Chi-gà m’hni vai-ah màwng.
Cun tu pang-a phih, ka k’chü nami ng’ngài ci-ah, nangmi-àm ka piéin cuh, Nami chi-gà gùi m’hni vä. Ning ú gùi ci àm, a k’ní vai ci pe gùi vä. Ning plah-tang gùi ci gùi kavai a k’ní-ah k’tài-gü péit gùi vä. Hlè neh nami ng’ming m’séit ci gùi kavai k’tài-gü vä. Nami ng’bèing vang ning k’beh gùi ci-àm, vang täng phih cun bà-vä. Nami ng’vaih ning lák péit gùi ci-àm, nami k’htù phih kä m’choh èin vä. Ning sàng gùi ci-àm pe vä. Nami khawh ning gut gùi ci-ah, kä nami san-èin bà vai. Nangmi-àm ami ning ci péit gùi vai, nami ng’zák hlü-a hlo-ah, ngami-àm phih ci péit gùi vä. Ning m’hni gùi ci bäng nami m’hni-ung, a i ni-bänák om khai ang? Kat bi ci-ah k’chàng gùi hngo nawh m’hni gùi ci cun tah m’hni tu bà ci gùi. Ning ninák gùi ci bäng, nami ninák-ung, nangmi-ung a i ni-bänák om khai ang? k’Chàng kat-mah gùi hngo nawh a cun-cò tah ci ci gùi-ah mo. Ning thúng bà gùi khai-ah äp neh nami k’pu gùi-ung, nangmi-ah phäh-ah i-ah ng’hmat khai ang? A Cu k’chü mät-ah ami thúng bà vai cò tah, k’chàng kat-mah gùi hngo nawh, a cu k’chàng kat-mah gùi àm k’pu tu ci gùi-ah, kä Nanami gà gùi m’hni vä. A k’ní vai ci péit gùi vä. A i kä äp-èin neh k’pu tu vä. Nangmi kavai bä khai néi. Hlüng pí k’bäih ci ah htá-ah nami kia khai. Ani cuh, kä süm hmat neh se ci gùi-àm a k’ní vai ci péit gùi ci.
Chü m’gein ng’khái ng’làngnák. (Mt-7:1-5)
36 Cun-ah kia hleih nami Pá Khãnpù-ghí nawh a ning m’gein gùi-a hlo-ah, m’gein tu thei vä. 37 Kat k’bün neh kä m’cha m’lang-èin vä. Cun-ah nami ci-ung nangmi-àm phih kä ning k’bün gùi khai gùi. k’Chàng kä m’dí-èin vä. Cun-ah nami ci-ung, nangmí phih kä ning m’dí gùi khai gùi. M’Gein thei vä. Ning m’gein gùi khai gùi néi. 38 Peta tu vä. Ning pe tu bà gùi khai gùi néi. Nangmi kavai, a k’ní-ah det neh k’hngün neh pleip khai-ah k’hmüt neh ning pe lo gùi khai gùi. A i-ah kia hleih ci-ung, a hei gùi kavai-ah, nami nän-a hlo-ah, nangmi kavai phih, ci tu bà khai gùi.
