Cun kòn ah kyòng im gui,sèikhat gui pâhtâ mòòng kyòng im gui néng neh pùng on ami kchák ah phäh ah kyòng kkài gui cuh bung yung ah phung tuh neh kyòng ami kài ah phäh ah mkhuh khmat a hlü hlü,gôigê nak a päng päng om lo ci. A i ah kya hleih ci ung bungyung ah a m’äm a hlü ahngäî om ca kpí gui ah hngú ah kài u hleih a cun gui noh ami htuih ah phäh ah góigê nak akthái gui ami gah lo ah kya ci. Tuhkbäih a cun ah gôigê nak gui cuh Covid lèi ah tah phih ngghüt tu ba hleih bùi ci gui akkhak tu ba cuh kchâ lüng hngô neh ngkùng ci gui ah kya ci. Acun ah a ngkyìng k’hlùi noh kkhân k’yòng on a kchák ah pùng ah phäh ni,hlêhnget kdäm gui on a kah khaghok nak gui ung a m’än gui i hlok ah ayat cuh u noh kä hmat pha hnging ca kya ci.

Ngleimdek ni,shingghing,khùmhlâ ni,kphyú kkhá,kkhìhlá,mkyüt mkyap gui lah tûi ung om ca kîkòng,ngá,k’âi ah chüt hleih ngtuk nak ung mang ah a m’äm noh a khò tüi pèi ngléng i hlok ah a dí cuh u noh kä hmat pha ca kya ci. Cun ah Kkhânpùghí noh a tüì ah kchàng lah a khò tüî pèingléng kä dí en ba khai ci hnging ci cuh a Kkhânpùghí mä ah vah kya ci. Yùm ktû kchàng phùng noh nghûi ngpâ ktàigü neh ngtuk khò a ngpäng hlah vai lah Kkhânpùghí ah dìm kyäp nak ghunkhò ung a om hlah vai ktàigü vai ah khîn lo ca kya ci. Cun ah ktàigü nghûi ngpâ nak phih a ngnéng düt ah kä kya en hleih a ghunkhò púm ung om ca htahtana ngvái gui noh nì na u neh akchün ah eî hlôi ktàigü neh Pá Kkhânpùghí ah dìm kyäp nak a om lo hlah vai ah bi vai khîn lo ca kya ci.Cun tu láng pang ah phih Kchòkhò a dìm kyäp ba vai chà tu hngá ca Kkhánpùghíah ni bä nak cuh kum 2025 ung ngdáng lo ci.

Cun ah a mdáng nak cuh Kchòkhò Htahtana Khòngmàng neh dìm kyäp khai na ktàigü püî gui khai ah Catholic Htahtana noh Ktàigü Mâng Ktùng Augustine Yòm Ghùng a na mdüih péit gui on hnguh hnging ah kya ci. A ghunkhò púm ung kä ni ca gá tuk nak ung mà kbäih neh ngdüí lo ca Kchò Kchàng chùi hlò gui khai ah Kkhànpùghí noh a ghü lo cuh cá Kcä Pùghí Ghung Mâng ah a kcä a ngkyüm bé lo nak ah phih kya ci. Ani noh a kcä cuh Kchò Htá noh pînlê tûi ung a kkhìm ktah lo khai ciah a kcä cuh ngkyüm be lo ca kya ci.

The post Ngtukkhò lah akhòtüî ah dínak first appeared on RVA KCHO.

The post Ngtukkhò lah akhòtüî ah dínak appeared first on RVA KCHO.

