Mindat Chin RVA - RVA KCHO

Ng’Bãng ghing-awn a m’tängnák.

Mindat Chin RVA — Fri, 28 Nov 2025 03:34:58 +0000

Cun kon-ah, ngamí àm m’tu m’täng neh a piéin cuh, “Ng’Bãng ghing-ung lèng neh sing ghing päng teng vä. Alim lo bà-ung, khàw a chà lo vai nami hmat ci. A cun-a hlo-ah, cun-ah màwng gùi a kia lo-ung, Khãnpùghí-ah ghin-khàw ng’et lo pi ci cuh, hmat vä. Nangmí-àm a k’càng-ah ka piéin cuh, tuh-chü k’chàng ng’sòn gùi kä maih pha hleih cun gùi avan kia lo zop khai. Mòpí lah m’dek bo-vah dí maih khai. Ka k’chü läí, a ngói-a phih, a i-zah ung phih kä maih khai.

Kho m’dek a khan a om yah ung Bawi ah ng’thu k’ni cuh mi ghün om püi vai hlü ci. Mi pe ung a a i kya ci ci cuh mi hnguh hmat thei vai Bawi noh na m’cäi gui ci.

The post Ng’Bãng ghing-awn a m’tängnák. first appeared on RVA KCHO.

The post Ng’Bãng ghing-awn a m’tängnák. appeared first on RVA KCHO.

Bä ciah Joseph Pignatelli ah ghünlu a mòng

Mindat Chin RVA — Fri, 28 Nov 2025 02:52:41 +0000

Bä ciah Joseph Pignatelli cu Christu kum 1767, April k’cha 2 ung ung ka no leng ne yaica nak gui buiawt ciah kya ci. Spain ga k’kat gui no ghunkho pum ung om ci gui ah Jesuit kyawng gui k’bui ne om ci gui ah kya ci. Spain Shangpughang a k’thum nak (King Charles III) no a guk ah ca ung Jesuit ng’htoi ung om ci gui a van a mi k’täm gui vai ah ghunkho k’chang gui am a thähla m’thein kan gui ah kya ci. Shangpughang cu a ni ah om nak ah kho k’thai ah kya ciah Spain lah Spain ung om ciah guh kho gui ung a ni ah uk nak lah aanaa gui am Jesuit gui no m’kyüih m’kyok ne yaica hlat ci gui ah ng’ngai lo ci. Shangpughang Charles lah a ni k’hnga k’phlang tu ci gui Jesuit ng’htoi cu a mi got täm gui vai lah a mi khoh tang gui a van a mi laky op vai ah phuk pit ci gui ah kya ci.

Jesuit ng’htoi k’däih ne a mi om hnging cu Jesuit ng’htoi a k’hngih nak m’düih hnging ciah Joseph Pignatelli ah bä nak bi loh khong mang nak hnging awn kya ci. A ni cu Catalan boarder ung Spain ghunkho ung ka no lo ci gui ah a hei Jesuit ng’htoi k’chang shing 50000 awn ng’pong ci gui ah kya ci. Ngami gui cu ng’pong u ne ta a k’ni ah do gui khai ah tui k’kham tu mat mat a mi hnguh hnging vai ah htinpow nu ung be ne lut u ne kho k’hngüp 21 hngüp peng peng tui lam ung hteit ci gui ah kya ci. Italy, Pyinhtit lah Potugual gui no ngami gui cu kä ng’yak hlü ci gui ah kya ci. Ghunkho mòng lam ah m’yai m’ca nak awn Papa Shangpughang a ghalei k’phli nak Clement no Kho m’dek pum ung om ciah Jesuit ng’htoi gui a u phih kä ng’ya ba hlü ciah pyein ne Taigü Boi gui a k’daa cu yum tu ng’bum ung ka no a k’pät gui ah kya ci.

