The post Bawi Ng’tüi lo pi ci first appeared on RVA KCHO.

The post Bawi Ng’tüi lo pi ci appeared first on RVA KCHO.

   Yeisu Bawi cuh anu pa gui-awn atäng-ah Nazereth mango-ah om ci gui. A k’hmo hta-ah kia neh im k’kyong bi loh gui cuh gung tu neh bi tu ci. Anu Maria ni apa Joseph ni-awn atäng-ah om ci gui. Bawi yeisu cuh Khanpughü-ah hta-ah kia ci. Cunte Joseph noh khanpughü cuh ahta tu k’cang vai hlü-ah m’htei ci.

   Joseph cuh im k’kyong khoh tang gui pyang thei ca kia neh phyu k’kyong-ung mang-ah ngoh nak, ei nak, m’kot gui-ah ng’müng cuh pyang ci. Yeisu cuh anupa-ah k’chü ng’ngai neh bi loh phya ci gui cun phih gung tu ci. A cun-ah hlo-ah mikmi gui cun phih mi nupa gui-ah k’chü mi ng’ngai neh ami na m’cäi gui mi läk vai-ah na m’thei m’thang gui ci. Ani-ah ana m’thei gui-ah ci-ah mi nupa gui-ah k’chü mi läk neh mi üm hta gui thei vai hlü ci.

    Khanpughü-ah m’cäi nak-ung phih nupa kyüh aa neh ng’ngaih vai ci-ah m’cäi om ci. Cun-ah kya hleih nupa-ah k’chü ng’ngai neh ana m’cäi läk cun phih Khanpughü-ah m’cäi läk tu-ah kia ci.

The post K’phyon Ca Bawi Cuh Ng’vai Lo Ci first appeared on RVA KCHO.

The post K’phyon Ca Bawi Cuh Ng’vai Lo Ci appeared first on RVA KCHO.

Vai hlü-ung ak’khang kä om neh k’hngüp ci-ah im k’kyong-ung ak’sho ngoh neh na ng’gün-ung I-ang na ng’ngaih ko? Cun-ah hlo-ah Isarael pa khui gui cu phih k’phyon ca Bawi cuh kum k’sho ng’güng man ci gui-ah kia ci.Ngami cuh k’ghnüp-ung kho kum (2000) phlän hleih ng’güng man ci gui-ah kia ci. A hngu-ah Khanpughü noh ak’chü khän cuh k’be lo pe gui ci. Ani noh ak’khang k’däm nuh cuh ngami-am k’hnguh gui neh ak’hngüp nu cuh m’theing m’htaih pe gui ci. Bawi Yeisu cuh ak’khang-ah kia ci. Khanpughü noh kho m’dek khan pum ak’khang vai lah ng’büh ng’mang ca Shnagpughang (or) ling gai pi ca ga k’kap ng’vai cuh tüi lo ci.  A ni noh tumat bäng-ah kia ca ahta cuh tüi lo ci. Yeisu cuh Khanpughü-ah kia ci. Cun te ani noh mikmi-ah hlo-ah k’chang tumat vai hlü-ah aom tu vai phäh-ah ang’ngah tüh bi loh nak-ung Nu Maria cuh ghüh ci. Bawi Yeisu cuh Nu Maria noh ä ci neh aäi nak-ah k’chü m’kha ät-awn ng’tüi lo tu ci.

Nu Maria cuh Nazaret Mang go-ung kah hti theing ca ng’lami hta-ah kia ci. Kho k’hngüp ät-ung k’khankho ng’shä k’tai Cabriel noh Khangpughü-ah ng’thu k’ni shä vai neh ama-ah ng’dang lo ci. Khanhtapup cuh agok lo vai-am tah “Ni bä nak-awn be ca k’hngumi-aw, nang-ung bä khäk nak be hlä. Nang cuh Khanpughü mät noh nung om püi ci.” ci neh m’tam khah ge neh hngu lo ci. Nu Maria cuh Khanpughü-ah pyein phung cuh yum äi  neh bi lo hlü ci. Am’shang tu ba cuh “Kei cuh Khanpughü noh ana phan-ah k’hngumi-ah ka kia ci.Ang’yak hlü-ah ci-ah kei-ung kia hlä.” ci neh m’shang tu ba ci. Cun-ah k’chü m’kha cuh Khanpughü-ah pa khui gui-ah ng’lak-ung thuuk ca ma mong -ah kia ci. Cunte cun cuh ngami gui ami kat nak-ung ka noh ami phyon lo nak vai-ah ani-ah m’hngi nak-ah lam leh nak-ah kia ci.

