Càng ca dämtài nak cuh m’hngînak on lam m’shüm vai.
Papa Shangpùghang Leo 14 noh September 23 khngüp Wednesday ung General Audience ung Second Vatican Council ah Gaudium et Spes mtheimthang ah moong pyein ci. Acun apyein nak ung htikpan hnguh hmat nak cuh Khanpughi ah ngyak hlü on kä nghngu ngtuk ci ci ci. Pope noh a pyein nak ung kchang cuh a mät ah bü ng’ngaih ah a ghinlu ghü kcang neh om hnging neh htikpan hnguh hmat nak ung phih cùm boi tu hnging ci. Kchang ah htikpan hnguh hmat nak cuh Khanpughi on ng’gäng ng’cäng nak ah kä kya ci ci ci.
Akthai ah hnguh hmat nak ung cum boi tu ah kya neh a khngüp tä bi gui akni ah bi nak on bi loh gui cuh theing thap hlak vai ci ci.
Pope noh a pyein nak ung nì pyinnya lah htikpan hnguh hmat nak gui cuh mhngi nak noh lam a mshüm ung vah càng ca dämtài nak ah kya khai ci ci. Acun ung vah kchang ah htingling nak ghun mhtei ah kya neh aktung pi ah dukhaih ci gui cuh chui hlo gui vai ci ci.
Lo khai ah September 27 khngüp cuh refugee gui ciah pyein ah dong k’hton ci gui ah khò khngüp ah kya chütah ami im ni ami ghunkhò ni nong ghüt neh dong ci gui ah aktúng pi ah akhmò gui lah ami yo kkà nak ah khmo ktho gui gungkum neh mhtei gui vai cuh kchang päng ah mamoong ah kya ci ci ci.
General Audience ung Pope noh hnguh hmat nak lah tat-lah nak gui têipai vai ah Second Vatican Council ah chü thämnak mi shüm hmat vai lah kchang päng ah däm tàinak vai ah bä tu ba ca ma lam ah däm tainak atäng ah bi vai pyein ci.
