NGTHUKNI NGTHEI - RVA KCHO

Báwi Jesu-ah M’Sí K’Phú awn m’tu m’täng ci.

Mindat Chin RVA — Sun, 12 Jul 2026 02:45:25 +0000

Cu k’hngüp Jesu cuh imung-kah, lut lo nehtah pinle’kàm-ah a ngoh zah ung K’Chàng gùi nawh lo sí u hleih, ani cuh Tuizun Imnú-ah ’khãn-ah kài neh ngoh ci. k’Chàng avan cuh, ’kóng-ah ng’düi ci gùi. Cun gùi àm m’tu-m’täng neh a màwng a k’dá, m’thei gùi neh a piéin lo cuh, ‘m’sí phú ci cuh, m’sí phú vai neh hteit ci.

A m’sí phú m’sahcuh lam-’khãn-ah ng’kia hleih, Phiú k’khá gùi nawh lo neh eì ci gùi. A m’sah cuh m’dek ng’pám ci-ah, lung k’chóng hngù-ah ng’kia hleih, a k’tén-ah lut lo tu pang neh phih, khaw ng’líng nawh úi hleih, a ng’zung kä htek pha-neh ng’zài neh ket ci. A m’sah cuh, ng’hlìng hngù-ah ng’kia hleih, ng’hlìng gùi ng’läh lo neh k’düi kilik zop ci. A m’sah cuh, m’dek k’ní ung ng’kia neh phia vei, chuk-kip vei, thùm-kip vei hngá neh ng’hlèp lo ci. Ng’Záknák vai-ah k’hngà om ci nawh ng’za hlä.

Hlu-läk gùi nawh phih, k’èt u neh ngamí àm a i ah kia hleih m’tu-m’täng neh na piéin ci ang? ci u hleih, a m’sàng bà gùi cuh “Nangmí läí Khãnmòpí ghin khàw-ah thúk ci-ah màwng nami hmat vai-ah kia ci. Ngamí läí cun-ah kä kia ci. A i-ah kia hleih ci ung gah ci nawh gah lo pí hleih gùi lo pí khai-ah péit-ah kia khai. A u nawh boh kä gah tu ci; ani ung om ci k’cei hngo lák bà-ah kia khai. Cun-ah kia hleih, ngamí àm m’tu-m’täng neh ka piéin-ah kia ci. A i-ah kia hleih ci ung ngami cuh, hnguh láng neh kä hnguh ci gùi; ng’zák láng neh kä k’síng ci gùi. Isaias, ce ng’sä-ah piéin man, ngamí ung bé lopi ci. A piéin cuh, “’ngài neh ng’zák láng neh kä nami hmat khai; teng neh hnguh láng neh kä nami k’síng khai. A i-ah kia hleih ci ung sin-ah k’chàng gùi cuh mik awn hnguh neh k’hngà awn ng’zák-neh, m’lùng awn hmat lo nehtah om-ih ng’thong hleih, ami gàw-pàinák, ka m’gü m’gái péit gùi vai-ah ng’ä u neh ami m’lùng-ah língneh k’hngà-ah pang neh mik-ah m’sìng ci gùi.”

Nami mik nawh hnguh neh nami k’hngà nawh ng’zák ci-ah kia neh bä ci néi. A i-ah kia hleih ci ung nangmí àm a k’càng-ah ka piéin cuh, nami hnguh gùi cuh ce ng’sä a k’dá lah, k’chàng k’ní gùi nawh hnguh tu hlü láng u neh kä hnguh ci gùi; nami ng’zák gùi cuh, ng’zák tu hlü láng u neh kä ng’zák ci gùi.