Khanpughü noh Nu Maria cuh kä ng’tüi om lo tu pha ge-ung k’phyon ca Bawi-ah nu-ah akia lo vai-ah pong püi ge ci. Cun cuh mikmi noh tuh chü mi chü-ah “Kat nak kaa-ah ng’tüi tu nak” ci-ah bä khäk nak cuh gah ci. Pein hlü cuh Nu Maria cuh nu pa k’htük-ah kt nak-ung kah phyong ca kia ci. A caw kia hleih ani cuh m’shi nak Secramentu alak tu vai kä hlü ci. I kia hleih ci-ung ani-ah ng’mü m’cha-ung Khanpughü cuh ak’cum-ah om hleih kia ci. Cun-ah kia hleih yeisu Khanpughü-ah akia lo vai-ah chin ca kai ci. Khanpughü noh Nu Maria-awn ng’khah khai goi-ah k’chang k’ni Joseph cuh ghü neh Bawi Yeisu m’htei khai-ah ghüh ci.

Bawi Yeisu ang’tüi tu  vai mü-ung Maria lah Joseph cuh ani ng’düm ng’tang nak  tu vai im kai cuh hteit ghüi neh shui ci goi. I kia hleih ci-ung Ngani cuh Bethelehem-ung om ni neh acu yah-ung Roma kho uk ca Shanpughang noh au phih amang go-ah hteit ba neh k’kyong khui ng’ming gui ami m’cut tu ba vai ng’thu shä hleih kia ci. Ani im kai shui lo k’chit neh ak’hngu-ah hlei gui ami chum nak-ung kiawn ba hleih hnguh ci goi. M’yo m’nem nak-awn ng’tüi lo tu ge ca kia ci.

Khankho ng’shä gui noh kho m’htung khan-ah hto gui ngäng neh om ci gui-ah hto k’shäm gui-am “ Kei noh nang mi-am yei kyai nak vai ng’thu ka ning m’thein lo ci nei, Tuh ngoi David Mang go-ah Bawi Christu ci-ah k’phyon ca Bawi cuh nangmi ka vai-ah ng’tüi lo pi ci. Ani cuh hlei ei k’kaw-ung ip hleih nami hnguk khai nei.” ci neh m’thein gui ci. Cäi cat neh yei kyai tu ca hto k’shäm gui cuh sheng neh dawng neh shum chuk tu vai u neh hteit tu ci gui. K’phyon ca Bawi cuh hto k’shäm gui noh Bawi cuh ma pi k’bäi neh hnguh ci gui. Hti theing ca ami m’lung gui cuh ma neh gän ap ci gui.

Bawi-ah ng’tüi nak cuh Christmas-ah kia ci. Tum k’khawng ng’äi ng’lam neh mi yei tu ci. Cun-ah ng’äi gui cuh ng’hlän pi ca kum (100) hlok-ung ami guk te gui-ah kia ci.

The post K’Phyon Ca Bawi Om Lo Tu Ci first appeared on RVA KCHO.

The post K’Phyon Ca Bawi Om Lo Tu Ci appeared first on RVA KCHO.

 Bawi noh akut kho ng’gung ci gui-am “Na kat nak gui phäh m’gein nak na gah püi ci nei” ci neh pyein hleih, k’chang gui-ah hmat cuh Khanpughü tumat bäng noh kat nak gui m’gein hnging ci-ah kia neh kä yum tu ba ci gui phih om ci. Bawi noh k’chang gui-ah ng’ngaih cuh hmat gui neh “Na kat nak-ah phäh m’gein nak na püi ci nei” ci-ang ng’hloi tu ba “Na ih phah ko ba neh na kho lek-awn ng’leh neh hteit-ä ci-ang a yät tu ba” ci neh ng’shi gui ne tah ani cuh kho m’dek khan-ah kat nak gui k’phyon hnging ca k’chang-ah akia-ah mong cuh ng’hten hleih am’dang nak-ah akut kho ng’gung ci-am ng’düi lo neh na im-ah hteit ba ci neh pyein nak ci. A kut kho ng’gung ci cun phih ng’düi lo neh m’khan ba hnging ca kia ci.