Shin ah nì lam ung kchàng avan ka vai khoh-tang gui atängtäng ah mang nak cuh kä kya hning ciah mòòng cun cuh kchàng kkên tu ba ah nghtòi gui ah goh mkot ah akya ah mòòng,kchàng gui noh khoh-tang ami mang lo ung khòh mdek ung kä yu khai ah nghlút neh pyéin ci gui.Cun kòn ah mi hmat ah täng ah kchàng gui ah phäh ah gah hnging ah êi ók gui ah ngbûm kthùm ung ngbûm ät cuh kchàng gui noh ghot u neh ami êi vai kä om ca akdú gui ka vai ah phäh ah acun ah ghoh cuh akdú gui ah êi ók vai guh tep gui ah kya ci. A ngdäih ah pyéin ung ghunkhò kkyòng lah a khòmdek púm ah kchàng ah gùi dá kä tàgá nak cuh mi kshíng ci.Kchàng adá lo ah phäh ah ngdü hngün tumat ung khoh-tang mangcâ nak aktén ah akâi lo ung ngdü hngün ung amòòng alam gui nggó ngài hlak ci. A ngtói gé ah akhòtüì pèingléng a thû shîn nak on mkónmkè mòòng ghoh ghoh ah khoh thêm gui gä hlêi nak,khoh-tang ngùi ghùi akèn cu lo nak lah kchàng ah om ih a düm lo nak gui a ngdün ah mi büí khai kya ci.

The post Akhòtüî lah akdú angmang gui first appeared on RVA KCHO.

The post Akhòtüî lah akdú angmang gui appeared first on RVA KCHO.

Shing Kthùm tumat ah kya ca Kkhânpùghí nüt dòng neh kä gah ah cäí vai ah nghtòi o,ngmüng van ah kyóm teng neh na mòòng na ngah-tüh hlak ä. Avan no nang Bói ah mòòng mdáng ci gui. Na tüi khmüt ah a hngün kghìng van ah phäh ah ning mtâm thêi ca mlùng thähla hlak ä.Mhngînak ah Bói o,keimi gui am khòmdek a hngùn kghìng gui ah na mhngi nak lòng hlak ciah na kya hlak gui ä. Nang Bói cuh a i a hngùn kghìng phih kä na khmih ci. Ânâ lah ngùi ghùi shäm ci gui am akkhang pe gui ä. Ngami ah màmòòng ah kä kya ci vai hlü ah ami om gui nong neh ami kthá ken ci gui ami bä lo vai khòmdek ami mhtei vai ah akkhang pe gui ä. Dú ci gui lah khomdek cuh ng’êi nghlô ci gui nei.O Kkhânpùghí o keimi gui am na phung takò akkhâng on na kbé gui ä. Hngùn gui avan kami mhtéi vai ah na gung gui ä. Ni ca ma lam na pyan pe gui ä.Taga nak ,mhnginak,dìmkyäp nak,kyómnak on bé ca ghunkhò gok lo hlak ä.Kami ning mtâm ci.Amen.2015 May 24Ngmùimchà Kthéing Pòi Ca Mkhäh

The post hngùn kghìng gui on Chritian gui ah ktàigü first appeared on RVA KCHO.

The post hngùn kghìng gui on Chritian gui ah ktàigü appeared first on RVA KCHO.

Avai hlü ah pyéin ah akya ung ngá pha nak ah ngdü hngün gui akèn lo nak gui cuh ngplôn ngplap neh kä bi thêi ca ngá shùi neh yòi ca kkyòng khùi gui akchün ah ploh kheih hlak ci. Ók ei ah tui gui a thûshîn nak cuh tûi kthéing ùm gui kä k’hleih hnging ca dú khaih ci gui ploh kheih ci.Tuili nu gui a pùm lo nak cuh ami ngplôn ngplap biloh nak vai kä om ca tui kkam pei ah om ca dukhaih ci gui ploh kheih ci.Kchòkhò ah om ca dukhaih ci gui cun phih ami bi vai kä om hleih akhò hei yung ah püíyài neh ami hteh htonnak ung ami ngploh ngkheih nak gui dá lo ci. Ngthup neh ami hteh htonnak ung pha neh ami chúm gui,cói ghâ neh lam coih ah ami shih kyuk nak gui,ami hten htonnak ung mkóm mkèi ci gui noh ami lèi k’èi nak gui ciah akkhak lènglèng búi òt u neh thüi kyah ngploh ngkheih nak gui akkhak lènglèng om lo ci.

