1. A ng’hta-ah ng’thu cuh ak’ni-ah ng’ngaih peit vai.

Ca k’chei-ah akia-ung apyein lo-ah ng’thu cuh ca uk chah neh ng’ngaih peit vai. Video teng yah akia-ung ani täng-ah ng’hmai m’hlat neh ng’hta püi vai. A pyein gui cuh ng’phleh khai-ah ng’ngaih pe neh tah pyein tu ba vai.

• A pyein lah ahngün hngawk vai phih ng’ngaih peit vai.

A hmai teng neh mik goi ng’chum hleih teng neh apyein lah kä cun ng’ngaih nak vai. Ak’aw lah hngu ma ng’gui hleih a ng’hta lah kä cun phih ng’ngaih nak vai.

• K’hmo hta gui-am k’hnga k’phlang nak kä peit gui p

ha-ung (or) yum ät nak kä peit pha-ung ani-ah ng’ngaih hmat vai hlü ci.

A pyein gui kä na hmat lah na hmat ang’shing vai phäh-ah k’hlai neh na ng’shi ba vai.

• Ng’ngaih na neh k’hnga m’cun peit gui vai.

A ng’thu ng’hta-ah hngu-ah i gui tah om hnging ci ci gui cuh a pyein hlü lah ang’ngaih gui cuh hmat hnging vai phäh k’plok pe gui neh pyein hlak gui vai. A ng’ngaih na hmat pe ca k’hmo noh ang’ngaih kon-ah ani-ah mong cuh pyein lo pi hti khai.

The post K’hmo Gui Noh Nu Pa-ah K’chü Mi Ng’ngaih Vai-ah first appeared on RVA KCHO.

The post K’hmo Gui Noh Nu Pa-ah K’chü Mi Ng’ngaih Vai-ah appeared first on RVA KCHO.

       Bawi-ah hlu läk gui cuh k’chang gui noh ami ngon gui vai kyü neh ng’ä u hleih k’hngumi gui lei cuh ami Bawi k’chitui ng’ui-awn kä mi hlup hlawt vai ng’ä ci gui. Ngani cuh ng’cim hngün ami khai nak lung cuh kä k’hmawng khai goi-ah hmat ci goi. Cunte gok ni  hleih k’shoh cuh ng’hmawng hleih hnguh ni neh cäi ci goi.  Khanhtapup noh ngani-am kä kyü-ein-ä. Bawi cuh a pyein-ah ci-ah ghüng lo ba püi ci ci neh m’thein gui hleih ngami cuh ak’ten-ah dawng ba u neh Bawi-ah hlu läk gui m’thein tu ba gui ci gui. Ng’yah lo tu ca John lah Peter cuh ng’cim hngün-ah dawng ci goi. Maria Macdaleane phih ngani-awn ng’gui tu ba ci. Ng’cim hngün k’kyong-ah lut u hleih Bawi kä om neh ami k’tawm nak-ah yih bäng cuh k’poih ghüt hleih hnguh ci gui. Cun-ung leng neh John lah Peter cuh Bawi aghün lo ba mong yum ci-ah a htük pi-ah hlu läk ng’shä goi-ah kia lo ci goi.

       Ngani cuh ani hnguh hmat gui-ah mong cuh a hngei gui-am m’thein tu ba gui vai neh dawng ba ci goi. Maria macdalean bäng cuh ng’cim hngün-ah k’poih ghüt ci. Bawi-ah kyä maih ca ng’ngai neh kyap hleih ahngu täng-ah ka noh “k’chang tu mat ku ku na shui ci ma?” ci neh ng’shi hleih cun-ah k’aw cuh ng’sim hngün ngäng ca k’chang-ah k’aw-ah ng’ngai ci. Cunte “Maria” k’aw cuh ng’ya lo neh ng’hlat hleih Bawi yeisu-ah akia-ah mong cuh a mik-awn hnguk ci. A hlu läk gui-am aghün lo ba-ah mong am’thein tu ba gui vai-ah ani cuh Bawi noh tüi ci.