Cun-ah kia hleih, m’sí phú ci awn m’tu-m’tängnák cuh, ng’ngài vä. Ghin khàw-ah màwng k’chü ng’za tu neh kä k’síng hleih khaw-’nget lo neh a m’lùng k’kiong-ah m’sí m’cáng cuh, a lák. Sin ah k’chàng cuh, lam-ung phú ah m’sí-m’cáng-ah kia ci. Lung k’chóng hngù-ah ng’kia ci-ah m’sí m’cáng cuh k’chü k’ní ng’zaneh a k’tén-ah dàw tu láng pang neh phih, Kä pià hnging neh a säng htá düit om ci. k’Chü k’ní-ah phäh-ah m’thüi m’hlèi k’kalu nák a gah lo ung a k’tén-ah thüì ci. Ng’Hlìng gùi hngù-ah ng’kia ci-ah, m’sí-m’cáng läí-cuh, k’chü k’ní ng’za láng neh phih, sin-ah khàw m’dek-ah’khãn ah ng’ä cäinák, khawh-tang, ghùi, ngùi gùi-ah m’hlè-m’hlaknák nawh khíp hleih, a ng’theih kä ng’theih ci-ah k’chàng-ah kia ci. M’Dek k’ní ung ng’kia ci-ah, m’sí m’cáng läí cuh k’chü k’ní ng’za nehtah k’síngneh a m’sah phia vei, a m’sah k’chuk-kip vei, a m’sah thumkip vei m’hlèp ci-ah k’chàng-ah kia ci.

The post Báwi Jesu-ah M’Sí K’Phú awn m’tu m’täng ci. first appeared on RVA KCHO.

The post Báwi Jesu-ah M’Sí K’Phú awn m’tu m’täng ci. appeared first on RVA KCHO.

Christù-ah hngip hngäinák.

Mindat Chin RVA — Sun, 05 Jul 2026 04:33:57 +0000

Cun zah ung Jesu nawh piéin neh Khãnmòpí lah khàw m’dek kanák ci-ah Pá aw, hnguh hmatnák awn bé ci gùi àm, sin gùi m’zih gùi neh a k’hmó gùi àm na m’dáng ci-ah kia hleih, ka ning süm hmat zùm m’nài ci. A k’càng néi. Asin-ah na ng’zák hlü ci-ah kia ci. Ka Pá nawh avan na àp zop pi ci. Pá kon-ah u nawh phih Htá kä hmat ci, Htá mät lah Htá nawh a k’khãng hlak-ah k’chàng kon-ah, u nawh phih, Pá, kä hmat ci.

Phuih güh hleih, zái-cã ci-ah k’chàng gùi avan, kei-ah lo vä; ka ning m’chüng zãng hlak gùi khai. Ka k’koh la neh k’kot tu vä. Ka m’lùng zo-nem, hngip hngäi ci-ah kia hleih, kei-ah ng’thei tu vä; nami m’lung dìm kiäp khai néi. A i-ah kia hleih ci ung ka k’koh cuh, k’koh phia ci, ka phuih phih zãng ci.

The post Christù-ah hngip hngäinák. first appeared on RVA KCHO.

The post Christù-ah hngip hngäinák. appeared first on RVA KCHO.

A phù kä gah-ah kä om khai nei.

Mindat Chin RVA — Sun, 28 Jun 2026 03:13:32 +0000

A u pang-tah kei-atah a Pá boh, a Nú boh, m’hni tu bà pi ci cuh kei-awn kä chîn ci. A htá-k’pá boh, a htá-k’hngu boh, m’hni tu ba pi ci cuh kei awn kä chîn ci. A mät-ah Sing-m’kang-k’tùng k’kot neh ka hngú-ah kä na läk ci cuh kei awn kä chîn ci. A mät-ah hngùn m’ghin hlü ci nawh a hngùn m’sih ci-ah kia khai. Kei ah phäh-ah, a hngùn m’sih ci nawh ghinnák gah khai

Nangmí ning m’om tu gùi ci nawh kei na m’om tu ci; kei na m’om tu ci nawh na tüi lo ci mät m’om tu ci-ah kia ci. Ce ng’sä-ah hmat neh ce-ng’sä m’om tu ci nawh ce ng’sä-ah ng’khéng gah ci; k’chàng k’ní-ah hmat neh k’chàng k’ní m’om tu ci nawh k’chàng k’ní-ah ng’khéng gah ci. A u nawh phih a k’ghói pí àm, ka hlu läk-ah a kia-ah phäh ah, tui k’khîng m’zak ät htá düit tu tu-khai; kei nawh nangmí àm a k’càng-ah ka piéin cuh, a phù kä gah-ah kä om khai.