      Bawi Khanpughü noh pum kyä lam täng kä gai gong ci gui ni kat nak gui-awn ng’mü m’cha lam täng kä gai gong ci gui phih m’gai ba gui ci. Bawi a om yah-ung k’chang ak’da cuh ami kat nak gui da k’hma ca ng’ngai u neh m’gein nak kä gah tu hnging khai gui-ah ng’ngai ci gui. Khanpughü-awn ng’gei ba vai phäh Jew pa khui gui-ah thum gui cuh läk vai ci-ah ng’thu m’cäi k’shüm noh m’thei m’thang ci gui. Ng’yu ba neh m’gein nak shang ca k’chang cuh Khanpughü noh m’gein vai neh a ge-ah om ca mong cuh Bawi Yeisu noh m’thei ci. A ng’yu ba vai kä hlü ca k’chang k’ni-ah tah ng’yu ng’yawn ba ca kat mah k’chang cuh Khanpughü noh m’hngi pi ca akia-ah mong cuh m’thei m’thang gui ci. Bawi Yeisu noh “ng’yu ng’yawn ba ca hta” ci-ah puma cun phih m’thei gui ci. Bawi Yeisu noh am’gein ba gui-ah k’chang gui cuh k’chang k’bä gui ami kia tu vai-ah k’tha guui cuh gah lo ci gui. Maria Madalean cu phih kat nak -ung ka noh kung-ka noh phyong neh Bawi-ah hngu läk tu ca k’chang k’bä-ah kia lo tu ci. K’hlam k’lok Sacheu cun phih akhoh gui du dawng ci gui-am a peit taak tu gui vai lah kä chin hleih ami koh alak te gui pe ba gui khai-ah ng’khan ci. Bawi-ah pei-ah ami kyang tu-ah m’guk ei cun phih Bawi-ah m’gein nak gah neh Khanmopi ghun kho-ah gok tu khai-ah kia lo ci. Bawi noh “ Nang-am ak’cang-ah ka pyein cuh nang cuh tu ngawi kei-awn atäng-ah Paradisu-ung na om tu khai” ci neh pyein nak ci.

      Mikmi noh k’chang-ah m’gein nak mi ng’yak hlü-ah kia-ung mi mät ge noh phih k’chang hngei gui-ah kat nak cuh mi m’gein tu gui vai hlü lo ci. Mi kat nak gui Khanpughü noh ana m’gein gui vai mi ng’yak hlü-ung mikmi cun phih na kat na gui ci-ah k’chang gui mi m’gein hnging vai-ah age-ah mi om vai hlü ci.

    Bawi Christu noh ani tu that neh ngawn shep ca k’chang gui m’gein gui neh “ Pa-aw ngai noh i a mi bi kä hmat ci gui” ci-ah suh shan nak gui bi pe gui ci. Cun-ah hlo-ah na kat nak gui ci cuh mi m’gein tu hnging vai hlü ci. Ngami ka vai k’hngüp täi hleih suh shan peit gui vai hlü ci. Suh shan nak gui cuh k’chang hngei gui ak’ni täng ami ng’thong ng’hlah lo vai phäh ni pi ci-ah täh tung-ah kia ci.

The post Na Kat Nak Gui M’gein Nak Gah Ci first appeared on RVA KCHO.

The post Na Kat Nak Gui M’gein Nak Gah Ci appeared first on RVA KCHO.

            Yumtu ng’bum-ung kat nak gui kä om vai phäh Bawi Christu noh ahlu läk ng’shä gui lah ngami-ah hngu-ah läk lo tu khai k’chang gui-am m’thei m’thang nak ma mong ami bi vai ka na hlak gui ci. “ Nangmi hteit u neh k’chang pa khui päng cuh kei-ah k’chang gui-ah kia hlak gui neh nang mi-am ka ni m’thei m’cäi gui phung cuh läk neh ami bi loh vai phäh ngami-am m’thei m’thang gui vä.”