         Bawi noh kat gui-ah phäh vuuk nak lah shih nak cuh m’chüt ci. Cun-ah aghün lo nak ba-awn K’khanpughü-ah kia-ah mong, shangpughang gui-ah shangpughang, Bawi ng’nü-ah Bawi-ah kia-ah mong cuh m’dang ci. Bawi cuh kä ghün lo ba vai hlü-ung mi yumtu cuh a khaw lä düt vai hlü ci neh bä ca polu noh pyein ci. Ng’dün neh ghün nak-ah bawi mi yum ci gui phih cun-ah ghün nak cuh mi gah tu kahi ci neh mi ääp hnging ci.  

The post Bawi Ghüng Lo Ba Püi Ci first appeared on RVA KCHO.

The post Bawi Ghüng Lo Ba Püi Ci appeared first on RVA KCHO.

Ng’pyang lo ng’la lo yah cuh pum kyä däm da hleih ng’thong hlai ca kya neh ami kyä cun phih ahlo yang yang, ami om kya cun phih a hlok yak yak-ah kia ci gui. Kut gui kho gui cuh ma neh däm lo neh kut ng’lan, kho ng’lan gui cuh a k’hngu-ah hla lo ci. Ami k’hleng ng’kai lo neh ami kyä däm lo ci. Ami müi hmai phih ng’thong lo ci. K’pami hta gui-ah ng’thong ng’hlah nak cuh ng’hmat tu pi ci. Hngüp täi a täng-ah om-ah k’chang noh kä k’shing tu pang hleih phih a hmät hta hnguh tu ba hti ci noh ami müi hmai ang’thong lo cuh ng’khai hleih k’shing ca kia ci.

Ng’pyang lo ng’la lo-ung pum kyä ng’thong ng’hlat ci ci tu lang pang-ung phih kä täng hnging ca kia ci. Mät-ah shi hla, pa k’khui lah ei awk gui-awn phih ng’cha ca kia ci. K’hngumi hta gui cuh k’pami hta gui-ah ya tah ami kyä ang’thong cuh yang tu ba ca kia ci. Kho kum gha-ung ka noh tün neh ami kyä cuh ng’thong neh k’pami hta gui cuh kum gha lei ät-ung ka noh tün neh ng’thong lo ci. K’hngumi k’pami avan nah ng’thong nak a tün lo nak lei cuh kum gha lei ät-ah kia neh ak’sho pi lei cuh kum gha lei k’chuk-ah kia ci.

M’dün lo ba vai……….

The post Pum kyä A ng’thong Lo Nak first appeared on RVA KCHO.

The post Pum kyä A ng’thong Lo Nak appeared first on RVA KCHO.

1. K’hmo k’tho gui cuh k’hmo hta k’hma vai hlü-ah käng ng’hta, kä ng’thu püi gui vai.
2. A bi loh hngün thoh gui k’täp neh ng’shi k’ca k’hma neh cet neh kä kia vai.(na ni pong ci cä a u-ang, a hoi ka-ang?, hoi cuh aom i bi ci-ang ci gui neh kä ng’k’thäh aih vai.)
3. M’thei m’thang hlü k’hma neh kä kia vai.(mät k’hnmo yah-ung-ah ci cha va kia man. caw  kä kia man ci gui neh mät-awn m’täng neh kä beit gui k’hma vai.)
4. Kä ng’näng kan püi vai.( k’hmo k’tho gui cuh k’chü-an ng’näng nak hlü ci gui-ah kia ci. Ngami gui-awn ng’tam neh k’chü kä ng’cuh püi gui vai. Ak’tung-ah hlü ca ma mong gui-ah kä kia-ung ng’cuh ng’vah püi nak gui cuh nong vai. U kä ng’näng ca boh ng’nän nei-ung phih ng’gei ng’cam nak gui cuh di hnging ca kia ci.
5. Hlo m’cheih, ng’gu ng’deng nak gui hloi vai. ( ng’ming ak’se gui pe neh chü nak, m’shuk k’chaak neh chü nak gui hloi vai.)
6. A lawm lawm-ah kä beit gui vai.(cun na bi pha ni-ang, cun mä na kia pha ni-ang? Ci gui neh kä beit gui vai. Ami mät-ah hnguh hmat nak thei gui cuh kyen lo khai-ah kia ci.)  