A í a bi ba vai kä om ciah Joseph Pignatelli cu Polona ah gok ne kyawng ung om ne a cun mät ung ei tu ne kya ciah kyawng hta tumat ah kya ne khokum m’ku om ciah kya ci. A m’lung ling gai ciah k’hngumi tumat no Jesuit ng’htoi k’däih ne om khai ah ci ba hnging ciah kya ci. A cun ah k’hngumi cu Rasia Impera ah shangpinu Catherine ah kya ci. Papa Shangpughang ah bi gui phih pheng ne Jesuuit gui ah bi bi gui a k’ni ah a ng’hloi ba vai ah ci ciah kya ci. Joseph Pignatelli a cun ng’yak lo tu ne Russia gui no a ni phih a mi do tu vai ah ng’shang ciah kya ci. Christu kum 1797 ung Joseph Pignatelli cun phih Jusuit Taigü tumat ah kya ne k’däih ne bi tub a hnging ciah kya ci. Christu kum 1804 ung tün ne a biloh gui ng’phät lo ba te ci a k’ni ah a ng’ngaih ah hlo ah kä bi lo ba pha ne Joseph Pignatelli cu shi ciah kya ci.

The post Bä ciah Joseph Pignatelli ah ghünlu a mòng first appeared on RVA KCHO.

The post Bä ciah Joseph Pignatelli ah ghünlu a mòng appeared first on RVA KCHO.

Jerusalem adí lo vai-ah màwng.

Mindat Chin RVA — Thu, 27 Nov 2025 07:35:00 +0000

Khàw m’tät gùi nawh Jerusalem ami ’kói nami nguh lo-ung, cun-ah pigò cuh dí neh si lo khai cuh hmat vä. Cun zah- ung Judea khàw-ung-kah gùi, khàw m’htung-ah dóng u hlä. Jerusalem pìgò k’om gùi, hläih u hlä. Lo k’om, bung k’hteit gùi imgò-ah kä lut-èin lo bà u hlä. A i-ah kia hleih ci-ung, cun-ah k’hngüp gùi cuh, m’cäinák-ung guk phùng a béit vai-ah phù sui, ng’loh m’hlonák-ah k’hngüp-ah kia ci. Cun-ah k’hngüp gùi-ung, käü-takmah gùi lah, hlúk-tui k’áw mah, k’hngumi gùi-ah phäh-ah ami m’lèi lo tu pí khai. A i-ah kia hleih ci-ung, khaw m’dek ’khãn-ah, akia-ah zái-cãnák ng’hlùi om hleih cun-ah pa-khúi-ah ’khãn-a phih, ng’loh m’hlonák gok lo khai. Ngami cuh, ’khìm-awn dí lo khai gùi. Pha neh a lòng hei-ah hteh püi gùi khai gùi. Ami k’hngi k’cha kä ng’kiüm lo phã phùng-ung Jerusalem pigò cuh, a hei k’chàng gùi nawh cot leh khai gùi.

K’Hngi, k’chã, ài-hli gùi-ung, k’hmütnák om lo khai. Khaw m’dek ’khãn-ah phih, pinle tui-nú ng’hngáwk-ah ng’hngum-awn, ’khúi päng cäí-cãt lo khai gùi. Khaw m’dek púm-ah, kia lo khai gùi hmat u neh kiü-kiok neh m’sin baihnák-awn, k’chàng gùi dí lo khai gùi. A i-ah kia hleih ci-ung, Mòpí khaw púm cuh a khawng zung púm-ah, ng’hngäk lo khai gùi. Cun zah-ung, k’chàng-ah Htá cuh a tài-mahnák- awn, ng’mei hngù-zah hmä lo hleih nami hnguh khai. Cun-ah màwng gùi a ng’tün lo zah-ung nangmi cuh, zäih-ah ng’düí neh nami lù m’tä vä. A i-ah kia hleih ci-ung, nami phiónnák vai ng’et lo pi ci.

The post Jerusalem adí lo vai-ah màwng. first appeared on RVA KCHO.

The post Jerusalem adí lo vai-ah màwng. appeared first on RVA KCHO.

Yum nak m’hteng nak awn nami ghün vai.