Cun bäng ah kä kya neh acun ah yáicâ gêivai ah phäh ah kkyòngkhui gui ngtáinak gui ah chüt hleih kä ni ciah amòòng gui cuh om lo ci. Kchang gui ah kchàng hlu moong kä taga ah phäh ah akhmo gui ah kya neh shi ci gui ah du khai ci gui lah khoh tang a kèncú lo ah phäh ah ngtuk ng’ah gui ah phäh ah shi ci gui,amòòng kthài gui ung kä mi mdáng ah ahei ngcuh ngcan gui ah phäh ah shi ca akdu gui akkhak om ci gui. Kchòkhò ung dú ci gui cuh aktúng pí ah Malaysia ah hteit neh nghloh ci gui. Ghunkhò ùk ca a ngkyìng k’hlùi acoyah noh lam khang hleih kkâ lam on hteit ci gui cuh lam coih ah shi kyu ci gui phih om ci. Pha neh chúm gui u hleih ngúi akdá pe neh lòt lo ba khò kshô ami mthung ba ah kkhân ah palik noh kä pha en vai dóng ghüi ghüi neh bi bi tu ci gui ah kya ci.Cun gui cuh phlän hnging vai kài lo khai acoyah cuh ghunkhò hei gui on ngpòng neh gung kum nak gui ahlü hlü on bi ung vah mchüt hnging vai kya ci.

The post Khòmdek púm kä tàgá nak gui first appeared on RVA KCHO.

The post Khòmdek púm kä tàgá nak gui appeared first on RVA KCHO.

1. K’chang gui ah gaigong nak cuh m’di ca kya ci.
2. Kä ni ciah kho-k’khi mi m’güip cuh k’chang a goipai nak a kya lo ci.
3. A päng avan a goipai, m’neh nak gui cuh om lo ci.
4. Kho a aa vai khin ung kä aa neh a hlo vai yah ung kä hlo neh ng’lat lo yop ci.
5. K’chang gui ami om nak nawng neh ami dawng gui.
6. K’chang gui ah m’lung ung kä dim kyap neh tüihlei nak gui.
7. K’chang gui coi gha u neh du dawng ci gui da lo ci. Ami ei vai kä om ci gui da lo ci.

The post Khotui kho-aa noh a m’di gui ah a mong k’chüih first appeared on RVA KCHO.

The post Khotui kho-aa noh a m’di gui ah a mong k’chüih appeared first on RVA KCHO.

Tuhchü cuh akya ah kèn lo ci.Tuhchü cuh kkhá hlêhngat gui akdá noh kkot lo neh kkhá gui ngón neh yòi tu lo u hleih kkhá gui cuh kèn lo píhtî ci.Cun cuh ngtukkhò pôk lo neh ngùi ghùi gah tang vai kä nghlôi lo ba hleih kphyú kkhá ngón neh ami yoih tuk lo ah kya ci.Cun ung Kchòkhò ùk ci nohkphyú kkhá a mtûi yah ung kä ngón vai,kphyú kkhá bäng ah kä kya neh kîkòng ngá,ng’âi phih a mtûi yah ung kä phâ vai ah pyéin lo ci. Cung phih pyéin düt ah kä kya en khai apì gò päng ung hlukì gui noh ktäih neh ami ghun vai hlü ci. Ghun khò ùk ci lam bäng ah kä kya neh kyòng gui ung phih akhmó hta gui ung lèng neh ami hmat vai ng’thêi ca gui lah ng’äî ng’om gui on mi mthêi vai hlü ci.Avai hlü ah kphyú kkhá ng’äî ng’om tumat ka guk nak ung”Kbìhlî mcòk kchót m’yìyèkphú kkhá van ah ngdü imKchòkhò van noh mi mhtéi ko.Van noh mi mhtéi ko.

