Kho m’dek Khan-ah yumtu ng’bum gui, yum nak gui ak’khak om ci. Khapughü-ung ka noh lo neh cang ca yum nak cuh mikmi noh i hlok cha mi hmat hnging khai-ang? Catholic yumtu ng’bum cuh ahngei yumtu ng’bum gui-awn ng’cha ci ci cuh i hlo k’cha mi hmat hnging khai-ang?

      Catholic Yumtu ng’bum cuh a hngei yumtu ng’bum gui-ah tah hngei tu hnga ca müi cuh k’phli om ci. Cun gui cuh Missa gün ap yah-ung yum nak ng’bäi nak-ung hlu läk ng’shä gui-ung ka noh kyum lo ca, tumat bäng kya ca, hti theing ca, Catholic yumtu ng’bum cuh ka yum ci. Ci neh mi m’cu gui cuh ni tu hnga neh hngei tu hnga ca mong-ah kia ci.

  Yumtu ng’bum cuh tumat bäng kia ci

                Bawi Christu cuh yumtu ng’bum tumat bäng tüi pyang neh Bawi-ah shi hla gän ap nak Secramentu gän ap nak cuh yumtu  ng’bum-am pe ghüt ci. Kho m’dek pum om ca Catholic yumtu ng’bum k’chang gui a vam cuh Scramentu, Phyon nak lah Khanpughü-ah mong gui yum nak-ung ät ci gui. Tumat bäng kia nak kä cun-ung kong ät nak cuh ahngei yumtu ng’bum gui-ung kä hnguh hnging-ah kia ci. A hngei yumtu ng’bum gui-ung tumat lah tumat-ah yum nak cuh kä täng hleih mi hnguh hnging ca kia ci. Catholic yumtu ng’bum lei-ung Hti theing ca ng’la mi hta Maria yum nak-ung phih kiai, a hngei hle lah cang ci-ah mong gui yum nak-ung phih kiai yum nak cuh täng ci-ah kia ci. Catholic yumtu ng’bum cuh ät ca yum nak lah hti theing ca Muh Khanpughü-awn kong ät neh om ci-ah kia ci.

Yumtu Ng’bum Cuh Hti Theing Ci

              Yumtu ng’bumh-ah m’thei m’cäi cuh hti theing ci. A bü ceng nak lei cuh Secramentu ci-ah chü-ah hngei tu hnga ca ni bä nak gui-awn yumtu k’chang gui cuh hti theing khai gui-ah a pyan vai kia ci. Catholic k’chang k’bä gui cuh mikmi gui-ah phäh-ah thei lah tu vai-ah k’chang gui-ah kia ci. Ngami gui cuh yumtu ng’bum-ah hti theing nak cuh ami k’bäi-ah hlo-ah ngami-ah mong gui shui lei tu nak cun phih Khanpughü-awn na ng’et nak hlak gui-ah kia ci.

Yumtu Ng’bum Cuh Cathlic-ah Kia Ci

                Catholic ci cuh avan-awn ng’pak ci-ah a thuuk k’phlan-ah kia ci. Yumtu ng’bum cuh Kho m’dek khan-ah om ca k’chang pa k’khui gui van-ung hteit neh kho k’chang van phyon nak gah vai bi ca kia ci. Mikmi gui cuh kä mi täng neh a hngei hngei gui mi ng’bum lo tu lang  hleih mi yum nak-ung ng’nu ng’be hta gui-ah mi kia yop ci.

Yumtu Ng’bum Cuh Hlu Läk Ng’shä Gui-ung-ah Lo Ci

                Mikmi gui-ah ng’mü m’cha täng-ah khong mang k’chang gui-ah kia ca Papa Shangpughang lah k’taigü mang gui-ah bi loh nak aana cuh hlu läk ng’shä gui-ung ka noh ng’dün neh kyum lo ci. Caw kia hleih k’taigü mang gui lah ami ng’vai-ah kia ca Papa Shangpughang-awn atäng-ah hlu läk ng’shä gui-awn atäng-ah m’thei m’thang nak-h aana cuh om ci. Cun gui cuh Hti Theing ca Muh Khapughü-ah ak’khang -ah lam m’shüm nak-awn bi lo ci gui-ah kia ci. Bawi Yeisu noh am’tu m’täng nak-ung hto k’shäm lah tho ng’nong cuh pyein hti ca kia ci. A hto gui ng’hngei-ah hlo k’ei aw-ung ka noh ghung vai neh amät-ah hngun pe ca hto k’shäm cuh ni ca hto k’shäm-ah kia ci-ah amät noh amät cuh bü neh pyein ci.

             Yumtu ng’bum cuh Peter-ah htinpaw ci neh chü ci gui. Khong mang neh lam m’shüm ci cuh Papa shanpughang-ah kia ci. A k’hngu pi bü ceng nak-ah kia ca Khanmopi-ah k’chang gui ami gok tu güt chüt hleih yumtu ng’bum noh tu m’bei m’htei m’hta neh k’chi gok ng’hngum ng’kyeng nak aom yah-ung gai gawng khai-ah gung tu k’ca kia ci.