       K’hmo k’tho gui cuh ami pyein gui tumat-ung ka noh tumat ng’pek hleih ng’hta ng’ko thei ci gui-ah kia ci. Ma mong tumat bäng ak’tung-ah tha neh ng’hta ng’ko püi gui vai hlü ci. Ng’ngaih m’chum nak gui kä bi pha-ung ani-ah ng’ngaih gui cuh hmat vai-ah ci cang vai. Ami pyein gui cuh hmat vai-ah ng’ngah tüh neh ng’ngaih peit gui vai.

The post Hmo K’tho Gui-awn om-ung Hloi Vai gui first appeared on RVA KCHO.

The post Hmo K’tho Gui-awn om-ung Hloi Vai gui appeared first on RVA KCHO.

Ng’phlän pyi ca kum 30 yah ung ghingghing khùghàm gui on bé neh k’phyú k’khá gui on ng’hnging ng’òi hleih khòtûi khò k’â phih ni hleih avan cuh gáigong yèi kyài neh ni tu hngá khai ah om màn ci gui ah kya ci. Khòchà yah ung phih khò kä ng’ling k’hmà neh m’dì on ami k’cih ah k’pyü im gui ung tûi kkhîng yù kphyìm o neh ami yù ng’kòi hlèi hlá nak ah ng’hteh ng’htôn tu kyu u neh yèi neh om màn ci gui ah kya ci. Khòchà yah ung pìgò tumat lah tumat m’hlân neh hteh yah ung phih lam ung khò noh kä na ng’ling hleih hteh-htôn màn ah kya ci. A i ah kya hleih ci ung K’Cho ng’vái gui cuh lam pèi ah shingghing gui m’düih neh lòngpéi ah phih khò phlèng neh kä vo en u neh pìgò lù phih ghàm khai thà u neh k’plut neh kä vo màn ci gui ah kya ci. Tuhchü cuh lampèi phleh neh khò vo lo u hleih lam pum tâikhalâk lo ci.Lam k’hteit phùng phùng cuh khò noh ng’ling hleih yái ci gui ah kya ci.

Acun gui cuh ng’lung na neh pyânthám ba vai ah Lung K’Shé Htahtana uk Bóiphàyá Ghùng Ng’thàng Shé noh shing gui k’pyô neh lam läk neh a géit hlak gui ah kya ci. Aikúng pí ah a géit hlak gui läi cuh ahêikhò yung ah ka noh gok lo ca Khâtôhmî Shingghing k’pyó gui ah kya ci. Cun ah shing gui cuh ami däm lo ung hlüng neh yäih neh a ng’ghò nu gui ah kya lo ci gui.Cun gui cuh k’pé ah gì neh ah ah akya ung bung yung ah a khòtüi m’htéi ca khòtûi khò k’â la ci gui ah ghingghí m’htàighàm gui cuh nong lo ah akya ung mi khò cuh kyäp kyäp ah ni lo ba khai kya ci. K’Chòkhò pum ah K’Chò gui noh a lam päng ung a pìgò päng ung van noh èi mang ne phih gah vai ah aghíng gui k’thá na neh mi géitkò ung mi mät ka vai lah mi htá k’cü nà ng’shòn ka vai phih kya ci.

Khò phlèng neh vók gui nong neh uyîn van noh k’thá na neh aphù kyüì neh màn lo ci gui mi géit mi yoih tuk ah akya ung ayân mi K’Chòkhò ah hlô ah K’Chò khò cuh ni lo ba khai kya ci.K’Chèipâi gui phih shing gui chu neh yòi neh bung ah om ca atak gui làt neh k’koih neh kä yòi en bà neh géitkhap neh sèitûi sèilùng gui ah mi pyân tu hnging vai ah mi m’thong m’hlah tu hnging ah akya ung ngùighùi phih kä ng’chüt en hleih mi mang hnging u neh mi kyä phih gáigong khai kya ci.Mi kyä a gáigong vai cuh khòmdek a gáigong vai hlü ci.Khòmdek kä gáigong khai bi ci cuh k’chàng ah va kya ca kya hleih k’chàng bä noh vah m’gái ba khai kya ci.

The post K”Chò K’Chàng lah akhòtüî first appeared on RVA KCHO.

The post K”Chò K’Chàng lah akhòtüî appeared first on RVA KCHO.