Mindat Chin RVA — Wed, 26 Nov 2025 02:30:11 +0000

Cun tu pang-a phih, sin-ah kä kia pha ung ka ng’ming-ah phäh-ah pha neh ning zo ’kà na gùi khai gùi. Cã-gat gùi lah, thõng im-ah ning àp lo gùi khai gùi. Sang-pùghang lah khaw-mah gùi-ah mà-ah, ning hlò-kaih gùi khai gùi. Cun-ah, nangmí cuh, kei-ah phäh-ah m’gòng k’bäi-ah nami kia lo khai. Cun tu pang-a phih, a i-ah ng’ghun vai cuh, kä nami pong-èin vai. A i-ah kia hleih ci-ung, nami ng’phi-pheih gùi nawh nangmí cuh kä k’taih, kä m’sàng-èin hnging khai-ah, m’gòng k’thúk sím k’chuh, k’tha-gui, nangmí-àm ka ning pe gùi khai. Nami nú-pá, phäí-nàü po-k’chàng nawh ning àp gùi khai gùi. Nangmi gùi-ung-kah a m’sah ngáwn khai gùi. Kei-ah ng’ming-ah phäh-ah k’chàng avan nawh ning ú gùi khai gùi. Cun tu pang-a phih, nami lu ’khãn-ah lùmu ng’mà-ät htá phih, kä maih khai. Nami zùm a m’hténgnák-awn nami hngùn m’chà nami phión püi khai.

A i gui mi bui ot ung phih Khanpughi kä mi hmih en vai hlü pi ca kya ci. Bawi noh ana gung gui vai cuh a pyein pi ah kya ci. Yum äp vai lah bi loh vai gui cuh mi bi vai hlü ci ci neh na m’thei gui ci. Khanpughi yum nak noh vah na chühlo gui khai ci cuh mi hmat vai.

The post Yum nak m’hteng nak awn nami ghün vai. first appeared on RVA KCHO.

The post Yum nak m’hteng nak awn nami ghün vai. appeared first on RVA KCHO.

Yumtu Ng’bumh-ah Müi

Mindat Chin RVA — Tue, 25 Nov 2025 04:25:20 +0000

K’bäi Nak K’phli

Kho m’dek Khan-ah yumtu ng’bum gui, yum nak gui ak’khak om ci. Khapughü-ung ka noh lo neh cang ca yum nak cuh mikmi noh i hlok cha mi hmat hnging khai-ang? Catholic yumtu ng’bum cuh ahngei yumtu ng’bum gui-awn ng’cha ci ci cuh i hlo k’cha mi hmat hnging khai-ang?

Catholic Yumtu ng’bum cuh a hngei yumtu ng’bum gui-ah tah hngei tu hnga ca müi cuh k’phli om ci. Cun gui cuh Missa gün ap yah-ung yum nak ng’bäi nak-ung hlu läk ng’shä gui-ung ka noh kyum lo ca, tumat bäng kya ca, hti theing ca, Catholic yumtu ng’bum cuh ka yum ci. Ci neh mi m’cu gui cuh ni tu hnga neh hngei tu hnga ca mong-ah kia ci.

Yumtu ng’bum cuh tumat bäng kia ci

Bawi Christu cuh yumtu ng’bum tumat bäng tüi pyang neh Bawi-ah shi hla gän ap nak Secramentu gän ap nak cuh yumtu ng’bum-am pe ghüt ci. Kho m’dek pum om ca Catholic yumtu ng’bum k’chang gui a vam cuh Scramentu, Phyon nak lah Khanpughü-ah mong gui yum nak-ung ät ci gui. Tumat bäng kia nak kä cun-ung kong ät nak cuh ahngei yumtu ng’bum gui-ung kä hnguh hnging-ah kia ci. A hngei yumtu ng’bum gui-ung tumat lah tumat-ah yum nak cuh kä täng hleih mi hnguh hnging ca kia ci. Catholic yumtu ng’bum lei-ung Hti theing ca ng’la mi hta Maria yum nak-ung phih kiai, a hngei hle lah cang ci-ah mong gui yum nak-ung phih kiai yum nak cuh täng ci-ah kia ci. Catholic yumtu ng’bum cuh ät ca yum nak lah hti theing ca Muh Khanpughü-awn kong ät neh om ci-ah kia ci.

