Philip lah Nathanael chü goi ci.

A ngói-ung, Galilee khàw-ah a hteh lo vai-ung, Philip hnguh neh Jesu nawh ani- àm, “Na läk-ä,” ci ci. Philip cuh, Andrew lah Petru-ah pìgò, Bethsaida-a kah, lo ci-ah kia ci. Philip nawh Nathanael hnguh neh a piéin cuh, “Moses nawh m’cäinák-ung a guk, ce ng’sä gùi nawh phih, a màwng ami guk-ah k’chàng, Nazareth-ung-kah Joseph-ah htá Jesu kami hnguh ci,” ci ci. Nathanael nawh ani-àm piéin neh, “Nazareth-ung-kah a i a k’ní om hleih-ang?” Philip nawh piéin neh, “Lo neh teng lo tu-ä,” ci ci. Nathanael cuh, a mät-ah lo hleih Jesu nawh hnguh neh ani-ah màwng cuh, piéin neh, “Hlè-hlaknák nawh a pí-a phih kä kohnák-ah Israel k’chàng k’càng cuh, teng vä,” ci ci. Nathanael nawh phih, “A i-ho k’chà-ah nà na hmat ci-ang?” ci hleih Jesu nawh, “Philip nawh kä níng chü pha hleih ng’bãng ghing-’kã-ah ngoh ci hleih ka ning hnguh ci,” ci neh ani-àm piéin ci. Nathanael nawh, “Rabbi-aw, Khãnpùghí-ah htá-ah na kia ci. Israel Sangpùghang-ah na kia ci,” ci neh piéin bà ci. Jesu nawh ani-àm a piéin lo bà cuh, “Ng’Bãng ghing k’kã-ah ka ning hnguh ci, ka ci-ah phäh-ah, nà na zùm ci. Cun-a tah, bä tu bà ci gùi na hnguh lo khai.” Ani-àm piéin bà mä neh, “Nangmí-àm a k’càng-ah ka piéin cuh, Khãnmòpí ng’hmòng hleih k’chàng-ah htá-a pèi zung púm-ah, Khãn-htapup gùi kium neh kài neh ami kia, nami hnguh lo khai.”