hngú ah läk ci goi.

A cun-ung-kah nawh hteit bà säng nehtah Zebedee-ah htá goi Jacob lah a nàü Johan cun phih ng’hlè-’kõ’khãn-ah ng’vài piàng ni hleih hnguh goi neh ngani phih, a k’tén-ah chü goi ci. Ngani phih ani Pá Zebedae cuh, ami ghüh gùi mah-ah ng’hlè ’kõ ’khãn-ah nawng ghüt ni neh a hngú-ah läk tu ci goi.

Bawi noh a chü nak ung Simon ciah Petru ah kya lo ci. Bawi Jesuh ah hlu läk gui ung a ng’vai pi ah kya lo ci. Andrew cuh Bawi Jesu kavai ma neh ami ngon a kya ci. Yakuk cuh yum nak lah bi loh nak a ng’toi vai hlü ca among pyein ci. Yawhan cuh Bawi Jesuh ah hlu läk gui ung a k’hmo pi ah kya ci. Yum m’hngi nak among ng’dang khai guk ci a kya ci.

The post Jesu nawh k’chàng sing k’phlì chü ci. first appeared on RVA KCHO.

The post Jesu nawh k’chàng sing k’phlì chü ci. appeared first on RVA KCHO.

Jesu nawh m’sinák a gah tu-ah màwng.

Mindat Chin RVA — Sun, 11 Jan 2026 05:11:59 +0000

Cun kòn-ah, Jesu cuh, Tui k’phùm Johan-a kah m’sinák a gah vai-ah Galilee khàw-a kah Jordan tui nú-ah lo ci. Johan nawh ani cuh, mã-na neh “Nang nawh vah, kei na nà m’si vai-ah kia chü-tah nang cuh, kei-ah na lo,” a ci. Jesu nawh phih, “Tuh-bäih, asin-ah kia cang hlä. A i-ah kia hleih ci ung bi vai cuh, asin-ah bi vai-ah kia ci,” ci neh m’sàng bà hleih a cun kon-ah, Johan äí ci. Jesu cuh, tui ung a ng’phùm kon-ah, a k’tén-ah lut lo bà ci. A cuvai àm, Khãnmòpí k’soh cuh, ng’hmòng hleih, Khãnpùghí-ah Htí-théing ci-ah Muh cuh müm htá-a hlo-ah kia neh a’khãn-ah, a ngoh cuh, hnguh ci. A cun vai-àm, Khãnmopi-a kah nawh “Sin cuh, a ng’htéi-ah ka m’hni-ah ka htá néi,” a ci-ah k’áw ng’zák ci.

The post Jesu nawh m’sinák a gah tu-ah màwng. first appeared on RVA KCHO.

The post Jesu nawh m’sinák a gah tu-ah màwng. appeared first on RVA KCHO.

Jesu lah Johan.

Mindat Chin RVA — Sat, 10 Jan 2026 05:05:00 +0000

Cun kon-ah, Jesu cuh, a-hlu-läk gùi- awn a kong ät-ah, Judea khàw-ah hteit ci. A cun-ung ngamí-awn a kong ät-ah om neh m’sinák pe ci. Johan phih Salim pèi-ah Aenon-ung m’sinák pe neh om ci. Cu zah-ah tui dá ci. K’Chàng gùi phih lo u neh m’sinák gah ci gùi. Johan thong-ung, kä kiùm pha ci te, Htí-théingnák-ah màwng, Johan-ah k’chàng a m’sah lah Judeu tumat nawh ng’cuh ci gùi. Johan-ah lo neh ami piéin lo cuh, “Saza-aw, Jodan hei gã-ah na m’si-ah k’chàng, a màwng na piéin te nawh m’si hleih avan ani-ah hteit ci gùi,” ci neh piéin ci gùi. Johan nawh m’sàng bà gùi neh a piéin cuh, “Khãnpùghí nawh kä péit-ung k’chàng nawh a i phih kä gah hnging ci. Kei, Christù-ah kä ka kia ci. A mà-ah tüih düit-ah ka kia ci, ka ci te cuh nami mät, kei-ah m’gòng k’bäi gùi-ah nami kia ci. Htá lak ci nawh k’chàng nak ci. A pèi-ah ng’düí tu ci-ah, htá k’là-ah teih püi läí cuh htá k’là-ah k’áw-ah phäh-ah zèi tu ci. Cun-ah kia hleih kei-ah zèinák cuh, bé ci. Ani a bä lo pí htí vai. Kei ka k’sui lo pí htí vai.