Ngami gui k’tha peit gui vai. Ngami gui cuh teih püi gui ng’ya hlü ci gui-ah a ching-ah kia ci. K’tha ami kyen nak cuh hmat ci gui. Cun-ah kia hleih Nu pa gui noh k’tha ami m’hteng nak gui cuh m’tam tu peit gui vai-ah kia ci.

“Na na hta na m’htei cuh ni ci. Na mg’khai ci. Ca nak k’tha lo nak cuh ni ci. Na bä ci ci neh m’tam tu nak gui cuh ngami-ah phäh-ah ngami m’hngi m’dang nak-ah kia neh ami mät noh ami mät ami ääp nak gui cun phih hlüng lo ca kia ci. K’kyong khui a dim gei lo vai phäh phih ng’leh ng’khän nak-ah kia ci.

Nu pa gui noh ami k’hmo yah-ung-ah ng’ngai ba enh ami hta k’hmo cuh m’caw m’thei ci gui. Mät k’hmo yah-ung tah shi k’cha” ci neh ami pyein-ung k’hmo k’tho gui noh kä ng’ngai hlü ci gui, k’hlet ci gui. K’hmo k’tho hta gui cuh u-awn phih kä täng hlü ci gui. Hngei tu hnga hlü ci-ah m’lung ng’ngaih om ci. “Nu tah kä hmat bä neh pyein-ei lo ba ci. A yan ka lah tuh chü käng ba ci” ci neh ami m’shang tu ba kon-ah k’chü a hngei kä ng’yak vai.

Nupa gui-ah phä-ah k’hmo hta gui cuh hlok yak ci gui ci neh hnguh hnging ci gui-ah kia ci. Nu pa gui-ah dan tu man-ah video gui cun phih ng’yum ci goi-ah k’pami hta lah k’hngumi hta goi cuh phih kut hta ng’pang neh atäng-ah ngo neh ng’hta ci goi hlok vah teng tu man gui. Tuchü cuh k’hngi kiak lam täng-ah kah kho k’chang gui-ah om kya gui cun phih k’hmo hta gui noh hnguh lo tu ci gui-ah kia ci. Kä ni ci-ah video gui lah ca gui cun phih k’hmo hta gui hnguh hnging ci gui-ah kia ci. Kä ni ca m’gumtha shei gui lah ei ok vai gui cun phih k’hleih neh gah lo-ah kia ci. Kho m’dek-ah ng’thong ng’hlat lo cun phih däm lo pi hti ca kia ci.

        Internet-ung ka noh phih k’hmo hta gui ka vai kä ng’hloi ca ma mong gui phih hnguh hnging ci gui-ah kia ci. K’hmo hta gui k’däk ca ma mong gui phih om ca kia hleih Upatei gui-awn läk neh m’cha m’lang nak gui phih om ca kia ci.

The post K’hmo Hta Gui Cuh M’tam Gui Vai first appeared on RVA KCHO.

The post K’hmo Hta Gui Cuh M’tam Gui Vai appeared first on RVA KCHO.

K’kyong mah gui-ah ami capyit tui cuh ng’pyi hleih hnguh ca  Nu Maria cuh a m’lung kä ni lo hleih a hta Yeisu-ah a shan peit gui-ung gah khai-ah hmat ge ci. Yeisu noh phih ani cuh aching kä gok tu pha lang hleih anu-ah shan peit gui-ah phäh bi pe gui ci. Lung k’hlüng gui-ung tui cuh be khai-ah m’cun hlak gui neh ak’tui k’hlim pi-ah capyit tui-ah lat ci. Bawi Yeisu noh shing m’kang k’tung-ung ashih lo vai-ung “Nang k’hngumi na hta teng-ä” ci neh pyein ci. Cun cuh John-am cein cuh na nu ci neh apyein hlü-ah kia ci.

     Cun cuh John bäng-am apyein-ah kä kia ci. Christian gui van-am apyein-ah kia neh yumtu ng’bum gui van-am Maria cuh nami nu nei ci neh a pyein-ah kia ci. Yeisu Bawi mät cuh Adam a k’thai-ah kia ci. Ani-ah shih nak cuh Adam-ah beit kä ng’yak nak cuh beit ng’yak nak-ah ng’hlat lo ca kia ci. Eve noh beit kä ng’yak te cuh Nu Maria-ah beit ng’yak nak-ah ng’hlat lo ci.

