NGTHUKNI NGTHEI - RVA KCHO

Bawi Jesu m’shi nak a khan tu ah poi k’hngüp.

Mindat Chin RVA — Sun, 11 Jan 2026 03:25:29 +0000

Cun kòn-ah, Jesu cuh, Tui k’phùm Johan-a kah m’sinák a gah vai-ah Galilee khàw-a kah Jordan tui nú-ah lo ci. Johan nawh ani cuh, mã-na neh “Nang nawh vah, kei na nà m’si vai-ah kia chü-tah nang cuh, kei-ah na lo,” a ci. Jesu nawh phih, “Tuh-bäih, asin-ah kia cang hlä. A i-ah kia hleih ci ung bi vai cuh, asin-ah bi vai-ah kia ci,” ci neh m’sàng bà hleih a cun kon-ah, Johan äí ci. Jesu cuh, tui ung a ng’phùm kon-ah, a k’tén-ah lut lo bà ci. A cuvai àm, Khãnmòpí k’soh cuh, ng’hmòng hleih, Khãnpùghí-ah Htí-théing ci-ah Muh cuh müm htá-a hlo-ah kia neh a’khãn-ah, a ngoh cuh, hnguh ci. A cun vai-àm, Khãnmopi-a kah nawh “Sin cuh, a ng’htéi-ah ka m’hni-ah ka htá néi,” a ci-ah k’áw ng’zák ci.

The post Bawi Jesu m’shi nak a khan tu ah poi k’hngüp. first appeared on RVA KCHO.

The post Bawi Jesu m’shi nak a khan tu ah poi k’hngüp. appeared first on RVA KCHO.

Mang Pa k’thum ah poi

Mindat Chin RVA — Sun, 04 Jan 2026 07:10:37 +0000

Hngu-hmat k’chàng gùi nawh Báwi Jesu ami khawih hngah lonák.

Herod Sangpùghang a hang mãng zah-ung, Judea khàw, Bethlèhem-ung, Jesu a om lo tu kon-ah hngilolam-ahkah lo u neh Hnguh-Hmat k’chàng a m’sah gùi cuh, Jerusalem-ah gok lo u neh “Tuh-bäih om lo tu ci-ah Judea k’chàng gùi-ah Sàng-pùghang cuh, hoi ang a om?” ci-neh ng’si ci gùi. A i-ah kia hleih ci ung keimi cuh hngilo lam-ah a àihli hnguh lo u nehtah ani sum-chuk tu vai neh kami lo ci” ci ci gùi. A cun-ah màwng cuh Sangpùghang Herod nawh ng’zák lo tu neh a mät lah Jerusalem k’om avan ng’ä-cäi ci gùi. Herod nawh k’tài-gü k’túng gùi lah chü m’cäi k’süm gùi k’bum gùi zop nehtah Christù a hoi om lo tu khai-ah a kia cuh, ng’si gùi ci. Ngami nawh phih, “Judea khàw Bethlèhem-ah kia khai. A i-ah kia hleih ci ung Khãnpùghí-ah k’ce ng’sä-ah guknák-ung, Judea khàw-ah om cã nang Bethlèhem, Judea pa-k’khui gùi-ung, a k’zopí-ah kä na kia ci. Kei-ah Israel k’chàng gùi khawng-màng khai cuh, nang-ung-kah om lo tu khai néi, ci-ah a om cuh, m’thein tu ci gùi. Cun kon-ah, Herod nawh Hnguh-hmat k’chàng gùi cuh, düp-ah chü hlak gùi neh àihli a ng’dáng lonák te-ah chin ng’si gùi nehtah “Hteit neh a k’hmóhtá cuh, a ng’cha ng’làng-ah ng’si tu cang vä. Nami hnguh lo kon-ah kei phih hteit neh ani ka sum-chuk tu vai-ah phäh-ah na m’thein lo tu bà vä” ci neh m’cäì gùi neh Bethlèhem lam-ah tüì gùi ci. Ngami nawh phih, Sàngpùghãng-ah piéin ng’ngài u neh ng’düi lo bà u chü-tah Hngilolam-ah ami hnguh te-ah àihli cuh, ami mà-ah hteit neh a k’hmó-ah omnák-ah k’khãn-ah gok nehtah ng’düm ci. Àihli hnguh lo bà u neh a ng’htéi-ah zèi tu ci gùi. A cun kon-ah im k’kiàwng-ah lut u neh a nú Maria-awn a kong ät-ah, a k’hmó cuh, hnguh lo u neh ghùi ni, k’chüt ng’ùi ni lah mirrha tui ng’ùi-awn khawih hngah ci gùi. Cun kon-ah, Herod-ah kä mi hteh èin bà vai-ah, ami ng’mãng-am Khãnpùghí nawh m’cäi gùi hleih lam hei-ung ami khàw-ah hteit bà ci gùi.