The post Yumtu Ng’bumh-ah Müi first appeared on RVA KCHO.

The post Yumtu Ng’bumh-ah Müi appeared first on RVA KCHO.

Ngami noh Bawi-ah m’cäi gui ghüt-ah ci-ah a shüng hta k’äih vai neh pong ci gui. Hlu läk ng’shä gui cuh a hngei hlu läk ng’shä gui-awn a täng-ah im k’kyong-ah ng’bum hta neh suh shang ci gui. Nu Maria cun phih ngami-awn atäng-ah om tu ci. Ngami noh Judah-ah hngün-ung Mathia cuh m’thon neh k’hmawh ba ci gui. Hti theing ca muh Khanpughü a kyum lo vai-ah phih k’tai gü ci gui. Kho k’hngüp gha be lo hleih ng’hngum neh ng’tum ca kho k’chi cuh ami om nak om k’kyong-ah ng’ya lo ci gui. Mei m’lei hta gui cuh ngami-ah tumat hti-ah k’khan-ah kyum lo ci. Cun cuh Hti theing ca Muh Khanpughü-ah kia ci. Cum kon lei-ah ngami cuh ami kyä hla ami m’neh vai, ami shih vai cuh kä kyüh kyok lo ba ci. Hti theing ca ng’thu k’ni gui cuh ami m’thei m’kan gui-ah age-ah ng’pyang lo ci gui.

Hlu läk ng’shä gui cuh ng’thu k’ni leng neh m’thei m’kan nak bi lo ci gui. Hnguh ng’ya tu ci gui noh phih cäi cat neh ng’ngai tu ci gui. Ngami-ung -ah ak’da tuba cuh Sinai m’htung k’khan-ah k’Khanpughü noh m’cäi nak gui a peit-ah poi-ah caä Esarael pakhui k’chang gui-ah Shapok poi-ah phäh Jeruselem mang go-ah gok lo tu ci-ah Jew pakhui ng’pai gui-ah kia ci. K’chang ak’da cuh hlu läk ng’shä gui noh Creek, Latin, Arab k’chü gui lah a hngei ng’thu gui-awn ami m’thei m’kan tu gui cuh cäi cat neh ng’ngai tu ci gui. Hti theing ca Muh Khanpughü noh ngami-am ng’thu ahlü hlü pyein hnging ca bä nak cuh pe gui ci.

Cun-ah ng’thu ng’hta ak’khak ami pyein hnging cuh Hti Theing ca Muh Khanpughü-ah bi loh-ah akia-ah mong cuh Peteru noh k’chang gui-am m’thein gui ci. Peteru noh Bawi Yeisu cuh shih nak-ung ka noh a k’cang -ah aghün lo ba-ah mong lah gün kyo te-ah k’phyon ca Bawi-ah akia-ah mong cuh shä neh m’thei gui ci. Bawi-h shih nak-awn phyon nak lah m’shi nak Secramentu-awn Hti theing ca Muh Khanpughü-ah ni bä nak gui cuh gah tu ci gui.

Peteru noh am’thei m’kan kan gui-awn k’chang ak’da cuh ami m’lung ng’thong ng’hlat hleih cu k’hngüp-ung chang shing phya thum kyip m’shi nak Secramentu gah tu ci gui. Cun-ah hlo-ah Bawi Christu-ah yumtu m’bum  cuh tün lo ci. Bawi yeisu sa ghün lo nak ba kho k’hngüp k’hma kyip be hleih Hti Theing ca Muh Khanpughü cuh hlu läk ng’shä gui-ah k’khan-ah kyum lo ci. Hti Theing ca muh Khanpughü-ah poi k’hngüp cuh yumtu ng’bum-ah ng’tüi tu nak-ah k’hngüp-ah kia ci.

The post Hngun Pe ca Bawi first appeared on RVA KCHO.

The post Hngun Pe ca Bawi appeared first on RVA KCHO.

Heberu pa k’khui k’chang gui cuh Khanpughü noh ni bä nak ak’khak leng leng pe gui hleih phih ngami cuh ami ng’yak hlü gui kä ng’päng ci. Tui kä om nak hla lai ma-ah ami gok lo yah-ung kat m’hluh ba mä ci gui. Cunte Khanpughü noh Moses-am a ng’sho htung-awn lung a m’ghuih vai pyein neh tui cuh luh lo hlak ci.