Yumtu Ng’bum Cuh Hti Theing Ci

Yumtu ng’bumh-ah m’thei m’cäi cuh hti theing ci. A bü ceng nak lei cuh Secramentu ci-ah chü-ah hngei tu hnga ca ni bä nak gui-awn yumtu k’chang gui cuh hti theing khai gui-ah a pyan vai kia ci. Catholic k’chang k’bä gui cuh mikmi gui-ah phäh-ah thei lah tu vai-ah k’chang gui-ah kia ci. Ngami gui cuh yumtu ng’bum-ah hti theing nak cuh ami k’bäi-ah hlo-ah ngami-ah mong gui shui lei tu nak cun phih Khanpughü-awn na ng’et nak hlak gui-ah kia ci.

Yumtu Ng’bum Cuh Cathlic-ah Kia Ci

Catholic ci cuh avan-awn ng’pak ci-ah a thuuk k’phlan-ah kia ci. Yumtu ng’bum cuh Kho m’dek khan-ah om ca k’chang pa k’khui gui van-ung hteit neh kho k’chang van phyon nak gah vai bi ca kia ci. Mikmi gui cuh kä mi täng neh a hngei hngei gui mi ng’bum lo tu lang hleih mi yum nak-ung ng’nu ng’be hta gui-ah mi kia yop ci.

Yumtu Ng’bum Cuh Hlu Läk Ng’shä Gui-ung-ah Lo Ci

Mikmi gui-ah ng’mü m’cha täng-ah khong mang k’chang gui-ah kia ca Papa Shangpughang lah k’taigü mang gui-ah bi loh nak aana cuh hlu läk ng’shä gui-ung ka noh ng’dün neh kyum lo ci. Caw kia hleih k’taigü mang gui lah ami ng’vai-ah kia ca Papa Shangpughang-awn atäng-ah hlu läk ng’shä gui-awn atäng-ah m’thei m’thang nak-h aana cuh om ci. Cun gui cuh Hti Theing ca Muh Khapughü-ah ak’khang -ah lam m’shüm nak-awn bi lo ci gui-ah kia ci. Bawi Yeisu noh am’tu m’täng nak-ung hto k’shäm lah tho ng’nong cuh pyein hti ca kia ci. A hto gui ng’hngei-ah hlo k’ei aw-ung ka noh ghung vai neh amät-ah hngun pe ca hto k’shäm cuh ni ca hto k’shäm-ah kia ci-ah amät noh amät cuh bü neh pyein ci.

Yumtu ng’bum cuh Peter-ah htinpaw ci neh chü ci gui. Khong mang neh lam m’shüm ci cuh Papa shanpughang-ah kia ci. A k’hngu pi bü ceng nak-ah kia ca Khanmopi-ah k’chang gui ami gok tu güt chüt hleih yumtu ng’bum noh tu m’bei m’htei m’hta neh k’chi gok ng’hngum ng’kyeng nak aom yah-ung gai gawng khai-ah gung tu k’ca kia ci.

The post Yumtu Ng’bumh-ah Müi first appeared on RVA KCHO.

The post Yumtu Ng’bumh-ah Müi appeared first on RVA KCHO.

Jerusalem adí vai-ah màwng piéin neh Zái-cã thüi-hlèi om lo khai ci ci.

Mindat Chin RVA — Tue, 25 Nov 2025 03:08:06 +0000

A m’sah gùi nawh, “lung-awn coh-ah khàw im cuh lung-bók ni, ami khawih hngahnák gùi-awn kióm ci,” ci u hleih ngamí-àm a piéin lo bà cuh “Tuh-bäih nami hnguh gùi cuh, lung tumat-ah k’khãn-ah tumat, kä ng’taih bà hleih a ng’gäí nák vai-ah k’hngüp gok lo khai.”