The post Jesu lah Johan. first appeared on RVA KCHO.

The post Jesu lah Johan. appeared first on RVA KCHO.

Kiám-ah ei a théing bà hlak.

Mindat Chin RVA — Fri, 09 Jan 2026 05:02:26 +0000

Báwi cuh pigò tumat ung a om zah ung a käü púm-ah kiám nawh a ei-ah k’chàng tumat nawh Jesu hnguh nehtah “Báwi aw, na ng’zák hlü-ah a kia-ung, kei na nà m’théing m’thap hnging ci,” ci neh ng’hui na neh piéin ci. Báwi nawh akut k’säng neh ani cuh, tòn neh “ka ng’za hlü ci. Htí-théing-ä,” ci ci. A cun vai-àm ani-ung-kah kiám cuh, lut lo ci. Jesu nawh m’cäi neh “A u-àm phih, kä piéin-èin-ä. Cun tu pang-a phih, hteit neh k’tài-gü ng’vái gùi-àm na käü k’hmuh tu gùi-ä. Ngami nawh na théing-thap bà-ah màwng ami hmatnák vai-ah, Moses-ah piéin-a hlo-ah pe gùi-ä,” ci neh piéin ci. Cun tu pang-a phih, ani-ah màwng cuh, hmat lo pí htí u hleih k’chàng a k’dá nawh ani ami ng’ngaih tu vai-ah phäh-ah ni, ami mät ung om ci-ah gaw-pàinák ung-kah ami phión vai-ah phäh-ah, a ät-ah lo ci gùi. Jesu läí cuh, bung hngù-ah hteit neh k’tài-gü ci.

The post Kiám-ah ei a théing bà hlak. first appeared on RVA KCHO.

The post Kiám-ah ei a théing bà hlak. appeared first on RVA KCHO.

Jesu nawh lèng neh m’thei m’tháng ci.

Mindat Chin RVA — Thu, 08 Jan 2026 04:59:30 +0000

Cun kon-ah Jesu cuh, Muh Khãnpù-ghí-ah k’tha gui awn Galilee khàw-ah hteit bà ci. Ani-ah màwng cun phih, a cun-ah khàw púm zat zop ci. Ngamí-ah cã-gat gùi ung m’thei gùi hleih avan nawh Báwi zùm m’nài ci gùi.

Báwi a ng’vái lonák-ah, Nazareth-ah gok lo neh a mät-ah ci man-a hlo bä-ah, kiün k’hngüp cã-gat-ah lut neh m’cäinák cuh ’chei vai neh ng’düi lo hleih Báwi àm, ce ng’sä, Isaiah-ah m’cäinák pe u hleih m’cäinák cuh, k’phíät neh a hnguh-ah m’cäi cã cuh “Khãnpùghí-ah ng’mùi m’chà cuh, kã ’khãn-ah om ci. A cun nawh kei na hlup hleih dú-dàwng ci gùi àm, zèi tu vai-ah màwng, m’lung-ah thüi hlèi ci gùi, m’zèi gùi vai-ah màwng, kiùm ci gùi ami luh lo bà vai, m’dah ci gùi nawh ami hnguh bà vai-ah màwng a piéin vai, ami zo ’kànák gùi k’phión gùi vai, Khãnpùghí-ah chü-k’hngànák, a na ng’kháinák gahnák-ah khaw-kum, khaw k’hngüp, khaw ng’sawng ung ka m’thein tu gùi khai-ah, kei na tüì lo ci.

M’Cäinák cuh k’chò bà neh cã-gat k’ngäng-àm pe nehtah ngoh ci. Cã-gat-ung om ci gùi phung nawh ani cuh, cügün neh teng ci gùi. Jesu nawh phih, “Tuh-ngói mät sin-ah m’cäinák cuh nami ng’zák mät-ah bé pi ci,” ci ci. Cun-ah k’chàng gùi avan nawh ani cuh, bä ci, ci u neh a k’ní-ah a piéin cuh, zùm m’nài nehtah “Sin cuh, Joseph-a htá-ah kä kia ci ang?” ci ci gùi.