Khanpughü noh a ghü-ah pa k’khui cuh m’hngi gui ci. Ngami ka vai ak’da bi pe gui ci. I kia hleih ci-ung shin-ah pa k’khui-ung ka noh kho m’dek k’chang gui van cuh phion nak gah lo vai phäh kia ci. Caw kia hleih Khanpughü noh ani cuh Isarael pa khui k’chang gui-ah Khanpughü-ah akia-ah mong, Isarael pa khui cuh ani-ah pa khui k’chang gui-ah ami kia-ah mong cuh am’dang hlü-ah phäh-ah ngami gui-awn ng’thu khän nak cuh bi ci. Khhanpughü noh Heberu k’chang gui cuh a yei nak gui-ah ak’khak-ah ang’ngaih gui-ah hta k’hngu hta k’pa gui-ah kia hlak gui ci. Khanpughü noh ami läk vai-ah am’cäi nak gui cun phih pe gui ci.Khanpughü noh Moses cuh Sinari m’thung khan-ah chü neh a hngei u phih kä ng’läk-ein lo tu vai-ah m’cäi ci. Moses cuh kho m’htung pum kho ng’mei loh k’hngim neh vei hleih kho k’hngüp k’sho Khanpughü-awn ng’hta ci goi. A cun-ung Khanpughü noh am’cäi mong gha cuh pe ci.

Moses noh Khanpughü-ah m’cäi mong gha cuh a htin nak vai m’kyüm cuh pyan hlak gui ci. Cun-ah m’kyüm cuh ng’thu khän m’kyüm ci neh chü-ah kia ci.

Cun-ah ng’thu khän m’kyüm cuh Isarael pa khui k’chang gui-ah ng’lung-ung Khanpughü om tu ci ci-ah a ng’hmat nak vai phäh kia ci. Shin-ah ng’thu khän m’kyün cuh Isarael pa khui k’chang gui-ah suh shan nak lah m’shum chuk m’hlüng m’tai nak-ah lam kyum-ah kia ci. Ngami noh Moses cuh güng lo k’chit u neh ghui hlei müi k’tung k’hlüm u neh Khanpuhgü hlok-ah shum chuk ci gui. Cun-ah ami om kya gui noh Moses lah Khanpughü cuh ani m’lung m’sheit goi ci. Cunte a k’cang-ah ng’tu ng’yawn ba ca k’chang gui cuh m’gein ba neh kä ng’yu ng’yawn tu ba ci gui cuh am’shih nak gui-awn ng’loh ng’chan hlak gui ci.

Isarael pa khui gui cuh Khanpughü-awn ng’peng lo ci gui-ah kia ci. A mi kat nak gui ami ng’yu ng’yawn ba güt chüt hleih Khangpughü noh tan pe gui ci. Khanpughü-ah m’cäi ng’ngai neh ani yum äp ci cuh ak’kyen hta k’puih lo ba ci. Ngami gui cuh tui-ah hti geit-ah ng’hleh nak kho lei k’ni-ah khah püi gui ci. Ngami gui-ah k’kyong khui päng-ung hta k’hngu hta k’pa gui pung chei hlak gui neh mang hlak gui ci. Kho m’dek khan-ah Khanpughü-ah mik hmuh nak-awn Khanpughü k’cang hmat neh m’shum chuk ca pa khui k’chang gui-ah kia man te ci gui.

The post Khanpughü-ah Pa K’khui Pyan Tham Nak first appeared on RVA KCHO.

The post Khanpughü-ah Pa K’khui Pyan Tham Nak appeared first on RVA KCHO.

K’chang k’bä gui cuh ami ghün yah-ung ng’yu ba ca m’lung, m’hngi ca m’lung gui-awn ak’cum-ah ng’pyang ng’tham ci gui-ah k’chang gui-ah kia ci. A k’se-ung ka noh ak’ni täng-ah, ak’ni-ung ka noh ak’ni pi täng-ah ng’hlat u neh hma kat nak gui cuh m’hngi nak-ah m’lung-awn m’shi k’pyo hnging ci gui-ah k’chang gui-ah kia ci gui. Ghün om nak-ung phih ni ci gui cuh läk neh bi ci gui-ah kia ci.

K’chang k’bä St. Augustine cuh lam k’ni kä hnguh pha-ung kat nak gui akhak leng leng bi ca k’chang tuamt-a kia te ci. Cung phih cang ca lam cuh hnguh lo neh kä ni ca lam cuh nong ghüt neh cang ca lam m’düng neh läk neh tah k’chang k’bä tumat-ah kia lo ci. Hlu läk ng’shä St. Paul cun phih ak’cang cuh hle-ah ng’ngai neh hle cuh ak’cang-ah a ng’ngaih yah-ung yumtu ng’bum cuh duk k’dei na neh ng’lei m’hlo te ca kia ci. Cung phih cang ci cuh ahmat lo kon-ah aghün om nak pum cuh cang ci täng-ah m’hlat neh pyang tham ci. A kat nak gui cuh nong ghüt ci.