Ngamí nawh phih, Báwi cuh, ng’si u neh, “Báwi-aw, cun-ah a kia lo vai-ung, a i-awn lèng neh kia khai-ang?” ci u hleih Báwi nawh a piéin bà cuh, “Kä ning m’hlè-èin gùi khai-ah, ng’ngaih na vä. A i-ah kia hleih ci-ung a k’dá, kei-ah ng’ming-awn lo neh, “Ani cuh, kei néi. Ng’Et lo pi ci,” ci lo khai gùi. Ngamí kä läk-èin gùi vä. Nangmí nawh ng’tuk ng’ah lah nget-ngawng, ng’vók-ng’gennák gùi-ah màwng, nami ng’zák-ung kä kiü kiok-èin vä. Cun gùi cuh, kia lo mà khai. Cun tu pang-a phih, phlèhnák-ah kä kia tot khai.” Cun kon-ah, ngamí-àm a piéin cuh, “Pa-khúi tumat lah tumat, ghun-khàw tumat lah tumat ng’gen ng’am lo khai. Avan-ung, sih-pí thüng neh gàw-pàinák, khaw-zõnák, Khãnmòpí-a ka phih cäi-catnák vai gùi ng’dáng lo khai.

The post Jerusalem adí vai-ah màwng piéin neh Zái-cã thüi-hlèi om lo khai ci ci. first appeared on RVA KCHO.

The post Jerusalem adí vai-ah màwng piéin neh Zái-cã thüi-hlèi om lo khai ci ci. appeared first on RVA KCHO.

Mindat k’taigü Mang Augustine cuh Kitha ah hteit neh a Hto gui teng gui ci.

Mindat Chin RVA — Mon, 24 Nov 2025 04:06:10 +0000

Mindat k’taigü Mango k’thai ung khong mang ca k’taigü Mang Augustine cuh November k’cha a gha-lei-hma nak ung Kitha pigo ah Msgr. John Om Se on Hngi m’khin phli yah ung gok lo ci goi ah kya ci. A cun a gok lo ni hleih Kitha Parish ung om ca yumtubum gui noh do chang ci gui ah kya ci. K’tung k’lam, ng’äi gui on do u neh ng’bumim a lut neh k’taigü Mang noh kongyi peit neh tah ng’düm ci gui ah kya ci. November k’cha a gha-lei-chuk nak ah kyün k’hngüp ung K’taigü Mang Augutine noh khongmang neh Missa gänap ci gui ah kya ci. A cun ung k’taigü Mang noh Mindat k’taigü Mango ung a bü ceng a bi lo hlü gui cuh m’thein tu gui ci. Missa gänap nak ng’pyi lo neh K’taigü Mang m’hlüm tai nak bi ci gui. Mü hngün täng a yumtubum a m’shah lah k’taigü Mang on ng’hnguh neh ng’gei k’shoi ci gui. November k’cha a gha-lei-chüih nak ung m’tho pigo ah Msgr. John Om ah a Pa ah m’mümcha kavai k’taigü nak cuh K’taigü Mang noh khong mang hleih bi ci gui. k’hngüp ei ei neh tah k’hngi m’khin k’thum ung ng’düi lo ba neh hteit ba ci gui.

The post Mindat k’taigü Mang Augustine cuh Kitha ah hteit neh a Hto gui teng gui ci. first appeared on RVA KCHO.

The post Mindat k’taigü Mang Augustine cuh Kitha ah hteit neh a Hto gui teng gui ci. appeared first on RVA KCHO.

Hmeinú-ah ng’khái nak.

Mindat Chin RVA — Mon, 24 Nov 2025 03:38:36 +0000

Báwi nawh teng neh ngùi gah ci gùi nawh m’kíüm-ung ami khawih-hngah gùi ami ghón cuh, hnguh ci. Hmeinú k’dú nawh phih, kièi k’hlèn phé-goi a ghón hnguh neh A piéin cuh, “Nangmí-àm a k’càng-ah ka piéin cuh, sin-ah hmei-nú k’dú nawh avan-a tah gùi-pí hleih ghón ci. A i-ah kia hleih ci-ung, ngamí avan nawh ami güm nák-ah k’poih vah, pe ci gùi. Ani läí nawh kä om láng hleih a hngùn a m’ghinnák vai hlü ng’hngün avan pe ci.