The post Jesu nawh lèng neh m’thei m’tháng ci. first appeared on RVA KCHO.

The post Jesu nawh lèng neh m’thei m’tháng ci. appeared first on RVA KCHO.

Jesu, tui-ah ’khãn-ah hteit ci.

Mindat Chin RVA — Wed, 07 Jan 2026 04:56:17 +0000

K’Chàng gùi a tüih bà gùi-zah ung a k’tén-ah, a-hlu-läk gùi cuh, ng’hlè-’kõ-ah ’khãn-ah kai hlak gùi neh vang-’kàm Bethsaida-ah k’hmà gùi ci. a tüih gùi kon-ah, k’tài-gü vai neh khaw m’htung-ah kài ci. Mü hngün täng-ah, ng’hlè-kõ cuh, tui-ah ng’lung-ah om ci. Jesu läí cuh, a mät htá bäng ’kóng-ah om ci. Ngami cuh, khàw-’chì mà na neh ng’hlè-’kõ thä u neh ami báwng cuh, Jesu nawh hnguh gùi ci. Khaw-thaih täng-ah, tui ung m’khãn neh ngami täng-ah lo nehtah ngami cuh, phlän gùi khai hlok-ah kia ci. Ngami läí nawh tui-ah k’khãn-ah, Jesu a hteh cuh, hnguh u neh m’chà-ah ng’ngài neh m’la ci gùi. A i-ah kia hleih ci ung, Jesu cuh, om ci gùi phùng nawh hnguh u neh cäi-cat ci gùi. Jesu nawh phih, ngami cuh, a k’ten-ah ng’htà püi gùi neh “Kä cäi èin vä, kei néi. Kä kiü èin vä,” ci neh ngami àm piéin nehtah, ngami-ah ng’hlè-’kõ-ah ’khãn-ah kài hleih khaw-’chi düm ci. Ngami cuh, a kia-ah cäi-cat pí ci gùi. A i-ah kia hleih ci ung ami m’lung-’hngà sìng hleih m’htut-ah màwng cuh, kä ng’ngaih-tüh hlot ci gùi.

The post Jesu, tui-ah ’khãn-ah hteit ci. first appeared on RVA KCHO.

The post Jesu, tui-ah ’khãn-ah hteit ci. appeared first on RVA KCHO.

Jesu nawh k’chàng phia k’hmakip a m’bei.

