K’Chàng séit-kat hlak ci-ah màwng gùi
Cun kon-ah Jerusalem-a kah Pharisee gùi lah k’chü m’cäi k’süm gùi nawh Jesu lo sí u nehtah “Cáü Pù Pá gùi-ah bi-loh hloihlak gùi màn (Thum)cuh na-hlu-läk gùi nawh i-ah kia hleih kä läk ci gùi ang? I-ah kia hleih ci ung ami kut kä m’si-ah ei, èi ci gùi,” ci neh ami ng’si.
Cun kon-ah, k’chàng gùi a pèi-ah chü gùi nehtah nangmí nawh ’ngài neh hmat-vä. Käü ’kiong-ah lut ci nawh k’chàng séit hlak ci-ah kä kia ci. Käü ’kiong-a kah lut lo ci nawhvah, k’chàng m’séit m’kat ci, ci neh piéin ci.
A k’chàng gùi nawh k’et u neh “Tuh-bäih na piéin-ah k’chü càn, Pharisee gùi nawh ng’zák u neh ami m’lung k’sé na hmat ci ang” ci neh ng’si ci gùi. Ani nawh phih, “Khãnmòpí-ah om ci-ah ka Pá Khãnpùghí nawh kä géit-ah a phùng ghing päng ka moi lo zop khai. Cun-ah k’chàng gùi cuh, ami om-ah om u hlä. Ngami cuh, a m’dah gùi àm lam m’süm ci-ah, k’chàng m’dah gùi-ah kia ci gùi. A m’dah goi hngá hngá tumat nawh tumat ani m’süm tu-kiu ung ani-ni k’hngih ghãng m’ghok-ung lut khai goi,” ci ci.