       Hti theing Muh Khanpughü akyum lo yah-ung Nu Maria cun phih hlu läk ng’shä gui-awn atäng-ah om tu neh ani-ah k’taigü nak tu cun phih yumtu ng’bum-ah ng’yäk ng’chan nak vai phäh-ah gung tu nak-ah kia lo ci.

         Nu Maria cuh kho m’dek khan aom nak ng’päng lo hleih akyä lah a ng’mü m’cha cuh khamopi-ah kai püi ci gui-ah kia ci. Cun cuh Nu Maria Khanmopi-ah ami püi nak k’hngüp ci neh chü-ah kia ci. Cun-ah k’hngüp cuh m’tupi k’cha (15) k’hngüp-ung bi-ah kia ci.

       Nu Maria cuh Khanmopi-ah om neh yumtu ng’bum pum-ah nu-ah phih kyai k’chang shing tumat hti-ah nu-ah phih kyai na teng gui neh na m’htei gui ci. Nu Maria cuh  vuuk mi hnguh yah-ung na gung tu gui neh mikmi ka vai-ah Khanpughü-ah ma yah na ng’hui tu pe gui ci.

The post Mi Ghün Om Nak ung-ah Khanpughü-ah Nu first appeared on RVA KCHO.

The post Mi Ghün Om Nak ung-ah Khanpughü-ah Nu appeared first on RVA KCHO.

Neh phih ak’da-ah chü ci gui. Ngami gui cuh kä k’hmo ba kä ng’vai pha tawng tai yah ci gui-ah kia ci. Cun yah-ung m’lung-ah thüi nak gui m’lung-ah sheit nak gui bui chum vai-ah kia ci. Ngami gui cuh ami k’hmo yah-ung ka hlo-ah ami m’lung ng’ngaih gui cuh kä kia ba ci. Ng’thong ng’hlat lo ci gui-ah kia ci. Ngami-ah om kya  gui cuh k’hmo k’tho gui-ah om kia gui ci neh chü-ah kia ci. Ngami gui-ah om kia gui-ah ami nu pa gui vuuk kat nak ami hnguh hlak hlü-ah kä kia neh nu pa gui noh ami hmat peit thei gui vai hlü ci. Ngami gui-ah om kya gui kä hmat-ah kia-ung nu pa gui cuh vuuk nak hnguh hnging ci gui-ah kia ci. K’hmo k’tho gui-ah om kia gui chin ci lah kä chin ci gui cuh hmat vai hlü ci. Ng’ngaih peit gui thei vai hlü ci.

       K’hmo k’tho hta gui-ah m’lung cuh ng’thawng hloi ci. Cun-ah kia hleih ami om kia cuh k’hngät lah k’hngät cuh kä täng hnging ci. K’chü m’da, ling neh bi, beit kä ng’ngaih, m’shang tu ba nak gui cuh ngami-ung om khai. Ani bäng ka pi ci ci neh pyein vai khak ci. Ani-ah kong ät ci gui-ah k’hmo hta gui phih teng tu gui neh m’täng shüm neh ng’ngaih peit vai. K’hmo tumat-ah om kia noh a hngei k’chang tumat kä hmong cang-ung cun cuh ni ci ci neh pyein hnging-ah kia ci. Im ng’gü lo ng’phei a teih püi gui-awn ng’awi neh a om tu hnging-ung phih cun cuh ni ci ci neh pyein hnging-ah kia ci.

      Cun-ah kia hleih nu pa gui noh ng’hlän lo hlü ca k’hmo k’tho gui-ah om kya gui cuh ng’ngaih peit gui vai hlü ci. A ng’khawt a ng’gei nak tu püi gui-ah k’hmo hta gui-ah mong hmat vai cuh hlü tu pi ci. Netah ngami gui-ah ami nu pa gui-awn phih ng’hta ng’ko vai hlü ci. Ngami gui-ah ami m’lung a ng’thong hloi yät aih, ng’cuh ng’vah nak hnging gui, ami mät hta ami va om vü gui cuh a k’hngät hta aom-ung i-ah kä kia ci. A k’cum-ah a om lo-ung lei hngei tu hnga ci ci neh pyein hnging -ah kia ci. Ami m’lung a thüi lo-ung im k’kyong-ah phih bi ka bi ba hlü neh kyawng-ah kä hteit ba hlü neh ami kia lo-ung vuuk nak tu mat ku ku bui hleih kia ci.

