RVA mamong bi ci gui Philippine a ng’hnguh ci gui.
RVA màmòòng na ci gui Philipine ng’hnguh nak ung K’Taigü Mâng Junie noh htahtana a phäh ah ät vai m’thä m’hlá ci.
k’Taigü Mâng Marcelino Antonio”Junie” Maralit Jr. no htahtana bi ung ät vai ah RVA NgThu Mamòòng na ci gui am October 6,Cavite Kho,Silan Manggo ung om ca Sisters of Mary kyong ung ami ktaigü nak ung pyein ci.
Acun ah ngbum nak ung RVA Asia ung mamoong na ci gui ah phäh ah Myanmar ung kah 9,India ung kah kphli,Bangladesh,Thai,Cambodia,Vietnam,Shrilangka lah Tayuk ghunkho gui ung kah tumat hti boi tu ci gui.
Asia Catholic Sayataw Nghtoi(FABC)Nghnguh Nghmat yung ah hluki San Pablo Nghtoi Sayataw Junie no lo ci gui am müi k’o mhlon ci gui ah kä kya pha ung Christu ah hluläk gui ah mi kya ah moong ngngaih nak vai pyein ci.
”Ka hngu ah na läk vä.Kchang kaning mhtuih hlak gui khai”ciah Christu ah ngchü nak cuh mamoong düt ah kä kya neh chüthämnak ah hnguh vai ah ktha pe ci.
Digitai online nghnguh nghmat nak ung thung man ah bi düt ah kä kya en hleih ngläk tu ci gui am yum mhngi nak i hlok ah ka pe gui ang? ciah ngah-tüh vai pyein ci.Sayataw Junie no digital platform ung om ci gui ah ami ngthong nghlah gui cuh RVA ung ka noh lam käh hma khin ah moong,yumnak mdang vai ah moong ah akya ah moong pyein ci.
Cun kon ah dukhaih neh ngplon ci gui,ami nong gui ka vai ngngaih nak pi vai pyein ci.
Sayataw no RVA am ”ami k’o kä ngyak ah kchang gui ka vai ah k’ó”ah kya neh m’ät nak ah ni lam tumat ah akya lo vai ah kthá pe ci.
”Htahtana bi kä bi pha ung ät nak”tumat hti ung ka noh Asia pum ah ngdon neh bi vai kthäh ci.
Emmaus ah hteh nak ung-atäng ah hteh nak,ngshinak,ngngaih nak,kphlannak,muk kbonak lah tüih nak gui ngngai neh mang cuh RVA ah ät nak ah akya lo vai ah ktha pe ci.A phleh nak ung Sayataw noh kthum a ngshi cuh”A u ah k’o kä ngngai neh ka om te ci ang?A i ang kä ngya neh ka om man?Tumat noh kä bi hnging ung phih atäng ah a i bi hnging vai ang?
October 5 ung ka no 8 ah chüt bi ah khngüp 4 nggè nak ah poi cuh Catholic Media mdangnak,Digital Ngplonnak,ngoigüt akhännak lah ät neh bi nak ah kkhan ah ngah-tüh ba vai lah RVA ät neh nggè nak gui mcut pe ci.
Tuhkbäih ngbum nghtoi nak cuh Asia ngdükho gui a phäh phäh ung kah RVA ung mamoong na ci gui ah phäh ah atäng ah binak a khän htek vai,bui chum gui ngtei ngpai vai,ngdükho Catholic Media mamoong ah ma lam atäng ah ngah-tüh vai ah mkot lam ah kya hlak ci.