The post A phù kä gah-ah kä om khai nei. first appeared on RVA KCHO.

The post A phù kä gah-ah kä om khai nei. appeared first on RVA KCHO.

kä kiü èin vä.

Mindat Chin RVA — Sun, 21 Jun 2026 03:51:20 +0000

Cun-ah kia hleih, kä kiü èin vä; a i- ah kia hleih ci ung sùng gùi phùng ng’dáng lo khai; Thuh gùi phùng ng’hmat lo khai. A k’hmüpnák ung ka ning m’cäì gùi cuh, a k’khãngnák ung piéin vä. Nami k’hngà pèi-ah nami ng’zák cuh, m’kiung khãn-ah piéin vä.

Käü ngáwn neh ng’mùi m’chà kä ngáwn hnging ci gùi kä kiüh èin vä; ng’mùi m’chà lah käü m’htèi khàw-ah k’htop hnging ci cuh, kiüh tu pí vä. Bít-htá k’hngih cuh, ngùi phia-ah zoih-ah kä kia ci ang? Nami Pá nawh kä ci ung tumat phih m’dek ’khãn-ah kä ng’kiak khai. Nami lu ’khãn-ah nami lu mû cuh, k’chei zop pi-ah kia ci. Cun-ah kia hleih, kä kiüh eìn vä; nangmi cuh, bít-htá gùi atah, nami bä tu bà púi ci néi.

A cun-ah kia hleih, a u pang nawhtah k’chàng gùi-ah mà-ah kei awn khäh khai; ani cuh Khãnmòpí-ah om ci-ah ka Pá-ah mà-ah ka khähnák tu bà khai. A u pang nawhtah k’chàng gùi-ah mà-ah, kei na ma-’khai; ani cuh, Khãnmòpí-ah om ci-ah ka Pá-ah mà-ah, ka ma tu bà khai.

The post kä kiü èin vä. first appeared on RVA KCHO.

The post kä kiü èin vä. appeared first on RVA KCHO.

Nu Maria ah hti theing ca m’lung poi

Mindat Chin RVA — Sun, 14 Jun 2026 02:27:44 +0000

Kum-täì hleih Paschal-ah phäh-ah, a Nú Pá goi cuh Jerulem-ah hteit hti man ci goi. Jesu, a khaw kum gha-leigoi-ah kia lo hleih Paschal thungman-ah, a Nú Pá mah-ah, Jerusalem-ah hang kài te ci gùi. A ng’päng vai àm, a Nú Pá goi hteit-èi bà ni hleih k’Pámihtá Jesu cuh Jerusalem ung om ghüt ci. Cun-ah a om ghüt cuh a nú lah pá nawh kä hmat te ci goi. Ngani nawh ani cuh ng’gui ci gùi ung ng’läk tu khai-ah, ng’ngài ni neh k’hngüp ät lüng, lam hteit cang ni nehtah ani pó-’chàng ng’khawt ng’et gùi ung sùi bà ci goi. Kä hnguh lo bà ni neh ani, ani sui bà vai-ah phäh-ah, Jerusalem-ah ng’hlat bà ci goi.

