Nu Maria kat k’ka ah a ng’tui lo tu k’hngüp.
Khãnpùghí-ah Htá, Jesu Christù-ah zèi tu vai-ah k’chü a tünnák; Ce ng’sä Isaiah ung “Teng-ä, na lam piàng khai ah kei-ah ng’sä cuh, kei nawh na mà-ah ka tüih. ‘Báwi-ah lam cuh, piàng vä. Ani-ah lam, ng’súng khai-ah ci väci neh Hla-lái mà-ah m’lä m’khãng ci-ah k’chàng-ah k’áw néi,”ci neh ng’guk ci.
Tui k’phùm Johan nawh hla-lái-ah ng’dáng lo neh kat k’phión khai-ah, ng’zu nák bà-ah kia ci-ah, m’sinák-a màwng cuh, piéin hla neh om ci. Judea khaw púm lah, Jerusalem pigò-nú púm ung-kah k’chàng avan, ani-ah hteit u neh ami kat gùi cuh, m’dáng u neh Jordan tui nú ung ani-ah kut ung-kah, m’sinák gah ci gùi. Johan cuh, kala-uk-ah mu awn ami tah-ah hlui hlùi neh, a’chéi ung hlèi-vun awn ng’kháwn neh ng’zùng-’khám-peh lah, khawilù eì neh om ci. A piéin lo cuh, “Kei-a tah bä tu bà ci, ka hngú-ah lo ci. Ani-ah khaw pha-dawk-gùi düit hngo, kóp htá neh ka k’phián vai-ah kä ka chin ci. Kei nawh nangmi cuh, tui awn ka ning m’si gùi ci. Ani nawh Htí-théing ci-ah Muh awn ning m’si lo gùi khai.
Cun zah ung Jesu cuh, Galilee khaw, Nazareth pigò-ung-kah lut lo neh Jordan tui-nú-ah, Johan-ah kut-ung-kah tui k’phùmnák gah ci. Tui-ung-kah a k’tén ah lut lo bà hleih Khãmòpí ng’hmòng nehtah Muh-Hti, müm htá vai hlü-ah kia neh a ’khãn-ah, a ngoh hnguh ci. A cu vai-àm, “Sin, a ng’htéi-ah ka m’hni-ah ka Htá néi,” ci-ah, Khãnmòpí-a kah k’áw ng’zák ci. cun vai àm, Muh-Htí nawh ani cuh, Hla-lái mà-ah tüi ci. Hla-lái mà-ah, k’hngüp phlikip lah mü k’phlikip om hleih khaw-’nget nawh táwk ci. Chihlá gùi awn, a ät-ah om tu ci. Khãnhtapup gùi nawh phih, a ng’zák hlü bi pe ci gùi.
Johan ami chúm kon-ah, Jesu cuh, Galilee khàw-ah lo neh Khãnpùghí-ah zèi tu vai-ah k’chü k’ní a piéin lo cuh, K’Hngüp ng’kìüm lo pi ci. Khãnpùghí-ah khàw ng’et lo ci. Ng’Zu bà u neh zèi tu vai-ah k’chü zùm vä.
Galilee tui nú pèi-ah a hteh zah ung Simon lah a nàü Andrew, tui-nú ung ng’vài vòi ni hleih hnguh goi ci. Jesu nawh phih, “ka hngú-ah na läk nä. K’Chàng gùi pha’ci-ah, ka ning piàng goi khai,” ci ci. Ngani nawh a k’tén-ah ng’vài gùi nawng ghüt ni neh a hngú ah läk ci goi.