            Bawi Christu noh khanmopi-ah kä kai ba pha-ung shin gui cuh m’thei m’cäi gui ghüt ci. Khanmopi-ah akai ba kon-ah ahlu läk gui noh i ami m’thei m’thang gui vai cuh lam m’shüm gui khai-ah Hti theing ca muh khanpughü cuh tüih lo gui ci.

            Peter lah hlu läk ng’vai gui noh ngami k’däih do khai gui-ah Papa Shangpughang lah K’taigü mang gui-am m’thei m’thang nak vai Aana cuh pei gui ghüt ci gui. Ngami gui cuh hti theing ci-ah ng’thu gui lah thum gui cuh m’thei m’thang nak vai aana cuh ak’pe-ah gah ci gui. Hti theing ca ng’thu cuh Khanpughü mät-ah ng’thu-ah kia ci. Yumtu ng’bum-ah hngu mong k’htük yah-ung ng’thu k’theing ci cuh kä om pha ci. Jew k’pa khui gui-ah guk then nak gui-ung kah hngawn gui tah ng’thu k’theing-ung m’dawn ci gui cuh m’theing m’thang nak bi ca yumtau ng’bum-ah phäh däm neh hnging ca ma mong tumat-ah kia ci.

           M’thei m’thang nak bi ci-ah yumtu ng’bum-ah phäh Chritain gui ami m’thei m’thang gui vai phäh ng’thu hteing lah thum gui cuh hlü ci. Ng’thu theing-ung am’shah cuh hmat hnging vai thuuk neh ahlü hlü-ah k’phlan ci gui. Papa shangpughang lah k’taigü mang gui noh hti theing ca muh-ah ak’khang-awn christian gui cuh m’thei m’thang gui hnging ci gui. Yumtu ng’bum-ah lu k’kye-ah kia ci-ah Papa Shangpughang noh hting ling chüi kha nak lah yum nak-ung cang ca mong gui cuh m’thei m’thang ci.

        Kho m’dek pum-ung om ca k’taigü mang gui ni Papa shangpughang ni cuh ng’ge ng’shä ba hti u neh yumtu ng’bum cuh i hlo k’cha m’thei neh pyan tham ba vai-ang ci gui cuh k’bäi ci gui. Yumtu ng’bum-ah hngu mong teng ba-ung ng’ge ng’shä nak gui cuh ak’khak vei bi ci gui. A k’hnguh pi-ah a k’hngih vai nak Vatican ami bi nak cuh 1962 tung ka noh 1965 chüit-ah bi ci gui. Papa shang pughang cuh kho m’dek k’om Catholic yumtu ng’bum-ah Saya-ah kia neh k’taigü mang gui cuh yumtu ng’bum ng’pai gui-ah yum nak-ah pa gui-ah kia ci. Papa shangpughang cuh k’chang van-awn ng’pak ca yum nak gui lah hting ling nak-awn ng’pak ca cang nak gui cuh ami m’thei m’thang nak gui cuh kä hma hnging ci. Kat nak k’ka ci cuh hti hteing ca muh khanpughü-ah ni tu hnga ci-ah ni bä nak lah kat nak ng’nü noh kä koh nakah kia ci.

The post Chang K’khui Päng hteit Neh M’thein Gui Vä first appeared on RVA KCHO.

The post Chang K’khui Päng hteit Neh M’thein Gui Vä appeared first on RVA KCHO.

The post Khomdek ka vai ktàigünak first appeared on RVA KCHO.

The post Khomdek ka vai ktàigünak appeared first on RVA KCHO.

    Shawlamung Shangpughang ashih kon-ah Israel pa k’khui cuh k’hngih-ah ng’pai ci. A m’shah cuh David shangpughang-ah hngün thong ca shangpughang gui-ah pyein ng’ngai ci lah a m’shah cuh a hngei shangpughang-ah pyein ng’ngai ci-ah ng’pai ci. A ni nik k’hngih cuh a hngei pa k’khui gui-ah hlo-ah shing ni, lung-awn pyaan-ah müi k’tung gui cuh shum chuk lo tu u neh Khanpughü-ah m’cäi mong gha cuh k’hmih lo ci gui. Israel Pa khui gui cuh a hngei pa k’khui gui-ah hlo-ah Khanpughü noh kä yum-ah hma ci gui ai bi nak-ung ami m’lung k’tha m’hteng lo ci.