K’chang cuh kat bi hloi ca hngun k’ghüng tumat-ah kia ci. Cun-ah kat nak gui cuh ng’dawit neh ng’pyang ng’tham ba neh ng’yu ba hnging-ung k’chang k’ni k’chang k’bä-ah kia tu hnging-ah kia ci. K’chang k’bä gui cuh kat nak-ung ami luh täi hleih let lo ba neh ak’cum-ah ng’däi tho ba ci gui-ah kia ci. Ng’yu ba ci nak-ung kong-ah kiah, k’hlam-ah miktui-ah hlo-ah kiah nak gui cuh ng’yu ba nak-ah miktui-ah kä kia ci. Ca puma-ung kong lah k’hlam-ah akia-ung hla ani loh thai-ah ani puk poi ani m’neh yah-ung vah ani miktui ng’kia lo ci kia ci. Mät-ah kat nak-ah phäh ng’yu nak ba-ung kat-ah phäh-ah thüi tu k’cang neh m’lung thüi tu k’cang neh ng’yu ba vai cuh hlü ci.

K’chang k’bä gui cuh ami kat nak-ah phäh-ah ami ng’yu ba cuh kä ng’shot ci gui. Shih nak cuh i-ah-ung phih lo hnging ci ci neh a k’cum-ah hti theing khai-ah ng’pyang ng’tham ci gui-ah kia ci. A cun-ah kia neh ami shih vai, shih nak-awn ami ng’bui vai cuh kä kiü ba ci gui. Ngami gui cuh kat nak ami bi vai-ah tah ami shih vai vah ng’ya hlü ci gui. Kho m’dek khan-ah ashäng hta om vai, Khanmopi-ah ng’dün hleih om vai cuh hnguh u neh kat nak gui cuh hloi ci gui. K’chang k’bä Goliet cuh kum (167) yah-ung yumtu ng’bum gui cuh läk neh ami ngon sheh yah-ung ami pha tu. Netah ayum-ah Khanpughü cuh ami plah hlak ak’she-ah ami pyein hlak, cunte Goliet noh ka kho kum 86 pum-ung Khanpughü noh hngät phih ak’se-ah kä na ci man ci kä plah hnging khai, a hngei kho ng’yo gui phih kä m’tam, kä m’hlüng m’tai hnging khai ci hleih ngon ci gui.  Cun-ah hlo-ah bä ca k’chang gui cuh ami yum äp-ah Khanpughü cuh ami m’lung kyong-ah ka noh m’hngi tu k’cang u neh ayum am’hngi gui vai-ah hti theing hting ling neh om ci gui. Cun gui cuh k’chang k’ni k’chang k’bä gui-ah kia lo ci gui.

Hting ling neh chüi kha ca k’chang gui phung cuh k’chang k’bä gui-ah kia tu hnging u hlä.

The post K’chang K’bä Tumat-ah Kia vai Phäh first appeared on RVA KCHO.

The post K’chang K’bä Tumat-ah Kia vai Phäh appeared first on RVA KCHO.

Yeisu Bawi cuh a nu pa-ah bi loh ma mong gui gung tu neh bi püi goi neh om ci. Ngami cuh k’kyong khui k’kyong shuh shan nak gui cun phih bi tu hnga ci gui. Kyün k’hngüp cuh Khanpughü m’hlüng m’tai nak vai-ah khän tu hnga-ah kho k’hngüp-ah kia ci.

Bawi Yeisu kho kum gha lei goi a be lo yah-ung anu pa goi-awn atäng-ah Jerusalem mang go-ah hteit ci gui. Cun yah cuh Jew pa k’khui gui-ah hti theing pi ca poi-ah kia ca Pathaca poi yah-ah kia ci. Joseph lah Maria cuh Bawi Yeisu Jerusalem-ah ak’poih tu ghüt kä hmat ni neh a päi na  gui-awn ng’gui lo tu ba khai düt neh hteit ba ci goi. Kho k’hngüp ät ng’lak lo na chü tah Bawi Yeisu kä lo tu ba cuh hmat lo ni neh cäi ng’ä neh ani shui nak ba-ung ak’thum k’hngüp-ung ng’bum im k’kyong-ah ng’thu k’shüm ng’vai k’chang gui-awn Khanpughü-ah mong gui ng’ge u hleih hngu ba ci goi. Ng’ya tu ci gui phung noh ani-ah hnguh hmat nak gui lah abi thei pyein thei nak gui cuh cäi neh ng’ngai tu ci gui. Nu Maria lah Joseph noh i kia hleih am’thüi goi-ah mong cuh kä hmat ci goi. Nu Maria cuh cun-ah hlo-ah kä hmat neh a vuuk yai tu nak gui,  a do vai-ah age-ah aom nak gui, am’hteng nak gui lah ayum aäp nak gui-awn k’phyon ca Bawi-ah nu-ah kia chin hleih kia ci. Bawi Yeisu cuh Nazareth mang go-ah gok ba u neh anu pa-ah m’cäi cuh ng’ngai neh om ci. Na nu pa na üm hta vai ci-ah Khanpughü-ah m’cäi cuh ghü neh läk tu ci.

The post Hti Theing Ca K’kyong Khui first appeared on RVA KCHO.

The post Hti Theing Ca K’kyong Khui appeared first on RVA KCHO.