The post Mang Pa k’thum ah poi first appeared on RVA KCHO.

The post Mang Pa k’thum ah poi appeared first on RVA KCHO.

Nu Maria Khanpughi ah Nu poi

Mindat Chin RVA — Thu, 01 Jan 2026 07:01:14 +0000

Khãnhtapup gùi cuh, Khãnmòpí-ah ami kai bà kon-ah, Htò k’säm gùi nawh mihmi phih Bethelem pigò-ah mi hteit khai. Báwi Khãnpùghí nawh sin-ah a m’dáng lo gùi cuh, mi teng khai ci-ah piéin tu kiu u nehtah, a k’tén-ah hteit neh Maria lah Joseph ni, hlèi-ei ’kõ ung ami m’sän-ah a k’hmó ni, hnguh ci gùi. Ami hnguh kon-ah, ami mät nawh ami ng’zák te-ah màwng gùi cuh avan-ung ä-sà neh piéin ci gùi. Htò k’säm gùi nawh ami piéin ng’za tu ci gùi phùng cuh a kia-ah cäi tu ci gùi. Maria cuh cun-ah màwng lam gùi ng’ngaih-tüh neh om ci. Htò k’säm gùi nawh phih, Khãnhtapup nawh a m’thein gùi-ah màwng cuh süm bà neh a cun-a hlo-ah a kia phih, hnguh tuh neh Khãnpùghi m’hlüng m’tai neh hteit bà ci gùi.

Khúipám vun, ahnák vai-ah a k’chéit k’hngüp ng’kiüm lo hleih kä käü nák pha ung Khãnhtapup nawh a piéin te-a hlo-ah, “Jesu” ci neh hlui ci gùi.

The post Nu Maria Khanpughi ah Nu poi first appeared on RVA KCHO.

The post Nu Maria Khanpughi ah Nu poi appeared first on RVA KCHO.

Hti theing ca kyawng khui poi k’hngüp.

Mindat Chin RVA — Sun, 28 Dec 2025 02:24:10 +0000

Ngamí ami hteh bà kon-ah, Khãnpùghí-ah ng’sä cuh, Josep-ah ng’dáng lo neh “Let lo neh a k’hmó lah a nú, Egypt khàw-ah, na dáwng püi goi vai; ka ning chü lo bà güt a cu-àh na om vai; a i-ah kia hleih ci-ung, Herod nawh a k’hmó ngáwn vai neh sùi lo khai néi,” ci neh piéin ci. A cun-ung, Joseph tho lo neh a k’hmó lah a nú cuh, mü k’sung mät-ah, Egypt khàw-ah khah püi goi nehtah Herod a sih àwng, acu-ah om tu te ci. Cun cuh, Egypt khàw-ah kah, ka htá k’pá ka chü bà pi ci, ci neh Khãnpùghí-ah k’ce ng’sä-awn, Báwi nawh a piéin te cuh, a ng’chüíp lo vai-ah phäh-ah kia ci.

Herod a sih kon-ah, Khãnpùghí-ah ng’sä nawh Egypt khàw-ah, Joseph-ah ng’mãng-ah ng’dáng lo neh “Let lo ä. A k’hmó lah a nú la goi nehtah Israel khàw-ah hteit bà ä. A i-ah kia hleih ci-ung, a k’hmó ngáwn hlü ci gùi, si zop pi ci gùi néi,” ci ci. Joseph phih let lo neh a k’hmó lah a nú khah püi goi neh Israel khàw-ah hteit bà ci. Cun tu pang-ah phih, a pá Herod-ah hngün-ung, Archelaus nawh Judea khàw a uk-ah màwng hmat nehtah a cu-àh a hteh vai-ah a kiüh zah k’sùng-ung, a ng’mãng àm hnguh nehtah Galilee khàw-ah hteit neh Nazareth khàw-ung om ci. “Nazareth k’chàng, ci neh chü khai gùi,” ci-ah k’ce ng’sä gùi-ah piéin cuh, a cun-ah bé ci.