  Cun gui hmat ca Khanpughü noh ami bi loh gui cuh hma ca akia-ah mong cuh ami hmat vai-ah k’ce ng’shä gui tüi gui ci. A ghü k’cei-ah pa khui noh Khanpughü-am ami peit te-ah k’chü khän gui cuh ami gäi-ah mong cuh k’ce ng’shä gui m’cäi m’ä ba gui ci gui.

Khanpughü noh ngami gui cuh ami kat nak gui-ah phäh ng’yu ba neh ami ng’thong ng’hlak lo ba vai ng’ya hlü ci. Ng’büh ng’mang ci gui noh du dong pa ca ci gui-am ami khoh tang ami peit tak tu gui vai ng’ya hlü ci. Israel pa khui gui noh k’ce ng’shä gui-ah ng’thu gui cuh kä ng’ngaih-ah k’hlet ci gui.  

               K’ce Ng’shä Isaiah

Bawi Yeisu kä ng’tüi tu pha kho kum phya ng’bum a pi hlok-ung k’ce ng’shä gui noh k’phyon ca Bawi alo vai mong-awn ng’pak hleih k’chang gui cuh ng’pyang ng’tham hlak gui ci gui. K’ce ng’shä Isaiah noh k’phyon ca Bawi alo vai mong cuh ng’thu shä ci. K’pyon ca Bawi cuh ng’lami hta-ung ka noh ng’tüi om lo tu neh kho m’dek k’om shangpughang gui-ah tah bä ng’mang tuba neh hlüng tai tu ba khai-ah mong gui cuh k’ce ng’shä Isaiah noh ng’thu shä ci.

 A huham däm ca shangpughang cuh gok lo neh Israel kho cuh caw neh m’düih lo ba khai-ah Jew pa khui gui noh ng’ngai ci gui. K’ce ng’shä Isaiah noh a pyein cuh k’phyon ca bawi cuh thüi hlei nak yaica nak gui om khai-ah pyein hleih k’chang gui cuh cäi ci gui.

             K’ce Ng’shä Jeramiah  

K’chang gui cuh lung shing gui-wn pyaan-ah müi k’tung gui düt ami shum chuk yah-ung k’ce ng’shä Isaiah ng’pyi hleih k’ce ng’shä Jeramiah cuh om lo ba ci. A ni noh cuh müi k’tung gui shum chuk nak gui ng’yu ng’yawn nak ba-awn ami nong chah vai ng’ya hlü ci. Ani cuh a shäng shäng pha neh chum neh ami ci.I kia hleih ci-ung ani cuh Israel shangpuhgang-ah kat nak lam täng abi nak gui cuh k’hlet cheng geng ca kia ci. K’chang gui cuh ami kat nak gui-ah phäh tana gah khai gui-ah mong cuh shä ci. Ei awk vai khaih neh ng’tuk ng’aah nak gui-awn a täng-ah chang gui cuh Babilon shangpughang-ah k’ka-ah gok ci gui. A cun yah-ung k’ce ng’shä gui noh k’phyon ca Bawi om lo tu khai ci neh k’chang gui-ah m’lung cuh m’gei pe gui ci gui.

Ng’thu k’phyüm-ung kah k’ce ng’shä gui-ung kah ak’hngu pi k’ce ng’shä cuh k’phyon ca Bawi a ng’tüi tu kon-ah leng nah ama mong bi ci. Cun cuh John Baptista-ah kia ci.

The post K’ce Ng’shä Gui-ah Ng’thu shä Gui first appeared on RVA KCHO.

The post K’ce Ng’shä Gui-ah Ng’thu shä Gui appeared first on RVA KCHO.