      Bawi Yeisu cuh ngami gui-ah tah nga k’shui gui, lo lai mah gui, k’kyong khui mah gui-awn ng’hnguh neh ng’hta ng’ko neh a ng’nam nep na gui ci. A mi hta k’hmo gui m’hngi gui neh puma gui phih m’thei m’kam tu gui ci. Bawi Yeisu cuh kat mah gui-awn ei ghawm neh om ät ci. Cun gui cuh Jew gui noh hnguh dam u neh kä yei nak ci gui. Bawi noh cäi cat vai gui k’hmuh gui hleih phih ngami Bawi cuh k’phyon ca Bawi ci neh kä yum ci gui. Khanpughü noh alam hngei-awn k’phyon ca Bawi cuh tüi lo ca akia-ah mong cuh do lak hnging vai-ah yum nak cuh hlü ci.

     Bawi Yeisu noh shi hla Secramentu-awn ng’pak hleih “Kei cuh Khanmopi-ah kyum lo ca hngun ei-ah ka kia ci.Shin ei tu ci gui cuh hngun ng’dün ghün nak gah khai gui. Shin-ah kho m’dek-ah phäh ka peit cuh kei-ah hla nei” ci neh pyein lo hleih ani yum tu te ci gui cun noh phih nong lo ghüt ci gui. K’chang a k’da noh k’chang hngei tumat-ah kyä hla ei cuh kat nak-awn be ci ci neh ng’ngai u neh hteh ta ci gui.

Jew pa k’khui khawng mang k’chang gui noh Bawi cuh  kä mi teng ba thei bäng-ah kä kia hleih kä yei lo na va ci gui. Moses-ah m’thei m’cäi gui kä läk tu ci ci neh Pharisees gui noh ng’ngai ci gui. Yeisu noh k’chang gui ami ng’ngaih ng’peng neh kä mi ng’gei vai-ah pong püi ci ci neh Saddusees gui noh hnguh ci gui. Bawi Yeisu noh thuuk ca m’thei m’cäi gui k’phlan nak-ung kä ng’ge püi gui-ah pyein u neh ng’thu m’cäi k’shüm gui noh phih u ci gui. Bawi cuh a i ng’bum a u ka vai-ah phih ng’düi ca kä kia neh ami kat nak gui cuh pyein lo pe gui ci. Bawi Yeisu noh Pharisees gui-am a k’pung täng-ah kyawm neh ak’kyong-ah she khak ca thung bawk-awn hlup-ah ng’cim hngüm lung vai hlü-ah pyein neh m’täng gui ci.

Jew pa khui gui noh ng’büh ng’mang khoh k’cham mah cuh Khanpughü-ah yei nak, du khaih nak cuh Khanpughü noh kat mah-ah kia hleih tan apeit ci neh yum ci gui. Cunte Bawi noh ng’büh ng’mang k’chang gui Khanmopi-ah ami gok vai-ah tah kalauk m’shi ng’pyün k’hngai-ung m’hluh ei vah yä tu ba khai ci neh pyein na gui ci. Khanpughü noh du dawng ci gui lah yai ca thü hlei ci gui m’hngi pi gui ca akia-ah mong cuh m’thei m’thang ci.

   Yum nak-ung khawng mang ci gui noh Bawi Yeisu a ng’ming thang neh a tai lo  vai cuh kä ng’ya hlü ci gui. Cunte a k’da noh Bawi cuh läk tu u neh a pyein-ah ci-ah ng’ngai tu ci gui. Ng’thu m’cäi k’shüm gui lah Pharisees gui noh Bawi cuh thuuk ci gui noh  Khanpughü-ah m’thei m’cäi gui-awn ng’peng ca ng’thu pyein hla lo müi khai ci neh ng’shi u hleih phih cang ci gui cuh m’thein gui cheng geng ci.

  Bawi-ah ga gui cuh Bawi noh cäi cat vai gui a k’khak leng leng m’dang gui hleih phih k’phyon ca Bawi ci neh kä yum ci gui. Ngami noh Bawi ami yum tu vai hlü-ung ami kat nak gui-ah phäh ng’yu ba khai gui hlü. Ngami cuh ami m’lung m’däm ci gui-ah kia neh Bawi cuh maa u neh ng’lung na neh ngon vai neh pong htei ci gui.

The post A M’lung M’däm Ci Noh Bawi Maak Ci first appeared on RVA KCHO.

The post A M’lung M’däm Ci Noh Bawi Maak Ci appeared first on RVA KCHO.