The post Hti theing ca kyawng khui poi k’hngüp. first appeared on RVA KCHO.

The post Hti theing ca kyawng khui poi k’hngüp. appeared first on RVA KCHO.

Bawi Jesu a ng’tüi lo nak ah Christmas poi.

Mindat Chin RVA — Fri, 26 Dec 2025 03:13:23 +0000

A k’htük-ah, k’chü om gé ci. K’Chü cuh, Khãnpùghí-awn om ät ci. K’Chü cuh, Khãnpùghí-ah kia ci. A k’htük-ah, Khãnpùghí-awn a kòng ät-ah om gé ci. Om ci phùng cuh ani hlu-ah ng’tüi om ci. Ani nawh kä bi, i kä om ci. Ani-ung hngùn om ci. Hngùn cun phih, k’chàng gùi kavai-ah a k’dèi-ah kia ci. A k’dèi cuh a k’hmüp-ung ’khãng lo hleih k’hmüp k’om nawh a ’khãng cuh, kä m’chüt ci.

Johan ng’mingnak ci-ah k’chàng tumat cuh Khãnpùghí nawh tüi lo ci. Ani hlu-ah, k’chàng gùi avan nawh ami zùm vai-ah, a k’dèi k’bäi tu vai neh m’gòng k’bäi-ah kia neh lo ci. A mät cuh, a k’dèi-ah kä kia neh a k’dèi ah m’gòng k’bäi-a vah lo ci.

K’Chü läí cuh, a k’dèi k’càng-ah kia neh khaw m’dek ’khãn-ah k’chàng päng sü lo gùi ci. M’Dek-ah lo hleih ani hlu-ah, khaw m’dek cuh, ng’tüi om lo ci-ah kia neh phih, ani cuh, kä hnguh hmat ci. A k’chàng gùi-ah lo na gùi hleih a k’chàng gùi mät nawh kä tä neh om ci gùi. Ani zùm ci gùi päng-àm, Khãnpùghí-ah htá-ah ami kia lonák vai cuh, ci pe gùi ci. Cun-ah htá gùi cuh, a mät ng’tüi lo ci lah, k’chàng-ah Si Hlá hlu-ah ng’tüi lo ci gùi-ah kä kia ci. Khãnpùghí-ung-kah ng’tüi lo ci gùi-ah kia ci. K’Chü cuh k’chàng-ah kia lo pi ci. Ani nawh na om püi gùi hleih a Pá-ah htá tumat bäng-ah a kianák-ah, hlüng tàinák lah, ni-càngnák-awn a bénák gùi cuh, mi hnguh tu ci.

15 Ani nawh a k’ni bäng bi neh, a k’bä bäng piéin ci. Johan nawh cun-ah Báwi-ah màwng, m’gòng k’bäi neh a piéin lo cuh, “Kei kon-ah lo ci-ah k’chàng cuh kei kä ka om pha-ung om tu gé ci-ah kia neh kei-a tah bä pí ci,” ci neh ka piéin cuh, asin-ah k’chàng néi ka piéin hlü” ci ci. 16 Ani-ah kíüm bénák-ung-kah mi gah tu cuh a ng’kháinák gùi m’taih neh a na bah tunák gùi-ah kia ci. 17 A i-ah kia hleih ci-ung, béit m’cäinák cuh Moses hlu-ah pe te ci. Ni-càngnák läí, Báwi Jesu hlu-ah na pe gùi ci. 18 Khãnpùghí cuh a u nawh kä hnguh tu man láng hleih phih, Pá Khãnpù-ghí-ah k’coi-ung om ci ah, a Htá k’pá tumat nawh Khãnpùghí cuh, m’dáng lo pi ci.