Kho m’dek khan a gah tang neh om nak yah ung a i phih Khanpughi ah ni bä nak a kya ci. Khanpughi on om ät neh peit tak nak ung phih mi ng’khai vai Bawi noh ng’yak hlü ci. Peit tak nak ung vah gah tang nak om ci ci neh bä ca Paulu no pyein ci. Kä om hleih kä peit ta kä kya ci. Kä peit a kya hleih kä om ci ci cuh mi hmat vai khin ci. Cun a kya hleih ng’khai ci ah m’lung a om vai ng’tha nak vai hlü ci.

The post Hmeinú-ah ng’khái nak. first appeared on RVA KCHO.

The post Hmeinú-ah ng’khái nak. appeared first on RVA KCHO.

Bawi Jesu Shangpughang a a kya a poi.

Mindat Chin RVA — Sun, 23 Nov 2025 03:32:38 +0000

K’Chàng gùi nawh ng’düí neh dan ci gùi. Khàwng màng gùi nawh phih, “Ani nawh k’chàng hei, k’phión man ci. Khãn-pùghí-ah Christù-ah a kia-ung, a mät k’phión hlä,” ci neh m’lep ci gùi. Khàw m’tät gùi nawh phih k’et u neh ani hlü-hlàwng u neh k’thui m’uih tui pe nehtah “Nang, Judeu gùi-ah Sangpùghang-ah na kia-ung, na mät nawh na mät k’phión-ä,” ci ci gùi. A lu ’khãn-a phih, “Sin, Judeu Sangpùghang Nazareth Jesu,” ci neh Greek, Latin lah Hebrew k’chü-awn guk ci gùi.

Ng’Bat tu ci-ah gut èi goi-ung-kah, tumat nawh, “Nang, Christù-ah na kia-ung, na mät k’phión neh keiní phih na k’phión goi-ä,” ci neh Báwi ghüh tu ci. Tumat läí nawh cun m’cäì neh, “Nang cuh, na kat-a phäh-ah, sin-ah zái láng neh Khãnpùghí kä na kiüh ci-ang? Nihní, gah chin neh ni gah ci. Ni om-awn chin hleih vah ni gah-ah kia ci. Ani nawh a k’sé a pí-a phih kä bi ci,”ci nehtah, Jesu-àm piéin neh, “Báwi- aw, na khàw-ah na gok bà-ung, kei na süm bà-ä,” ci ci. Jesu nawh, “Nang-àm ka piéin cuh, tuh-ngói kei mah-ah, Paradisu-ah na om tu khai,” ci ci.

The post Bawi Jesu Shangpughang a a kya a poi. first appeared on RVA KCHO.

The post Bawi Jesu Shangpughang a a kya a poi. appeared first on RVA KCHO.

Bawi Jesu m’müng van a Shangpughang poi k’hngüp.

Mindat Chin RVA — Sun, 23 Nov 2025 03:31:59 +0000

Ng’Bat tu ci-ah gut èi goi-ung-kah, tumat nawh, “Nang, Christù-ah na kia-ung, na mät k’phión neh keiní phih na k’phión goi-ä,” ci neh Báwi ghüh tu ci. Tumat läí nawh cun m’cäì neh, “Nang cuh, na kat-a phäh-ah, sin-ah zái láng neh Khãnpùghí kä na kiüh ci-ang? Nihní, gah chin neh ni gah ci. Ni om-awn chin hleih vah ni gah-ah kia ci. Ani nawh a k’sé a pí-a phih kä bi ci,”ci nehtah, Jesu-àm piéin neh, “Báwi- aw, na khàw-ah na gok bà-ung, kei na süm bà-ä,” ci ci. Jesu awh, “Nang-àm ka piéin cuh, tuh-ngói kei mah-ah, Paradisu-ah na om tu khai,” ci ci.

The post Bawi Jesu m’müng van a Shangpughang poi k’hngüp. first appeared on RVA KCHO.

The post Bawi Jesu m’müng van a Shangpughang poi k’hngüp. appeared first on RVA KCHO.