     K’hmo hta gui cuh ami lum nak-ung, ami ng’lah nak-ung ng’hlut ng’gen nak gui cuh om täng khai-ah kia ci. Cunte k’hmo tumat bäng noh a nu be päi na gui a ng’gen lo püi laih laih lei-ung ng’ngaih nak vai hlü lo ci.

       K’chang gui cuh tumat lah tumat kä täng ci-ah kia neh k’chü m’da ci a om-ah hlo-ah k’chü m’kyen ci phih om ci. Ng’aa thei ci, amät bäng om thei ci gui phih om ci. K’chü m’kyen neh ang’ngaih gui am’lung k’kyawng-ah k’cep ci gui cuh ani ng’hlän lo-ung phih acun-ah kia ci gui. Ling neh am’lung m’däm ci-ah ak’hmo cun phih ang’hlän lo-ung beit päng m’shang tu ba neh li läih thei ca kia ci. Cun gui hmat neh ng’ngah tüh ne tah vah k’hmo k’tho hta gui-ah om kia gui cuh chin ci lah kä cun m’cha hnging  vai-ah kia ci.

The post K’hmo k’tho gui-ah hngün thoh  lah ng’ngaih gui first appeared on RVA KCHO.

The post K’hmo k’tho gui-ah hngün thoh  lah ng’ngaih gui appeared first on RVA KCHO.

A i ah kya hleih ci ung shin ah amòòng cuh Kkhòilung Pìgò Ngcut bäng ah kä kya neh a KChòkhò púm ah KChò KChàng gui cuh lungkhò lah khònggî akya ah ngcuh ci gui ah kya ci. Avan noh ami gah vai bäng ngah-tüh neh khò kä tä ah ami ngcuh ah khòmdek cuh khòmdek ah kkhân ah hngang ghin yah ung phih kyai,shih kòn ah ngmùimchà ah ka vai phih kyai a i hlok ah kyih kshé ci cuh hnguh hmat phya gé khai ah ngkháikhapèng hleih a mthêi ah phäh ah kya ci. A cun ah a mthêi mcäì cuh KChò ngthû on Kkhânpùghí Ngthû lah KChò Thùng mcoih neh a mthêi cuh mhteih neh teng ah akya ung KChàng gui noh KChòkhò ah akhòtüî pèingléng gui cuh mhtéimhtâ nak ung ana nghlôi ngpán lo ba khai kya ci. Avâihlü ah a mthêimcäì nak gui ung kah tumat teng lo ah akya ung”Khònggî hlò ci cuh a mät mà neh khòmdek ah nglat lo khai.Ngploh ngkheih lo khai. ”ciah a pyéin cuh a u noh phih a bùichúm tu màn ah amòòng alam ah kya ci.

Tuhchü cuh tumat lah tumat ah khònggî hlô kaih ngcuhngcan bäng ah kä kya hleih k’hlí ah tûikhong ah kya ciah khòpùi thùighàm kplut neh chu dèng neh vo kyang lo u netah hläm ät gôi ami gah vai,ami mät ah yu êi ami mang vai bäng cuh ngah-tüh lo ci gui ah kya ci. KChò gui cuh avan noh lungkho plohkheih hlò kaih ci cuh ngplohngkheih,shikyu neh a kkhúi hngô cì ci neh kyih ci gui.Cun tu pang ah phih amshah noh kä kyih neh khò kä tä neh ami ngngaih ah om ba hti u hleih kpoih ba ci gui cun phih ngami on ngcuh ba bä ci gui ah kya ci. KCho pùghí pa gui noh tuikhong,lungkhò,lamtung,khòghàm plohkheih ci gui ah phäh ah i hlok ah kyihkyok kshé nak gui a om ami pyéin gui om ci.Avaihlü ah”K’hlòigò tu ci a kkhúi cìn ci.Shénglung shep ci a ghêi hmò ci. Pùpì lam khang ci a hngùn än ci.Ghíngghàm kä na chuk vai.