The post Bawi Jesu a ng’tüi lo nak ah Christmas poi. first appeared on RVA KCHO.

The post Bawi Jesu a ng’tüi lo nak ah Christmas poi. appeared first on RVA KCHO.

Jesu lah, Tui k’phùm Johan-ah k’chàng goi ami ng’htà.

Mindat Chin RVA — Sun, 14 Dec 2025 05:23:52 +0000

Johan nawh Christù-ah bi gùi ng’zák tu neh a mät-ah hlu-läk gùi-ung-kah, k’hngih tüì goi neh; “Lo khai cuh, nang ang? Kä cun-ung a hei kami gün-èi vai ang?” ci neh ng’sî hlak goi ci. Nganí àm Jesu nawh phih; “Johan-ah hteit bà neh nani ng’zák nani hnguh phùng m’thein tu bà nä. Amik m’dah te ci, m’dèi lo ci, a khaw ng’chèm ci hteit lo thei ci, kiám nawh a èi te, gái lo bà ci; a k’pang, ng’làng lo ci, a k’sì ghing bà ci; dú-dàwng ci gùi nawh phih Khãnpùghí-ah ni-bänák ng’zák tu pi ci gùi.

Cun kòn-ah, kei-ah bi om awn, kä ng’vän èn ci cuh bä khai néi,” ci neh m’sàng bà goi ci. Hteit-èi bà ni chü-tah Jesu nawh Johan-ah màwng cuh, k’chàng gùi àm piéin lo neh; “nangmí nawh a i teng vai u neh hla-lái-ah nami hteit te ci ang? Khàw-k’chi nawh a k’hngün-ah vài púm ang? A i teng vai u neh nami hteit te ci ang? Hlui-hlak k’kióm hlùi ci-ah k’chàng ang? Hlui-hlak k’kióm hlùi ci gùi cuh Sangpùghang im gùi-a vah hnguh manCun-ah kia hleih, a i teng vai u neh nami hteit te ci ang? Ce ng’sä cun ang? A cun néi. Anitah Ce ng’sä düit-a phih kä kia ci, ci neh ka piéin. M’Cäinák ung ami guk-ah,“Ka ng’sä, na mà-ah ka tüih,” ci neh guk te cuh ani àm néi piéin-ah kia ci.

Nangmí-àm ka piéin cuh, k’hngumi gùi-ah htá gùi ung Tui k’phùm Johan-atah, bä tu bà ci, u kä om pha ci; cun tu pang-ah phih Khãnmòpí ghin khaw ung a k’hmó pí cuh, ani-a tah bä tu bà ci.

The post Jesu lah, Tui k’phùm Johan-ah k’chàng goi ami ng’htà. first appeared on RVA KCHO.

The post Jesu lah, Tui k’phùm Johan-ah k’chàng goi ami ng’htà. appeared first on RVA KCHO.

Tui k’phùm Johan-ah m’thei m’cäi-nák.