Kôlù bókkchôhlaphokkchôpägätkóikègèshóiphâishèvakkchitvapyàvangvû lah yòng ng’ài ah ngtüìnak.Cun kòn ah ayân ng’äî kphyìm ung akhmó gui noh yèikyài hàyâ neh ami hnguh hmat thêi vai ng’äî ng’om tumat om ci. ”A lù mthut notûi yä lo neha pêm kògàngna mcûn hleihhlìmhlìm hlòm mhlêmya ngphäî tu unga mcûn kkyòng ahluh k’hläm ungkshúishé lòn tama kkhìm ghón onlù lah lê ahna mchün neha khìn im ahna khahpüî nehmshì k’am ngkyah ungna shúm nehhngùn vü ci nehna èi shüm nehka guh ák nehshì chä ve. ”Cun kon ah kkhá bäng ah kä kya neh ahêi kkhìhlá,ngá,ng’âi gui phih kyòngkài khmó gui noh ami yéi nak thêi vai mthêi vai hlü ci.Acun ah mthêi nak ungtuhchü ng’äî k’ó gui bäng on kä kya neh Kchò ng’äî kphyìm gui on phih mthêi neh hnguh hmat nak a hlühlü péit vai hlü ci. Avai hlü ah kphyúghèm ah ng’äi tumat ung”Mhtûng ah kchung ahka khùi vüt nehom khò yò ngäi.Khteng ah kpèm ahka hlet pyàng nehom khò yò ngäi.Ka khùi vüt nehkkhòikong mhtéi noom khò yò ngäi.

Ka hlet pyàng nehshòng khngáigè noom khò yò ngäi.Kkhòikong mhtéi nokhùi na hlüm hleihom khò yò ngäi.Shóng khngàigè nohhlet na gèng hleihom khò yò ngäi.Khùi na hlüm hleihhlìhlüm ka ngmêi om khó yò ngäi. Hlet na gèng heihngngài tìtüí nehom khò yò ngäi. Hlìhlüm ka ngmêihlò hläk däî nehom khò yò ngäi”Cá kphyú kkhá kkhìhlá ah Kchò ng’äî kphyìm gui kyòng kkài gui am mthêi ah phäh ah Kchò khmò hta gui cuh kchî kphyìm gui hmat lo u neh kphyú kkhá khìhlá phih yèi lo thêi neh ami kya lo ung thùng yò phih mhtéi u neh a khòtŭi pèinglèng ah a phù a kyüì ah mòòng phih ami mlúng khngà ung om lo khai kya ci. A khòtüî péi ngléng ghum mhtéi nak ung ghunkhò ùk ci gui lah ca ngthêi nak bäng ah kä kya en neh pâhtâ yùmnak gui ung phih aktúng ah mthêimthàng vai kya ci.

A i ah kya hleih ci ung Kkhânpùghí ah ngthûkthéing kyànca ngtüî om lo nak ung mi hngu hnging ca kya ci.Khòmdek kkhân ah om ca kphyú kkhá khìhlá kphyùtîk kkhânkhò avan tüí yop lah Kkhânpùghí noh ”Ni ci” ciah a pyéin cuh mi hngu hnging ci. Acun ah ni ci ciah pyéin netah nami mhtéi vai ciah ana màmòòng nak hlak gui cuh pâhta lam ung phih a khòtüì pèingléng mhtéi vai ah màmòòng ktúng ah a kya cuh mi hngu hnging ci. A khòtüî pèingléng mhtéi vai tängpàng mthêimthàng nak ung Catholic Htahtana cuh cá tün neh bi lo ca kya ci.Khòmdek akshé gui ni khai pyàng neh êi ók màn phùng géitkò neh acun ung ka noh gah lo ci gui on dúkhaih yáica ci gui am tumbêi ca yahteih kyòng gui phih mdüih neh ami om cuh Catholic Htahtana ah Hngün Mòòng(Church History)ung mi hngu hnging ci. A cun ah a màmòòng màn te cuh mikmi ung gok lo ca kya ci.