K’Hngüp thùm-ah kia lo hleih Khaw Im-’kiong-ah, Saza ng’vái gùi-ah ng’lung-ah ngoh tu neh ng’ngài gùi neh-lah, a mät nawh phih, ng’si tu bà gùi hleih hnguh lo bà ci goi. Ani-ah piéin ng’zák tu ci gùi phung nawh phih, ani-ah hnguh hmat lah, a m’sàng bà gùi hti-a phäh-ah, a ng’htéi-ah cäí ci gùi. Ani cuh, hnguh lo bà ni neh a ng’htéi-ah cäi tu ni nehtah a nú nawh “Ka Htá aw, a i-ah kia hleih keini, sin-ah na nà ci goi ci ang? Teng-ä! Na Pá lah kei thüi ng’ä aih neh kani ning sùi bà ci,” ci hleih, Ani nawh phih, “A i vai-ah nani nà sùi bà te ci ang? Ka Pá-ah màwng lam ka bi vai cuh, kä nani hmat tu ci ang?” ci neh a m’sàng bà, Jesu-ah m’sàng nák bà, sin-ah k’chü cuh a k’ní-ah kä k’síng ci goi.

Cun kon-ah, Jesu nawh ngani mah-ah kium lo bà neh Nazareth pigò-ah lo bà nehtah ani béit phung ng’ngài neh om te ci. A nú nawh phih, sin-ah màwng gùi avan cuh a m’lung-àm k’üp düit man ci.

The post Nu Maria ah hti theing ca m’lung poi first appeared on RVA KCHO.

The post Nu Maria ah hti theing ca m’lung poi appeared first on RVA KCHO.

Bawi ah shi hla poi k’hngüp

Mindat Chin RVA — Sun, 07 Jun 2026 03:18:32 +0000

Khãnmòpí-a kah, kium lo ci-ah, kei cuh, ghing ci-ah m’htut ah ka kia ci. Sin-ah m’htut èi ci läí cuh a k’cùm-ah ghing khai. Ka péit vai-ah m’htut cuh sin-ah khaw m’dek-a phäh-ah kei ah hlá néi. Cun kon-ah Judeu gùi nawh, “Sin nawh a mät-ah hlá ei vai-ah a i-ah pe hnging khai ang?” ci neh ami mät ng’cuh ci gùi. Jesu nawh ngamí àm a piéin cuh, “Nangmí àm a k’càng-ah ka piéin cuh k’chàng-a Htá-ah hlá, kä nami ei ung ani-ah si kä nami áwk ung nangmí ung hngùn kä om khai. Ka hlá èi neh ka si áwk ci nawh, a k’cùm-ah ghinnák gah ci. Ani cuh cin khàw a lo k’hngüp ka m’ghin bà khai. Kei-ah Hlá cuh ei vai a k’càng ah kia ci. Ka si cun phih, áwk vai a k’càng ah kia ci. Kei-ah Hlá lah Si èi aw ci-ah k’chàng cuh kei ung ät ci. Cun-ah k’chàng ung phih kei ka om ci. A k’cùm-ah ghing neh om ci-ah, Pá Khãnpùghí nawh, kei cuh, na tüi lo hleih kei cuh, Pá ung ka ghin-a hlo-ah, kei-ah Hlá lah Si ei áwk ci-ah k’chàng cuh kei ung ghing khai. Sin-ah m’htut cuh Khãnmòpí-a kah kium lo ci-ah, m’htut-ah kia ci. Nangmi-ah pughí pá gùi nawh, Mannã èi neh ami sih-a hlo-ah kä kia khai. Sin ah m’htut èi ci-ah k’chàng cuh a k’cùm a k’täih-ah ghinnák gah khai,” ci neh Cãpharnaum pigò-ah cã-gat ung m’thei gùi ci.

The post Bawi ah shi hla poi k’hngüp first appeared on RVA KCHO.

The post Bawi ah shi hla poi k’hngüp appeared first on RVA KCHO.