Mindat Chin RVA — Sun, 07 Dec 2025 07:15:59 +0000

Cun zah ung Tui k’phùm Johan, lo neh Judea khàw Hla-lái-ah m’thei m’cäi gùi neh a piéin lo cuh, “Ng’zu bà vä. i-ah kiah hleih ci ung Khãnmòpí khàw cuh, gok lo pi ci. Ce ng’sä Isaias hlu-ah sin chà-ah a piéin-ah kia ci.‘Hla-lái ung m’lã ci-ah ’áw nawh Báwi-ah lam piàng vä. Ng’Khep ci gùi ng’súng khai ah bi vä,’” ci ci. Johan läí cuh kalauk-ah mu awn tah-ah hlui, hlùi neh a ’chéi ung meh-vun awn ng’chit ci. A èi cuh, ng’zùng ’khãmpeh lah khàwi-lù-ah kia ci. Cun zah ung Jerusalem ni, Judea khàw púm lah, Jordan tui-nú pèi púm-a kah avan, Johan-ah hteit ci gùi. Ami mät-ah kat m’dáng u neh Jordan tui-nú ung Johan ah m’sinák gah ci gùi. Cun tu pang-ah phih, Pharasee gùi lah Sadducee gùi, a m’sinák-ah lo u hleih hnguh gùi neh ngamí àm a piéin cuh “Nangmí k’phiù k’nget-ah ng’sòn gùi, dínák-ung-kah, nami phión vai-ah a u nawh ning m’süm gùi hleih ang? Cun-ah kia hleih, nami ng’zu bà k’càng-ah màwng cuh nami om ih awn m’dáng vä. Nami m’lung ’kiong-ah, ‘Abraham kami pánák ci, kä ci eìn vä. A i-ah kia hleih ci ung sin-ah lung gùi-ung-kah, Abraham ah htá gùi ah kia khai-ah Khãnpùghí nawh piàng hnging ci. A i-ah kia hleih ci-ung, a tuh-bäih shing ghing gùi-ah kùng-ah, chuknák vai-ah ghei m’sän gé-ah kia hleih a k’ní-ah kä ng’theih ci-ah a ghing gùi phùng, chuton neh mei ung k’htop-ah kia khai. Nami ng’zu bà vai-ah phäh-ah, tui-awn ka níng m’si gùi ah kia ci. Kei kon-ah, lo’khai cuh, kei-atah, bä pí ci. A khaw pha dawk hngo düít, ka ’koh tu vai-ah kä ka chin ’ká ci. Ani nawh nangmí, Htí-théing ci-ah Muh lah mei àwn, ning m’si lo gùi khai. K’Phià, akut ung ’kot neh m’cháp nehtah a k’hte cuh, ’chei ung htinneh a zìng lah a ng’sì cuh, m’sih neh kä m’chüt vai-ah mei ung m’chih khai,” ci ci.

The post Tui k’phùm Johan-ah m’thei m’cäi-nák. first appeared on RVA KCHO.

The post Tui k’phùm Johan-ah m’thei m’cäi-nák. appeared first on RVA KCHO.

Bawi Jesu m’müng van a Shangpughang poi k’hngüp.

Mindat Chin RVA — Sun, 23 Nov 2025 03:31:59 +0000

K’Chàng gùi nawh ng’düí neh dan ci gùi. Khàwng màng gùi nawh phih, “Ani nawh k’chàng hei, k’phión man ci. Khãn-pùghí-ah Christù-ah a kia-ung, a mät k’phión hlä,” ci neh m’lep ci gùi. Khàw m’tät gùi nawh phih k’et u neh ani hlü-hlàwng u neh k’thui m’uih tui pe nehtah “Nang, Judeu gùi-ah Sangpùghang-ah na kia-ung, na mät nawh na mät k’phión-ä,” ci ci gùi. A lu ’khãn-a phih, “Sin, Judeu Sangpùghang Nazareth Jesu,” ci neh Greek, Latin lah Hebrew k’chü-awn guk ci gùi.

Ng’Bat tu ci-ah gut èi goi-ung-kah, tumat nawh, “Nang, Christù-ah na kia-ung, na mät k’phión neh keiní phih na k’phión goi-ä,” ci neh Báwi ghüh tu ci. Tumat läí nawh cun m’cäì neh, “Nang cuh, na kat-a phäh-ah, sin-ah zái láng neh Khãnpùghí kä na kiüh ci-ang? Nihní, gah chin neh ni gah ci. Ni om-awn chin hleih vah ni gah-ah kia ci. Ani nawh a k’sé a pí-a phih kä bi ci,”ci nehtah, Jesu-àm piéin neh, “Báwi- aw, na khàw-ah na gok bà-ung, kei na süm bà-ä,” ci ci. Jesu awh, “Nang-àm ka piéin cuh, tuh-ngói kei mah-ah, Paradisu-ah na om tu khai,” ci ci.

The post Bawi Jesu m’müng van a Shangpughang poi k’hngüp. first appeared on RVA KCHO.

The post Bawi Jesu m’müng van a Shangpughang poi k’hngüp. appeared first on RVA KCHO.