A khngîm na yî hlü khai.Ghípá ngvái kä na mthüî vai.A kchî na ngngai hlü khai.”ci gui ah kya ci. Shin ah KChòkhò ah a khòtüî pèingléng ghunmhtéi nak ung KChò gui noh khòmdek tuikhong bungghàm plohkheih ung a i hlok ah nggheih ngbah neh a kyih kyok kshé gui cuh mtheimthang ci adá lo ah akya ung chüt gok khai ah kya ci. Cun cuh mkyihmkyok gui düt ah kä kya en hleih ngphlän pyi ciah hluhngün om mòòng gui ung hnguh tengteng ah a i ah ana a kya vü ci cuh mdáng gäkgäk neh akdá noh akcàng ah bilô neh mthêi laih laih ah akya ung akhòtüî péingléng cuh ngthong nghlat neh ni lo ba khai kya ci. A i ah kya hleih ci ung Kkhânpùghí noh khòmdek lah khòmdek ung om ci gui avan tüì khmüt netah kcháng am a àp te cuh kchàng van bä noh a pyân ba vai ah mi mà na ciah kya ci.

Inviroment

The post Bóiphaya Kyüi K’Khui Om ah pyéinhlak first appeared on RVA KCHO.

The post Bóiphaya Kyüi K’Khui Om ah pyéinhlak appeared first on RVA KCHO.

K’kyong mah gui-ah ami capyit tui cuh ng’pyi hleih hnguh ca  Nu Maria cuh a m’lung kä ni lo hleih a hta Yeisu-ah a shan peit gui-ung gah khai-ah hmat ge ci. Yeisu noh phih ani cuh aching kä gok tu pha lang hleih anu-ah shan peit gui-ah phäh bi pe gui ci. Lung k’hlüng gui-ung tui cuh be khai-ah m’cun hlak gui neh ak’tui k’hlim pi-ah capyit tui-ah lat ci. Bawi Yeisu noh shing m’kang k’tung-ung ashih lo vai-ung “Nang k’hngumi na hta teng-ä” ci neh pyein ci. Cun cuh John-am cein cuh na nu ci neh apyein hlü-ah kia ci.

     Cun cuh John bäng-am apyein-ah kä kia ci. Christian gui van-am apyein-ah kia neh yumtu ng’bum gui van-am Maria cuh nami nu nei ci neh a pyein-ah kia ci. Yeisu Bawi mät cuh Adam a k’thai-ah kia ci. Ani-ah shih nak cuh Adam-ah beit kä ng’yak nak cuh beit ng’yak nak-ah ng’hlat lo ca kia ci. Eve noh beit kä ng’yak te cuh Nu Maria-ah beit ng’yak nak-ah ng’hlat lo ci.

       Hti theing Muh Khanpughü akyum lo yah-ung Nu Maria cun phih hlu läk ng’shä gui-awn atäng-ah om tu neh ani-ah k’taigü nak tu cun phih yumtu ng’bum-ah ng’yäk ng’chan nak vai phäh-ah gung tu nak-ah kia lo ci.

         Nu Maria cuh kho m’dek khan aom nak ng’päng lo hleih akyä lah a ng’mü m’cha cuh khamopi-ah kai püi ci gui-ah kia ci. Cun cuh Nu Maria Khanmopi-ah ami püi nak k’hngüp ci neh chü-ah kia ci. Cun-ah k’hngüp cuh m’tupi k’cha (15) k’hngüp-ung bi-ah kia ci.

       Nu Maria cuh Khanmopi-ah om neh yumtu ng’bum pum-ah nu-ah phih kyai k’chang shing tumat hti-ah nu-ah phih kyai na teng gui neh na m’htei gui ci. Nu Maria cuh  vuuk mi hnguh yah-ung na gung tu gui neh mikmi ka vai-ah Khanpughü-ah ma yah na ng’hui tu pe gui ci.

The post Mi Ghün Om Nak ung-ah Khanpughü-ah Nu first appeared on RVA KCHO.

The post Mi Ghün Om Nak ung-ah Khanpughü-ah Nu appeared first on RVA KCHO.