Mindat Chin RVA — Tue, 06 Jan 2026 04:42:16 +0000

A-hlu-läk ng’sä gùi cuh, Jesu-ah ng’bum lo u neh ami bi gùi lah, ami m’thei gùi-ah màwng cuh, m’thein tu ci gùi. Báwi nawh phih, “Hlatai-ah a dümnák-ah a säng ng’düm vä,” ci neh ngami àm piéin ci. A i-ah kia hleih ci ung hteit-htawn ci gùi dá ci gùi-ah kia hleih ei hngo kä eì hlot ci gùi.Ngami cun phih, ng’hlè-’kõ awn hteit nehtah hlatai-ah, a dümnák-ah hteit ci gùi. Ngamí-ah hteh cuh, vang-’kàm täng-ah om ci-ah, k’chàng gùi nawh hnguh neh ami htehnák vai phih hmã tu neh cun-ah pigò gùi-ung-kah k’chàng gùi cuh, ana dáwng mà neh ana gok mà ci gùi. Jesu cuh, ’kàm-ah a gok lo hlu-am, k’chàng a k’dá ng’bum u hleih hnguh-gùi neh htò-k’säm kä om ci-ah, htò gùi vai hlü-ah kia u hleih k’chü k’hngà gùi neh ngami àm a màwng a k’dá, lèng neh m’thei lo gùi ng’tüi ci. Khaw va lut vü-ah ci hleih a-hlu-läk ng’sä gùi nawh k’et lo neh , “Sizah cuh, bung hngù-ah kia ci. Khaw phih mü lo-ah ci ci. Ngami cuh, hteit u neh ng’et ci ah pigò k’zo, k’däm-ah, ami mät kavai èi vai ami k’hleih vai ah tüi bà gùi-ä,” ci ci gùi. Jesu nawh “Ngamí àm èi vai nangmi nawh pe vä,” ci neh piéin hleih ngami nawh “Keimi nawh hteit neh ngùi tàng-kà pit goi awn m’htut k’hleih neh ami ei vai-ah kami péit gùi vai ang?” ci neh piéin bà ci gùi. Jesu nawh “Nangmi ung m’htut ng’lung i chü ang a om? Hteit neh teng vä,” ci neh ngamí àm piéin ci. Ngami nawh teng u nehtah “M’Htut ng’lung k’hmà lah ngá k’hngih,” ci neh piéin ci gùi. Cun-kon-ah om ci gùi phùng cuh, m’ghó k’chüng-ah ’khãn-ah, a ng’bum htá gùi phäh phäh-ah ngoh hlak gùi vai-ah, m’cäi gùi ci. Ngami cun phih, phia k’täi, k’hmàkip täi-ah ngoh ci gùi. Jesu nawh m’htut k’hmà lah ngá ng’zun goi la neh Khãnmòpí-ah han k’dang neh Khãnpùghí-ah ni-bänák m’tam m’khah nehtah m’htut cuh, k’bo neh ami tei vai-ah a-hlu-läk ng’sä gùi àm pe gùi ci. Ngá k’hngih cun phih om ci phung àm ami tei. Om ci phung avan nawh èi neh ami phü kon-ah, a k’pi htá gùi lah ngá gùi a k’poih cuh, k’bah-khawp ghàleigoi bé khai-ah kó bà ci gùi. Èi ci gùi cuh, k’pámi gùi bäng, phia k’hmàkip lo ci gùi.

The post Jesu nawh k’chàng phia k’hmakip a m’bei. first appeared on RVA KCHO.

The post Jesu nawh k’chàng phia k’hmakip a m’bei. appeared first on RVA KCHO.

Galilee khàw-ah hteit bà ci.

Mindat Chin RVA — Mon, 05 Jan 2026 04:39:50 +0000

Johan pha neh ami chúm ng’za neh Jesu cuh, Galilee khàw-ah hteit bà nehtah Nazareth nawng ghüt neh Zabulon lah Nepthali khàw ng’gü, tui ’kàm pèi, Cãrpha naum pìgò-ah lo neh om ci. Cun cuh ce ng’sä Isaias-ah piéin a bé vai-ah phäh-ah kia ci. A piéin cuh “Zabulon lah Nepthali khàw tui ’kàm pèi Jordan tui nú vang ’kàm-ah khúi hei gùi-ah Galilee khàw, A k’hmüpnák-ung om ci gùi nawh a ’khãng-nú hnguh ci gùi. Sih-nák nawh a sùng gùi-ah k’chàng gùi ung a ’khãng dáng lo ci.” Jesu nawh “Ng’zu bà vä. A i-ah kia hleih ci-ung, Khãnmòpí khàwcuh ng’et lo ci néi,” ci neh m’thei m’cäi lo gùi ci.

Jesu nawh zèi vai-ah k’chü, khãn khàw-ah màwng cã-gat gùi ung m’thei m’cäi gùi neh go pàinák a hlü hlü ung-kah, k’chàng gùi m’zèi m’gái bà gùi neh Galilee khàw púm-ah hteit ci. Ani-ah màwng cuh Syria khàw-pum-ah tháng zop ci. Gònák a hlü hlü awn, gàw ci gùi phùng ni, khàw-ah phã gùi ni, mãng ng’tak ci gùi ni, akut-khaw ng’gúng ci-ni cuh lo püi u chü-tah m’gái bà gùi zop ci. Galilee khàw ung lèng neh Decãpolis ni, Jerusalem ni, Judea ni, Jordan tui nú-ah hei gã-a kah gùi, a k’dá läk tu ci gùi.

The post Galilee khàw-ah hteit bà ci. first appeared on RVA KCHO.

The post Galilee khàw-ah hteit bà ci. appeared first on RVA KCHO.