David cuh hto gui shäm ca ak’hmo hta-ah kia ci. Cunte ani cuh Isarael pa khui k’chang gui-ah phäh cäi cat vai-ah k’thai gui m’yung m’ya mah neh kia lo ci. Ani cuh gai ghang neh ng’tuk ng’aah nak gui-ung phih ak’ni pi lam gui cuh shui thei ca kia ci. Ani cuh Jerusalem tu neh m’chüt  neh ak’chang gui-ah mang go-ah kia hlak ci. David cuh Khanpughü yum neh m’hngi neh ak’chang gui-am phih ni ca ghün om nak vai gui cuh m’thei m’thang gui ca kia ci. David Shanpughang cuh mikmi-ah ghün om nak-ung Khangpughü ak’cum-ah om ca akia-ah mong lah Khanpughü noh i hlok-ah ana m’hngi gui-ah mong cuh na m’thei gui ca kia ci. Ne tah Khanpughü i hlo cha m’hngi tu ba vai mong gui cun phih na m’thei ba gui ci. Khanpughü noh gai ghang neh nget ngong hnging ca Goliat am’chüt hnging vai-ah gung tu ci. Goliat cuh dong k’chuk lo neh ang’thuh-ah hlui hlak gui, ak’koh-ah k’chim cun phih däm neh güh ca kia ci. David cuh yaw tawi neh k’chim phih kä k’kot tu ca kia ci. Cunte gai ghang ca goliat cuh ang’tuk püi vai-ah Khanpughü cuh ääp ca kia ci. A ning tuk nak-ung ng’näng ci. David noh ak’chang gui-am am’dang hlü cuh ng’müng van di maih lo khai ci-ah ng’ngaih yah-ung Khanpughü cuh mikmi-ah pei-ah om ci ci-ah kia ci. Khanpughü-ah k’tha gui huu ham cuh kho m’dek khan-ah om ca ng’mü van gui-ah tah däm da tuba ca akia-ah mong cuh am’dang hlü-ah kia ci.

David Shangpughang noh shuh shan nak-ah ahlü-ah mong cuh na m’thei gui ci. Ani noh ng’awi neh ng’ngaih phya ca tum k’khawn nak gui lah ng’äi ng’om nak gui cuh gu neh m’cu ca kia ci. Khanpughü-am ani noh ang’äi gui cuh salan ng’äi ci neh ang’ming thang ci. Cun-ah ng’äi gui cuh m’hngi nak lah m’tam khah nak ng’äi-ah kia neh kum phya k’da sho lo tu lang hleih Khanpughü-ah im k’kyong-ah tu ngawi güt chüt hleih m’cu ba-ah kia ci. I kia hleih ci-ung nga mi noh tuh chü mikmi noh mi yu-ah Khanpughü cuh bä neh hlüng tai neh kia ci ci-ah täng ca yum nak cuh na hmat tu hlak gui ci-ah kia ci. Ani-ah m’hngi nak yei nak cuh ak’cum-ah ng’däih hleih om ci. Mikmi noh ani cuh shum chuk neh m’tam khah neh mi kat nak gui cun phih ng’yu ng’yawn ba neh mi om vai hlü ci. Ani noh atüi pyan gui cuh mi m’hngi neh mi htei vai hlü ci. A ghün hngun ana k’pai tu gui-ah phäh phih mi shüm hmat tu ba vai hlü ci.

David Shangpughang cuh ni ca Shangpughang-ah  kia neh Khanpughü cuh k’phyon ca Bawi ng’däih ca shangpughang cuh ani-ah kyong khui-ung ka noh om lo khai akya mong cuh k’chü khän te ca kia ci. Bawi Yeisu-ah hlo-ah David cuh a hto ng’nong cuh m’htei ca k’chang, ni ca hto k’shäm-ah kia ci. Ani cuh hnguh hmat nak gui-awn be neh taga ca Shangpughang-ah kia ci. Goliat-ah kut-ung  ka noh Khanpughü noh ak’phyon yah ge-ung Khanpughü-am a hngun pe khai-ah ng’ngai ge ca kia ci. Ca gui guk neh m’cu ca Shangpughang cuh k’chang gui k’phyon vai Khanpughü-ah bü ceng nak-ung k’chang k’bä tumat-ah kia tu ci.

The post Shangpughang David first appeared on RVA KCHO.

The post Shangpughang David appeared first on RVA KCHO.

        Na mät noh na mät na hmat vai ci cuh van noh ng’ya tumat khai. Cun-ah k’chü cuh pyein vai ayät-ah hlo-ah bi vai cuh kä yäk ci.I kya hleiih ci-ung cun-ah hngu-ah ng’shüm nak ci cuh om ci. Cun cuh bi shüm nak läk shüm nak gui kä om-ung mät oh mät hmat nak cuh kä om hnging khai kia ci. Tumat ku bi lo-ung i-ng ka bi, ng’ngah tüh nak aluh lo-ung i-ang ka ng’ngah tüh yah ci gui neh mät noh mät cuh ak’cum-ah ng’ngaih na neh ng’shüm neh om vai hlü ci.