Catholic Htahtana ung a khòtüì pèingléng mhngî khmà neh kphyú kkhá khìhlá yèi na ca Bä ca Francis Asisi cuh van noh a thêibang tu vai ah kchàng ah kya ci.A ni cuh kphyú kkhá khìhlá yéi na aih neh kya chütah Kkhâpùghí noh chà tu hngá ca yèikyàinak a péit om ci. A ktàigü yah ung kphyú kkhá gui cuh a kut,a kphlèngphùng,a lù kkè hngô ung ngò lo u neh atäng ah Kkhânpùghí on mtâm tu ca kkhá gui ah ngshòn a tuhgüt chüt hleih Bä ca Fracis Uyin ung ami om cuh akya ah yùm ngak vai kya ci. Tuhchü cuh a khòtüî pèingléng mhtéinak ung NGO gui phih thählà lo ci gui ah kya neh avan on ngtói neh mi bi ung mi ghin om nak ah khòmdek cuh ni lo ba khai kya ci. Akhòtüî péingléng mhtéi nak ung pahta lam ni,acòyah kyòng ni,NGO ni on ngtói neh ngdükhò kcháng gui van noh mi bi ah akya ung om na phya ca khòmdek ah kya lo ba khai.

The post Van ah ngshünngphannak first appeared on RVA KCHO.

The post Van ah ngshünngphannak appeared first on RVA KCHO.

1. Kä na om yah ung mei cuh na m’shih vai. Pyein hlü cuh Electricity ci ah mei cuh k’chang kä om yah ung m’dei neh kä mi nong ein vai kya ci.
2. Plastic ka tah a hei na bi thei vai na k’tha nak vai. Di loi ca htun nak cuh mi bi vai hlü ci.
3. Na ghoh vai gui cuh a k’ni hta a na tha vai. A hei ah na bi ba thei vai na pyan vai.
4. Tui phih kä na plom-htah vai. Tui cuh da hngo khai hlü te vah namät a bi vai hläm hta vah na lak vai.
5. Ing-hta ciah na ng’no nak ung a hei gui kä na shum vai.
6. Tui na ng’shi yah ung tui on ng’shoi vai ah kya ci. Tui ung kä na ng’shik vai.
7. Na hnga na k’tuh yah ung tui kä lok khai ah na ci vai.
8. Ca guk nak phih na htung ba thei vai na ci vai.
9. A hoi na htiet yah ung phih na ng’it na koh vai, kä na hlo ein vai.
10. k’pyuk kha, Khi-hla, shing ghüng , pai paai gui cuh na m’htei vai. A cun gui cuh m’htei cuh mi kho m’dek mi ng’lei mi m’htei a kya ci.

Internet ung a ” 10 ways to take care of the Environment” cuh ka k’phlan na kya ci.

The post Kho m’dek m’htei vai among (10) first appeared on RVA KCHO.

The post Kho m’dek m’htei vai among (10) appeared first on RVA KCHO.

Dúkhaih ci gui ngùi ghùi lam on gunghtót hûn kpàng nak cuh akchün ah yáicâ ci gui ah phäh ah ami ngcét ngcam nak gählêi péit hnging ah kya ci. Ngshông pí khai ah gungkûm péitták mòòng bü cèng nak cuh màmòòng biloh nak on htìnglìng chüì khá ca ghinlù on ghin om nak ah kya ci.Hlùmmlèi òngpàn kchàng gui cuh hnguh hmat nì pyinnyâ hlüng tài ca akhing ung a phù a kyüì kèn hlak neh bi bi ci gui mkén hlak neh a hngün thung biloh nak bi lô lo hlü ci gui. Biloh vai kä om nak cuh kchàng hlû gung kûm vai phäh mcun ah ngùi kên hlak neh hlùmmlèi mòòng plohkheih lo hnging ca kya ci. Kchàng gui ah kung kap nak ung hlùmmlèi mòòng cùm bòi neh hlùmmlèi mòòng díshùm nak ung kchàng gui ah kchàng gui ah kungkap nak cùm bòi ca kya ci.