Shing k’thum Khanpughi tumat

Mindat Chin RVA — Sun, 31 May 2026 04:32:01 +0000

A mät-a htá k’pá tumat htá bäng hngo pe neh, sin-ah khàw m’dek cuh Khãnpùghí nawh m’hni ci. Ani zùm ci pang, kä dí-èin neh a k’cùm-ah ghinnák a gah vai-ah phäh-ah kia ci. A i-ah kia hleih ci-ung, khaw m’dek a m’cha m’làngnák vai-ah, a Htá cuh khaw m’dek-ah ’khãn-ah tüi lo ci-ah kä kia ci. M’Dek cuh, ani-awn phión vai-ah phäh-ah kia ci. Ani zùm ci cuh kä m’cha m’làng vai; ani kä zùm ci cuh m’cha m’làng püi-ah kia ci. Khãnpùghí-ah Htá k’pá cuh, kä zùm hleih néi m’cha m’làng gùi tah, m’cha m’làng cuh sin-ah kia ci; a ’khãng cuh khaw m’dek-ung lo láng hleih k’chàng gùi nawh a k’hmüp vah, a ’khãng-a tah m’hni tu bà ci gùi; ami om kia kä ni hleih néi. A k’sé bi ci phùng nawh a ’khãng cuh, ú neh a ’khãng-ah kä lo ci. A bi kä ng’dáng-èin vai-ah phäh-ah kia ci. A k’ní bi ci nawh Khãnpùghí-ung bi ci-ah kia neh a bi a ng’dáng vai-ah, a ’khãng-ung lo ci.

The post Shing k’thum Khanpughi tumat first appeared on RVA KCHO.

The post Shing k’thum Khanpughi tumat appeared first on RVA KCHO.

Htí-théing ci-ah Muh cuh, gah vä.

Mindat Chin RVA — Sun, 24 May 2026 07:25:56 +0000

Khaw hngüp k’chüih-ung-kah, a k’htük hngüp mü hngün-ah, Judeu k’chàng gùi ami kiüh-ah phäh-ah, a-hlu-läk gùi nawh ami omnák-ah im ung k’shoh khai neh ng’üng ci gùi. Jesu cuh, lo neh ngamí-ah ng’lùng-ah ng’düí nehtah, “Nangmí dìm kiäpnák nawh ning om püi gùi hlä,” ci ci. Cun-ah piéin nehtah akut goi lah, avé cuh, k’hmuh tu gùi ci. A-hlu-läk gùi nawh phih, Báwi cuh, hnguh lo u neh a kia-ah zèi tu ci gùi. Leng bà neh Jesu nawh, “Nangmí gùi ung dìm kiäpnák om hlä,” Pá nawh, kei cuh, a na tüih-a hlo-ah, kei nawh ka ning tüi gùi ci,” ci ci. Ngami gùi-ah k’khãn ah muh neh, “Htí-théing ci-ah Muh cuh, gah vä. Nangmi gùi nawh, kat nami m’hlòt péit gùi ung lòt khai gùi. Kat nami tang péit gùi läí cuh a cu ng’tang-ah, kat ung om khai gùi,” ci neh Jesu nawh piéin ci.

The post Htí-théing ci-ah Muh cuh, gah vä. first appeared on RVA KCHO.

The post Htí-théing ci-ah Muh cuh, gah vä. appeared first on RVA KCHO.

Bawi Jesu Khanmopi ah a khai nak a poi k’hngüp.

Mindat Chin RVA — Sun, 17 May 2026 03:01:37 +0000

A-hlu-läk gha-lei-ät nawh phih, Galilee khàw-ah, Jesu nawh a nütnák gùi-ah khàw m’htung-ah kài u neh Báwi cuh, hnguh u neh ng’bóp-htá neh sum-chuk ci gùi. A m’sah nawh kä zùm pí pí neh kia ci gùi.

Jesu nawh a-hlu-läk gùi àm piéin neh “Khãnmòpí lah khaw m’dek ung ã ka gah zop pi ci. Nangmi, hteit neh k’chàng pa-khúi päng, kei-ah k’chàng-ah kia hlak u neh a Pá ni, a Htá ni lah Htí-théing ci-ah Muh-ah ng’ming-awn m’si gùi vä. Kei nawh nangmi àm ka ning m’cäi gùi phung, ami ng’ngaih tu vai-ah phäh-ah, m’thei m’cäi tu bà gùi vä. Kei phih, cin-khaw a lo güt chüt hleih nangmi-awn atäng-ah, a khaw k’cùm-ah ka om khai néi” ci neh a-hlu-läk gùi àm piéin ci.