Bawi Yeisu cuh kho m’dek khan-ah akyum lo yah-ung k’chang tu k’cang-ah kia neh om lo tu ci. Cunte ani-ung kat nak cuh kä kop ci. Bawi Yeisu cuh ng’pyi pi ca kho kum phya m’ku yah-ung om lo tu te ci. Cun cuh ma neh a kyum lo-ah kia ci. Yum nak-ah ci-ah kho m’dek ang’pyi lo-ung lo ba khai-ah pyein ghüt ci. Cun cuh ak’hngih vei nak a kyum lo ba-ah kia khai. Ng’dün neh ghüng ca Khanpughü-ah lam cuh ng’shung hngei hlak vä. Ci neh om ci.

Yumtu ng’bum-ah shum chuk nak kum cuh Adventus-ung leng neh Bawi christu Shangpughang akia nak-ah poi-ung ng’pyi ci. Adventus cuh Novenber ang’pyi lo yah lah December ak’htük yah gui-ung gok lo hti ci. Adventus-ung kyün hngüp cuh (4) vei om ci.

Yumtu ng’bum noh March k’cha a (25) nak-ung K’khan khio ng’shä Cabriel noh Maria-am ng’thu am’thein lo-ah poi k’hngüp cuh bi ci. Cun k’hngüp cuh Bawi Yeisu ang’tüi lo tu vai Nu Maria noh aäi nak-ah kia neh cun-ung kah noh cha k’ko ng’lak la hleih December a(25) k’hngüp cuh Bawi-ah ng’tüi lo nak tu-ah k’bäi neh Christmas poi cuh bi ci.

 Christmas poi bi vai phäh pong htei nak-ah Adventus cuh a hta nak vai ng’et lo ca kyä tak mah hngumi-awn täng ci. A u ng’chu ng’la goi phih ani hta k’hmaw ng’tüi lo tu khai-ah ani hmat-ung yei tu neh pong htei khai goi-ah kia ci. K’phyon ca Bawi hta om lo tu khai kia hleih yumtu ng’bum noh m’lung kyong-ah ahting ling a chüi kha hta-ah pong htei hnging vai-ah Adventus ci neh k’bäi ci.

Ng’chu ng’la goi-ah kia ca k’pami cun phih ak’chu hta lo khai-ah kia hleih yei tu neh ak’hmo hta aom lo tu-ung kavai cuh pong htei khai-ah kia ci. A k’chu k’hngumi cun phih ahta lo-ung u hta-ah mä akia ko ci neh yei tu neh ng’pyang tham khai-ah kia ci. A pai na, apäi na gui cun phih cun-ah hlo-ah yei tu u neh ani nu-ah pei-ah om neh güng kyo ci gui-ah kia ci. Cun-ah hlo-ah pong htei nak, m’hngi nak, yei nak, ng’ngaih u nak-awn be ca Christmas gün nak-ah Adventus cuh yumtu ng’bum noh ng’ngah tüh häih häih neh ak’bäi-ah kia ci.

Sweet December ci neh ng’ven tu ng’kyu cuh December ak’htük hngüp-ah kia neh Adventus k’kong -ung gok lo püi ca kia hleih Cahtolic yum tu k’chang gui noh ng’ngaih nak vai hlü ci. Mi m’lung gui hti theing khai-ah ng’pyan tham nak pong htei nak-ah kia hleih ei awk neh ha ya düit neh kä hlä lä ng’däi düit vai kia ci.

Van-ah m’lung kyüm be ca pong htei nak-awn k’pyon ca Bawi cuh ng’tüi om lo tu hnging hlä ci neh ni k’tai gü peit gui nei.

The post Adventus lah Sweet December first appeared on RVA KCHO.

The post Adventus lah Sweet December appeared first on RVA KCHO.

 Kho m’dek Khan-ah yumtu ng’bum gui, yum nak gui ak’khak om ci. Khapughü-ung ka noh lo neh cang ca yum nak cuh mikmi noh i hlok cha mi hmat hnging khai-ang? Catholic yumtu ng’bum cuh ahngei yumtu ng’bum gui-awn ng’cha ci ci cuh i hlo k’cha mi hmat hnging khai-ang?