Kchàng gui ka vai kplok neh mangcâ ah kpun mkhêinak mòòng ung a mlòt myót nak gah hlak píhtî nak nok bücèng nak äp nak bü cèng neh mdüm lo ah akya ung cun ah bi cuh kchàng nghtòi ngkhóp ah phäh ah she kà ca hlùmmlèi biloh màmòòng ah kya ci.Biloh màmòòng gah-tang nak vai phäh ah biloh nak ung khoh-thêm akkhúi akkhak lènglèng pyânthám nak lah hlùmmlèi biloh mòòng cuh akkthài ah nì lam on pyânthàm nak ung cùm bòi ca hlùmmlèi mòòng nì lam gui mhlüng mtaih péit nak aktúng ah kya ci. Avaihlü ah pyéin ah akya ung kùmkyüì kchàng kkhúi htung akkhak tu mbêi ca eî òk kkhúi htung akdá cuh apí hta htî ah pyânthàm ah nì lam(Lái mdek apí kchù mang neh ghoh nong ah khoh-thêm apí kchù bòi ci. Lái lah ùyîn ung ka noh gah ah a kheih atak gui,,bung kpya khìhlá nak ngdükhò kkyòng ah ngá phâ nak gui ah kya ci.

Pope Francis noh cun ah a guk cuh hlüngtài bä ngmang ca ghunkhò ung amòòng gui a pyéin ah kya ci.Mikmi Kchókhò ah pyéin ah akya ung läí cuh acun ah bä ngmang ca ghunkhò yung ah hteit neh a ngthup ah gok tu u neh bilo tu te ci gui cuh kkalû phànshà nak gui ah kya ci. Acun gui ah a ngyung a pyà nak gui cuh ghunkhò uk ciah a ngkyüng khlùi a ngvái gui noh ami mät ka vai bäng teng neh ghunkhò khoh-tang gui m’yót neh mhtîk yop u hleih dúkhaih ca ghunkhò kchàng gui cuh ami loh êi mang vai kä om lo hleih ami yáicâ gêin vai ah kkhân ah ami dóng nak tu ah phih Kchò gui noh kkhúishûi u neh ”A ngyó k’shô kpàng ah geih” ami ci on täng lo ci. Acun ah yáicâ ah kkhân ah kum 2021 ung khlí ah ânâ gut hleih kum khmà shô hleih ngtuk ng’ah nak om lo hleih ghunkhò kkyòng ah om ci gui cun phih ami biloh vai kä om hleih ami yáicâ ah Kkhân ah akcùm kyì ghìng ngyóyô hleih avan cuh ghìng ca kya ci.

She kà neh nget ngong ca a ngkyìng khlùi gàkkáp gui noh hlêhnget kdäm nu gui on lô,lái,uyin bi ci gui káp neh kkhân k’yòng on pùng ahêi kchák vü cuh ghunkhò kchàng gui ami biloh êi mang kä om ah kkhân ah a ghàlù ghin hngan ghin cuh shin ah ghunkhò kkhân ah hngang ghin cuh mhtèikhò vai hlü ah ngngài neh thüìhlèi ci gui. Acun ah nglùng ung línggái mhtumhténg ca khmó kthô gui noh ami hngùn pe neh ngtuk ng’ah püî gui neh mchüt u neh k’hlí ah uk nak on khòngmàng neh ngói güt biloh vai ami pongpüî gui amshah bi lo ci gui.Coffe,thòpat uyin bi neh akum tä hleih aktheih mang gäkgäk vai phäh ah kya ci.Cun tu pâng ah phih a nghngün ngcét ah êi mang vai cuh kchàng päng hlü lo chütah kpé át neh yoih tuk nak,lung ngkèng shùi neh yoih-tuk vai,kchèipâi shùi nak bi vai cuh Kchòkhò uk ci gui noh ami bi hlak ah kya ci.Cun gui cuh ngngaih nah kä bi ah a kya ung akhòtüî mi plohkheih lo pi htî khai kya ci.

The post Ghin om vai lah akhòtüî first appeared on RVA KCHO.

The post Ghin om vai lah akhòtüî appeared first on RVA KCHO.

