

Nu Pa Gui-ah Bi Chin Gui
Mikmi nu pa gui cuh mi hta k’hmo gui mi m’htei vai, m’thei vai cuh mi ma na bäng bäng ca kia ci. Cun-ah mi m’thei m’thang nak gui-ung mi hmat hlu-ah mi m’thei m’thang gui a om hlu-ah kä mi hmat gui phih k’hmo noh kä mi hmat-ah ami na hmat gui vai ng’ä neh mi va ng’kang vä nak phih om hngo khai.
Tuk ngoi cuh mi hta gui-awn ng’thu ng’hta nak ni, ngami-ah ng’ngaih gui ng’ngaih tu peit nak gui phih mi ng’hngu hmat tu khai-ah kia ci.
Hta k’hmo m’hting nak-ung hlü ci gui cuh mi hmat lo tu khai-ah kia ci.
- M’hgni nak lah m’lung-ah üp nak peit vai
Kat nak ami bi yah-ung phih na m’hngi ci gui ci neh ami m’lung-ung ami ng’ngaih hnging vai-ah om püi gui vai. Ami m’lung k’kyong-ah kaha mi pyein tu hlü gui cuh ng’ngaih tu peit gui vai. K’chang hngei k’hmo hta gui-awn m’täng gui neh kä m’thing gui hlü vai.
- Ng’thu ng’hta nak lah ng’ngaih peit nak
K’chü kä chah pha lah k’hnga kä k’phlang gui pha-ung ami pyein tu hlü lah ami ng’ngaih tu nak gui cuh k’hnga m’cung neh ng’ngaih tu peit gui vai. Na m’lung ng’ngaih-ah kä kia-ung phih ngami lam täng-ah ami ng’lung ng’ngaih cuh pyein hlak gui neh ng’ngaih peit gui vai.
- M’hting nak k’bäi nak
K’kyong khui-ung hting ling nak lah hngu ma, k’eng k’pat m’tu m’cawih nak cuh ng’gui khai-ah k’bäi ge neh tha vai. A mi na aa tu vai-ah m’ghuih the nak, gen k’se nak, m’kyüh m’kyok nak gui kä om-ein hleih om püi gui vai.
- Ma mong laak nak lah Mät noh mät ääp nak
K’hmo gui noh ami ma mong ami mät noh ami bi thei vai-ah m’thei gui vai. Ami kho kum-ah ci-ah ami bi loh nak, k’chü chah nak gui cun phih bi hlak gui vai. Ami mät ma neh nami bi cang vai kä na mi bi lo thei-ung ni m’thein lo tu gui vai ci neh bi loh hlak gui vai.
Shin gui cuh hta k’hmo gui m’thei m’thang nak gui-ung ni pi ci gui-ah kia ci.
M’dün lo ba vai……………………………………………………………………..