The post Bawi Jesu Khanmopi ah a khai nak a poi k’hngüp. first appeared on RVA KCHO.

The post Bawi Jesu Khanmopi ah a khai nak a poi k’hngüp. appeared first on RVA KCHO.

RC ah Htâhtanâ K”Bî gui

Mindat Chin RVA — Wed, 29 Apr 2026 05:27:00 +0000

RC ci cuh a ng’shäî ah pyêin ung Roman Catholic ah kya ci.Khòmdek púm ah a ngmìng tháng hleih uk ca Roma Shangpùghang ah a hngün ung Bói Jesu yùm ci gui avan ung yat lo neh shangpùghang gui mät noh. Bói Jesu noh a mdüih ah Catholic Htahtana ah mthêi mcäì gui on ami uk lo ah Chà tu hngá ca ngthong nghlah nak ah ngming ah kya ci. Cun ah a ghunkhò púm kä ngthong nghlah phâ ung Roma Shangpùghang gui noh khòngmàng hleih a Roma Ghunkhò Ngcut púm ung yat hleih Bói Jesu yùm ci gui cuh pha neh ami chúm,ami dukkdêi,akhngú ah ami ngòn gui hngô akkhak lènglèng ah kya lo ci. Amshah cuh a êi kcôi ah thà gui netah kongmang gui phih a êi kcói ah thá gui laih laih netah lo neh ami êi vai guih ah ami ci ah kya ci.

Akkhak lènglèng cuh pha neh phàn ah kchàng ah yòi tu láng pang u hleih phih ami phàn akní ah bi u neh ami bói ah béit ngngài u neh ami om ah phäh ah christian gui ah mlùng i hlok ah ngshûng yäih neh htíthéing hleih ami hmat ah phäh ah christian kä kya ci gui hngô noh ami yùm ngak lo gui. Acun ah christian gui akdá pí gui cuh om hnging u chütah ngami on ngkhîng ngkhong ci gui akdá gui cuh ngthong nghlat lo u neh ngami ah bói ngvái gui lah ngvái kchàng gui cuh ngthong nghlat lo u neh akhngú ah a k’hlüng pí ah kya ca ghunkhò shangpùghang gui mät cuh ngthong nghlat lo ci gui ah kya ci.Acun ah Catholic Htahtana ah hngün mòòng teng nak on pahta kchàng phùng cuh htahta bi a bi vai ah a ngtüi püi gé ah ghing lo ca kya ci.Tuhchü cuh akdá pí noh a ngngaih cuh Bòiphaya,Mámah,Koyin,Tamah Saya gui bäng ah màmòòng ah ngnfài ci gui.Htahtana a ngtüî lo htük yah ung Bóiphaya,Mamah,Koyin ci cuh kä om màn ci.Cung phih kä kchu cèimah neh akcùm ah Bòi bäng läk khenggeng neh om ci gui ah hngün ung ngami thung ci om bà laih laih u hleih acun gui am cuh MVá Ngthû ah(သူတော်စင်)gui ciah pyéin lo ah kya ci. Tuhchü Htahtana bi bi nì gui cuh a hlü hlŭ om lo ci.Hteit ghüî ghŭi neh mtheimthang hnging ci gui bäng am htahtana kbî ah pyéin ah kä kya lo ba ca kya ci.Mi ghin yah pum ung htahtana bi mi bi hnging ca kya ci.Mät ah im ah om neh phih bi neh mi gah ciah kya ci.Lam hteh yah ung,mü ah ngshüm lo ba ung,gói neh ngyän yah ung thüi yah yéi yah avan ung mi bi hnging ca kya ci.Acúm ah mi ktàigü gui vai cuh akkhak om ci.Thongkhui mhtèi mkot ci gui ka vai,mhtèikhò k’yô ung ami kat ah phäh ah nglô ngchàng ba yah ci gui ka vai,Bói Jesu kä yum tu pha ci gui ka vai,Bòi yùm ci gui kä yèi na ci gui ka vai,kchàng gui noh ami yo kká ngon phá gui ka vai,mät kä na yèi na ci gui ka vai ciah mi ktàigü vai gui cuh akkhak om ci.Acun cuh Htahtana ung hmat phya neh a ngdáng nak gui akkhak om ci.America khò ah Bä Ca Sayataw Full Ton Sheen cuh Bòi Jesu ah mòòng mthêimthàng nak ung a ngmìng akya ah tháng ci.Ani noh akktôi hta gui ah chüt gok khai,ngkhaikhapeng khai a mthêi hnging ah phäh ah christian ngpài gui akkhak lénglèng cuh RC ah ngthong nghlat lo tu ci gui.Cun ah ani ah hlô ah a hnguh hmat nak a hlü ahngäî on kä mthêi tu láng pang ne phih goigê neh a ngkùng nak ung ka noh a ktáigü nghuingpa nak on mhtèikhò k’yô ung ka noh ngmuimcha gui akdá mhlòt hnging ca kya ci. Ani cuh Mámah ah kya tu hlü neh Mámah kyòng ahom tu ci te goi laih laih netah ngdüm ca kya ci. Goige laih laih netah phih a mneh m’oh gui cuh Kkhânpùghí am gän ap khenggeng neh a ktàigü cuh Kkhânpùghí noh chà tu hngá ca bä khaknak pe ci.Acun läí cuh ani ah ktàigü péit ah phäh ah lót lo ca ngmùimchà gui ni,lòt hlü ca ngmuimcha gui on kei lah nang ah nghnguh ngteng nghtankò hnging nak pe ci.Mikmi gui cun phih tukbäih kaning mthêin tu gui ah Sayataw Full Ton Sheen lah Maria Simma ah hlo bä ah kä mi kya tu hnging ung phih ahêi nì lam gui on Htahtana bi mi bi hnging ci.Avai hlü ah kyòng kài ci gui noh a i lam on htahtana bi bi hnging khai ang.Khòlô màmòòng ci gui,hlùm mlèi ci gui ni lah nghloh nghngih ci gui ni mä a i hngo kcha Htahtana bi bi hnging khai gui ang?