      Catholic Yumtu ng’bum cuh a hngei yumtu ng’bum gui-ah tah hngei tu hnga ca müi cuh k’phli om ci. Cun gui cuh Missa gün ap yah-ung yum nak ng’bäi nak-ung hlu läk ng’shä gui-ung ka noh kyum lo ca, tumat bäng kya ca, hti theing ca, Catholic yumtu ng’bum cuh ka yum ci. Ci neh mi m’cu gui cuh ni tu hnga neh hngei tu hnga ca mong-ah kia ci.

  Yumtu ng’bum cuh tumat bäng kia ci

                Bawi Christu cuh yumtu ng’bum tumat bäng tüi pyang neh Bawi-ah shi hla gän ap nak Secramentu gän ap nak cuh yumtu  ng’bum-am pe ghüt ci. Kho m’dek pum om ca Catholic yumtu ng’bum k’chang gui a vam cuh Scramentu, Phyon nak lah Khanpughü-ah mong gui yum nak-ung ät ci gui. Tumat bäng kia nak kä cun-ung kong ät nak cuh ahngei yumtu ng’bum gui-ung kä hnguh hnging-ah kia ci. A hngei yumtu ng’bum gui-ung tumat lah tumat-ah yum nak cuh kä täng hleih mi hnguh hnging ca kia ci. Catholic yumtu ng’bum lei-ung Hti theing ca ng’la mi hta Maria yum nak-ung phih kiai, a hngei hle lah cang ci-ah mong gui yum nak-ung phih kiai yum nak cuh täng ci-ah kia ci. Catholic yumtu ng’bum cuh ät ca yum nak lah hti theing ca Muh Khanpughü-awn kong ät neh om ci-ah kia ci.

Yumtu Ng’bum Cuh Hti Theing Ci

              Yumtu ng’bumh-ah m’thei m’cäi cuh hti theing ci. A bü ceng nak lei cuh Secramentu ci-ah chü-ah hngei tu hnga ca ni bä nak gui-awn yumtu k’chang gui cuh hti theing khai gui-ah a pyan vai kia ci. Catholic k’chang k’bä gui cuh mikmi gui-ah phäh-ah thei lah tu vai-ah k’chang gui-ah kia ci. Ngami gui cuh yumtu ng’bum-ah hti theing nak cuh ami k’bäi-ah hlo-ah ngami-ah mong gui shui lei tu nak cun phih Khanpughü-awn na ng’et nak hlak gui-ah kia ci.

Yumtu Ng’bum Cuh Cathlic-ah Kia Ci

                Catholic ci cuh avan-awn ng’pak ci-ah a thuuk k’phlan-ah kia ci. Yumtu ng’bum cuh Kho m’dek khan-ah om ca k’chang pa k’khui gui van-ung hteit neh kho k’chang van phyon nak gah vai bi ca kia ci. Mikmi gui cuh kä mi täng neh a hngei hngei gui mi ng’bum lo tu lang  hleih mi yum nak-ung ng’nu ng’be hta gui-ah mi kia yop ci.

Yumtu Ng’bum Cuh Hlu Läk Ng’shä Gui-ung-ah Lo Ci

                Mikmi gui-ah ng’mü m’cha täng-ah khong mang k’chang gui-ah kia ca Papa Shangpughang lah k’taigü mang gui-ah bi loh nak aana cuh hlu läk ng’shä gui-ung ka noh ng’dün neh kyum lo ci. Caw kia hleih k’taigü mang gui lah ami ng’vai-ah kia ca Papa Shangpughang-awn atäng-ah hlu läk ng’shä gui-awn atäng-ah m’thei m’thang nak-h aana cuh om ci. Cun gui cuh Hti Theing ca Muh Khapughü-ah ak’khang -ah lam m’shüm nak-awn bi lo ci gui-ah kia ci. Bawi Yeisu noh am’tu m’täng nak-ung hto k’shäm lah tho ng’nong cuh pyein hti ca kia ci. A hto gui ng’hngei-ah hlo k’ei aw-ung ka noh ghung vai neh amät-ah hngun pe ca hto k’shäm cuh ni ca hto k’shäm-ah kia ci-ah amät noh amät cuh bü neh pyein ci.

