Bä ca Clare

Bä ca Clare cuh Kum (1199) ung ng’tuiom lo tu ca ng’lamithein tumat ah kya ci. Poor Clare ci ah ng’htawi m’duh ca Bä ca Clare cuh Assi ung ang’mangk’chàng congkhui ung ah ng’tui lo ci.

Akho kum (19) ung Bä ca Francis ah kyünhlawi  on ng’khinng’khong ca m’cäm’ä yum aik ne-ta ani cuh Poticula ah amät noh amät Boiyesu-am a ap vai ng’thup neh hteih ci.

Hluihlak ani gui nonghüt neh aluhla neh kyom ci phih at pit neh akya k’on nah Francis noh hluishe pek neh Pastia Go-Nu ung om ca Benedictine Maamah Cong ah ak’tha. Anu be, aphänau tu noh khaih ba pui vai neh lo u chü ta Phayakyak veng neh “ Jesu m’lung thein pi kon ah ahei ka ce kä om ci’’ ci ci.

Ng’hlawing’hlak lo chü ta ahei ng’lami gui awng atäng ah Maamah ng’htawi ak’thai tumat Bä ca Damiano cong pe ah m’duh ci gui. Poor Clare ci ah ak’da noh ami hmat ah ng’htawi cuh dukhai nak lah akya ah ng’yung’yawng thuihlei nak bi ci gui. Nga mi cuh khodoh kä leh ah hteihhtawng nak. K’hngüp tä Taigü suh shan nak ung eihlawin nak gui bi u neh m’hni ah phäh bäng ah ng’hta ci gui.

Kum (1228) ung Papa Shangpughang Garegory (9) nak noh thein-e-hma ca Dukhaih lam ung ka noh m’hloh ci ta “ Kei cuh ka kat ung ah ka phyong vai hlu ci te, Boiyesu noh hngu lak nak ung ka noh ka phyong vai kä hlu ci”, ci ah m’shan ba ci.

A cun ah kya ci ta ngami am Privetecium Paperitates pe ghüt ci. Kum (1224) kum ung Fatis(2) Kyaakap cuh Assi Go-Nu m’di vai neh lo ci. Bä ca Clare noh Bä ca Sacramentu koh neh hteih ci. Acun ung ak’ten ah akyükyoh she noh khikya gui cuh k’pang gui ci.

A cun ah kya lo hleih Go-Nu kyong om au phih I ah kä ci hloh neh dong ba ci gui. Kum (1253) ung ashih lo hta vai ung Clare noh “ ka ana tuihmüt ah phäh ah khànpughü ung Bäkhäh nak om hlä” ci ah pyein shuh ci.