A i ah mäih ah hngang ghin om ung phih htahta kbi tumat ah ongtang hleih ghin om nak hnging vai cuh kthagui na pe hnging ca Kkhânpúghí ah kthá na neh ktàigü hnging vai cuh aktung kpan pi kbäih ah kya ci. Acun ah kthá na neh mi ktàigü nghuingpa hnging ah akya ung mi mät phäh phäh on nghloi ca htahtana bi bi tu hnging vai cuh Bói mät noh lam na mshüm gui khai kya ci. Tuhchü cuh kä yum tu pha ci gui ami yùm lo tu vai a hlü ah hlo ah ghunkho om kho kä ni hleih RC gui atängtäng ah kya tu láng pâng hleih phih nggen ng’am nak gui dá lo ci.Mi mät gui ah nglung ah nggèingkhot nak,dìm kyäp nak a om vai kthá nak vai a hlü ah hlô ah ahei gui ung phih khîn lo ci.Om khò kä ni hleih a ghunkho púm ung kchàng gui cuh dong khtôn yop neh a púm ah ngcô ngphyót neh mi om yah ung hngu ,mà,k’eng kpat phèilàng ung om ci gui ah Bói kä yum tu pha ci gui noh ami hmat lo tu vai ah mi bi hnging vai Bòi noh ana täk phan hnging vai mi mlùng pyángtham neh mi ngthong nghlat vai cuh aktung ah kya ci.KChàng hêi a ngthong ngjlat hnging vai ah mi mät mi ngthong nghlat ung vah Bói noh kchàng gui ami ngthong nghlat vai ah na phànsha gui hlü khai kya ci cuh aktúng ah kya ci.

The post RC ah Htâhtanâ K”Bî gui first appeared on RVA KCHO.

The post RC ah Htâhtanâ K”Bî gui appeared first on RVA KCHO.