A khòtüî pèingléng a thûshîn nak cuh lungkhò gui a dí damnak,shing ghing kkhúi tumat bäng géitnak,cíngcì im ung ka gui ung ka noh ghoh ah a kthú kshîn gui,ngá phâ nak ung dinamite pùng mkek nak lah sinite gui mang nak cuh tûi k’om gui shih kyuk hlak ca ngá phâ nì lam gui htung mang ah phäh ah om lo ca dídam nak cuh pinle tûilìnú gui ung gok lo ci. A cun ah amòòng amà gui ngkhái hleih mdáng nak on akhòtüî a ngtäp gui ung kchàng gui kbàn neh kkyákpok neh hmóngcàng gui ah phäh ah om lo ca a ngkhap ngtaih a ngtói gui cuh a tuhkbäih aktén ah kä hnguh tu láng pâng ah phih khòmdek khoh-tang gui ami mät ka vai ami htùngmang ah nìlam amshah ah phäh ah pînlê tûi kkâ mdek ah chüt hleih a khòtüî dídam nak ciah aphù kä khìn hnging ah vúk hnguh nak mi bùi chúm lo cuh kchàng gui noh hmat lo ci gui.

Kchòkhò ah phäh ah pyéin ah akya ung avan düt ung ahêi kä géit ah mtà bängbäng khàng neh géit ngah-tüh ba vai ah kya lo ci. A ghíng. gui cuh ahlü ahngäî ngcôngphyót neh ami phùng ghíng ung vah tumat lah tumat ah a ktheih pâi atüì hlìm ngshün ngphan ngdô ngpeh neh tumat noh tumat yîhngêi khai kya ci.Avaihlü ah mshíp phih om neh khtünggük phih neh aom ngcôngphyót ung mtà ung om ca mkyüt phih ghùng hnging khai kya ci. Avan düt noh mtà ghóng ami géit ah phäh. shè lo khapang netah kä ghàm pha neh kyu neh ngtäng neh thu ploih lo ci. Cuh kòn ah a cun ah mtà géit vai phäh khò gui a pùi kplut neh vo neh a lòng phlèng neh chuk ah phäh ah bùichúm lo vai ah she khai gui cun phih ngah-tüh vai kya lo ci.A cun ah phäh ah khò k’â pha ca thùikhò gui a kpú lo ung khò phih káng lo khai. Mêi k’ló a om lo ung phih mshih vai kä nghlôi lo ba khai kya ci.

Cun bäng ah kä kya neh ktùngshing nak vai phih kä om lo ba khai.A cun ah bungghàm yîhngêi ca kphyú kkhá, khìhlá,kchèi pâi gui phih kä om lo ba ung êi meh vai phih kä gah-tang lo bà vai kya ci.Tuhkbäih mi géitkò om ih gui mthong mhlah vai khai lo ci.Mi mthong mhlah khîn gui läí cuh tûikhong gui mhtéi ba vai.Khò gui ghàm khai thà ba vai kya lo ci.Khò vo phleng neh uyin gui kä bi en ba neh shing ghìng hei mdüih vü neh acun ah nglak gui ung kâphî, thòpat gui lah a hêi mang phya ci gui géit ah akya ung a kum tä hleih yoih tuk vai gui om lo khai.Mtà bäng géit ah akya ung kum kthùm ung khngät bäng coh ah kya netah mdek phih dí neh ghin ah lù púm cô neh kä êi mang hnging vai kya ci.A kum tä hleih gah-tang vai phih kya neh akhòtüî pèingléng mhtéi vai ah nì lam gui phih mtói hnging ah akya ung avan ah phäh ah nghlôi ngpán khai kya ci.

The post Kchòkhò géitkò mòòng lahKphyá ngtàng gui first appeared on RVA KCHO.

The post Kchòkhò géitkò mòòng lahKphyá ngtàng gui appeared first on RVA KCHO.

Thùi kdúp khòghàm gui vo kyang neh uyin bi neh pìgò k’hlüm neh om lo ah phäh ah kä cìn maih pha ca a hngùn kghìng kkhúi gui,kä ket pha ca tûikhong gui lah kchèi pâi khù mhlâi a hlühlü ah ngshün ngphannak(ecology)ah a mòòng gui cuh mtúng neh pyéin hlak hngün thô neh pongpüi biloh vai ah kya lo ci.Biloh ghunmhtéi vai gui cuh1Kä cìn pha ca kphyú kkhá khìhlá gui2.Shing ghìng,kchèipài,khùmhlâi gui ah ngshün ngphânnak3.Kchòkhò bäng ah kä kya neh Myanmar,Asia khò ah pakkhúi lungkhò 1.Kä cìn pha ca kphyú kkhá khìhlá guiA héi ghunkhò gui ung kä om neh Htum Kchòkhò bäng ung om ca kphyú kkhá kkhì hlá gui mhtéi vai cuh Kchò gui ah màmòòng ah kya ci.

