M’Sí k’phú-awn a m’tängnák.
k’Chàng a k’dá cuh, pigò gùi päng- a kah, Jesu-ah lo neh ami ng’ bum lo zah ung m’tu m’täng neh a piéin lo cuh, “K’Chàng at nawh m’sí phú vai neh hteit ci. M’Sí a phú zah-ung, a m’sah cuh, lam ng’lung-ung ng’kia ghüt hleih lam hteit gùi nawh kainak ci gùi. Kha-htá gùi nawh phih, k’cung neh èi ci gùi. A m’sah cuh lung gùi-ah ’khãn-ah ng’kia u hleih a ng’lih kon-ah, m’dek lè kä om hleih ng’zài neh si düit ci. A m’sah cuh ng’hlìng gùi hngù-ah ng’kia hleih ng’hlìng gùi nawh phih, a täng-ah ng’lih lo tu u neh géit cuh, k’düi ci gùi. A m’sah läí cuh khaw ng’lei k’ní ung ng’kia neh ng’lih piò lo nehtah ng’lung-ät te, ng’lung phia vai-ah lùm lo ci,” ci neh piéin nehtah ng’záknák vai-ah, a k’hngà khùi om ci nawh ng’za hlä,” ci neh a ng’khái-ah piéin ci.
Cun kon-ah, a-hlu-läk gùi nawh a khúi suinák-ah a màwng ng’si u hleih a m’sàngnák bà gùi cuh, “Khãnpùghí-ah ghin-khàw ung ng’zih ng’thu ci-ah a màwng gùi cuh, nangmi nawh nami hmat lo tu hnging ci. A hei gùi läí nawh m’tu m’tängnák awn m’thei gùi ung teng u neh phih, kä hnguh ci gùi, ng’za tu láng u neh phih, a màwng kä hmat ci gùi.
Cun-ah a màwng gùi cuh, Khãnpù-ghí-ah k’chü-ah kia ci. Lam ng’lung ung ng’kiak ci cuh, Khãnpùghí-ah k’chü ng’za tu-düit ci-ah k’chàng gùi-ah kia ci. Kä mi zùm, kä mi phión èin hnging vai-ah, khaw-’nget nawh, ami m’lung ’kiòng-a kah, Khãnpùghí-ah k’chü a k’hlèh bà péit gùi àm a piéin-ah kia ci. Lung ung ng’kiak ci cuh Khãnpùghí-ah k’chü ng’za neh m’hni neh zùm ci-ah kia ci. Cun ung phih, a pià kä om ci-ah géit gùi-a hlo-ah, ami zùmnák kä khäng hleih zái-cãnák ami gah lo ung nong bà zop ci gùi àm a piéin-ah kia ci. Ng’Hlìng phùng hngù-a ka cuh, Khãn-pùghí -ah k’chü ami ng’zák lo ung khaw m’dek khãn-ah, khawh-tang, ngùi ghùi gùi, ami käü-ah zèi-kiàinák-a màwng gùi nawh m’oh m’htoh gùi hleih a vui pai kä hngin hlot ci-ah géit awn täng ci,” ci neh piéin-ah kia ci. Khaw ng’lei k’ní ung ng’kiak ci, ci cuh, ng’súng neh ng’khái ng’làng ci-ah m’lung awn, Khãnpùghí-ah k’chü ng’zák u nehtah säm chêng geng ci gùi-ah kia neh ni hleih ng’hlèp ci ah géit awn täng ci gùi, ci neh piéin-ah kia ci.”