        Hnguh hmat ca k’chang tumat noh apyein cuh k’chü m’kha ät hta kä na pyein pha-ung k’thum vei na ng’ngaih tüh cang vai. I kia hleih ci-ung kä pyein pha-ung ng’ngah tüh cuh pyein kon, bi kon-ah ng’yu ba-ah bä tuba ca kia ci.Poi k’kyong-ah kah avan lut lo khai-ah pyein lo phleng phleng-ung k’chang hngei gui noh kyä kä gai cuh na hmat lo tu khai gui-ah kia ci. K’chü m’kha tumat om ci. Cun cuh na hmat na bi vai, na bi na hmat vai ci-ah ng’shüm hmat nak kä om-ung mät noh mät i bi hmat vai kä ng’hloi-ah hlo-ah bi chin gui cun phih phloi khai kia ci. Boi Yeisu noh shing m’kang k’khan-ah ang’bah yah-ung ani tu that neh ngon m’shih ci gui-ah k’chang k’nget gui-am “Ngnami noh kä hmat neh ami bi nei m’gein tu gui-ä.” ci neh apyein cuh tuh ngoi güt chüt hleih ng’ngah tüh vai ni ca k’chü m’kha tumat-ah kia ci. Cun-ah hlo-ah mikmi-ah ghün om nak-ung phih ak’ni vai k’tha na neh bi-ung phih kä hmat ca, mät-ah tah hnguh hmat nak kyen tu ba ca k’chang m’shah noh ana ng’shuk chak lo-ung cun nak k’chü m’kha cuh shüm ba neh k’tha lak ba vai kia ci.

       Boi yeisu noh apyein nak-ung mong goi lo hning ci. Ma neh tumat cuh k’chang k’ngon gui noh Boi yeisu cuh khanpughü-ah kä hmat neh ami duk dei nak, ami tuk thah nak-ah phih kya hnging ci. A hngih nak-ung k’chang k’ngon gui noh ngami-ah bi cuh ni ci-ang ka ci-ang cuh kä mi hmat-ah phih kia hnging ci. Cung phih ami duk dei nak-ah Boi Yeisu noh ak’ni lam täng-ah ng’ngaih pe gui ca mong cuh mi hmuh hnging ca kia ci. A k’hngih nak-ung ka ng’ngah tüh ba-ung k’chang tu that neh m’lei m’hlo nak cuh ni ca ma mong kä kya-ah mong cuh lei cuh hmat hnging ci gui. Cung phih hmat nak cuh a hmu-ah phäh kia ci.

      Ng’yak hlü lah hmat nak cuh ng’toi ge lei-ung ni tuba ci. Ng’yak hlü cuh ma neh hmat nak cuh a hngu lo-ung ng’yu nak ba noh cuh läk lo ge ca kia ci. Ng’shüm nak hamt nak gui kä om-ung mei-awn kä ng’shü neh k’hngüp khui-ah m’tham neh hteit ca k’chang-awn täng ca kia ci.

The post Ng’shüm Nak Hmat Nak first appeared on RVA KCHO.

The post Ng’shüm Nak Hmat Nak appeared first on RVA KCHO.

Khanpughü noh ngami cuh am’hngi nak-awn tüi pyang gui ci. Khangpughü noh Khanhtapup gui cuh ani-awn atäng-ah yei kyai neh ami om tu vai ng’ya hlü neh a tüi gui te. Khanhtpup gui noh ami m’hngi tu ba vai hnging vai-ah ng’hla tha ca m’lung ngaih ni tu hnga ca ceisu k’tha gui cuh pe gui ci. Cunte Khanhtpup am’shah cuh Khanpughü-ah pyein, Khanpughü-ah phan-ah kä om ba hlü neh ng’hngu ng’tuk lo püi ci gui.

Khanpughü-ah beit ng’ngai ci lah kä ng’ngai tu ca khanhtpup gui khanmopi-ah ng’tuk ci gui. Ni ca Khanhtpup gui cuh Khamopi-ah om ghüt u neh kä ni ca Khanhtapup gui cuh m’htei kho-ah hteit ci gui.

Khanhtapup gui-ah hlo-ah Adam lah Eva cun phih a tüi goi te. Khanpughü noh ng’hla tha nak pe goi neh teih püi goi hlü-ah am’om goi te. Ngani cuh lo ma-ung kah I phih ei neh gah ci goi, cunte ang’lung-ung ghüng ca shing k’theih bäng cuh kä ni ei-ein vai-ah am’cäi goi.

Cun-ah k’theih cuh ani ei-ung Khanpughü-awn täng oo tu khai goi ci neh kho k’nget noh tawk goi hleih cun-ah k’theih ei ni ne Khanpughü-ah k’chü cuh k’hlet lo ci goi. Caw kia hleih ngani-am tan cuh pe goi ci. Cun cuh kat thük-ah akia-ah hlo-ah Nu pa k’htük-ah hma kat nak-ah phih kia ci. Adam lah Eva cuh Khanpughü noh ani kat nak-ah phäh tan pe goi ci. Cunte am’hngi nak goi cuh kä maih ci. Khanpughü noh ngani achü nak ba goi vai lam cuh shui ci. Ani kat nak gui m’theing m’htaih pe goi neh Khanmopi k’shoh k’hmawng ba khai-ah k’phyon ca bawi ka tüi lo khai ci neh k’chü khän ci. Bawi yeisu cuh k’phyon ca Bawi, ani cuh mikmi gui-ah kat nak ana k’phyon gui vai-ah shing m’kang tung-ung shik ci. Ani cuh kho m’dek pum k’phyon ca Bawi-ah kia ci. Ani cuh shih nak m’chüit neh ghüng lo ba neh apa Khanpughü-ung ng’dün neh ghü nak-ah hngun cuh na gah pe gui ci. Cun-ah ng’dün neh ghün nak cuh mi ng’kyüh ng’gah tu vai phäh-ah m’shi pyo nak Secramentu cuh na pe gui ghüt ci. M’shi nak Secramentu noh mi kat nak gui na m’theing m’htaih pe gui neh Khanpughü-ah ng’dün neh ghün nak-ah hngun cuh mikmi-ah ng’mü m’cha-ung na tuun pe gui ci.