A cun gui ghunmhtéi vai cuh ayân ghunkhò ah màmòòng düt ah van noh a ngngaih màn te.Tukbäih cuh mät ah pakkhúi,ngdükhò,mânggò mät noh ùk vai Feferal ghunkhò mdüih vai ah a ghunkhò púm mi hngün thô lo ca kya neh Kchòkhò ghun mhtéi vai cuh mi mät ung nghlüh lo ci.Kä cìn maih pha ca kphyú kkhá khìhlâ gui,ahei khò gui ung kä om neh Kchòkhò bäng ung om ci ciah ami pyéin gui cuh pyéin tu düt ah kä kya neh hnguh hmat vai ci tu netah mhtéi tu kcàng vai ah kya lo ci. A cun gui mhtéi ah phäh ah kchàng gui lah akhòtüî phèilàng ah phäh ah a i ah ngshün ngphân neh nî bä nak pe ciah mòòng(ecology)cun phih mi hmat vai kya lo ci. Avai hlü ah Kkhì hlá hlè mná gui lô ca nghêi cuh mcìn neh ngón vai ciah akdá noh ngngài ci gui.Cung phih nghêi noh ktok khlèng gui hleih vuh mhtah gui cuh avan ung tâikhalâk khai kä hteit ba u neh nggui neh a ngbäng ah hteit neh khù eì u hleih kpoih ca ngdü hngün gui ung êi mang phya ci gui cuh ngtheih pài däm hlâ lo ci.A cun gui cuh kchàng noh èi mang ba ca kya neh ngshün ngphannak(ecology)ah kya ba ci.Aktói ah teng ung kä ni ca ngngaih cuh akní ah teng ung nî nak na pe ca kya ba ci.2.

Shingghing,kchèipâi,khùmhlãi gui ah ngshün ngphannakKhòmdek ah kkhân ah a tüî khmüt gui phùng cuh akhòlä ah a tüî ah kä kya neh nî bä nak a i bo tah om khai ah a tüî ah kya ci.Khò kkhì ung thushìng neh kä ni ci gui cuh shing ghing khùmhlâi kchèipâi gui nohmghüp neh èi mang u netah akthéing kkhú gui na pe ba gui hleih kchàng gui ah gáigong nak ah kya ci. A pâi gui kkhòi gui noh lók neh kkhòilù ah pyàng u hleih acun mi ok ca kchàng gui ah gáigong nak ah kya lo ci.A pâi gui cuh tumat lah tumat ngdo ngpe neh ktheih tak lo ci.A theih a tak gui è ok ca a hngùn kghìng gui ah ghin om nak ah kya ba ci.Ghìng om ci phùng cuh avan ka vai ah ghìng om ca kya hleih avan noh ngngaih na neh mhtéi vai ah kya lo ci. 3.Kchò bäng ah kä kya neh Myanmar ghunkhò lah Asia Khò ah tüikhong lungkhòHtum Kchòkhò ung om ca Khònúmhtûng uyin cuh Myanmar bäng ah kä kya neh Asia Khò ah a phù kä khìn hnging ah ghin om nak ah uyin ah ami kbäî ah kya ci. A ghunkhò hei gui hngô noh a hngùn kghìng gui ah ngdŭkhò tûikhong ami yùm mhngî ah mi thùikhò kkyóm Khònú Pakkhúi Uyin ghun mhtéi vai cuh Kchò Kchàng gui ah màmòòng ah ngkhät lo ci.

The post Ngmüngvan ah ngshünngphan nak first appeared on RVA KCHO.

The post Ngmüngvan ah ngshünngphan nak appeared first on RVA KCHO.