A k’ni a k’se m’cha thei vai among

Mindat Chin RVA — Sun, 09 Nov 2025 03:43:33 +0000

Kei nawh phih, nangmi àm ka piéin cuh, sin-ah katnák-ah kia man ci-ah ngùi khawh-tang-awn nangmi nawh teih püi k’ní gùi nami sui vai. A cu kon-ah, ngùi amaih lo k’hngüp-ung nangmí phih a k’cùm-ah nami ghing om tu khai. A pihtá-ung ni ci cuh däm ci-ung phih ni k’ci. Api htá-ung kä chin hleih ci ci cuh a màwng k’däm-ung phih kä chin hleih ci ci. Cun-ah dí-chük ci-ah khawh-tang ung nami piéin-ah kä nami om-ung khawh-tang k’ni k’càng-ung, a u nawh ning zùm gùi khai ang? Kä na mät ka-ung, ning zùm vai-ah kä na kia-ung, na mät ka cuh u nawh ning pe khai ang?

A u nawh phih, Báwi k’hngih kavai-ah kä bi hnging khai. A i-ah kia hleih ci-ung, tumat ú neh tumat cuh m’hni khai. Tumat äp neh tumat cuh i-ah kä hlui neh kia khai. Nangmí nawh Khãnpùghí lah khawh-tang kavai-ah kä nami bi hnging khai.

Cun gùi avan cuh ng’umtak ci-ah Pharisee gùi nawh ng’za tu u neh gaih tu ci gùi. Báwi nawh phih, ngamí-àm piéin neh “Nangmi cuh, k’chàng gùi-ah mà-ah a k’ní hlok-ah nami ng’séi ci. Khãnpùghí läí nawh nami m’lùng hmat ci. k’chàng gùi-ah mà-ah bä hlok ci nawh Khãnpùghí-ah mà-ah m’se m’lèi ci.

The post A k’ni a k’se m’cha thei vai among first appeared on RVA KCHO.

The post A k’ni a k’se m’cha thei vai among appeared first on RVA KCHO.

A k’shi gui ah poi

Mindat Chin RVA — Sun, 02 Nov 2025 03:36:42 +0000

Cun kon-ah, Khãnmòpí khaw cuh, ng’dàwn khai goi-ah k’Pámihtá lah k’hngumi-htá la-tu goi vai neh mei im ’kot neh hteit ci gùi ah ng’lamitá ghà-awn täng ci. Ngami gùi-ung k’hmà cuh, i kä hnguh hmat ci gùi. K’Hmà läi cuh, hnguh hmat ci gùi-ah kia ci. I kä hmat ci-ah k’hmà nawh mei im lo püi neh chi-tui kä lo püi ci gùi. Hngu-hmat ci gùi nawh mei im lah chi-tui cun phih lo püi ci gùi. A k’chú m’dàwn khai-ah k’pámihtá sok’sü hleih cun gùi avan ngàm neh ip zop ci gùi. Mü khawcoih ah “A’chú m’dàwn khai-ah k’pámihtá lo ci. Dàw vai-ah hteit vä,” ci neh m’la ci gùi. Cun zah ung ng’lami avan cuh, let lo u neh ami mei-im piàngtham ci gùi. I kä hmat ci gùi nawh “Keimí-ah mei-im sih pi ci, nami chi-tui apí htá na pe tu gùi-vä,” ci neh hnguh-hmat ci gùi-ah ng’zoi tu ci gùi. Hnguh-hmat ci gùi nawh “Keimi lah nangmi kavai kä päng vai hleih chi-tui zòi ci gùi-ah hteit neh nami mät-ah phäh-ah nami k’hleih-ung bä tu bà khai,” ci neh piéin bà ci gùi. Ngami cuh, k’hleih vai neh ami hteh zah ung a k’chú m’dáwn khai-ah k’Pámi htá gok lo hleih ana-om ci gùi mah-ah k’chú m’dàwn nák-ah lut neh k’soh-khai ci gùi. Cun kon-ah k’poih bà ci-ah ng’lami gùi lo u neh “Báwi aw, Báwi aw, k’soh na k’hmón tu péit gùi-ä,” ci neh ng’chü ci gùi. “Nangmi-àm, a k’càng-ah ka piéin cuh, nangmi kä ka ning hmat gùi ci,” ci neh piéin bà ci. Cun-ah kia hleih cu k’hngüp cu zah, kä nami hmat ci-ah kia hleih güng neh om vä.

The post A k’shi gui ah poi first appeared on RVA KCHO.

The post A k’shi gui ah poi appeared first on RVA KCHO.