The post K’phyon Ca Bawi Alo Vai K’chü Khän Nak first appeared on RVA KCHO.

The post K’phyon Ca Bawi Alo Vai K’chü Khän Nak appeared first on RVA KCHO.

Nga mi noh Khanpughü cuh k’hmih tu lang pang u hleih Khanpughü noh  nga mi cuh kä k’hmih gui ci. Khanpughü noh k’phyon ca bawi ka tüih lo khai ci neh apyein nak k’chü khaän cuh kä k’hmih ci. Khanpughü noh k’phyon ca bawi a tüih lo vai phäh thing ling chüi kha ca k’chang am’shah cuh  tün neh ghü ci. Abaraham cuh Khapughü noh a ghü-ah ahtük pi k’chang tumat-ah kia ci. Abaraham cuh yum nak ci-ah ceisu cuh Khapughü-ung kah däm pi hleih gah ca kia ci.

Khanpughü noh Abaraham-am aim-ung ka noh ng’düi lo neh lam k’hla-ah ahteh vai-ah pyein nak ci. Abaraham cuh ayum nak-ah m’shi theing-awn Khanpughü cuh yum ci. Yum nak ci cuh K’chang tumat-ah k’khan-ah äp neh ghün om nak-ah kia ci. Abaraham cuh ak’chu Sarah lah apai na-ah hta Loh lah hto ng’nong gui avan cuh khah püi neh lam k’hla kho dung-ah kia ca Canan kho-ah hteit ci gui. Kei noh shin-ah kho cuh ka ning pe khai ci neh Abaraham-am pyein nak ci. Nang cuh hlüng tai pi ca pa khui-ah pang’vai-ah na kia khai ci neh pyein nak ci. Cun-ah k’chü m’kha-ah phäh-ah k’chü khän kho ci neh hlui-ah kia ci. Khanpughü noh abü ceng cuh Abaraham-ung ka noh k’phyon ca Bawi ang’tüi lo vai phäh kia ci. Khanpughü noh ani-am khawh cham ak’da pe neh hto ng’nong cun phih ak’da pung hlak ci. Cun te ani hta k’hmo kä om tu hleih thüi ci goi. Ani ghü lo-ah pam-ah k’hmo hta tumat pe goi hleih yei tu ci goi. Nga ni noh yei kyai nak ci-ah Issac ci-ah ng’ming pe ci goi. Cun-ung leng neh ani cuh  aghün om nak pum-ung yei kyai ci.

Kho k’hngüp ät-ung Khanpughü noh Abaraham-ah yum nak cuh cam ci. Khapughü noh apyein cuh na hta m’htung khan-ah khah püi neh ngon neh na gän ap vai ci ci. Abaraham cuh thüi neh i akya vai kä hmat ci. Cun te Khanpughü ayum nak m’khän neh a pyein cuh läk ci. A hta cuh ngon lo tu vai k’cang neh apong yah-ung khanhtpup noh ng’dang lo neh m’shot neh i mäih akya-ung nang cuh Khanpughü cuh na ng’ngai khai-ah age-ah na om-ah mong cuh Khanpughü noh hmat pi ci nei ci neh pyein ci. Khanpughü yei tu ci nei. Nang-am ni bä nak gui ak’khak ning pe khai ci neh pyein ci. Abaraham cuh yei kyai nak-awn be ci. A pei-ah ng’shun-ung ng’awk ca hto me hta cuh ngon neh gän ap ghüt ci. Khanhtpup noh mopi-ah kah ai hli vai hlü-ah ahta gui pung chei lo khai gui ci neh pyein na ghüt ci. Khanpughü noh aghü-ah shin-ah pa khui-ung-ung kah k’phyon ca bawi om lo khai ci neh pyein nak ci.

Khanpughü noh mikmi gui phih kho k’hngüp ät-ung a caw mäih-ah na cam gui hnging ci.Khnanppughü noh m’hngi yei nak ca Abaraham kavai abi peit-ah hlo-ah mikmi gui cun phih m’hngi nak lah ng’ngaih nak gui-ah phäh yei kyai nak lah ni bä nak gui cuh ana peit gui vai-ah m’cun pi ci-ah kia ci.

The post Abaraham; Khanpughü-ah ng’shon Htung first appeared on RVA KCHO.

The post Abaraham; Khanpughü-ah ng’shon Htung appeared first on RVA KCHO.