             Yumtu ng’bum cuh Peter-ah htinpaw ci neh chü ci gui. Khong mang neh lam m’shüm ci cuh Papa shanpughang-ah kia ci. A k’hngu pi bü ceng nak-ah kia ca Khanmopi-ah k’chang gui ami gok tu güt chüt hleih yumtu ng’bum noh tu m’bei m’htei m’hta neh k’chi gok ng’hngum ng’kyeng nak aom yah-ung gai gawng khai-ah gung tu k’ca kia ci.

The post Yumtu Ng’bumh-ah Müi first appeared on RVA KCHO.

The post Yumtu Ng’bumh-ah Müi appeared first on RVA KCHO.

Ngami noh Bawi-ah m’cäi gui ghüt-ah ci-ah a shüng hta k’äih vai neh pong ci gui. Hlu läk ng’shä gui cuh a hngei hlu läk ng’shä gui-awn a täng-ah im k’kyong-ah ng’bum hta neh suh shang ci gui. Nu Maria cun phih ngami-awn atäng-ah om tu ci. Ngami noh Judah-ah hngün-ung Mathia cuh m’thon neh k’hmawh ba ci gui. Hti theing ca muh Khanpughü a kyum lo vai-ah phih k’tai gü ci gui. Kho k’hngüp gha be lo hleih ng’hngum neh ng’tum ca kho k’chi cuh ami om nak om k’kyong-ah ng’ya lo ci gui. Mei m’lei hta gui cuh ngami-ah tumat hti-ah k’khan-ah kyum lo ci. Cun cuh Hti theing ca Muh Khanpughü-ah kia ci. Cum kon lei-ah ngami cuh ami kyä hla ami m’neh vai, ami shih vai cuh kä kyüh kyok lo ba ci. Hti theing ca ng’thu k’ni gui cuh ami m’thei m’kan gui-ah age-ah ng’pyang lo ci gui.

Hlu läk ng’shä gui cuh ng’thu k’ni leng neh m’thei m’kan nak bi lo ci gui. Hnguh ng’ya tu ci gui noh phih cäi cat neh ng’ngai tu ci gui. Ngami-ung -ah ak’da tuba cuh Sinai m’htung k’khan-ah k’Khanpughü noh m’cäi nak gui a peit-ah poi-ah caä Esarael pakhui k’chang gui-ah Shapok poi-ah phäh Jeruselem mang go-ah gok lo tu ci-ah Jew pakhui ng’pai gui-ah kia ci. K’chang ak’da cuh hlu läk ng’shä gui noh Creek, Latin, Arab k’chü gui lah a hngei ng’thu gui-awn ami m’thei m’kan tu gui cuh cäi cat neh ng’ngai tu ci gui. Hti theing ca Muh Khanpughü noh ngami-am ng’thu ahlü hlü pyein hnging ca bä nak cuh pe gui ci.

Cun-ah ng’thu ng’hta ak’khak ami pyein hnging cuh Hti Theing ca Muh Khanpughü-ah bi loh-ah akia-ah mong cuh Peteru noh k’chang gui-am m’thein gui ci. Peteru noh Bawi Yeisu cuh shih nak-ung ka noh a k’cang -ah aghün lo ba-ah mong lah gün kyo te-ah k’phyon ca Bawi-ah akia-ah mong cuh shä neh m’thei gui ci. Bawi-h shih nak-awn phyon nak lah m’shi nak Secramentu-awn Hti theing ca Muh Khanpughü-ah ni bä nak gui cuh gah tu ci gui.

Peteru noh am’thei m’kan kan gui-awn k’chang ak’da cuh ami m’lung ng’thong ng’hlat hleih cu k’hngüp-ung chang shing phya thum kyip m’shi nak Secramentu gah tu ci gui. Cun-ah hlo-ah Bawi Christu-ah yumtu m’bum  cuh tün lo ci. Bawi yeisu sa ghün lo nak ba kho k’hngüp k’hma kyip be hleih Hti Theing ca Muh Khanpughü cuh hlu läk ng’shä gui-ah k’khan-ah kyum lo ci. Hti Theing ca muh Khanpughü-ah poi k’hngüp cuh yumtu ng’bum-ah ng’tüi tu nak-ah k’hngüp-ah kia ci.

The post Hngun Pe ca Bawi first appeared on RVA KCHO.

The post Hngun Pe ca Bawi appeared first on RVA KCHO.